ᓄᓇᕗᒻᒥ ᓯᕗᓕᖅᑎ ᔮᓐ ᒪᐃᓐ ᐅᓪᓗᒥ ᓴᖅᑭᑦᑎᖅᑲᐅᕗᖅ ᐅᑯᓂᖓ ᐅᖃᐅᓯᐅᔪᓂᑦ:
"ᐅᕙᑦᑎᓐᓂᓕᒫᖅ ᓄᓇᕗᒻᒥ, ᐅᖃᕈᒪᕗᖓ ᒪᑦᓇ, ᓇᑯᕐᒦᒃ, ᐊᒻᒪ ᖁᔭᓐᓇᒦᒃ ᐅᐱᓐᓇᖅᑐᖅ, ᒥᐊᓕ ᓴᐃᒪᓐ. ᖁᔭᓐᓇᒦᒃ ᐱᓕᕆᐊᕆᖃᑦᑕᖅᓯᒪᔭᓕᒫᓐᓄᑦ ᐊᕐᕌᒍᓄᑦ ᑕᓪᓕᒪᓄᑦ ᑯᐃᓐᒧᑦ ᑭᒡᒐᖅᑐᖅᑎᒋᔭᐅᓪᓗᑎᑦ.
ᔪᓚᐃ 26, 2021−ᒥ, ᓴᐃᒪᓐ ᑎᒃᑯᐊᖅᑕᐅᓚᐅᖅᓯᒪᕗᖅ ᑲᓇᑕᒥ ᓯᕗᓪᓕᖅᐹᖑᓪᓗᓂ ᓄᓇᖃᖅᑳᖅᓯᒪᔪᓄᑦ ᑯᐃᓐ ᑭᒡᒐᖅᑐᖅᑎᖓᓄᑦ.
ᓯᕗᓪᓕᖅᐹᖑᓪᓗᓂ ᐃᓅᓪᓗᓂ ᓂᕈᐊᖅᑕᐅᓪᓗᓂ ᖁᑦᑎᒃᑐᒧᑦ ᐱᓕᕆᐊᒃᓴᒧᑦ, ᓴᐃᒪᓐ ᓯᕗᒃᑲᖅᑕᖅᑎᐅᕗᖅ, ᐃᔾᔪᐊᒐᒃᓴᑦᑎᐊᕙᐅᓪᓗᓂ ᒪᒃᑯᒃᑐᓄᑦ ᐆᒃᑑᑎᑦᑎᐊᕙᐅᓪᓗᓂᓗ ᐊᓂᒍᐃᔪᓐᓇᕐᓂᕐᒥᒃ ᐊᒃᓱᕈᕐᓇᖅᑐᓂᒃ.
ᑯᐃᓐ ᑭᒡᒐᖅᑐᖅᑎᖓ ᐱᓕᕆᐊᒃᓴᒥᓂᒃ ᐱᓕᕆᐊᖃᓚᐅᖅᐳᖅ ᑯᐃᓐ ᑭᒡᒐᖅᑐᖅᑎᖓᓄᑦ ᐱᑦᑎᐊᖅᖢᓂ, ᐃᒃᐱᒋᔭᐅᑦᑎᐊᖅᖢᓂ ᓈᒻᒪᑦᑎᐊᖅᖢᓂᓗ, ᐊᒻᒪᑦᑕᐅᖅ ᓄᓇᓕᖕᓂ ᑐᙵᕕᒋᔭᒥᓂᒃ ᐸᐸᑦᑎᑦᑎᐊᖏᓐᓇᓚᐅᖅᐳᖅ ᑭᒡᒐᖅᑐᐃᔨᐅᓪᓗᓂ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒧᑦ ᐃᓅᓯᖃᑦᑎᐊᕐᓂᕐᒧᓪᓗ, ᓴᐃᒻᒪᖃᑎᒌᖕᓂᕐᒧᑦ ᑲᓇᑕᒥ, ᐊᔾᔨᒌᙱᕈᓘᔭᖅᑐᓂᒃ ᐃᓚᓕᐅᔾᔨᓂᕐᒥᒡᓗ, ᐊᒻᒪᓗᑦᑕᐅᖅ ᐊᕙᑎᑦᑎᓐᓂ ᑲᒪᑦᑎᐊᕐᓂᕐᒥᒃ.
ᐊᒃᓱᕉᑎᖃᐃᓐᓇᓚᐅᖅᐳᖅ ᐃᓅᖃᑎᒌᑦᑎᐊᓕᒃᑲᓐᓂᖁᓪᓗᒋᑦ ᓄᓇᖃᖅᑳᖅᓯᒪᔪᑦ ᓄᓇᖃᖅᑳᖅᓯᒪᙱᑦᑐᓪᓗ ᐃᓄᐃᑦ ᑲᓇᑕᒥ.
ᑎᒃᑯᐊᖅᑕᐅᓚᐅᖅᑳᕋᓂ, ᓴᐃᒪᓐ ᐱᓕᕆᕐᔪᐊᖅᓯᒪᕗᖅ ᓴᖅᑭᑎᑦᑎᓂᕐᒥᒃ ᐅᑭᐅᖅᑕᖅᑐᒥ ᑲᑎᒪᔨᓂᒃ, ᒐᕙᒪᒥᐅᑕᐅᖃᑎᒌᑦ ᑲᑎᒪᓂᖏᑦ ᓴᖅᑭᔮᖅᑎᑦᑎᒃᑲᓐᓂᖅᖢᑎᒃ ᑲᔪᓰᓐᓇᕈᓐᓇᖅᑐᓂᒃ ᐱᕙᓪᓕᐊᑎᑦᑎᓂᕐᒥᒃ ᐱᓕᕆᖃᑎᒌᖕᓂᕐᒥᒡᓗ ᐅᑭᐅᖅᑕᖅᑐᒥ ᓄᓇᓕᕐᔪᐊᖑᖃᑎᒌᓂᒃ.
ᓯᕗᓪᓕᖅᐹᖑᓚᐅᕐᒥᔪᖅ ᐃᓅᓪᓗᓂ ᐅᑭᐅᖅᑕᖅᑐᒧᑦ ᑭᒡᒐᖅᑐᐃᔨᐅᓪᓗᓂ ᓄᓇᕐᔪᐊᑉ ᐅᑭᐅᖅᑕᖅᑐᖓᓂ ᐱᓕᕆᔨᓄᑦ ᐊᒻᒪᓗ ᑭᒡᒐᖅᑐᐃᔨᐅᓚᐅᖅᓯᒪᓪᓗᓂ ᑎᓐᒫᒡᒧᑦ 1990-ᖏᓐᓂ 2000 ᐱᒋᐊᓕᓵᖅᑎᓪᓗᒍ.
ᑲᓇᑕᒥ 30-ᒋᔭᐅᓪᓗᓂ ᑯᐃᓐ ᑭᒡᒐᖅᑐᖅᑎᖓ, ᐅᖃᐅᓯᖃᓚᐅᖅᐳᖅ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂᒃ ᓇᖕᒥᓂᖅᓱᕈᓐᓇᕐᓂᕐᒥᒃ, ᐊᒻᒪ ᐊᓯᐅᑎᑦᑎᑦᑕᐃᓕᒪᓂᕐᒥᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᐃᓕᖅᑯᓯᖏᓐᓂᒡᓗ.
ᓯᕗᓕᖅᑎᐅᓪᓗᖓ ᓄᓇᕗᒻᒧᑦ, ᖁᔭᒋᕙᕋ ᑯᐃᓐ ᑭᒡᒐᖅᑐᖅᑎᖓ ᐊᔾᔨᒌᒃᑎᑦᑎᓪᓗᓂ ᐃᓚᓕᐅᔾᔨᓯᒪᑦᑎᐊᖅᖢᓂᓗ ᑭᒡᒐᖅᑐᐃᑦᑎᐊᓚᐅᕐᓂᖓᓄᑦ ᑲᓇᑕᒥᐅᓂᒃ ᓇᒧᙵᐅᕈᓘᔭᕋᓗᐊᕈᓂ ᓄᓇᕐᔪᐊᓕᒫᒥ. ᒪᕐᕉᖕᓂᒃ ᐅᖃᐅᓰᖕᓂᒃ ᐅᖃᓪᓚᒍᓐᓇᑦᑎᐊᕐᓂᖓ ᐃᓄᒃᑎᑐᓪᓗ ᐅᖃᓪᓚᒐᔪᖕᓂᖓ ᓇᓗᓇᐃᖅᓯᔾᔪᑕᐅᓚᐅᖅᐳᖅ ᐱᒻᒪᕆᐅᓂᖓᓂᒃ ᖁᕕᐊᓲᑎᖃᕐᓂᖅ ᐃᑲᔪᖅᓱᐃᓂᕐᓗ ᓄᓇᖃᖅᑳᖅᓯᒪᔪᑦ ᐅᖃᐅᓯᖓᓂᒃ ᐊᑐᕐᓂᕐᒥᒃ.
2024−ᒥ, ᓄᓇᕗᑦ ᐅᐱᒍᓱᓚᐅᖅᐳᖅ ᑐᙵᓱᒃᑎᑦᑎᔪᓐᓇᕋᒥᒃ ᑯᐃᓐ ᑭᒡᒐᖅᑐᖅᑎᖓᓂᒃ ᐊᒻᒪ ᐅᐱᓐᓇᖅᑐᖅ ᐅᐃᑦ ᕗᕋᐃᓱ ᓄᓇᕘᒥ 25−ᓂᒃ ᐅᑭᐅᖃᓕᖅᑎᓪᓗᒍ.