ᓯᕗᓕᖅᑎ ᓴᕕᑲᑖᖅ ᑐᓴᖅᑎᑦᑎᔪᖅ ᑎᒃᑯᐊᖅᓯᓂᕐᒥᒃ ᐊᖏᔪᖅᑲᐅᑎᓄᑦ ᒫᑦᓯ 24, 2020

ᒫᔾᔨ 24, 2020

ᓯᕗᓕᖅᑎ ᓴᕕᑲᑖᖅ ᑐᓴᖅᑎᑦᑎᔪᖅ ᑎᒃᑯᐊᖅᓯᓂᕐᒥᒃ ᐊᖏᔪᖅᑲᐅᑎᓄᑦ

ᐃᖃᓗᐃᑦ, ᓄᓇᕗᑦ (ᒫᑦᓯ 24, 2020) − ᓯᕗᓕᖅᑎ ᔫ ᓴᕕᑲᑖᖅ ᐅᓪᓗᒥ ᑐᓴᖅᑎᑦᑎᔪᖅ ᑎᒃᑯᐊᖅᓯᓂᕐᒥᒃ ᓯᑏᕙᓐ ᒫᓐᓱᓪ ᒥᓂᔅᑕᐅᑉ ᑐᒡᓕᐊᓄᑦ ᒪᓕᒐᓕᕆᔨᒃᑯᓐᓄᑦ, ᐊᑐᓕᕐᓂᐊᖅᑐᖅ ᐊᐃᕆᓕ 27, 2020.

“ᒫᓐᓱᓪ ᐱᒃᑯᓇᖅᑐᒃᑯᑦ ᐱᓕᕆᔨᒻᒪᕆᐅᓯᒪᔪᖅ ᓄᓇᕗᒻᒥ ᑕᑯᒃᓴᐅᓂᖃᑦᑎᐊᕐᖢᓂᓗ ᐊᑐᕐᓂᑯᖃᑦᑎᐊᕐᖢᓂᓗ ᐱᓕᕆᕝᕕᖕᒧᑦ,” ᐅᖃᖅᓯᒪᔪᖅ ᓯᕗᓕᖅᑎ ᓴᕕᑲᑖᖅ. “ᓇᓗᙱᑦᑐᖓ ᐊᑐᖅᓯᒪᓂᑯᒋᔭᖏᑦ ᐊᔪᙱᑕᖏᓪᓗ ᐃᑲᔪᕐᓂᐊᕐᓂᖏᓐᓂᒃ ᓯᕗᓕᖅᓯᓗᓂ ᓴᙱᓂᖏᓐᓂ ᐃᖅᑲᓇᐃᔭᖅᑎᑦ ᐱᓕᕆᔪᑦ ᐱᑎᑦᑎᓗᑎᒃ ᐱᔭᕆᐊᖃᒻᒪᕆᒃᑐᓂᒃ ᐱᓕᕆᐊᒃᓴᓂᒃ ᐱᔨᑦᑎᕋᐅᑎᓂᒃᓗ ᒪᓕᒐᓕᕆᔨᒃᑯᓐᓄᑦ ᓄᓇᕗᒻᒥ.”

ᒫᓐᓱᓪ ᐱᕈᖅᓴᓚᐅᖅᑐᖅ ᓄᓇᕗᒻᒥ ᑐᑭᒧᐊᒃᑎᑦᑎᔨᐅᓚᐅᖅᑐᕐᓗ ᓯᓚᑦᑐᖅᓴᕐᕕᒃᔪᐊᖅ ᓵᔅᑳᑦᑐᐊᓐ ᓄᓇᕗᒻᒥ ᒪᓕᒐᓕᕆᓂᕐᒧᑦ ᐃᓕᓐᓂᐊᕈᑎᓄᑦ ᑕᐃᒪᙵᑦ ᒪᐃ 2017. ᓯᕗᓂᖓᒍᑦ, ᒫᓐᓱᓪ ᐃᖅᑲᓇᐃᔭᕐᖢᓂ ᓄᓇᕗᒻᒥ ᒪᓕᒐᓕᕆᔨᒃᑯᓐᓄᑦ ᐊᕐᕌᒍᒐᓴᖕᓂᒃ ᐅᓄᖅᑐᓂᒃ ᐃᖅᑲᓇᐃᔮᒥᓂ, ᐃᓚᐅᓪᓗᑎᒃ ᐃᓇᖏᐅᑎᓪᓗᓂ ᒪᓕᒐᓕᕆᔨᒻᒪᕆᐅᑉ ᑐᒡᓕᒃᑲᓐᓂᖓ, ᑐᑭᒧᐊᑦᑎᑦᓯᔨ ᐊᑐᐊᒐᓕᕆᓂᕐᒧᑦ ᐸᕐᓇᐃᓂᕐᒧᓪᓗ ᐊᒻᒪ ᐱᖁᔭᓕᕆᔨ.

ᐊᒻᒪᒃᑲᓐᓂᖅ, ᐊᖏᔪᖅᑳᖑᓯᒪᔪᖅ ᑕᒪᒃᑮᓄᑦ ᒪᓕᒐᓕᕆᔩᑦ ᑲᑐᔾᔨᖃᑎᒌᑦ ᓄᓇᕗᒻᒥ ᐊᒻᒪ ᓄᓇᕗᒻᒥ ᐃᖅᑲᓇᐃᔭᕐᕕᖕᒥ ᐊᕕᑦᑐᖅᓯᒪᓂᖏᑦ ᑲᓇᑕᒥᐅᓄᑦ ᑭᒡᓕᖅ ᑲᑐᔾᔨᖃᑎᒌᖏᓐᓄᑦ. ᐱᔨᑦᑎᖅᓯᒪᖕᒥᔪᖅ ᑲᑎᒪᔨᐅᓪᓗᓂ ᓄᓇᕗᒻᒥ ᒪᓕᒐᓕᕆᔩᑦ ᑲᑎᒪᔨᖏᓐᓄᑦ, ᐃᓚᒋᔭᐅᓪᓗᓂ ᓄᓇᕗᒻᒥ ᐃᓄᐃᑦ ᐱᔪᓐᓇᐅᑎᖏᓐᓄᑦ ᑭᒡᒐᖅᑐᐃᔨᓄᑦ, ᐊᒻᒪ ᐃᓚᒋᔭᐅᓪᓗᓂ ᓄᓇᕗᒻᒥ ᐃᖅᑲᖅᑐᐃᓂᓕᕆᔨᒃᑯᑦ ᐅᖃᐅᔾᔪᐃᒋᐊᖅᑎ ᑲᑎᒪᔨᕋᓛᖏᓐᓄᑦ.

ᓯᕗᓕᖅᑎ ᓴᕕᑲᑖᖅ ᖁᔭᒋᓪᓗᓂᒋᒃ ᑕᒪᒃᑮ ᐃᑐᕆᐊᓐ ᓯᐅᓪᒃ ᐊᒻᒪ ᓴᐃᒪᓐ ᐊᕙ ᐱᓇᓱᒃᓯᒪᓂᖏᓐᓄᑦ ᓯᕗᓕᖅᑎᐅᓂᖏᓐᓄᓪᓗ ᐃᖅᑲᓇᐃᔮᕆᑎᓪᓗᒋᑦ ᑭᖑᕝᕕᖅᓯᓯᒪᓂᕐᒥᒃ ᒥᓂᔅᑕᐅᑉ ᑐᓪᓕᐊᓂᑦ ᐱᓕᕆᕝᕕᖕᒧᑦ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᑲᐃᑦ ᒪᒃᓚᐅᑦ

ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᔫ ᓴᕕᑲᑖᖅ ᑎᑎᕋᕐᕕᐊᓂ

867-975-5059;

867-222-5763

cmacleod@gov.nu.ca