ᓯᕗᓕᖅᑎ ᔮᓐ ᒪᐃᓐ ᐅᓪᓗᒥ ᓴᖅᑭᑦᑎᖅᑲᐅᕗᖅ ᐅᖃᐅᓯᒃᓴᒥᒃ ᐱᔾᔪᑎᖃᖅᖢᓂ ᖃᖓᑦᑎᐊᓵᖅ ᐅᖃᐅᓯᐅᓚᐅᖅᑐᓂᒃ ᐊᒥᐊᓕᑲᒥᐅᑦ ᐱᓕᕆᔨᖏᓐᓄᑦ ᑲᓛᖦᖡᑦ ᓄᓈᓐᓂ ᐱᔾᔪᑎᖃᖅᖢᑎᒃ.
"ᓄᓇᕗᑦ ᑲᑐᔾᔨᖃᑎᖃᖅᐳᖅ ᑲᓛᖦᖡᑦ ᓄᓈᓐᓂ ᐃᑲᔪᖅᑐᐃᓪᓗᓂᓗ ᓇᖕᒥᓂᖅᓱᕈᓐᓇᕐᓂᕐᒥᒃ.
ᓄᓇᕗᑦ ᐃᓕᖅᑯᓯᕐᒥᒍᑦ, ᐅᖃᐅᓯᓕᕆᓂᒃᑯᑦ ᐃᓚᒌᖕᓂᒃᑯᓪᓗ ᑲᓛᖦᖡᑦ ᓄᓈᓐᓂ ᐃᓕᖅᑯᓯᖃᖃᑎᒌᒃᐳᑦ, ᐊᖏᕈᑕᐅᓯᒪᐃᓐᓇᖅᖢᓂᓗ ᑲᒪᒋᔭᐅᖏᓐᓇᖁᓪᓗᒋᑦ ᑖᒃᑯᐊ ᐱᒻᒪᕆᐅᔪᑦ ᐱᓕᕆᖃᑎᒌᖕᓃᑦ.
2000−ᒥ ᐱᒋᐊᓚᐅᖅᓯᒪᓪᓗᓂ, ᓄᓇᕗᑦ ᒐᕙᒪᖓ ᑲᓛᖦᖡᑦ ᓄᓈᓐᓂᓪᓗ ᐱᓕᕆᖃᑎᒌᑦᑎᐊᖏᓐᓇᖅᐳᑦ ᓇᓗᓇᐃᖅᑕᐅᓯᒪᔪᓂᒃ ᑎᑎᕋᖅᓯᒪᔪᑎᒍᑦ ᑐᑭᓯᐅᒪᖃᑦᑕᐅᑎᓂᕐᒥᒃ, ᐱᔾᔪᑎᖃᓪᓗᐊᑕᖅᖢᑎᒃ ᐃᖃᓗᓕᕆᓂᕐᒥᒃ, ᑐᓚᒃᑕᕐᕕᓕᕆᓂᕐᒥᒃ, ᓄᒃᑕᕈᓐᓇᕐᓂᕐᒥᒃ, ᐃᓕᓐᓂᐊᕐᓂᓕᕆᓂᕐᒥᒃ ᐃᓕᖅᑯᓯᕐᒥᒡᓗ.
ᓂᕆᐅᖕᓂᖃᐃᓐᓇᖅᐳᒍᑦ ᐅᖃᖃᑎᒌᖕᓂᖅ ᒪᑭᑕᑦᑎᐊᖏᓐᓇᖅᑎᑦᑎᓂᐊᕐᒪᑦ ᐅᑭᐅᖅᑕᖅᑐᒥ ᓄᓇᓕᕐᔪᐊᖁᑎᑦᑎᓐᓂ ᓇᓗᓇᐃᖅᓯᓗᑕᓗ ᑲᓛᖦᖡᑦ ᓄᓈᓐᓂ ᐱᓕᕆᐊᒃᓴᖏᑦ ᐱᒻᒪᕆᐅᒋᔭᐅᓪᓗᑎᒃ ᐱᓕᕆᖃᑎᒋᔭᐅᓂᖏᓐᓂᒃ ᓄᓇᕗᒻᒧᑦ, ᑲᓇᑕᒧᓪᓗ."