Nunavutim Hivuliqtia John Main ublumi tuhaqtitaa una uqautaa:
"Uumani havainirmi, katimaqatigijatka avikturniinni havaqatitka talvani Ukiuqtaqtumi Hivuliqtit Katimavianni Hay River-mi, Nunatsiami, uqautigiplugit tamarmik pijumajavut, pidjutikhat ihumaluutigijavullu. Pingahut avikturniituni aadjikkutavjait amigaittuni qanurittuni, katidjutivut hakugiktut, tamapta tikinnahuaqtakhavut avikturnivut nakuutqijauliriangani tamainut nunaqaqtunut.
Nunavunmut, pivut Ikajuqtigiikta pitqujaujut turaaqhimajut pijaangini tapkua havaktaujut.
Tadja takuliqtugut amigaigjuumijunik ihumagijaujunik imaalu maniliurutikhanik Nunavunmi tapkunanga kavamatuqatkunit, anginiqaqtuq paanarijavut kangiqhimajukhat tamna nunarjuami-piliurniq Nunavummiunut tukiqaqtuq piliurnirmik aadjikkiiktunik uukturvikhanik, pivikhanik imaalu ihariagijaujunik. Nunavut Kavamangit tunngahuktitijut hanaqidjutikharnik talvuuna Angijunik Havaaqhangit, malrungnik atuqtaujukharnik amigaituniklu atuqtakharnik munagidjutikharnik igluqpangnik. Kihimi, tapkua maniliurutit havaktaujukhat atautikkut ilaliutihimajut maniliurutit tapkua pidjutigijait nunallaavut aadjikiiliqlugit nunarjuami atugakhat inuuhiinun.
"Ilihimaraanginnaqtara taimaa Nunavunmiut aanniarnaittumik ilauvakhutiklu, nunallaavut nauvalliavaktut. Una akhuurutaujuq Ukiuqtaqtumut munarininnga aulapkaininngalu - tamaita nunallaavut ilaujukhat ikajuqtaulutiklu maniliurninnganit Ukiuqtaqtumi.
Akhuuqhaqtaujunga ikajuutainnit avikturniinni havaqatigijamnit, nakuukpiaktumik uqautigivaktavut ajuiqpalliavakhutalu avatingnut. Uumatimnin qujagijumajara Hivuliqti R.J. Simpson tun'ngahuktittingmat Kátł'odeeche First Nation tun'ngahuktittingmatta nunaptingnut. Niriuktunga katimapkailunga aipaagu Ukiuqtaqtumi Hivuliqtit Katimaqjuarutaanun Nunavunmi."