ᓄᓇᕗᑦ ᒐᕙᒪᖓ ᐊᖏᖅᓯᓯᒪᕗᖅ ᐋᖅᑭᒃᓯᒪᓕᖅᑎᑕᐅᔪᒥᒃ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᑦ (NWMB−ᑯᓐᓂᑦ) ᐅᓄᖅᓯᒋᐊᖅᑎᑦᑎᔪᒪᓪᓗᑎᒃ ᑲᑎᖦᖢᒋᑦ ᖃᔅᓯᕌᕈᓐᓇᖅᑎᑕᐅᓂᕐᒥᒃ (TAH−ᒥᒃ) ᕿᑭᖅᑖᓗᖕᒥ ᑐᒃᑐᓂᒃ ᐱᒋᐊᕐᓗᓂ ᒫᓐᓇᑲᐅᑎᒋ 2026-2027−ᒥ ᓇᓐᓄᒐᓱᖕᓇᒥ.
ᐊᖑᓇᓱᖕᓇᒥᑦ ᔪᓚᐃ 1, 2026−ᒥᑦ ᔫᓂ 30, 2027−ᒧᑦ, ᐃᓚᒋᐊᓛᕐᑐᑦ 550-ᒥᑦ 6,000−ᒧᑦ ᓂᕕᖓᑖᑦ ᕿᑭᖅᑖᓘᑉ ᑐᒃᑐᖏᓐᓄᑦ. ᐅᓄᖅᓯᒋᐊᖅᑕᐅᓂᖓ ᒪᓕᒃᐳᖅ ᒫᓐᓇᓕᓴᕐᓂᒃ ᖃᔅᓯᐅᓂᖏᓐᓄᑦ ᑐᓴᖅᑕᐅᔪᒃᓴᓂᒃ, ᑕᒪᕐᒥᑦᑎᐊᖅ ᒪᓂᒪᔪᑦ ᖃᐅᔨᓴᖅᓯᓂᕐᒧᑦ ᑐᓴᖅᑕᐅᔪᒃᓴᐃᑦ ᐃᓄᐃᓪᓗ ᖃᐅᔨᒪᔭᑐᖃᖏᑦ ᐅᓂᒃᑲᐅᓯᐅᓚᐅᖅᑐᑦ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᑲᑎᒪᓂᕆᕙᒃᑕᒥᓄᑦ ᔫᓂ 24, 2026−ᒥ, ᐱᓕᕆᖃᑎᖃᖅᖢᑎᒃ ᕿᑭᖅᑖᓗᖕᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ ᐊᖑᓇᓱᒃᑐᓕᕆᔨᒃᑯᓐᓂᒡᓗ. ᑕᒪᓐᓇ ᐅᓄᖅᓯᒋᐊᖅᑕᐅᓂᖓ ᐊᖏᒡᓕᒋᐊᖅᑎᑦᑎᕗᖅ ᐊᖑᓇᓱᖕᓂᕐᒧᑦ ᐱᕕᒃᓴᓂᒃ ᓄᓇᕗᒻᒥᐅᓄᑦ ᓇᓗᙱᑦᑎᐊᕈᑕᐅᓪᓗᓂᓗ ᐊᕗᖓᑲᓪᓚᒃ ᑲᔪᓰᓐᓇᕈᓐᓇᕐᓂᖓᓂᒃ ᕿᑭᖅᑖᓗᖕᒥ ᑐᒃᑐᐃᑦ ᖃᔅᓯᐅᓂᕆᔭᖏᑦ.
ᐅᓄᖅᓯᒋᐊᖅᑕᐅᓂᐊᕐᒥᔪᑦ 125−ᓂᒃ ᓂᕕᙵᑖᓂᒃ ᓇᓐᓄᒐᓱᖕᓇᐅᓕᕌᖓᑦ ᐱᒋᐊᕐᓗᑎᒃ 2027-2028−ᒥ ᓇᓐᓄᒐᓱᖕᓇᒥ ᑕᐃᒪᐃᖁᔭᐅᓪᓗᑎᒃ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᑦ. ᑭᖑᓂᑦᑎᓐᓂ ᑰᑕᖃᙱᑦᑐᑦ ᑭᒡᓕᖃᖅᑎᑕᐅᔪᑦ ᐊᕐᓇᓪᓗᐃᑦ ᑐᒃᑐᑕᐅᔪᓐᓇᖅᑐᑦ 20 ᐳᓴᓐᑎ ᐅᖓᑖᓅᙱᑦᑐᖅ ᑲᑎᖦᖢᒋᑦ ᐊᖑᓇᓱᒃᑕᐅᔪᓐᓇᖅᑐᑦ ᐊᔪᖅᑎᑦᑎᓪᓗᑎᒡᓗ ᐊᕐᓇᓪᓗᖕᓂᒃ ᑐᒃᑐᓐᓇᓱᒍᓐᓇᙱᖦᖢᑎᒃ ᓄᕐᕋᖃᕐᓗᑎᒃ, ᐲᖅᑕᐅᓚᐅᕆᕗᑦ.
ᑐᓐᓂᖅᑯᑎᖃᕐᓂᖅ ᐊᖑᓇᓱᒃᑕᐅᔪᓂᒃ ᖃᐅᔨᓴᒐᒃᓴᓂᒃ ᕿᑭᖅᑖᓗᖕᒥ ᑐᒃᑐᓄᑦ ᐱᔭᐅᔭᕆᐊᖃᕈᓐᓃᖅᑐᑦ ᑲᑎᖅᓱᖅᑕᐅᕙᓪᓕᐊᔪᓪᓘᓐᓃᑦ, ᐃᓚᒋᔭᐅᓗᓂ ᓇᓗᓇᐃᖅᓯᔾᔪᑎ ᑭᓲᖕᒪᖔᑦ. ᑕᐃᒪᐃᒃᑲᓗᐊᖅᑎᓪᓗᒍ, ᐊᖑᓇᓱᒃᑏᑦ ᐅᓂᒃᑳᖃᑦᑕᕆᐊᖃᖅᐳᑦ ᐊᖑᓇᓱᒃᑕᒥᓂᒃ ᐆᒪᔪᕐᓂᐊᖅᑎᒃᑯᖏᓐᓄᑦ ᐊᖑᓇᓱᒃᑐᓕᕆᔨᒃᑯᓐᓄᓪᓘᓐᓃᑦ. ᐊᒻᒪᓗᒃᑲᓐᓂᖅᑕᐅᖅ, ᐊᖑᓇᓱᒃᑏᑦ ᑎᓕᐅᖅᑕᐅᒋᕗᑦ ᖃᐅᔨᑎᑦᑎᓯᑲᐅᑎᒋᖁᔭᐅᓪᓗᑎᒃ ᓄᓇᓕᖕᓂ ᐆᒪᔪᕐᓂᐊᖅᑎᒃᑯᑦ ᑎᑎᕋᕐᕕᒋᔭᒥᓂᒃ ᖃᓄᑐᐃᓐᓇᖅ ᐸᓴᒋᔭᐅᔪᓂᒃ ᖃᓂᒪᔪᖃᕐᓂᖓᓂᒃ ᓂᕐᔪᑎᒥᒃ.
ᐊᖑᓇᓱᒃᑏᑦ ᐃᖅᑲᐃᓯᔭᐅᕗᑦ ᐊᖑᓇᓱᖕᓂᖅ ᕿᑭᖅᑖᓗᖕᒥ ᑐᒃᑐᓂᒃ ᓴᓂᕐᕙᒃᑕᐅᓯᒪᙱᓪᓗᑎᒃ 2026-2027−ᒥ ᓱᓕ ᐱᖁᔭᕐᒥᒃ ᓱᕋᐃᓂᐅᕗᖅ ᐅᑯᑎᒎᓇᖅ, ᐆᒪᔪᓕᕆᓂᕐᒧᑦ ᐱᖁᔭᖅ ᓴᖅᑭᑎᑦᑎᑐᐃᓐᓇᕆᐊᖃᖅᖢᓂᓗ ᐊᑐᖅᑎᑦᑎᓪᓚᕆᖕᓂᕐᒧᑦ ᐱᓕᕆᐊᖑᔪᓂᒃ.
ᐊᑖᓂ ᓄᓇᕗᒻᒥ ᐊᖏᕈᑏᑦ, ᓴᓂᕐᕙᒃᑕᐅᔪᑦ ᑲᑎᖦᖢᒋᑦ ᐊᖑᓇᓱᒃᑕᐅᔪᓐᓇᖅᑐᑦ ᑲᒪᒋᔭᐅᔭᕆᐊᖃᖅᐳᑦ ᕿᑭᖅᑖᓗᖕᒥ ᐆᒪᔪᓕᕆᔨᒃᑯᑦ ᑲᑎᒪᔨᖏᓐᓄᑦ.
ᐃᓛᒃᑰᖅᑐᑦ ᐊᖑᓇᓱᒃᑐᓕᕆᔨᒃᑯᑦ ᐱᔪᓐᓇᐅᑎᖃᖅᐳᑦ ᓴᓂᕐᕙᐃᔪᓐᓇᖅᖢᑎᒃ ᑲᑎᖦᖢᒋᑦ ᐊᖑᓇᓱᒃᑕᐅᔪᓐᓇᖅᑐᓂᒃ ᐃᓚᒋᔭᐅᔪᓄᑦ ᐊᐅᓚᑦᑎᔪᓐᓇᖅᖢᑎᒡᓗ ᐊᖑᓇᓱᖕᓂᕐᒧᑦ ᐱᓕᕆᐊᖑᕙᒃᑐᓂᒃ ᓄᓇᓕᖏᓐᓂ.
ᐊᖑᓇᓱᒃᑐᑎᑦ ᕿᑭᖅᑖᓘᑉ ᑐᒃᑐᖏᓐᓂᑦ ᐊᖑᓇᓱᒍᒪᒃᐸᑕ, ᖃᐅᔨᒋᐊᕐᕕᒋᓗᒋᑦ ᐊᖑᓇᓱᒃᑐᓕᕆᔨᒃᑯᔅᓯ ᑐᑭᓯᒋᐊᒃᑲᓐᓂᖁᓪᓗᓯ ᓯᐊᒻᒪᒃᑕᐅᕙᒃᑐᓂᑦ.