ᓯᕗᓕᖅᑎ ᓴᕕᑲᑖᖅ ᓇᓗᓇᐃᖅᓯᔪᖅ ᐱᓗᐊᙳᐊᖅᑐᓂᒃ ᑎᒃᑯᐊᖅᑕᐅᔪᓂᒃ

ᔫᓂ 20, 2018

ᐃᖃᓗᐃᑦ, ᓄᓇᕗᑦ –  ᓯᕗᓕᖅᑎ ᔫ ᓴᕕᑲᑖᖅ ᖁᕕᐊᑦᑐᖅ ᓇᓗᓇᐃᖅᓯᒍᓐᓇᕋᒥ ᑎᒃᑯᐊᖅᑕᐅᓂᖓᓂᒃ ᕗᔨᓂᐊ ᒨᓐᔅ ᓯᕗᓕᖅᑎᒧᑦ ᑎᑎᕋᖅᑎᐅᓂᖓᓂᒃ. ᑎᒃᑯᐊᖅᑕᐅᓂᖓ ᐱᒋᐊᓛᖅᑐᖅ ᔪᓚᐃ 3, 2018.

"ᖁᕕᐊᑦᑐᖓ ᒥᔅ ᒨᓐᔅ ᐊᖏᖅᓯᒪᒻᒪᑦ ᐃᖅᑲᓇᐃᔮᒥᒃ. ᑲᑐᔾᔨᖃᑎᒌᑦᑎᐅᓂᖓ ᐊᑦᓱᕉᑎᖃᖃᑦᑕᕐᓂᖓᓗ ᐃᑲᔪᖅᓱᐃᓂᕐᒧᑦ ᐃᓄᐃᑦ ᐃᖅᑲᓇᐃᔭᖅᑎᑕᐅᒋᐊᖃᕐᓂᖏᓐᓂᒃ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᓐᓂ ᐊᑑᑎᖃᑦᓯᐊᕐᓂᐊᖅᑐᑦ ᐊᓪᓚᕝᕕᑦᑎᓐᓄᑦ," ᐅᖃᖅᓯᒪᔪᖅ ᓯᕗᓕᖅᑎ ᓴᕕᑲᑖᖅ.

2014-ᒥᓂᑦ, ᒥᔅ ᒨᓐᔅ ᒥᓂᔅᑕᒧᑦ ᑐᒡᓕᒃᑲᓐᓂᐅᓯᒪᔪᖅ ᒐᕙᒪᓕᕆᔨᒃᑯᓐᓂ, ᐱᓕᕆᐊᑦᓴᖃᖅᑎᐅᓪᓗᓂ ᐊᐅᓚᑦᓯᓂᕐᒧᑦ ᖃᓄᖅᑑᕈᑎᖃᕐᓂᒃᑯᑦ ᐸᕐᓇᐃᓂᕐᒥᒃ ᑐᑭᒧᐊᖅᑎᑦᓯᓂᕐᒥᓪᓗ ᓄᓇᕗᑦ ᒐᕙᒪᒃᑯᖏᓐᓂ. ᓯᕗᕐᖓᒍᑦ, ᐊᐅᓚᑦᓯᔨᒻᒪᕆᐅᓚᐅᖅᑐᖅ ᓄᓇᕗᑦ ᑐ ᙵᕕᒃᑯᓐᓂ.

ᖄᒃᑲᓐᓂᖓᒍᑦ, ᑲᐃᑦ ᒪᒃᓚᐅᑦ, ᑐᓴᕋᑦᓴᓕᕆᓂᕐᒧᑦ ᑐᑭᒧᐊᖅᑎᑦᓯᔨᐅᓚᐅᖅᑐᖅ ᓄᓇᕗᑦ ᒐᕙᒪᒃᑯᖏᓐᓂ, ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎᐅᓂᐊᓕᖅᑐᖅ. ᒪᓕᒐᓕᐅᖅᑎᐅᓚᐅᖅᓯᒪᔪᖅ ᕌᓐ ᐊᓕᐊᑦ ᓯᕗᓕᖅᑎ ᓴᕕᑲᑖᖅ ᐃᑲᔪᖅᑎᒌᓐᓇᕐᓂᐊᖅᑕᖓ ᐊᒻᒪᓗ ᑐᐊᑲᔅ ᓇᑖᖅ-ᕼᐊᒧᐃ ᓱᓕ ᐊᓪᓚᑦᑎᒋᔭᐅᓂᐊᖅᑐᖅ.

"ᐊᓪᓚᕝᕕᑦᑎᓐᓂ ᐊᑕᖏᖅᑐᓂᒃ ᐃᖅᑲᓇᐃᔭᖅᑎᖃᓕᖅᑎᓪᓕᖓ, ᐱᒋᐊᓪᓚᒍᓐᓇᖅᓯᔪᖓ. ᑲᑐᔾᔨᓗᑕ, ᐊᑦᓱᕉᑎᖃᕐᓂᐊᖅᑐᒍᑦ ᓄᓇᕗᒻᒥᐅᓄᑦ ᖁᕕᐊᓱᒻᒪᕆᑦᑐᖓᓗ ᐱᓕᕆᖃᑎᖃᖅᐸᓪᓕᐊᓂᕐᒥᒃ ᑲᑐᔾᔨᖃᑎᒋᕙᑦᑕᑎᓐᓂᒃ ᐃᓚᐅᖃᑕᐅᒋᐊᓕᓐᓂᓪᓗ ᐱᓕᕆᐊᕆᒍᓐᓇᖅᓯᖁᓪᓗᑎᒍ ᑐᕌᒐᕗᑦ," ᐅᖃᖅᓯᒪᔪᖅ ᓯᕗᓕᖅᑎ ᓴᕕᑲᑖᖅ.

###

ᐱᕙᓪᓕᐊᔪᓕᕆᔨᓄᑦ ᖃᐅᔨᒋᐊᕐᕕᑦᓴᖅ:

ᑲᐃᑦ ᒪᒃᓚᐅᑦ
ᐱᕙᓪᓕᐊᔪᓕᕆᓂᕐᒧᑦ ᑎᑎᕋᖅᑎ
ᓯᕗᓕᖅᑎ ᓴᕕᑲᑖᖅ ᐊᓪᓚᕝᕕᖓᓂ
867-975-5059
cmacleod@gov.nu.ca