Hivuliqti P.J. Akeeagok anipkaktaa uqautikhaq kiudjutikhamun ihuaqhaijit ihumaliurutainun taaffumunga Ilanga 23 pihimajumun Inuinnarnun havangnirmuninikhait kavamatkunni:
Nunavut Kavamanga (GN) akhuuqtut piliurlugu havaqatigiiktukhanun ihuaqtumun inungnut ikayuutikhaanik kivraqtuidjutikkut inuqarniinni Nunavunmi ihuaqhaqhimajumi Ilanga 23 Nunavut Angirutaani. Havaqatigihimmaaqtavun Nunavut Tunngavikkut Timinga (NTI) ukuallu Kanataup Kavamanga hivumuarutikhat piqatigijaptingnun tikittumajaptingnik uumunga pidjutaanun.
GN-kut pihimmaarniaqtun piliurlugin havalirlugillu naunaittiaqhimajun, turaangajun, ihuaqpiaktulluy Inuit Havaktittinirmun Upalungaijautikhat pihimajun amigairjuumilugin Inuit ilaujun kavamatkunni havaktunun ihuaqhilugu pidjutikhaanun.
Ikajuriami ukuninga upalungairutikhanun, kavamakpun pijain ikajuutikhat ministap tuglia havaakhait ajuittumin ajuiqhaqtukhanun amihunun Inuinnaujunun hivuliqtiujunun havaakhainun. Pijaqqun pilluagakhaq tunihijakhamun havaktunun iglukhainun naunairiami aturaaqpaktumi havakhimmaaqpaktun Inuit havaktit utaqqivaktun naunaiqtauvlutik haililiqqan havaktunun iglukhat. Pijaqqun pilluagakhaq tikkuaqtaunirmun pijakhaq pijaami amihunik Inuit ukununga havakhimmaaqtunun havaakhainun. Naunaiqhinahurittugullu qanuq ikajuutikhanik nuutirnirmun pilugillu amihut pidjutikhainik GN-kuni havaktiujunun havagianginni kitmillikaak nunallaamin iluani GN-kut havagviani.
Angirutigijavun ihuaqhaijip paqitainnik inmik Qiqaijalirvia 25 ihumaliurutaat. GN-kut pikpiarniaqtun kiulutik iluani 60-ni ubluni taaffumunga NTI-kut pijumajait ihuaqhaidjutikhat, tunihiniaqtugullu hivuani uqaqtakhaptingnun.”