Arviat, Nunavut (Julai 7, 2026) – Ublumi, Kavamangit Manitobami Nunavunmilu sainiqtuk Titiqqamik Kangiqhimadjutimik (MOU) hakugikhariami hapkunani havaqatigiigutikkut, paannariigutikku, hivunikhanilu pivalliadjutinun.
Una titiraq kangiqhimadjuti (MOU) sainiqtaujuq Arviani uumanga Maligaliuqtimin Wab Kinew, Hivuliqti Manitobamun, uumangalu Maligaliuqti John Main, Hivuliqti Nunavunmun.
Nunakkut nuatqatiupluta piqaqhuta aajjikkiingnik ajurnaqhivaktunik, Manitoba Nunavullu havaqatigiingniaqtuk hivumuudjutijaami Nunaqaqqaaqtunin-hivulliutaujuq pivalliadjutit, hakugikharlugin ukiuqtaqtumi auladjutikhat piliurlunilu uuktukvighanik inugijainnun tamarni nunaijaujuni.
Una titiraq kangiqhidjuti havaktitaik malruuk kavamagijaujuk aularaanginnaqtunik havaqatigiigutinik, ilitturipkaiqatigiikhutik atauttikkullu upalungaijaqhutik taapkunani hivuliutiujukhanik kituni, ilaujuqlu Ukiuqtaqtumi amiridjutaanik atanniqtuidjutaaniklu, piangaijarnirnun naudjutainnik, iliharutinun aanniaqtailinirnullu munaridjutinun.
Malruuk kavamagijaujuk naunaijarniaqtiat ihuaqhaqtauhimajun naudjutikhanik niuvvaanirni aulavikhainnun, ingilradjutikhanun tulaktaqvingnullu nutaanguqtirutikhanun - ilaujuqlu una tukhiqhimajuq Kivalliq Hydro-Fibre Atadjuti unalu Tulaktarvik Churchill Plus – pimmarighariami tamajanik-agjaqtuinirni mahulingainnirnik atadjutiniklu ukunani Nunavut, Manitoba nunarjuamilu niuvvaanirni. Piniaqhimajullu qanitqijaujunik havaqatigiigutinik aanniaqtailinikkut-havagutini tunidjutinik, angiklijuummiqtunik qaritaujakkuurutinik, ajuiqhautiniklu ukunani ujaraghiunikkut havagviinni.
Manitoba Nunavullu atuqatigiingniaqtut ajuiqhimadjutinik qajangnaittunik aularaanginnaqtaaqtunik pivalliadjutinik nunami piqutainnik. Malruuk kavamagijaujuk aulahimmaarniaqtuk ikajuqlutik Nunaqaqqaaqtuni hanaujarutainnik pitquhiinniklu, ilaujuq uvuuna hivitujumi-pihimajuq paannariigutini uuvani WAG-Qaumajuq Winnipegmi.
“Hivuliqt Kinew hivulliqpaaq Hivuliqti aallamin nunagijaujumin quviahuutigijara katimaqatigiplugu Nunavunmi,” uqaqtuq Hivuliqti Main. “Aquidjutaanik nunallaamnun Arviani quvianaqpiaqtuqlu. Ukuallu Kivalliq Inuit Katimajiit Atanngujaa Kono Tattuinee unalu Angijuqqaaq Nunavut Tunngavikkunni, Gloria Uluqsi, Hivuliqti Kinew uvangalu uqaqatigivaktavun Arviarmiutat”.
“Sainiutat uumani Nunavut-Manitoba titiraq kangiqhidjuti ublumi naunaiqtaa nutaanguqtirniq uumani tahamanittumi titiraq kangiqhidjuti hakugikhaqhugulu pidjutiqaqtigiigutivut havagutivullu havaqatigiingnikkut atauttikkut havattiarutikkut. Una titiraq kangiqhidjuti pidjutiniaqtuq tunngaviuluni atauttikkut turaangadjutinun, ukualluanilu angijunik havaktakhani imaatun Inuinnin-hivuliqtaujuq Kivalliq Hydro Fibre Atadjuti atadjutiillu uvani tulaktarvingnmi Churchillmi. Akhuurnaqtuq piqariami kangiqhimadjutinik qanuqtut hivumuudjutijaaqtavun hapkuat havaktakhat ukununga atauttikkut ikajuutikhanun tamainnun inungnun naliinni atauttikkut kiklirijaptingni.”
Atauttikkut Manitoba-Nunavut Atuqtipkainirnun Katimajiit, ikhivautaqatigiiktunik, ukunanga angajukhiinnin havaktinin, pivallialiurniaqtun havagutikhakkut upalungaijautimik unniudjutilutiklu ukiuq tamaat hivumuudjutiani.