ᐃᖃᓗᐃᑦ, ᓄᓇᕗᑦ (ᐊᑦᑑᕝᕙ 15, 2026) − ᓄᓇᕗᒻᒥ ᐱᓕᕆᖃᑎᒌᑦ ᑲᑎᒪᔨᕋᓛᖏᑦ − ᓯᕗᓕᖅᑎᑦ ᑲᑎᒪᔨᖏᑦ ᓄᓇᕗᑦ ᒐᕙᒪᖓᓐᓂ (GN) ᐊᒻᒪᓗ ᑲᑎᒪᔨᖏᑦ ᓄᓇᕗᑦ ᑐᙵᕕᒃᑯᑦ ᑎᒥᖓᑕ (NTI) − ᑲᑎᒪᖅᑲᐅᒻᒪᑕ ᑎᓴᒻᒥᕐᒥ ᐅᖃᐅᓯᖃᖅᑐᑎᑦ ᐱᕙᓪᓕᐊᓂᐅᓯᒪᓕᖅᑐᓂᑦ ᑖᒃᑯᓇᓂ ᑲᑐᔾᔨᓂᒃᑯᑦ ᓯᕗᓪᓕᐅᑎᓯᒪᔭᖏᑦ ᐊᒻᒪᓗ ᐸᕐᓇᐅᑎᓕᐅᕐᓗᑎᑦ ᑭᖑᓂᐊᒍᑦ ᐱᓕᕆᐊᖑᓂᐊᖅᑐᓂᑦ.
ᑖᓐᓇ ᐱᓕᕆᖃᑎᒌᓐᓂᐅᔪᖅ ᐱᒋᐊᖅᑎᑕᐅᓯᒪᔪᖅ ᒫᑦᓯ 2022-ᖑᑎᓪᓗᒍ ᐊᒻᒪᓗ ᓄᑖᕈᕆᐊᖅᑕᐅᓯᒪᓪᓗᓂ ᑏᓰᕝᕙ 2025-ᖑᑎᓪᓗᒍ, ᓄᑖᒥᑦ ᒐᕙᒪᑖᓚᐅᖅᑎᓪᓗᒋᑦ, ᐊᒻᒪᓗ ᑕᕝᕙᓂ ᐱᓇᓱᐊᕈᓯᕐᒥᑦ ᑲᑎᒪᓂᐅᔪᖅ ᓯᕗᓪᓕᖅᐹᖑᓯᒪᔪᖅ ᑖᒃᑯᓄᖓ ᐃᓚᒋᔭᐅᓕᑕᐃᓐᓇᖅᑐᓄᑦ ᓂᕈᐊᖅᑕᐅᓯᒪᔪᕗᑦ ᓯᕗᓕᖅᑎᐅᔪᓄᑦ ᓯᕗᓪᓕᖅᐸᐅᓚᐅᖅᑐᒥᓂᒃ. ᐱᓕᕆᐊᖃᒌ ᑖᒃᑯᐊ ᐱᔾᔪᑎᖃᓂᕐᒧᑦ−ᐊᐅᓚᓂᖃᖅᑐᑦ, ᑐᕌᒐᖃᖅᑐᑦ ᑐᑭᖃᑦᑎᐊᖅᑐᒥᒃ ᐱᕙᓪᓕᐊᓂᖃᖁᔨᓪᓗᑎᑦ ᓯᕗᓪᓕᐅᑎᓯᒪᔭᖏᓐᓂᒃ ᐅᖃᐅᓯᐅᓯᒪᔪᑦ ᓄᓇᕗᑦ ᒐᕙᒪᒃᑯᑦ ᐃᑲᔪᖅᑎᒌᒃᑕ ᐱᓕᕆᐊᔅᓴᓄᑦ ᑐᕌᒐᖓᓐᓂᒃ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᑎᒥᖓᑕ ᐃᓄᖕᓂᒃ ᒪᑭᑉᐸᓪᓕᐊᑎᑦᑎᓂᖅ ᑐᕌᒐᕆᔭᖓᓐᓂᒃ.
“ᑕᐃᒪᙵᓂᒃ ᐱᓕᕆᖃᑎᒌᓐᓂᐅᔪᖅ ᐱᒋᐊᖅᑎᑕᐅᓚᐅᖅᑎᓪᓗᒍ, ᐱᕙᓪᓕᐊᖅᑎᑦᑎᓯᒪᓕᖅᑐᒍᑦ ᐱᒻᒪᕆᐅᔪᓂᑦ ᓯᕗᓪᓕᐅᑎᓯᒪᔭᑎᓐᓂᒃ. ᖃᐅᔨᓯᒪᓕᖅᑐᒍᑦᑕᐅᖅ ᑖᓐᓇ ᐱᓕᕆᖃᑎᒌᓐᓂᐅᔪᖅ ᑲᔪᓰᓐᓇᕈᑎᒋᔭᕆᐊᖃᕐᒪᑦ ᐱᓕᕆᐊᖑᓂᖓᑕ, ᐊᒻᒪᓗ ᒪᑐᐃᖓᓂᒃᑯᑦ ᑐᓴᐅᒪᖃᑦᑕᐅᑎᓂᖃᕐᓗᑕ ᐱᔪᒪᓂᖃᑦᑎᐊᕐᓂᒃᑯᓪᓗ ᐱᔭᕆᐊᑐᔪᑎᒍᑦ ᑲᑐᔾᔨᓗᑕ,” ᐅᖃᖅᑐᖅ ᓯᕗᓕᖅᑎ ᔮᓐ ᒪᐃᓐ. “ᓄᓇᕗᒻᒥᐅᑦ ᐅᕙᑦᑎᓐᓂᒃ ᓂᕆᐅᒻᒪᑕ ᐱᓕᕆᖃᑎᒌᖁᔨᓪᓗᑎᑦ, ᐊᒻᒪᓗ ᐊᖏᖅᓯᒪᔪᒍᑦ ᐱᓕᕆᖃᑎᒌᒍᒪᓪᓗᑕ ᐃᑲᔪᖅᑕᐅᑦᑐᐊᖁᓪᓗᒋᑦ ᐃᓄᐃᑦ ᓄᓇᕗᒻᒥᐅᑦ.”
“ᓄᓇᕗᑦ ᑐᙵᕕᒃᑯᖅ ᑎᒥᖓᓗ ᑖᒃᑯᐊᓗ ᓄᓇᕗᑦ ᒐᕙᒪᒃᑯᑦ ᐊᔾᔨᒌᙱᑦᑐᓂᒃ ᑲᒪᒋᔭᔅᓴᖃᕐᒪᑕ, ᑭᓯᐊᓂ ᑲᑐᔾᔨᓂᒃᑯᑦ ᐊᖏᖅᓯᒪᒐᑦᑕ ᐱᐅᓯᕚᓪᓕᖅᑎᑦᑎᓂᕐᒧᑦ ᐃᓄᐃᑦ ᐃᓅᓯᖏᓐᓂᑦ,” ᐅᖃᖅᑐᖅ ᒍᓗᐊᕆᐊ ᐅᓗᖅᓯ, ᐊᖓᔪᖅᑳᖓ ᓄᓇᕗᑦ ᑐᙵᕕᒃᑯᖅ ᑎᒥᖓᑕ. “ᑖᓐᓇ ᐱᓕᕆᖃᑎᒌᓐᓂᕆᔭᕗᑦ ᑐᕌᖓᖁᔭᕋ ᐱᓕᕆᐊᖑᓯᒪᔪᓂᑦ ᓴᖅᑭᑦᑎᔾᔪᑕᐅᖁᓪᓗᒍ ᐱᔭᕆᐊᑭᑦᑐᒃᑯᑦ ᐃᓄᐃᑦ ᑕᑯᔪᓐᓇᕐᓂᐊᕐᒪᑕ ᓄᓇᓕᖏᓐᓂᑦ. ᐃᓪᓗᓕᕆᒍᑦᑕ, ᐃᓄᒃᑐᑦ ᐃᓕᓂᐊᕐᓂᓕᕆᒍᑦᑕ, ᐅᕝᕙᓘᓐᓃᑦ ᐱᕕᔅᓴᖅᑖᖅᑎᑦᑎᓂᕐᒧᑦ ᐃᓄᓐᓂᑦ, ᐱᓕᕆᖃᑎᒌᒋᐊᖃᖅᑐᒍᑦ ᐊᒻᒪᓗ ᑲᔪᓯᑎᑦᑎᓗᑕ ᐊᖏᖅᓯᒪᒍᑎᒋᔭᑦᑎᓐᓂᒃ. ᐊᒻᒪᓗᑦᑕᐅᖅ ᐃᓄᓐᓄᑦ ᐅᖃᐅᔾᔨᔭᕆᐊᖃᕋᑦᑕ ᖃᓄᐃᑦᑐᓂᒃ ᐱᓕᕆᖃᖅᓯᒪᓕᕐᒪᖔᑕ ᐊᒻᒪᓗ ᐱᓕᕆᐊᔅᓴᖃᕋᑦᑕ ᓱᓕ.”
ᑲᑎᒪᔨᕋᓛᑦ ᑖᒃᑯᐊ ᐃᓕᓴᖅᓯᓯᒪᔪᑦ ᐱᕙᓪᓕᐊᓂᐅᓯᒪᓂᑦ, ᐊᖏᖅᓯᒪᓂᖏᓐᓂᒃ ᐱᓕᕆᐊᖑᔭᕆᐊᓕᓐᓂᑦ ᓴᙵᑦᑎᒋᐊᕈᑕᐅᓗᓂ ᐱᓕᕆᖃᑎᒌᓐᓂᐅᔪᖅ ᐊᒻᒪᓗ ᑲᔪᓯᑎᑕᐅᔪᓐᓇᕐᓂᖏᑦ ᓄᑖᕐᒥᑦ ᐱᓕᕆᒍᑕᐅᓗᓂ ᑐᕌᒐᕆᔭᐅᔪᓄᑦ ᖃᓄᐃᓕᐅᕈᑕᐅᔭᕆᐊᓕᓐᓄᑦ.