ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᖏᓐᓂ ᓯᕗᓕᖅᑏᑦ ᑲᑎᓚᐅᖅᑐᑦ ᐋᑐᕙᒥ ᓴᖅᑭᔮᖅᑎᑦᓯᒋᐊᖅᑐᖅᑐᑎᒃ ᐅᑭᐅᖅᑕᖅᑐᒥᒃ

ᒪᐃ 4, 2018

ᐋᑐᕙ, ᐋᓐᑎᐅᕆᐅ (ᒪᐃ 4, 2018) – ᓄᓇᕗᒻᒥ ᓯᕗᓕᖅᑎ ᐹᓪ ᖁᐊᓴ, ᓄᓇᑦᓯᐊᕐᒥ ᓯᕗᓕᖅᑎ ᕌᐳᑦ ᒪᒃᓚᐅᑦ ᐊᒻᒪᓗ ᔫᑳᓐᒥ ᓯᕗᓕᖅᑎ ᓵᓐᑎ ᓯᐅᓪᕗ ᑲᑎᓚᐅᖅᑐᑦ ᐋᑐᕙᒥ ᑕᕝᕙᓂ ᐱᓇᓱᐊᕈᓯᕐᒥ ᐅᖃᖃᑎᒌᒋᐊᖅᑐᖅᑐᑎᒃ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᖏᓐᓂ ᐃᓱᒪᒋᔭᖏᓐᓂᒃ ᐊᔾᔨᒌᓂᓪᓗ ᐱᓕᕆᔾᔪᓯᕆᔭᖏᓐᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐳᔪᕐᓗᓐᓂᒃ/ᐃᓱᕐᓗᓐᓂᒃ ᐊᑭᓕᖅᓱᐃᓂᕐᒧᑦ, ᒪᑭᒪᔾᔪᑎᑦᓴᓂᒃ ᑮᓇᐅᔭᖃᖅᑎᑕᐅᓂᕐᒧᑦ, ᒐᕙᒪᑐᖃᒃᑯᓪᓗ ᐊᑐᐊᒐᓕᐅᖅᐸᓪᓕᐊᓂᖏᓐᓄᑦ ᐅᑭᐅᖅᑕᖅᑐᒥ.

ᐱᖓᓱᑦ ᓯᕗᓕᖅᑏᑦ ᑲᑎᒪᖃᑎᖃᑦᓯᐊᓚᐅᖅᑐᑦ ᐊᖏᔪᖅᑳᕐᔪᐊᖅ ᔮᔅᑎᓐ ᑐᕈᑐᒥᒃ, ᐅᖃᖃᑎᖃᑦᓯᐊᖅᑐᑎᓪᓗ ᑮᓇᐅᔭᓕᕆᔨᒃᑯᑦ ᒥᓂᔅᑕᖓᓂᒃ ᐱᐅᓪ ᒧᐊᓄ, ᐊᕙᑎᓕᕆᔨᒃᑯᑦ ᒥᓂᔅᑕᖓᓂᒃ ᑳᑐᕆᓐ ᒪᑭᐊᓇ, ᒪᑭᒪᔾᔪᑎᓄᑦ ᒥᓂᔅᑕᖓᓂᒃ ᐊᒪᔩᑦ ᓱᕼᐃ, ᒐᕙᒪᑐᖃᒃᑯᑦ-ᓄᓇᖃᖅᑳᖅᑐᒥᓃᑦ ᐱᓕᕆᖃᑎᒌᓐᓂᖏᓐᓂᒃ ᒥᓂᔅᑕᖓᓂᒃ ᑭᐅᕈᓕᓐᓂ ᐸᓂᑦ.

ᒪᑭᒪᔾᔪᑎᓕᕆᓂᖅ

ᓯᕗᓕᖅᑏᑦ ᓇᓗᓇᐃᖅᓯᓚᐅᖅᑐᑦ ᒐᕙᒪᑐᖃᒃᑯᑦ ᓄᑖᓂ ᑮᓇᐅᔭᖅᑖᖅᑎᑦᓯᒻᒪᕆᓚᐅᕐᖓᑕ ᒪᑭᒪᔾᔪᑎᑦᓴᓄᑦ 2018 ᑮᓇᐅᔭᐃᑦ ᐊᑐᖅᑐᑦᓴᓕᐊᖏᓐᓂ. ᓇᓗᓇᐃᖅᓯᒋᐊᓚᐅᖅᑐᑦ ᐱᒻᒪᕆᐅᓂᖓᓂᒃ ᑮᓇᐅᔭᖃᖅᑎᑦᓯᒋᐊᖏᓐᓇᕆᐊᖃᕐᓂᖏᑦ ᓴᓇᑐᓂᖃᕆᐊᖃᕐᓂᖏᓪᓗ ᒐᕙᒪᑐᖃᒃᑯᓐᓄᑦ ᐊᓯᖏᓐᓄᓪᓗ ᑲᑐᔾᔨᖃᑎᖏᓐᓄᑦ ᐊᒥᒐᖅᓯᓗᐊᕈᓐᓃᖁᓪᓗᒋᑦ ᓄᓇᓕᓐᓄᑦ, ᐆᒻᒪᖅᑯᑎᓕᕆᓂᕐᒧᑦ, ᑐᓴᐅᒪᖃᑎᒌᒍᑎᓄᑦ ᐃᖏᕐᕋᔪᓕᕆᓂᕐᒧᓪᓗ ᑮᓇᐅᔭᖃᖅᑎᑕᐅᓂᕐᒧᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᖏᓐᓄᑦ ᑲᓇᑕᐅᓪᓗ ᐊᓯᖏᓐᓃᑦᑐᓄᑦ. ᐊᖑᒻᒪᑎᓕᖅᑎᑦᓯᓂᖅ ᐊᑭᑭᓪᓕᕚᓪᓕᕈᑕᐅᒐᔭᖅᑐᖅ ᐃᓅᓇᓱᐊᕐᓂᕐᒧᑦ ᐅᑭᐅᖅᑕᖅᑐᒥᐅᑕᕐᓄᑦ ᐱᕕᖃᓕᕈᑕᐅᓗᓂᓗ ᒪᑭᒪᔾᔪᑎᖃᕈᓐᓇᕐᓂᒥᒃ ᐊᔾᔨᒌᙱᑦᑐᓂᓪᓗ ᑮᓇᐅᔭᓕᐅᕈᑎᖃᕈᓐᓇᓂᕐᒥᒃ, ᐃᓚᒋᔭᐅᓪᓗᑎᒃ ᐅᔭᕋᕐᓂᐊᖅᑐᓕᕆᓂᕐᒧᑦ. ᐃᓱᒪᑦᓴᖅᓯᐅᕈᑎᖃᖁᔨᓂᖅ ᐊᓯᔾᔨᖅᑕᕈᓐᓇᖅᑐᓂᒃ ᑮᓇᐅᔭᖃᖅᑎᑦᓯᖃᑦᑕᓂᕐᒥᒃ ᓇᓗᓇᐃᖅᑕᐅᒋᐊᓚᐅᕐᒥᔪᖅ ᑲᑎᒪᑎᓪᓗᒋᑦ.

ᓯᓚᐅᑉ ᐊᓯᔾᔨᖅᐸᓪᓕᐊᓂᖓ

ᒐᕙᒪᑐᖃᒃᑯᑦ ᐊᖏᖅᓯᒪᓂᖏᑦ ᐋᖅᑭᑦᓱᐃᓂᕐᒧᑦ ᐅᑭᐅᖅᑕᖅᑐᒥ ᓱᖏᐅᑎᕙᓪᓕᐊᒍᑎᖃᕐᓂᕐᒧᑦ ᖃᓄᖅᑑᕈᑎᒥᒃ, ᓇᓗᓇᐃᖅᑕᐅᓯᒪᔪᖅ ᑲᓇᑕᓕᒫᒥ ᐸᕐᓇᐅᑎᖓᓂ ᓴᓗᒪᔪᓂᒃ ᐱᕈᖅᐸᓪᓕᐊᒍᑎᖃᕐᓂᕐᒥᒃ ᓯᓚᐅᓪᓗ ᐊᓯᔾᔨᖅᐸᓪᓕᐊᓂᖓᓄᑦ, ᐅᖃᐅᓯᐅᓚᐅᕐᒥᔪᖅ ᐱᒻᒪᕆᐅᓂᖓᓂᒃ ᓇᓗᓇᐃᖅᓯᓯᒪᒍᑕᐅᓗᓂ ᐊᑕᖏᖅᑐᒋᑦ ᐱᖓᓱᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᐅᔪᑦ ᐱᔪᓐᓇᕐᓂᖃᑦᓯᐊᕈᓐᓇᖁᓪᓗᒋᑦ ᓱᖏᐅᑎᕙᓪᓕᐊᒍᑎᖃᕐᓂᕐᒥᒃ ᓯᓚ ᐊᓯᔾᔨᖅᐸᓪᓕᐊᑎᓪᓗᒍ. ᑖᓐᓇ ᐱᒻᒪᕆᐅᓗᐊᙳᐊᖅᑐᖅ ᐅᑭᐅᖅᑕᖅᑐᒥ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᓱᑲᑦᑐᐊᓗᒻᒥᒃ ᐱᕙᓪᓕᐊᓂᖓᓄᑦ.

ᐳᔪᕐᓗᐃᑦ/ᐃᓯᕐᓗᐃᑦ ᐊᑭᓕᖅᓱᖅᑕᐅᓂᖏᑦ

ᓯᕗᓕᖅᑏᑦ ᐅᖃᐅᓯᖃᓚᐅᕐᒥᔪᑦ ᐳᔪᕐᓗᐃᑦ/ᐃᓯᕐᓗᐃᑦ ᐊᑭᓕᖅᓱᖅᑕᐅᓂᖏᓐᓂᒃ ᓇᓗᓇᐃᖅᓯᓪᓗᑎᓪᓗ ᐊᔾᔨᒌᙱᑦᑐᓂᒃ ᐱᓕᕆᔾᔪᓯᐅᒍᓐᓇᖅᑐᓂᒃ ᐊᑐᓕᖅᑎᑕᐅᒐᔭᖅᑐᓂᒃ ᐅᑭᐅᖅᑕᖅᑐᒥ. ᐱᖓᓱᑦ ᐊᕕᑦᑐᖅᓯᒪᓂᐅᔪᑦ ᒐᕙᒪᑐᖃᒃᑯᓪᓗ ᐱᓕᕆᖃᑎᒌᑦᑐᑦ ᐊᑦᑐᐃᓂᖃᓗᐊᕋᔭᖁᓇᒍ ᐳᔪᕐᓗᐃᑦ/ᐃᓯᕐᓗᐃᑦ ᐊᑭᓕᖅᓱᖅᑕᐅᒋᐊᖃᓛᕐᓂᖏᓐᓄᑦ ᖁᕝᕙᓯᓗᐊᖅᑐᐊᓗᒻᒥᒃ ᐊᑦᑐᐃᓂᖃᖁᓇᒍ ᐅᑭᐅᖅᑕᖅᑐᒥᐅᓂᒃ ᐊᑭᑦᑐᕆᐊᕈᑕᐅᖁᓇᒍ ᐊᑭᑐᓗᐊᖅᑐᐊᓘᒌᖅᑐᒥᒃ ᐃᓅᓇᓱᐊᕐᓂᕐᒧᑦ ᐊᐅᓚᑦᓯᓂᕐᒧᓪᓗ.

ᐅᑭᐅᖅᑕᖅᑐᒥ ᐊᑐᐊᒐᓕᕆᓂᕐᒧᑦ ᐸᕐᓇᐅᑎ

ᓯᕗᓕᖅᑏᑦ ᓇᓗᓇᐃᖅᓯᒋᐊᒃᑲᓐᓂᓚᐅᖅᑐᑦ ᐱᒻᒪᕆᐅᓂᖓᓂᒃ ᐋᖅᑭᑦᓱᐃᒋᐊᖃᕐᓂᕐᒧᑦ ᐊᑐᐊᒐᓕᕆᓂᕐᒧᑦ ᐸᕐᓇᐅᑎᒥᒃ ᐅᑭᐅᖅᑕᖅᑐᒧᑦ ᑐᕌᒐᖃᕐᓗᓂ ᐱᔭᕆᐊᓕᖏᓐᓄᑦ ᑐᕌᒐᖏᓐᓄᓪᓗ ᐅᑭᐅᖅᑕᖅᑐᒥᐅᑕᐃᑦ. ᐃᓚᒋᔭᐅᓗᑎᒃ ᑲᔪᓯᒍᑎᖃᕐᓂᖅ ᐊᔩᕈᑎᖃᕐᓂᕐᒥᒃ ᐊᑐᓕᖅᑎᑦᓯᕙᓪᓕᐊᓂᕐᒥᓪᓗ ᓴᙱᓂᖅᑖᕐᓂᕐᒧᑦ ᐊᖏᖃᑎᒌᒍᑎᓂᒃ. ᐱᓗᐊᙳᐊᕐᓂᐊᖅᑐᖅ ᐅᑭᐅᖅᑕᖅᑐᒧᑦ ᐊᑐᐊᒐᓕᕆᓂᕐᒧᑦ ᐸᕐᓇᐅᑎᓕᐅᕐᓂᖅ ᐊᖏᖅᓯᒪᒋᐊᖃᕐᓂᖏᑦ ᒐᕙᒪᑐᖃᒃᑯᑦ ᖃᓄᖅᑑᕈᑕᐅᓯᒪᔪᓂᒃ ᑮᓇᐅᔭᖃᖅᑎᑦᓯᖃᑦᑕᓂᕐᒧᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᐅᔪᓄᑦ ᑐᕌᖓᓂᖃᑦᓯᐊᕐᓗᑎᒃ ᐊᑐᓂᑦ ᐊᕕᑦᑐᖅᓯᒪᓂᐅᔪᑦ ᐱᔭᕆᐊᖃᓪᓚᑦᑖᖅᑕᖏᓐᓄᑦ ᐃᑲᔪᕐᓂᖃᕐᓗᑎᓪᓗ ᒪᑭᒪᔾᔪᑕᐅᒍᓐᓇᖅᑐᓂᒃ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑕᐅᒍᓐᓇᖅᑐᓂᒃ, ᓇᓗᓇᐃᔭᖅᓯᒪᔪᑦ ᒪᓕᑦᑐᒋᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᐅᔪᑦ ᑕᑯᔪᒪᔭᖏᑦ ᒪᑭᒪᔾᔪᑎᓕᕆᓂᕐᒧᑦ ᓴᖅᑭᖅᑕᐅᓚᐅᖅᑐᖅ ᐅᑭᐅᖅᑕᖅᑐᒥ ᓯᕗᓕᖅᑎᖏᓐᓄᑦ 2017-ᖑᑎᓪᓗᒍ.

ᓯᕗᓕᖅᑏᑦ ᓯᕗᒧᒋᐊᖅᑎᑦᓯᕙᓪᓕᐊᖏᓐᓇᕐᓂᐊᖅᑐᑦ ᑕᒪᒃᑯᓂᖓ, ᕿᒥᕐᕈᐃᓛᖅᑐᑎᓪᓗ ᐱᕙᓪᓕᐊᓂᐅᓯᒪᔪᓂᒃ ᑭᖑᓪᓕᕐᒥ ᐅᑭᐅᖅᑕᖅᑐᒥ ᓯᕗᓕᖅᑏᑦ ᑲᑎᒪᓕᕐᒥᑉᐸᑕ ᓄᓇᕗᒻᒥᐅᓛᖅᑐᓂ.

"ᑕᐃᒪᐃᑦᑐᓂ ᑲᑎᒪᓂᐅᔪᓂ ᐅᖃᖃᑎᒌᖃᑦᑕᕈᓐᓇᖅᑐᒍᑦ ᐊᔾᔨᐅᙱᑦᑐᓂᒃ ᐊᑦᓱᕈᕐᓇᖅᑐᒃᑰᕈᑎᖃᕐᓂᑎᓐᓂᒃ, ᐃᓕᑉᐸᓪᓕᐊᖃᑎᒌᓪᓗᑕ ᐊᔾᔨᒌᓂᒃ ᐱᓕᕆᔾᔪᓯᑦᑎᓐᓂᒃ, ᐱᕚᓪᓕᕈᑎᖃᕐᓂᒥᓪᓗ ᓴᙱᓂᕆᔭᑦᑎᓐᓂᒃ ᐅᑭᐅᖅᑕᖅᑐᒥᐅᑕᐅᓪᓗᑕ ᐊᔾᔨᐅᙱᑦᑐᓂᒃ ᐱᔭᕆᐊᓕᑦᑎᓐᓂᒃ ᐃᓱᒪᒋᔭᑦᑎᓂᓪᓗ ᑐᓴᖅᑕᐅᑎᑦᓯᒍᓐᓇᕐᓗᑕ ᑐᑭᓯᔭᐅᒍᓐᓇᕐᓗᑕᓗ ᒐᕙᒪᑐᖃᒃᑯᓐᓄᑦ," ᐅᖃᖅᓯᒪᔪᖅ ᓯᕗᓕᖅᑎ ᖁᐊᓴ, ᑐᙵᓱᑦᑎᑦᓯᔨᐅᓚᐅᖅᑐᖅ ᑲᑎᒪᑎᓪᓗᒋᑦ ᐋᑐᕙᒥ. "ᑮᓇᐅᔭᖃᖅᑎᑕᐅᒻᒪᕆᒋᐊᓕᐅᔪᒍᑦ ᐅᑭᐅᖅᑕᖅᑐᒥ ᐊᖑᒻᒪᑎᒍᓐᓇᖅᓯᓕᖁᓪᓗᑕ ᑲᓇᑕᒥ ᐊᓯᖏᓐᓃᑦᑐᓄᑦ. ᐊᑦᓱᕉᑎᖃᖅᑐᒍᑦ ᐱᓕᕆᖃᑎᒌᓐᓂᕐᒧᑦ ᓯᕗᓕᖅᑎᐅᓪᓗᑕ ᐊᔭᐅᖅᑐᐃᒍᑎᖃᖅᑐᑕ ᐊᑲᐅᓈᕈᔾᔭᐅᑦᓯᐊᓕᕈᓐᓇᖁᓪᓗᒋᑦ ᐅᑭᐅᖅᑕᖅᑐᒥ ᐅᑭᐅᖅᑕᖅᑐᒥᐅᑕᓕᒫᓄᓪᓗ."

"ᓱᓕ ᐊᑦᓱᕈᕐᓇᖅᑐᒻᒪᕆᓐᓂᒃ ᓵᖓᔭᐅᔪᑦ ᐅᑭᐅᖅᑕᖅᑐᒥ ᑲᓇᑕᐅᑉ ᐅᔾᔨᕆᒋᐊᓕᖏᓐᓂᒃ ᑮᓇᐅᔭᖃᖅᑎᒋᐊᓕᖏᓐᓂᓪᓗ. ᖁᕕᐊᑦᑐᒍᑦ ᐱᓕᕆᖃᑎᖃᕈᒪᓂᕋᕐᖓᑕ ᐅᕙᑦᑎᓐᓂᒃ ᑲᒪᒋᓗᒋᑦ ᐱᔭᕆᐊᓕᕗᑦ ᓂᕆᐅᑦᓯᐊᖅᑐᖓᓗ ᑲᑐᔾᔨᖃᑎᒌᑉᐸᓪᓕᐊᓂᐊᕐᓂᑎᓐᓂᒃ ᐃᑲᔪᖅᓱᖅᑕᐅᓂᐊᕐᓂᑎᓐᓂᓪᓗ," ᐅᖃᖅᓯᒪᔪᖅ ᓯᕗᓕᖅᑎ ᒪᒃᓚᐅᑦ.

"ᖁᕕᐊᑦᑐᖓ ᐃᓚᐅᖃᑕᐅᒍᓐᓇᓚᐅᕋᒪ ᐅᑭᐅᖅᑕᖅᑐᒥ ᓯᕗᓕᖅᑎᐅᖃᑎᓐᓄᑦ ᐋᑐᕙᒥ. ᐅᖃᖃᑎᒌᒍᑎᖃᖅᓯᒪᔪᒍᑦ ᐊᒥᓱᓂᒃ ᐃᓱᒫᓘᑎᒋᔭᑦᑎᓐᓂᒃ ᐊᑑᑎᖃᑦᓯᐊᖅᑐᓂᓗ ᐅᖃᓕᒪᒋᐊᖃᕐᓂᑎᓐᓂᒃ ᒐᕙᒪᑐᖃᒃᑯᓐᓂ ᒥᓂᔅᑕᓄᑦ ᐊᑕᐅᓯᕐᒥᒃ ᓂᐱᖃᕐᓗᑕ. ᐊᔾᔨᐅᙱᑦᑐᓂᒃ ᐊᑑᑎᖃᐃᓐᓇᕋᑦᑕ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᑦᑎᓐᓂ, ᐱᓕᕆᐊᖃᕐᓂᕐᓗ ᑕᒪᒃᑯᓂᖓ ᐅᑭᐅᖅᑕᖅᑐᒥ ᐃᓱᒫᓘᑕᐅᔪᓂᒃ ᑲᑐᔾᔨᒍᑎᒋᓗᒋᑦ ᖁᕝᕙᐹᓪᓕᕈᑕᐅᓂᐊᖅᑐᑦ ᓴᖅᑭᖅᐸᑦᑕᑎᓐᓂᒃ ᒐᕙᒪᑐᖃᒃᑯᓐᓄᑦ. ᐱᕙᓪᓕᐊᓂᖃᑦᓯᐊᖅᑐᓂᒃ ᑲᑎᒪᓂᖃᓚᐅᖅᑐᒍᑦ ᖁᔭᓐᓇᒦᖅᑕᒃᑲᓗ ᐅᑭᐅᖅᑕᖅᑐᒥ ᓯᕗᓕᖅᑎᐅᖃᑏᒃᑲ ᐱᕕᖃᖅᑎᑕᐅᒍᓐᓇᓚᐅᕋᒪ," ᐅᖃᖅᓯᒪᔪᖅ ᓯᕗᓕᖅᑎ ᓯᐅᓪᕗ.

-30-

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᑦ:

ᕼᐃᓗᕆ ᑲᐃᓯ
ᐱᕙᓪᓕᐊᔪᓕᕆᓂᕐᒧᑦᖃᐅᔨᒋᐊᕐ
ᓯᕗᓕᖅᑎ ᐹᓪ ᖁᐊᓴᐅᑉ ᐊᓪᓚᕝᕕᖓᓂ
ᓄᓇᕗᑦ ᒐᕙᒪᖓ
867-975-5059
hcasey@gov.nu.ca

ᓵᓚᑦ ᑎᒡᓇᔅ
ᐱᕙᓪᓕᐊᔪᓕᕆᓂᕐᒧᑦ ᑐᓴᕋᑦᓴᓕᕆᓂᕐᒧᓪᓗ ᑐᑭᒧᐊᖅᑎᑦᓯᔨ
ᒥᓂᔅᑕᓄᑦ ᑐᓴᕋᑦᓴᓕᕆᓂᖅ ᐊᑐᐊᒐᓕᕆᓂᕐᓗ
ᓄᓇᑦᓯᐊᕐᒥ ᒐᕙᒪᖓ
867-757-9140 ᐃᓂᖓ 11092
charlotte_digness@gov.nt.ca

ᓴᓂ ᐹᑦᔅ
ᑐᑭᒧᐊᖅᑎᑦᓯᔨ, ᑐᓴᕋᑦᓴᓕᕆᓂᖅ
ᓯᕗᓕᖅᑎᐅᑉ ᐊᓪᓚᕝᕕᖓᓂ
ᔫᑳᓐ ᒐᕙᒪᖓ
867-393-7478
sunny.patch@gov.yk.ca