ᓄᓇᕗᑦ ᒐᕙᒪᖓᑦ ᐊᒻᒪᓗ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᑦ (NEU) ᐊᑎᓕᐅᖅᐳᑦ ᓄᑖᒥᒃ ᐃᖅᑲᓇᐃᔭᖅᑎᓄᑦ ᐊᖏᖃᑎᒌᒍᑎᒥᒃ.
ᓄᑖᖅ ᐊᖏᖃᑎᒌᒍᑎ, ᐊᑐᕐᓂᐊᖅᑐᖅ ᐅᑐᐱᕆ 1, 2024−ᒥᑦ, ᓯᑎᐱᕆ 30, 2028−ᒧᑦ, ᐋᔩᖃᑎᒌᖕᓂᒃᑯᑦ ᐱᒋᐊᓚᐅᖅᑐᖅ ᐅᑭᐊᒃᓵᒃᑯᑦ 2024-ᒥᑦ.
"ᓯᕗᓪᓕᐅᑎᔪᒪᔭᕗᑦ ᑲᔪᓯᑎᑦᑎᔪᒪᓪᓗᑕ ᐊᑐᖅᑕᐅᓪᓚᕆᒋᐊᓕᖕᓂᒃ ᐱᔨᑦᑎᕋᐅᑎᓂᒃ ᓄᓇᕗᒻᒥᐅᓄᑦ ᐃᑲᔪᖅᑐᐃᓗᑕᓗ ᓴᙱᔪᓂᒃ ᐱᓕᕆᓪᓚᕆᒍᒪᔪᓂᓪᓗ ᐃᖅᑲᓇᐃᔭᖅᑎᓂᒃ," ᐅᖃᖅᑐᖅ ᒥᓂᔅᑕ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᐋᓂ ᑕᑦᑐᐃᓂ. "ᑖᓐᓇ ᐊᖏᖃᑎᒌᒍᑎ ᑕᑯᒃᓴᐅᑎᑦᑎᕗᖅ ᐊᔾᔨᒌᒃᑐᒥᒃ ᐊᑐᖅᑕᐅᓇᔭᖅᑐᒥᒃ ᓴᙱᒃᑎᒋᐊᖅᑎᑦᑎᓪᓗᓂᓗ ᑐᑭᓯᐅᒪᖃᑎᒌᖕᓂᕐᒥᒃ, ᐱᕕᒃᓴᖃᖅᑎᑦᑎᓪᓗᓂ ᐅᕙᑦᑎᓐᓂᒃ ᓯᕗᒻᒧᐊᒃᑎᑦᑎᓂᕐᒥᒃ ᓄᓇᕗᑦ ᒐᕙᒪᖓᑕ ᐱᔭᒃᓴᕆᔭᖏᓐᓂᒃ ᖁᓱᙱᓪᓗᑕ."
"ᐅᒃᐱᕈᓱᒃᐳᒍᑦ ᓄᑖᖅ ᐃᖅᑲᓇᐃᔭᖅᑎᓄᑦ ᐊᖏᖃᑎᒌᒍᑎ ᒪᓂᒪᑎᑦᑎᓂᐊᕐᒪᑦ ᐋᖅᑭᒋᐊᕈᑎᒃᓴᑦᑎᐊᕙᖕᓂᒃ ᐃᑲᔫᑎᓂᓪᓗ ᓄᓇᕗᑦ ᒐᕙᒪᖓᓂ ᐃᖅᑲᓇᐃᔭᖅᑎᓄᑦ," ᐅᖃᖅᑐᖅ ᔭᐃᓴᓐ ᕌᑲᓐ, ᐊᖓᔪᖅᑳᖅ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ. "ᖁᔭᓕᔪᒪᕙᒃᑲ ᐋᔩᖃᑎᒌᒃᑎᕗᑦ ᑕᒪᕐᒥᑦᑎᐊᕐᓗ ᓄᓇᕗᒻᒥ ᐃᖅᑲᓇᐃᔭᖅᑎᑦ ᑲᑐᔾᔨᖃᑎᒌᓄᑦ ᐃᓚᒋᔭᐅᔪᑦ ᐃᑲᔪᖅᑐᐃᓂᖏᓐᓄᑦ ᐃᓚᐅᓪᓗᑎᒡᓗ ᐱᓕᕆᐊᖑᓂᓕᒫᖓᓂ."
ᐊᑎᓕᐅᖅᑕᐅᓂᖓ ᓄᑖᖅ ᐃᖅᑲᓇᐃᔭᖅᑎᓄᑦ ᐊᖏᖃᑎᒌᒍᑎ ᓯᕗᒻᒧᐊᒍᑕᐅᕗᖅ ᑲᑐᔾᔨᖃᑎᒌᒃᑲᓐᓂᕐᓂᕐᒧᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᓄᓇᕗᒻᒥ ᐃᖅᑲᓇᐃᔭᖅᑏᑦ ᑲᑐᔾᔨᖃᑎᒌᖏᓐᓄᑦ. ᓴᙱᒃᑎᒋᐊᖅᑎᑦᑎᒃᑲᓐᓂᖅᖢᓂ ᐊᖏᖅᓯᒪᓂᖏᓐᓂᒃ ᐱᓕᕆᖃᑕᐅᔪᓕᒫᑦ ᐱᔨᑦᑎᕋᑦᑎᐊᕈᒪᓪᓗᑎᒃ ᓄᓇᕗᒥᐅᓄᑦ.