Nunavutim Hivuliqtia P.J. Akeeagok ublumi tuhaqtitaa una uqautigijaa:
“Taimaa aivadjutautiit aulahimmaaqtun Kanadami, Nunavut Kavamanga akhuurhaijuq angiklijuummiqtunik pijaarutikhanik ihuaqtunun aanniaqtailinirmut-munaridjutikhanun Nunavunmiunnun.
“Fibjuali 15mi, tunngahuktitatka Iqalungnun ukuak kavamatuqatkunni Minista Naliinni-kavamatkunni Qanuriliurutainni Dominic Leblanc, unalu Minista Aanniaqtailinirmut Jean-Yves Duclos. Nunavunmi Aanniaqtailinirmut Minista John Main unalu Kiinaujaliqijikkut Minista Lorne Kusugak ilaujun uqaqatigiidjutiptikni. Una miitiuti niriuktitaatigun.
“Huli, hivumuutilluta aivadjutinun uvani Kanadami Aanniaqtailinirnun Nuutirutimun (CHT) ukunanilu aallani tamainni angirutini ukunani aanniaqtailinirmut maniliqtuutikhanun, naunaijarumajatka ihariaginiit maniliqtuutikhanik talvuuna Nunavunmi Aanniaqtailirnirmun Maniliurutikhanun Maniliqtuutikhaq (THIF). Nunavut ihariagijuq uumani kavamatuqatkunni maniliurutikhami ikajuutaujukhami ukunani akitujuni tuniutinikkut aanniaqtailinirmun-munaridjutikhanik havagutinik ilihimajaungittun uvani tamainnun-inungnun nutirutini.
“Nunavunmun tunihimajuq uumani THIFmi aularaaqpaktuq 50%mi, tadja $13.5 million ukiuq tamaat, tautuktidjutimi nunapota angijumi aallangajunilu ajurnavjaktuni pihimaittun qujaginnaq nunagijaujuni Kanadami, ilaujullu nuatqativun ukiuqtaqtumi.
“Atauttikkut ukuallu Nunatqiaq (NWT) unalu Yukon, kavamakput titiraqhimajuq Kanadaup Angajuqqaarjuanganun Trudeau, pitquplugu kavamatuqatkut ihumaliuffaarutigilugu tukhirutimik ukiuqtaqtun tunihimaanik Nuvaipami. Una tukhiruti pipkarniaqtaa Nunavunmi Aanniaqtailirnirmun Maniliurutikhanun Maniliqtuutikhaq uvani $75 million atauhirmi ukiumi – 50% Nunavunmun, 26$ NWTmun, imaalu 24% Yukonmun.
“Tamaita Kanadami hivuliqtiit ilitarijaa aallangajun qanuridjutait ukiuqtaqtuni uqarhimajullu hakugiktunik ikajurutinik tuniutinikkut pimmarigharhimajunik ukiuqtaqtuni maniliqinirnun itquumajunik.
“Niriuktunga havaqatigijaami paannarilugin kavamatuqatkut pijaami nutaanguqtirhimajumik angirutimik ikajutaujuq ihariagijainnun Nunavunmiutat talvuuna naunaittuni ihuaqtunilu aanniaqtialinirmut-munaridjutinun maniliqtuutikhanik.”