ᐊᕐᕕᐊᑦ, ᓄᓇᕗᑦ (ᔪᓚᐃ 7, 2026) – ᐅᓪᓗᒥ ᒫᓂᑑᐸᒃᑯᑦ ᒐᕙᒪᖓ ᐊᒻᒪᓗ ᓄᓇᕗᑦ ᒐᕙᒪᖓ ᐊᑎᓕᐅᖅᑑᒃ ᑎᑎᕋᖅᓯᒪᔪᑦ ᑐᑭᓯᐅᒪᖃᑎᒌᒍᑎᒥᒃ (MOU) ᓴᙵᑦᑎᑦᑎᒋᐊᕈᑕᐅᓂᐊᖅᑐᖅ ᑲᑐᔾᔨᖃᑎᒌᓐᓂᕆᕙᑦᑕᖏᓐᓂᒃ, ᐱᓕᕆᖃᑎᒌᓐᓂᕆᕙᑦᑕᖏᓐᓂᒃ, ᐊᒻᒪᓗ ᓯᕗᓂᔅᓴᒥᑦ ᐱᕙᓪᓕᐊᓂᑎᑕᐅᔪᒫᖅᑐᓄᑦ.
ᑖᓐᓇ ᑎᑎᕋᖅᓯᒪᔪᑦ ᑐᑭᐅᒪᖃᑎᒌᒍᑎᖓ ᐊᑎᓕᐅᖅᑕᐅᖅᑲᐅᔪᖅ ᐊᕐᕕᐊᓂ ᒪᓕᒐᓕᐅᖅᑎ ᐅᐊᑉ ᑭᓂᐅ, ᒫᓂᑑᐸᒥ ᓯᕗᓕᖅᑎ, ᐊᒻᒪᓗ ᒪᓕᒐᓕᐅᖅᑎ ᔮᓐ ᒪᐃᓐ, ᓄᓇᕗᒥ ᓯᕗᓕᖅᑎ.
ᓄᓇᖏᒃ ᓴᓂᓕᕆᖑᒪᑎᒃ ᑖᒃᑯᓂᖓᔅᓴᐃᓐᓇᕐᓗᓂ ᐱᔭᕆᐊᑐᔪᖅᓯᐅᖃᑦᑕᖅᑑᒃ ᐊᔾᔨᒌᓂᒃ, ᒫᓂᑑᐸᓗ ᓄᓇᕗᓪᓗ ᐱᓕᕆᖃᑎᒌᓐᓂᐊᖅᑑᒥᒃ ᓯᕗᒧᐊᑦᑎᑕᐅᒋᐊᖁᓪᓗᒋᒃ ᓄᓇᖃᖅᑳᖅᓯᒪᔪᓄᑦ−ᐊᐅᓚᑕᐅᔪᓂᑦ ᐱᕙᓪᓕᐊᑎᑦᑎᓂᕐᒧᑦ, ᓴᙵᑦᑎᒋᐊᖅᑎᑦᑎᓂᕐᒧᑦ ᐅᑭᐅᖅᑕᖅᑐᒥᑦ ᐊᐅᓚᔪᓐᓇᐅᑎᖏᑦ ᐊᒻᒪᓗ ᐱᕕᔅᓴᖅᑖᖅᑎᑕᐅᒃᑲᓐᓂᖁᓪᓗᒋᒃ ᑕᒪᒃᑮᓐᓂᒃ ᒐᕙᒪᖃᕐᕕᐅᔫᓐᓂᒃ.
ᑖᓐᓇ ᑎᑎᕋᖅᓯᒪᔪᑦ ᑐᑭᓯᐅᒪᖃᑎᒌᒍᑎᖓ ᐊᖏᕈᑎᖃᖅᑎᑦᑎᔪᖅ ᑖᒃᑯᓂᖓ ᒪᕐᕉᓐᓂᒃ ᒐᕙᒪᐅᔫᓐᓂᒃ ᑲᑐᔾᔨᖃᑎᒌᖏᓐᓇᕐᓂᐊᕐᒪᑎᒃ, ᑐᑭᓯᓯᒪᔾᔪᑎᔅᓴᓂᑦ ᑐᓴᐅᒪᑎᑦᑎᖃᑦᑕᐅᑎᓗᑎᒃ ᐊᒻᒪᓗ ᐸᕐᓇᐅᑎᖃᑎᒌᓪᓗᑎᒃ ᑖᒃᑯᓇᓂ ᐱᖓᓲᔪᖅᑐᓂᑦ ᓯᕗᓪᓕᐅᑎᑕᐅᔭᐅᓯᒪᔪᓂᑦ, ᐱᖃᓯᐅᑎᓪᓗᒍ ᐅᑭᐅᖅᑕᖅᑐ ᓴᐳᔾᔭᐅᓯᒪᓂᖓᑕ ᐊᒻᒪᓗ ᓄᒻᒥᓂᖃᕐᓂᕆᔭᖓᓐᓄᑦ, ᑮᓇᐅᔭᓕᐅᕋᓱᐊᕐᓂᒃᑯᑦ ᐱᕈᖅᐸᓪᓕᐊᑎᑦᑎᓂᕐᒥᑦ, ᐃᓕᓐᓂᐊᕐᓂᓕᕆᓂᕐᒥᑦ ᐊᒻᒪᓗ ᐋᓐᓂᐊᖃᕐᓇᖏᑦᑐᓕᕆᓂᕐᒥᑦ.
ᑖᒃᑯᐊ ᒪᕐᕉᒃ ᒐᕙᒪᐅᔫᒃ ᕿᒥᕐᕈᓂᐊᖅᑑᒃ ᐊᐅᓚᑕᒥᑎᒍᑦ ᑮᓇᐅᔭᖃᖅᑎᑦᑎᓂᒃᑯᑦ ᑕᐅᖅᓰᖃᑎᒌᓐᓂᕐᒧᑦ ᐊᖅᑯᑎᖃᖅᑎᑦᑎᓂᕐᒥᑦ, ᐃᖏᕐᕋᔪᓕᕆᓂᕐᒥᑦ ᐊᒻᒪᓗ ᑐᓚᑦᑕᕐᕕᖏᓐᓂᒃ ᓄᑖᕈᕆᐊᖅᑎᑦᑎᓂᕐᒥᑦ − ᐱᖃᓯᐅᑎᓗᒍ ᑖᓐᓇ ᑭᕙᓪᓕᕐᒥᑦ ᐃᒫᒍᑦ−ᐃᒐᓚᐅᔭᓂᑦ ᓄᑭᓪᓚᐅᑎᓄᑦ ᑲᓱᖅᓯᒪᒍᑎ ᐊᒻᒪᓗ ᑰᔾᔪᐊᕌᓗᒻᒥᑦ ᑐᓚᑦᑕᕐᕕᖓ − ᐱᐅᓯᒋᐊᖅᑎᐅᓗᓂ ᐱᖁᑎᓄᑦ−ᐊᖅᑯᑎᒋᕙᑦᑕᖓ ᑲᔫᓯᓐᓇᕈᓐᓇᖁᓪᓗᒍ ᑲᓱᖅᓯᒪᔾᔪᑎᒋᔭᖓ ᓄᓇᕗᓪᓗ ᐊᒻᒪᓗ ᒫᓂᑑᐸᓗ ᐊᒻᒪᓗ ᓄᓇᕐᔪᐊᕐᒥᑦ ᓂᐅᕐᕈᑎᔅᓴᓕᕆᔨᐅᔪᓄᑦ. ᑖᒃᑯᐊᑦᑕᐅᖅ ᐱᓕᕆᖃᑎᒌᒋᐊᒃᑲᓐᓂᕈᑎᖃᕐᓂᐊᑦᑑᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ−ᐱᔨᑦᑎᕋᕈᑎᖏᑎᒍᑦ, ᐃᓚᒋᐊᖅᑕᐅᓯᒪᓗᓂ ᖃᖓᑦᑕᖅᑎᑕᐅᓯᒪᔪᒃᑯᑦ ᐃᑭᐊᖅᑭᕕᒃᑰᕈᓐᓇᐅᑎᖓ, ᐊᒻᒪᓗ ᐱᓕᒻᒪᒃᓴᖅᑎᑦᑎᓂᕐᒥᑦ ᐅᔭᕋᓐᓂᐊᖅᑐᓕᕆᕐᓂᒥᑦ.
ᒫᓂᑑᐸᓗ ᓄᓇᕗᓪᓗ ᐊᔪᙱᓐᓂᕆᔭᖏᓐᓂᑦ ᐱᓕᕆᔪᓐᓇᕐᓂᐅᔪᓂᑦ ᑲᑐᑎᓂᐊᖅᑑᒃ ᐊᑦᑕᕐᓇᖏᑦᑐᒃᑯᑦ ᐊᒻᒪᓗ ᑲᔪᓰᓐᓇᕈᓐᓇᖅᑐᒃᑯᑦ ᐱᕙᓪᓕᐊᑎᑦᑎᓂᕐᒥᑦ ᓄᓇᒦᖔᖓᔪᓂᑦ. ᑖᒃᑯᐊ ᒪᕐᕉᒃ ᒐᕙᒪᐅᔫᒃ ᐃᑲᔪᖅᑐᐃᓯᒪᖏᓐᓇᕐᓂᐊᖅᑑᒃ ᓄᓇᖃᖅᑳᖅᓯᒪᔪᑦ ᓴᓇᐅᒐᖏᓐᓂᒃ ᐊᒻᒪᓗ ᐃᓕᖅᑯᓯᖏᓐᓂᒃ, ᐱᖃᓯᐅᑎᓗᒋᑦ ᑖᒃᑯᑎᒎᓇ ᐱᓕᕆᖃᑎᒌᖏᓐᓇᖅᓯᒪᓂᕆᔭᖏᑎᒍᑦ ᐅᐃᓂᐸᐱᒻᒥ ᓴᓇᙳᐊᒐᕐᓄᑦ ᑕᑯᔭᒐᖃᕐᕕᒃ−ᖃᐅᒪᔪᖅ ᐅᐃᓂᐸᐱᒻᒥ.
“ᓯᕗᓕᖅᑎ ᑭᓂᐅ ᓯᕗᓪᓕᖅᐹᑦᑎᐊᖑᔪᖅ ᓯᕗᓕᖅᑎᐅᔪᓂᑦ ᐊᓯᐊᑦᑎᓐᓂᒃ ᒐᕙᒪᖃᕐᕕᐅᔪᒦᖔᖅᓯᒪᔪᒥᒃ ᓄᓇᕗᒻᒧ ᐊᐃᓯᒪᓪᓗᓂ ᑐᙵᓱᑦᑎᒍᓐᓇᖅᓯᒪᓕᖅᑕᕋ,” ᐅᖃᖅᑐᖅ ᓯᕗᓕᖅᑎ ᒪᐃᓐ. “ᐅᕙᖓ ᓄᓇᖓᓐᓄᑦ ᐊᖏᕐᕋᓐᓄᑦ ᐊᐃᓯᒪᔪᓐᓇᓚᐅᕐᒪᑦ ᐊᕐᕕᐊᓄᑦ ᑖᓐᓇ ᐱᒻᒪᕆᐅᓂᖅᓴᐅᓯᒪᒻᒪᕆᑦᑐᖅ. ᐱᖃᑕᐅᓪᓗᓂᓗ ᑭᕙᓪᓕᕐᒥᑦ ᐃᓄᐃᑦ ᑲᑐᔾᔨᖃᑎᒌᒃᑯᖏᑕ ᐊᖓᔪᖅᑳᖓ ᑯᓄ ᑕᑦᑐᐃᓂ ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ, ᒍᓗᐊᕆᐊ ᐅᓗᖅᓯ, ᓯᕗᓕᖅᑎ ᑭᓂᐅᓗ ᐅᕙᒍᒃ ᐊᕐᕕᐊᕐᒥᐅᓂᑦ ᑲᑎᓯᔪᓐᓇᓚᐅᖅᑐᒍᑦ”.
“ᐊᑎᓕᐅᖅᑕᐅᓂᖓᑕ ᑖᔅᓱᒪ ᓄᓇᕗᑦ−ᒫᓂᑑᐸ ᑎᑎᕋᖅᓯᒪᔪᑦ ᑐᑭᓯᐅᒪᖃᑎᒌᒍᑎᖏᑦ ᐅᓪᓗᒥ ᓄᑖᕈᕆᐊᖅᑕᐅᓂᖓᓂᒃ ᓇᓪᓕᐅᓐᓂᖃᖅᑐᖅ ᐊᑐᓚᐅᖅᑕᐅᑦᑎᓐᓂᒃ ᑎᑎᕋᖅᓯᒪᔪᑦ ᑐᑭᓯᐅᒪᖃᑎᒌᒍᑎᐅᓚᐅᖅᑐᑦ ᐊᒻᒪᓗ ᓴᙵᑦᑎᒋᐊᕈᑎᒋᓪᓗᑎᒍᑦ ᑲᑐᔾᔨᓂᕆᔭᑦᑎᓐᓂᒃ ᐊᒻᒪᓗ ᐊᖏᖅᓯᒪᓂᕆᔭᑎᓐᓂᒃ ᐱᓕᕆᐊᖃᖅᑎᓪᓗᑕ ᑲᑐᔾᔨᓂᒃᑯᑦ ᐱᔭᔅᓴᑎᓐᓂᒃ. ᑖᓐᓇ ᑎᑎᕋᖅᓯᒪᔪᑦ ᑐᑭᓯᐅᒪᖃᑎᒌᒍᑎ ᑐᙵᕕᓕᐅᕈᑕᐅᔪᖅ ᑐᕌᒐᕆᕙᕗᑦ ᑖᒃᑯᐊᑦᑕᐃᓐᓇᐃᑦ ᐱᓪᓗᒋᑦ, ᐱᓗᐊᖅᑐᒥᓪᓗ ᐊᖏᔫᑎᓄᑦ ᐱᓕᕆᐊᔅᓴᓄᑦ ᓲᕐᓗ ᑖᓐᓇ ᐃᓄᓐᓄᑦ−ᐊᐅᓚᑕᐅᓯᒪᔪᖅ ᑭᕙᓪᓕᕐᒥᑦ ᐃᒫᒍᑦ ᐃᒐᓚᐅᔭᑦ ᓄᑭᓪᓚᐅᑏᑦ ᑲᓱᖅᓯᒪᒍᑕᐅᓂᐊᖅᑐᖅ ᐊᒻᒪᓗ ᑰᔾᔪᐊᕌᓗᒻᒥ ᑐᓚᑦᑕᕐᕕᖓᓄᑦ. ᐱᒻᒪᕆᐅᒻᒪᑦ ᑐᑭᓯᓯᒪᖃᑎᒌᓐᓂᖃᑦᑎᐊᕆᐊᖃᕐᓂᑎᓐᓂᒃ ᖃᓄᖅ ᑕᒪᒃᑯᓂᖓ ᐱᓕᕆᐊᔅᓴᐅᔪᓂᑦ ᓯᕗᒧᒋᐊᖅᑎᑦᑎᔪᓐᓇᕐᒪᖔᑕ ᐃᑲᔫᑎᖃᕐᓂᕆᔭᖏᓐᓂᑦ ᑖᒃᑯᓇᙵᑦ ᐱᔪᐃᓐᓇᖁᓪᓗᑕ ᑕᒪᑦᑕ ᐊᑐᓂᒃ ᒐᕙᒪᖃᕐᕕᐅᔫᓐᓂᒃ.”
ᑖᓐᓇ ᑲᑐᔾᔭᐅᔪᖅ ᒫᓂᑑᐸᒥ−ᓄᓇᕗᒻᒥ ᐊᑐᓕᖅᑎᑦᑎᓂᕐᒧᑦ ᑲᑎᒪᔨᕋᓛ, ᐊᖓᔪᖅᑲᐅᑎᓂᑦ ᐃᔅᓯᕙᐅᑕᖃᖅᑐᓂ, ᐱᓕᕆᐊᔅᓴᓕᐅᖅᑎᐅᓂᐊᖅᑐᑦ ᐊᒻᒪᓗ ᐊᕐᕌᒍᑕᒫᖅᓯᐅᑎᒥᒃ ᐅᓂᒃᑳᓕᐅᖃᑦᑕᕐᓗᑎᒃ ᖃᓄᐃᑉᐸᓪᓕᐊᓂᐅᓯᒪᓕᖅᑐᓂᒃ.