ᓄᓇᕗᒻᒥ ᓯᕗᓕᖅᑎ ᔮᓐ ᒪᐃᓐ ᐅᓪᓗᒥ ᓴᖅᑭᑦᑎᖅᑲᐅᕗᖅ ᐅᑯᓂᖓ ᐅᖃᐅᓯᒃᓴᓂᒃ:
"ᑕᒪᑐᒪᓂ ᐱᓇᓱᐊᕈᓯᕐᒥ, ᑲᑎᖃᑎᒋᓚᐅᖅᐸᒃᑲ ᐅᑭᐅᖅᑕᖅᑐᒥ ᓯᕗᓕᖅᑎᐅᖃᑎᒃᑲ ᐅᑭᐅᖅᑕᖅᑐᒥ ᓯᕗᓕᖅᑏᑦ ᑲᑎᒪᑎᓪᓗᒋᑦ ᕼᐊᐃ ᕆᕗ, ᓄᓇᑦᑎᐊᒥ, ᐅᖃᐅᓯᖃᖅᖢᑕ ᑕᒪᐃᓐᓄᑦ ᐱᓕᕆᐊᒃᑯᒥᒋᔭᑦᑎᓐᓂᒃ, ᐱᕕᒃᓴᓂᒃ ᐊᒻᒪ ᐃᓱᒫᓘᑎᑦᑎᓐᓂᒃ. ᑖᒃᑯᐊ ᐱᖓᓱᑦ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᑦ ᐊᔾᔨᒌᐸᓗᒃᐳᑦ ᖃᓄᑐᐃᓐᓇᑦᑎᐊᖅ, ᐊᒃᑐᐊᓂᕆᔭᕗᓪᓗ ᓴᙱᔫᓪᓗᓂ, ᑕᒪᑦᑕᓗ ᑐᕌᕆᔭᖃᖅᐳᒍᑦ ᐅᑭᐅᖅᑕᖅᑐᒥ ᐊᕕᒃᓯᒪᓂᕗᑦ ᐃᓂᑦᑎᐊᕙᐅᓂᖅᓴᐅᖁᓪᓗᒍ ᑕᒪᐃᓐᓄᑦᑎᐊᖅ ᓄᓇᓕᖕᒥᐅᓄᑦ.
ᓄᓇᕗᒻᒧᑦ, ᐃᑲᔪᖅᑎᒌᒃᑕ ᑎᓕᔭᐅᓯᒪᔾᔪᑎᖓ ᑐᕌᒐᖃᖅᐳᖅ ᑕᒪᓐᓇ ᑲᔪᓯᒐᓗᐊᕐᒪᖔᑦ.
ᒫᓐᓇᐅᑎᓪᓗᒍ ᑕᑯᕙᓪᓕᐊᑎᓪᓗᑕ ᐅᔾᔨᕆᔭᐅᓕᖅᐸᓪᓕᐊᔪᓂᒃ ᑮᓇᐅᔭᓕᐅᕈᑕᐅᕙᓪᓕᐊᔪᓂᒡᓗ ᓄᓇᕗᒻᒧᑦ ᒐᕙᒪᑐᖃᒃᑯᓐᓂᑦ, ᐱᒻᒪᕆᐊᓘᕗᖅ ᐱᓕᕆᖃᑎᒋᕙᒃᑕᕗᑦ ᑐᑭᓯᐅᒪᓗᑎᒃ ᑲᓇᑕᒥ−ᐋᖅᑭᒃᓱᐃᕙᓪᓕᐊᓂᖅ ᓄᓇᕗᒻᒥᐅᓄᑦ ᐃᒪᓐᓇ ᑐᑭᖃᖅᐳᖅ, ᓴᖅᑭᑎᑦᑎᓂᕐᒥᒃ ᓇᓕᒧᒌᒃᑎᑦᑎᓂᕐᒥᒃ ᐱᕕᒃᓴᓂᒃ, ᐊᑐᕈᓐᓇᕐᓂᕐᒥᒃ ᐊᑐᖅᑕᐅᔭᕆᐊᖃᓪᓚᕆᒃᐸᒃᑐᓂᒡᓗ. ᓄᓇᕗᑦ ᒐᕙᒪᖓ ᑐᙵᓱᒃᑎᑦᑎᕗᖅ ᐱᓕᕆᐊᖑᕙᓪᓕᐊᔪᒪᔪᓂᒃ ᐊᖏᔪᓄᑦ ᐱᓕᕆᐊᒃᓴᓄᑦ, ᒪᕐᕉᖕᓄᑦ ᐊᑐᖅᑕᐅᔪᓐᓇᖅᑐᓄᑦ ᖃᔅᓯᑲᓪᓚᖕᓄᓪᓗ ᐱᔾᔪᑎᖃᕐᓗᓂ ᓴᐳᔾᔨᓯᒪᓂᕐᒧᑦ ᓇᑉᐸᖅᑎᖅᑕᐅᓯᒪᔪᓂᒃ. ᑕᐃᒪᐃᒃᑲᓗᐊᖅᑎᓪᓗᒍ, ᑕᒪᒃᑯᐊ ᑮᓇᐅᔭᓕᐅᕈᑕᐅᓇᓱᒃᑐᑦ ᐊᑕᐅᑦᑎᒃᑰᖃᑎᖃᕆᐊᖃᖅᐳᑦ ᖄᒃᑲᓐᓂᐊᒍᑦ ᑮᓇᐅᔭᓕᐅᕈᑕᐅᓇᓱᒃᑐᓂᒃ ᓄᓇᓕᕗᑦ ᐊᖑᒻᒪᑎᓕᖁᓪᓗᒋᑦ ᑲᓇᑕᓕᒫᒥ ᐃᓅᓯᕆᔭᐅᔪᓄᑦ.
"ᖃᐅᔨᒪᐃᓐᓇᐅᔭᖅᑕᕋ ᓄᓇᕗᒻᒥᐅᑦ ᖃᓄᐃᙱᑦᑎᐊᕌᖓᑕ ᐃᓚᐅᑦᑎᐊᕌᖓᑕᓗ, ᓄᓇᓕᕗᑦ ᐱᕚᓪᓕᕈᓐᓇᕐᓂᖏᓐᓂᒃ." ᑖᓐᓇ ᐱᓪᓗᐊᑕᐅᕗᖅ ᐅᑭᐅᖅᑕᖅᑐᖅ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᓇᖕᒥᓂᖃᕐᓂᕐᒧᓪᓗ − ᓄᓇᓕᓕᒫᑦ ᐃᓚᐅᑎᑕᐅᔭᕆᐊᖃᖅᐳᑦ ᐱᕚᓪᓕᕈᑎᖃᕐᓗᑎᒡᓗ ᑮᓇᐅᔭᓕᐅᕈᑕᐅᓇᓱᒃᑐᓂᑦ ᐅᑭᐅᖅᑕᖅᑐᒥᑦ.
ᑲᔪᖏᖅᓴᖅᑕᐅᑦᑎᐊᖅᐳᖓ ᐃᑲᔪᖅᓱᖅᑕᐅᓂᑦᑎᓐᓄᑦ ᓄᓇᕘᒥ ᐱᓕᕆᖃᑎᒋᕙᒃᑕᓐᓄᑦ, ᐅᖃᖃᑎᒌᑦᑎᐊᖃᑦᑕᖅᓯᒪᓪᓗᑕᓗ ᐃᓕᑦᑎᖃᑦᑕᐅᑎᓪᓗᑕᓗ. ᐆᒻᒪᑎᒃᑯᑦ ᖁᔭᓐᓇᒦᕈᒪᕙᕋ ᓯᕗᓕᖅᑎ ᐊᐅ ᔭᐃ ᓯᒻᓴᓐ ᑐᙵᓱᒃᑎᑦᑎᓚᐅᕐᓂᖓᓄᑦ ᐊᒻᒪ ᑲᑦᓚ ᐅᑎᐃ ᓄᓇᖃᖅᑳᖅᓯᒪᔪᓄᑦ ᑐᙵᓱᒃᑎᑦᑎᓚᐅᕐᓂᖏᓐᓄᑦ ᓄᓇᖓᓄᑦ. ᓂᕆᐅᒃᐳᖓ ᑐᙵᓱᒃᑎᑦᑎᓛᕆᐊᒃᓴᖅ ᐊᕐᕌᒎᓛᖅᑐᒥ ᐅᑭᐅᖅᑕᖅᑐᒥ ᓯᕗᓕᖅᑏᑦ ᑲᑎᒪᓂᖓᓂ ᓄᓇᕗᒻᒥ."