ᓄᕙᒡᔪᐊᕐᓇᖅ-19−ᒧᑦ ᓄᓇᕗᑦ ᒐᕙᒪᖓᑕ ᓄᑖᙳᕆᐊᖅᑎᑕᖏᑦ - ᒫᑦᓯ 19, 2020

ᒫᔾᔨ 19, 2020

 

ᓄᕙᒡᔪᐊᕐᓇᖅ-19−ᒧᑦ ᓄᓇᕗᑦ ᒐᕙᒪᖓᑕ ᓄᑖᙳᕆᐊᖅᑎᑕᖏᑦ



ᓄᑖᖑᓚᑦ ᑐᓴᒐᒃᓴᑦ ᓄᓇᕗᑦ ᒐᕙᒪᒃᑯᖏᓐᓂᑦ:

  • ᒫᓐᓇᒧᑦ, ᓄᕙᒡᔪᐊᕐᓇᖅ-19−ᒥ ᖃᓂᒻᒪᒃᓯᒪᔪᖃᕐᒪᖔᑦ ᓇᓗᓇᖅᑐᖅ ᓱᓕ ᓄᓇᕘᒥ.
  • ᐋᓐᓂᐊᕕᖕᒥ ᖃᓂᒻᒪᓯᕐᓂᒃ ᐊᐃᑦᑐᕐᓘᑕᐅᔪᓐᓇᖅᑐᓂᒃ ᐱᓕᕆᔨᐅᖃᑎᒌᑦ70−ᐸᓗᖕᓂᒃ ᐃᓄᖕᓂᒃ ᖃᐅᔨᓴᖅᓯᓯᒪᓕᖅᑐᑦ.  24-ᖑᓪᓗᑎᒃ ᐃᓄᐃᑦ ᖃᐅᔨᓴᖅᑕᐅᕌᓂᒃᓯᒪᔪᑦ ᐊᓂᑎᑕᐅᓯᒪᓕᖅᑐᑦ ᐃᓄᖃᙱᑦᑐᒦᑦᑕᕆᐊᖃᕈᓐᓃᖅᖢᑎᒡᓗ.
  • ᒐᕙᒪᕗᑦ ᐅᓪᓗᒥ ᐊᖏᖅᓯᖅᑲᐅᕗᑦ $25,000-ᓂᒃ ᑕᒪᐃᓐᓄᑦ ᐊᖑᓇᓱᒃᑐᓕᕆᔨᓄᑦ ᓄᓇᓕᖕᓄᑦ ᐊᖑᓇᓱᒋᐊᕈᑎᒃᓴᓂᒃ, ᓄᓇᖅᑲᑎᒌᓄᑦ ᓂᕿᒃᓴᕆᔭᐅᓂᐊᖅᑐᓄᑦ.
  • ᐊᖏᖅᓯᖅᑲᐅᖕᒥᔪᒍᑦ $531,000−ᓂᒃ ᐊᑭᓕᒃᑲᓐᓂᕆᐊᓕᖕᓄᑦ ᐊᓯᐅᔨᔭᐅᑐᐃᓐᓇᕆᐊᓕᖕᓄᑦ ᓄᓇᕗᒻᒥ ᐸᐃᕆᕕᖕᒥ ᐃᖅᑲᓇᐃᔭᖅᑎᓄᑦ ᓚᐃᓴᓐᓯᖃᖅᑐᑦ ᐸᐃᕆᕕᖕᓂ, ᑮᓇᐅᔭᓂᒃ ᐊᓯᐅᔨᑐᐃᓐᓇᕐᓂᐊᕐᒪᖔᑦ ᐃᓱᒫᓘᑎᖃᔾᔮᙱᒻᒪᑕ.
  • ᑭᓇᑐᐃᓐᓇᑦᑎᐊᖅ ᓄᓇᕗᒧᐊᖅᑐᕕᓂᖅ ᓴᓇᑦᑕᐃᓕ, ᒫᑦᓯ 15−ᒥ ᐃᒻᒥᓂᒃ ᐅᐸᒃᑕᐅᑦᑕᐃᓕᒪᑎᑦᑕᕆᐊᖃᖅᐳᑦ ᖃᐅᔨᑎᓪᓗᒋᓪᓗ  ᐊᓐᓂᐊᕕᖕᒥᐅᑕᑦ ᖃᓂᒻᒪᒃᐸᓪᓕᐊᑐᐃᓐᓇᖅᑰᔨᒃᐸᑕ.
  • ᓄᓇᕗᑦ ᒐᕙᒪᒃᑯᑦ ᓅᑎᑦᑎᕙᓪᓕᐊᔪᒪᓕᕐᒥᔪᑦ ᐃᖅᑲᓇᐃᔭᖅᑎᑦ ᐊᐃᓯᒪᓗᑎᒃ ᐃᖅᑲᓇᐃᔭᖔᑲᑕᓕᕐᓗᑎᒃ ᓄᓇᕗᑦ ᒐᕙᒪᒃᑯᓐᓂ ᐱᔭᕆᐊᖃᓪᓚᕆᙱᓐᓂᖅᓴᓂᒃ ᐃᖅᑲᓇᐃᔮᓖᑦ ᐱᓕᕆᐊᖑᐃᓐᓇᖅᐳᑦ.
  • ᓄᓇᕗᑦ ᒐᕙᒪᒃᑯᑦ ᐱᓕᕇᓐᓇᖅᐳᑦ ᐱᓕᕆᐊᕆᔭᐅᖔᕈᓐᓇᖅᑐᓂᒃ ᒪᒃᐱᖅᓯᒪᑏᓐᓇᕋᓱᒃᖢᒋᑦ ᓂᕆᔭᒃᓴᖃᙱᑦᑐᓄᑦ ᓂᕆᔭᒃᓴᖅᑖᕐᕖᑦ/ᖃᔪᖅᑐᕐᕖᑦ ᓄᓇᕘᓕᒫᒥ.
  • ᓄᓇᕗᒥᐅᑦ ᑐᐅᕕᕐᓗᑎᒃ ᑲᑎᖅᓱᐃᖁᔭᐅᙱᑦᑑᒐᓗᐊᑦ ᓂᕆᔭᒃᓴᓂᒃ  − ᓱᓕ ᑎᑭᑕᐅᑲᑕᐃᓐᓇᕋᑦᑕ ᑭᓱᒐᓚᖕᓂᒃ ᓂᕿᓂᒡᓗ. ᓄᕙᒡᔪᐊᕐᓇᖅ-19 ᓂᐅᕕᕐᕕᖕᓂᑦ ᓂᐅᕕᐊᒃᓴᓂᒃ ᐊᒥᒐᕈᑕᐅᓕᔾᔮᙱᑦᑐᑦ, ᑭᓯᐊᓂ ᐅᖓᑎᓗᐊᖓᓄᑦ ᓂᐅᕕᖅᑐᑦ ᓄᖑᕋᐃᑎᑦᑎᖔᕐᓂᐊᖅᑐᑦ.  ᐱᔭᕆᐊᖃᖅᑕᓯ ᓈᒻᒪᓈᑐᐃᓐᓇᖅᐸᒡᓗᒋᑦ ᐊᓯᕗᑦᑕᐅᖅ ᐱᔭᕆᐊᖃᕐᒥᔪᑦ ᐃᖅᑲᒋᖕᒥᓗᒋᑦ. 
  • ᓈᓚᒃᐸᒡᓗᒋᑦ ᐅᖃᐅᓯᐅᔪᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓪᓚᕆᖕᓂᑦ, ᐊᔪᕈᓐᓃᖅᓴᐅᑎᒌᓐᓇᕐᓗᒍ ᐃᓅᖃᑎᑦᑎᓐᓂᒃ ᖃᓂᒃᓴᓗᐊᖅᑕᐃᓕᒪᓂᖅ ᒪᓖᓐᓇᕐᓗᒋᓪᓗ ᐱᑕᖃᖅᑎᑦᑎᑦᑕᐃᓕᒪᓂᕐᒧᑦ ᐱᓕᕆᐊᖑᔪᑦ.
  • ᐋᓐᓂᐊᕕᓕᐊᓚᐅᙱᓐᓂᔅᓯᓐᓂ ᐅᖃᓗᖅᑳᖃᑦᑕᕐᓗᓯ. ᐱᒻᒪᕆᐅᖕᒪᑦ ᐅᖃᓘᑎᒃᑯᑦ ᖃᐅᔨᓴᖅᑕᐅᖅᑳᕆᐊᖃᕐᓂᔅᓯᓐᓂᒃ.
  • ᓄᓇᕗᑦ ᒐᕙᒪᖓ ᑲᔪᓯᑎᑦᑏᓐᓇᕐᓂᐊᖅᑐᖅ ᐱᔨᑦᑎᕋᕈᑕᐅᕙᒃᑐᓂᒃ ᓄᓇᕗᒥᐅᓄᑦ. 
  • ᒫᑦᓯ 20-ᒥᑦ ᐱᒋᐊᕐᓗᒍ, ᐃᒥᕐᕕᕋᓚᓕᒫᑦ ᒪᑐᔭᐅᓂᐊᖅᐳᑦ.
  • ᓂᕆᔭᖅᑐᕐᕕᓕᒫᑦ ᒪᒃᐱᖅᓯᒪᐃᓐᓇᕐᓂᐊᖅᑐᑦ ᑭᓯᐊᓂ ᑎᑭᓴᕐᓗᒋᑦ/ᐋᑦᑎᕕᐅᕙᒡᓗᓯ ᐊᑭᓖᔭᖅᑐᖅᑐᓪᓗ ᖁᓖᓐᓇᐃᑦ ᑐᑭᓕᕇᒡᓗᑎᒃ ᐅᑕᖅᑭᔪᓐᓇᖅᐳᑦ. ᐄᔭᒐᖅᑖᕐᕖᑦ, ᐅᖅᓱᐊᓗᒃᑖᕐᕖᑦ, ᓂᕿᑖᕐᕖᓪᓗ ᓂᐅᕕᕐᕖᑦ ᒪᒃᐱᖅᓯᒪᐃᓐᓇᕐᓂᐊᖅᑐᑦ.

ᐃᓚᒋᓪᓗᓂᐅᒃ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓄᑦ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐊᖅᓵᕐᓇᖅᑐᒧᑦ ᐱᓯᒪᓕᑐᐃᓐᓇᕆᐊᖃᕐᓂᕐᒧᑦ ᑕᒪᑐᒥᖓ ᓄᕙᒡᔪᐊᕐᓇᖅ-19−ᒥᒃ, ᓄᓇᕗᑦ ᒐᕙᒪᒃᑯᖏᑕ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ:





ᐋᓐᓂᐊᖃᖕᓇᙱᑦᑐᓕᕆᔨᒃᑯᓐᓂᑦ ᓄᑖᙳᕆᐊᖅᑎᑕᐅᔪᑦ ᑐᓴᒐᒃᓴᑦ

ᐋᓐᓂᐊᕕᖕᒥᐅᑕᑦ ᓇᓗᓇᐃᖅᓯᕗᑦ ᑐᐊᕕᕐᓇᖅᑑᓕᕐᓂᖓᓂᒃ.

  • ᐱᔭᕆᐊᖃᓪᓚᕆᒃᑐᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᐅᑎᑦ ᐃᖏᕐᕋᐃᓐᓇᕐᓂᐊᖅᑐᑦ.
  • ᐋᓐᓂᐊᕕᖕᒥ ᐃᖅᑲᓇᐃᔭᖅᑎᓕᒫᑦ ᐃᖅᑲᓇᐃᔭᕆᐊᖃᓪᓚᕆᖕᒪᑕ ᐃᖅᑲᓇᐃᔭᕆᐊᖃᒃᑲᓐᓂᕌᖓᑕ ᐃᖅᑲᓇᐃᔭᒃᑲᓐᓂᖃᑦᑕᕐᓂᐊᖅᑐᑦ ᑕᐃᒪᐃᑦᑕᕆᐊᖃᕌᒐᑦ.  

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᑐᓕᖅᑎᑦᑎᕗᑦ ᖃᐅᔨᓴᖅᓯᓂᕐᒧᑦ ᐱᓕᕆᐊᖑᖃᑦᑕᕐᓂᐊᖅᑐᒥᒃ ᑕᒪᐃᓐᓄᑦᑎᐊᖅ ᐋᓐᓂᐊᕕᓕᐊᖅᖢᑎ ᐊᐅᓪᓚᖅᐸᒃᑐᓄᑦ ᐃᓗᐊᖅᓴᖅᑕᐅᔭᖅᑐᖅᖢᑎᒃ, ᑕᐃᒪᐃᓕᐅᖅᑕᐅᖃᑦᑕᕐᓂᐊᖅᑐᑦ ᐱᓚᐅᙱᓐᓂᕐᒥᓂ ᐊᔪᙱᑎᑕᐅᓕᕐᓂᕐᒥᒃ ᐊᐃᕐᕋᐅᔭᕆᐊᒃᓴᖅ ᓄᓇᒥᓄᑦ.

ᓄᓇᓕᖕᒥᐅᑦ ᐊᐱᕆᔭᐅᕗᑦ ᐅᐸᒃᓯᑦᑕᐃᓕᒪᖃᑦᑕᖁᔭᐅᓪᓗᑎᒃ ᐋᓐᓂᐊᕕᓕᐊᕐᕕᖕᓂᒃ  ᐋᓐᓂᐊᕕᖕᒥᒡᓗ ᐊᔪᕐᓇᙱᑐᐊᕌᖓᑦ ᐱᑕᖃᖅᑎᑦᑎᑦᑕᐃᓕᒪᔪᒪᓂᕐᒧᑦ ᖁᐊᖅᓵᕐᓇᖅᑐᒥᒃ ᓴᒧᙵᖅᑎᕆᓕᑐᐃᓐᓇᕆᐊᖃᕐᓂᕐᓂᒥᒃ ᑕᒪᑐᒥᖓ ᐱᑖᕆᔭᐅᑎᑕᐅᔪᓐᓇᖅᑐᒥᒃ ᖃᓂᒪᓐᓇᒥᒃ.



ᑲᔪᓰᓐᓇᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

  • ᐊᑐᖅᓯᔪᓐᓇᓯᑲᐅᑎᒋᓂᖅ ᑐᐊᕕᕐᓇᖅᑐᓄᑦ ᓴᖅᑭᑉᐸᓪᓕᐊᔪᓄᓪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᐅᕙᖕᓂᕐᒧᑦ ᐱᔨᑦᑎᕋᕈᑕᐅᕙᒃᑐᑦ ᑲᔪᓰᓐᓇᖅᐳᑦ ᑕᒫᓂᓕᒫᖅ ᐅᑭᐅᖅᑕᖅᑐᒥ ᐊᕕᒃᓯᒪᓂᓕᒫᒥ. 
  • ᑐᐅᕕᕐᓇᖅᑐᓄᑦ ᑭᒍᑎᓕᕆᔭᐅᓂᕐᒧᑦ ᒪᓂᒪᑎᑕᐅᖏᓐᓇᖅᐅᖅ ᐃᖃᓗᒃᑑᑦᑎᐊᒥ, ᑲᖏᖅᖠᓂᕐᒥ, ᐃᖃᓗᖕᓂᓗ. ᐊᐅᓪᓚᕆᐊᖃᕐᓂᖅ, ᐊᖏᖅᑕᐅᒃᐸᑦ, ᓄᓇᒋᔭᐅᔫᑉ ᖃᓂᓛᖓᓅᕐᓂᐊᖅᐳᖅ ᓈᒪᒃᑐᒧᑦ ᐃᓂᒋᔭᐅᔪᒧᑦ ᑖᔅᓱᒧᖓ ᐱᓕᕆᕝᕕᒋᔭᐅᔭᕆᐊᓕᖕᒧᑦ.
  • ᐃᓱᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕈᑏᑦ ᓄᓇᓕᖕᓂ ᒪᓂᒪᐃᓐᓇᖅᑎᑕᐅᕗᑦ ᐊᓯᔾᔨᖅᓯᒪᙱᖦᖢᑎᒡᓗ.
  • ᐃᓱᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓗᐊᖅᓴᐃᔨᓂᑦ ᐱᔨᑦᑎᕋᕈᑕᐅᕙᒃᑐᑦ ᕿᑭᖅᑕᓂ ᐋᓐᓂᐊᕕᖕᒥ ᒪᓂᒪᑎᑕᐅᖏᓐᓇᖅᐳᑦ ᐊᓯᔾᔨᖅᑕᐅᓯᒪᙱᖦᖢᑎᒡᓗ.
  • ᐃᓱᒪᒃᑯᑦ ᖃᓄᐃᙱᑦᑎᐊᕈᓐᓇᕐᓂᕐᒧᑦ ᐱᓕᕆᐊᖑᕙᒃᑐᖅ ᑲᔪᓯᑎᑦᑎᖃᑦᑕᕐᓂᐊᖅᐳᖅ ᓄᓇᓕᖕᓂ ᓈᓚᐅᑎᒃᑯᑦ ᑐᓴᖅᓴᐅᑎᑕᐅᔪᓂᒃ ᑕᒫᓂᓕᒫᖅ ᐊᕕᒃᓯᒪᓂᕆᔭᐅᔪᒥ ᐊᔪᕐᓇᙱᓕᑐᐊᕌᖓᑦ
  • ᒪᒃᑯᒃᑐᓄᑦ ᖃᓄᐃᙱᑎᑦᑎᓂᕐᒥᒃ ᐱᓕᕆᖃᑎᒌᒃᐸᒃᑐᑦ ᒪᓂᒪᑎᑦᑎᕗᑦ ᐅᖄᓚᐅᑎᒃᑯᑦ−ᐱᓕᕆᐊᖑᖃᑦᑕᕋᔭᖅᑐᓂᒃ ᐅᖃᐅᔾᔪᖅᑕᐅᓂᕐᒧᑦ ᐃᑲᔪᖅᑐᐃᔪᓐᓇᕐᓂᕐᓂᒃ:
    • ᒫᓐᓇ ᐱᓕᕆᕝᕕᒋᔭᐅᕙᒃᑐᑦ ᐊᓯᖏᓪᓗ ᐃᑲᔪᖅᑕᐅᔭᕆᓖᑦ ᐅᕗᖓ, 867-979-7661-ᒧᑦ ᐅᖄᓚᔪᓐᓇᐳᑦ.
    • ᓄᑖᓄᑦ ᑕᐃᑯᙵᖁᔨᓇᔭᕐᓂᕐᓄᑦ,ᐅᓇ ᖃᐅᔨᒋᐊᕐᕕᒋᓗᒍ ᓲᓴᓐ ᒪᔫᕐ ᐅᕗᖓ, 867-975-5999.
  • ᓘᒃᑖᑦ ᑲᔪᓰᓐᓇᕐᓂᐊᖅᑐᑦ ᓄᓇᓕᖕᓄᑦ ᑕᑯᔭᖅᑐᖅᓯᕙᒡᓗᑎᒃ. ᑕᒪᓐᓇ ᐊᔪᕐᓇᕐᓂᖅᐸᑦ, ᑕᒪᒃᑯᐊ ᑕᑯᓯᓃᑦ ᐱᓕᕆᐊᖑᓂᐊᖅᐳᑦ ᑕᓚᕖᓴᒃᑯᑦ ᐃᓗᐊᖅᓴᖅᑕᐅᓗᑎᒃ. ᓄᓇᓕᖕᓄᐊᖅᐸᒃᑐᑦ ᓘᒃᑖᑦ ᖃᐅᔨᓴᖅᑕᐅᖃᑦᑕᕐᓂᐊᖅᐳᑦ ᑕᐃᒪᐃᑦᑐᒧᑦ.
  • ᐃᖃᓗᖕᓂ, ᐅᖁᒪᐃᓐᓂᕐᓂᐊᕐᕕᒃ ᒪᑐᐃᙶᖏᓐᓇᕐᓂᐊᖅᑐᖅ.  
  • ᖃᓄᐃᙱᑦᑎᐊᖅᑐᓄᑦ ᓄᑕᕋᓛᕐᓄᑦ ᐱᓕᕆᐊᖑᕙᒃᑐᑦ, ᓯᖓᐃᔪᓄᑦ ᑕᑯᔭᖅᑐᖅᓯᓂᐅᕙᒃᑐᑦ ᑲᐱᔭᐅᕙᖕᓃᓪᓗ ᑲᔪᓰᓐᓇᖅᐳᑦ ᓄᓇᕘᓕᒫᒥ.
  • ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒧᑦ ᐱᔨᑦᑎᕋᕈᑕᐅᕙᒃᑐᑦ ᓄᓇᓕᖕᓂ ᐊᓯᔾᔨᖅᓯᒪᙱᓚᑦ. 
  • ᐊᑐᖅᑕᐅᖔᓕᕈᓐᓇᖅᑐᓂᒃ ᐱᓇᔪᒃᑐᖃᖅᐸᓪᓕᐊᕗᖅ ᖄᒃᑲᓐᓂᐊᒍᑦ ᑐᐊᕕᕐᓇᖅᓯᔪᓄᑦ ᐱᓕᕆᐊᖃᕐᕕᐅᓂᕐᒧᑦ ᐅᖃᐅᔾᔪᐃᓂᕐᒧᓪᓗ ᐃᑲᔪᖅᑐᖅᑕᐅᓂᕐᒧᑦ ᐅᖄᓚᐅᑎᒃᑯᑦ ᑕᓚᕖᓴᒃᑯᓪᓗ ᑕᐅᑐᖃᑦᑕᐅᑎᕝᕕᒃᑯᒃ.
  • ᑎᑎᕋᕐᕕᒃ ᐋᓐᓂᐊᕕᓕᐊᖅᓯᒪᔪᓂᒃ ᐃᓅᖃᑎᖃᖅᐸᖕᓂᕐᒧᑦ ᖃᐅᔨᒋᐊᕐᕕᐅᔪᓐᓇᖅᐳᖅ ᑐᕌᕈᑎᒋᕙᒃᑕᑐᖃᖓᒍᑦ ᐅᕗᖓ: patientrelations@gov.nu.ca.
  • ᐋᓐᐊᓂᕕᓕᐊᖅᑐᓄᑦ ᑕᖕᒫᖅᓯᒪᕝᕕᐅᕙᒃᑐᑦ ᐱᐅᓯᑎᑦᑎᒋᐊᖅᓯᒪᓕᖅᐳᑦ ᓴᓗᒻᒪᖅᓴᐃᓂᕐᒧᑦ ᓴᓗᒻᒪᖅᓴᐃᓂᕆᕙᒃᑕᒥᓂᒃ.

ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

  • ᐃᓗᐊᖅᓴᖅᑕᐅᔭᖅᑐᖅᓯᒪᔪᓄᑦ ᐃᓅᖃᑎᖃᖅᐸᖕᓂᕐᒧᑦ ᐅᑳᓚᐅᑎᒃᑯᑦ ᐱᔨᑦᑎᕋᕈᑕᐅᕙᒃᑐᖅ ᒫᓐᓇ ᒪᓂᒪᙱᓚᑦ, ᑭᓯᐊᓂ ᐋᖅᑭᒃᓯᒪᓕᕈᑎᒃᓴᖏᓐᓂᒃ ᐋᖅᑭᒃᓯᔪᖃᖅᐸᓪᓕᐊᕗᖅ.
  • ᐃᖃᓗᖕᓂ; ᐃᓱᒪᒃᑯᑦ ᐃᓗᐊᖅᓴᖅᑕᐅᓂᕐᒧᑦ ᐅᖃᐅᔾᔪᖅᑕᐅᕙᒡᓗᓂ ᐱᔭᕇᖅᑕᐅᖃᑦᑕᕐᓂᐊᖅᐳᖅ ᐅᖄᓚᐅᑎᒃᑯᑦ (ᐊ ᑐᖅᑐᖃᕐᓗᓂ ᐊᑕᐅᓰᓇᖅᒦᑎᑕᐅᔪᒧᑦ  ᐅᖄᓚᕝᕕᐅᔪᓐᓇᕐᓂᕐᒧᑦ ᐅᖄᓚᐅᑎᒃᑯᑦ; 867-975-5999).
  • ᕿᑭᖅᑕᓂ ᐋᓐᓂᐊᕕᖕᒥ: ᐃᖃᓗᖕᒥᐅᓄᑦ, ᑐᐊᕕᕐᓇᙱᑦᑐᓄᑦ ᖃᓄᐃᓕᖓᓂᕆᔭᐅᔪᓄᑦ, ᐅᖄᓚᖅᑳᕐᓗᓯ ᕿᑭᖅᑕᓂ ᐋᓐᓂᐊᕕᓕᐊᓚᐅᖅᑳᕋᓯ. ᐃᓗᐊᖅᓴᖅᑕᐅᓃᑦ ᖃᓄᐃᓕᖓᓂᕆᔭᐅᔪᓄᑦ ᐱᔭᕇᖅᑕᐅᖃᑦᑕᕐᓂᐊᖅᐳᑦ ᐅᖄᓚᐅᑎᒃᑯᑦ ᐊᔪᕐᓇᙱᑐᐊᕌᖓᑦ.
  • ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓱᓕᑦᑕᖅᑎᑦᑎᕗᑦ ᐳᓛᕆᐊᕐᓂᕆᔭᐅᕙᒃᑐᓂᒃ ᕿᑭᖅᑕᓂ ᐋᓐᓂᐊᕕᖕᒧᑦ ᓄᓇᓕᖕᓂᓗ ᐋᓐᓂᐊᕕᓕᐊᕐᕕᖕᓄᑦ.
  • ᕿᑭᖅᑕᓂ ᐋᓐᓂᐊᕕᖕᒥ: ᐳᓛᕆᐊᖅᓯᒪᔪᑦ ᐃᓱᓕᑦᑕᕐᕕᖃᖅᑎᑕᐅᕗᑦ ᐊᑕᐅᓯᕐᒥᒃᐳᓛᕆᐊᖅᑐᒥᒃ ᐊᑕᐅᓯᕐᒧᑦ ᐅᓂᒃᓯᒪᔪᒧᑦ (ᓯᕗᓪᓕᖅᐸᐅᔾᔭᐅᖃᑦᑕᕐᓂᐊᖅᖢᑎᒃ ᐊᖓᔪᖅᑳᕆᔭᐅᔪᑦ ᐊᐅᓪᓚᕈᔾᔨᓯᒪᔪᓪᓗ ᐃᑲᔪᕆᐊᖅᓯᒪᔪᑦ).
  • ᐅᐸᒃᓯᒃᑲᓐᓂᕆᐊᖃᕐᓂᕐᒧᑦ ᐃᓂᓕᐅᖅᑕᐅᓯᒪᔪᑦ ᖃᐅᔨᓴᖅᑕᐅᕙᓪᓕᐊᕗᑦ, ᐃᓚᖏᓪᓗ ᐅᖓᕙᕆᐊᖅᑕᐅᑐᐃᓐᓇᕆᐊᖃᖅᖢᑎᒃ.
  • ᒪᒃᑯᒃᑐᓂᒃ ᖃᓄᐃᙱᑎᑦᑎᓂᕐᒧᑦ ᐱᓕᕆᖃᑎᒌᑦ ᒪᓂᒪᑐᐃᓐᓇᖅᐳᑦ ᑲᑎᖃᑎᖃᖃᑦᑕᕐᓂᐊᖅᖢᑎᒃ ᒪᒃᑯᒃᑐᓂᒃ ᐊᑕᐅᓯᐅᑦᑕᖃᑎᒋᕙᒡᓗᒋᑦ ᐊᒻᒪᓗ ᐃᓂᒃᓴᓕᐅᖅᓯᒪᔭᕆᐊᖃᖅᖢᑎᒃ
  • ᑕᒪᕐᒥᑦᑎᐊᖅ ᑐᐊᕕᕐᓇᙱᑦᑐᑦ ᐊᐱᕆᔾᔪᑕᐅᔪᑦ ᐱᓕᕆᐊᖑᔭᕆᐊᖃᕐᓂᖏᑦ ᖃᐅᑕᒫᑦ ᐋᖅᑭᒋᐊᖅᑕᐅᒃᑲᓐᓂᖃᑦᑕᕐᓂᐊᖅᐳᑦ.
  • ᐃᓗᐊᖅᓴᖅᑕᐅᔭᖅᑐᖅᓯᒪᔪᑦ ᑕᐃᑯᙵᖅᓯᒪᔪᑦ ᐅᕗᙵᖔᓯᖁᔭᐅᕙᒃᐳᑦ, ᐊᑲᐅᓯᓴᕐᕕᒃ, ᑕᐃᒪᐃᒃᑯᑎᒃ ᓄᓇᓕᖕᒥᐅᓂᒃ ᑲᑎᖃᑎᖃᖃᑦᑕᔾᔮᙱᒻᒪᑕ.
  • ᒪᒃᑯᒃᑐᓄᑦ ᐱᓕᕆᔨᒋᔭᐅᕙᒃᑐᑦ ᐊᑐᖅᑎᑦᑎᔾᔮᙱᓚᑦ ᑕᐅᑯᙵᐅᔪᓐᓇᓂᕐᓂᒃ ᐃᑲᕐᕋᓂᒃ  ᖃᓄᑐᐃᓐᓇᕐᓘᓐᓃᑦ ᐱᓕᕆᖃᑎᒌᑦ ᐱᓕᕆᐊᕆᕙᒃᑕᖏᓐᓂᒃ ᓄᖅᑲᖓᑎᑦᑎᓪᓗᑎᒃ, ᑭᓯᐊᓂᓗᑦᑕᐅᖅ ᓱᓕ ᒪᓂᒪᕙᒃᖢᑎᒃ ᑕᑯᓯᔪᓐᓇᕐᓂᕐᓂᒃ ᒪᒃᑯᒃᑐᓂᒃ ᐃᓄᑑᖃᑎᒋᓗᒋᑦ ᑕᐃᒪᐃᑦᑕᕆᐊᖃᕌᖓᒥᒃ. 
  • ᑕᒪᒃᑯᐊᓕᒫᖅ ᑲᒪᒋᔭᐅᖏᓐᓇᖅᑐᒃᑯᕖᑦ ᐅᖃᐅᔾᔭᐅᓯᒪᕗᑦ ᐃᓱᓕᑦᑕᖅᑎᑦᑎᖁᔭᐅᓪᓗᑎᒃ ᐳᓛᕆᐊᕐᓂᕆᔭᐅᕙᒃᑐᓂᒃ ᐊᔪᕐᓇᙱᑐᐊᖅᐸᑦ − ᑕᐃᒃᑯᐊᓗ ᑕᐃᑯᙵᐅᔪᑦ ᐃᓂᒧᑦ ᖃᐅᔨᓴᖅᑕᐅᕙᒡᓗᑎᒃ ᐃᓯᓚᐅᙱᓐᓂᖏᓐᓂ. 
  • ᕿᑭᖅᑕᓂ ᐋᓐᓂᐊᕕᒃ ᐋᓐᓂᐊᕕᓕᐊᕐᕖᓪᓗ ᐃᓱᓕᑦᑕᖅᑐᓂᒃ ᐳᓛᕆᐊᖅᑎᑦᑎᖃᑦᑕᕈᓐᓇᖅᐳᒃ. ᐊᑕᐅᓯᕐᒥᒃ ᐳᓛᕆᐊᖅᑐᒥᒃ ᐊᑕᐅᓯᕐᒧᑦ ᐅᓂᒃᓯᒪᔪᒧᑦ.

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:

  • ᓂᕆᔭᖅᑐᕐᕕᖕᒧᙵᐅᔪᓐᓇᕐᓂᖅ ᕿᑭᖅᑕᓂ ᐋᓐᓂᐊᕕᖕᒥ ᐃᓱᓕᑦᑕᖅᑎᑕᐅᕗᖅ.
  • ᑕᒪᕐᒥᑦᑎᐊᖅ ᐊᑐᖅᑕᐅᒐᔪᒃᐸᒃᑐᑦ ᑭᒍᑎᓕᕆᓂᕐᒧᑦ ᐱᔨᑦᑎᕋᕈᑕᐅᕙᒃᑐᑦ ᓄᖅᑲᖅᑎᑕᐅᕗᑦ ᐅᖃᐅᓯᐅᒃᑲᓐᓂᓕᓚᐅᙱᓪᓕᖏᓪᓂ.
  • ᓄᓇᓕᖕᓂ ᐋᓐᓂᐊᕐᕕᖕᓂ: ᐳᓛᕆᐊᖅᐸᖕᓂᖅ ᐋᓂᐊᕕᖕᓄᑦ ᓄᖅᑲᖅᑎᑕᐅᕗᖅ.
  • ᑕᒪᕐᒥᑦᑎᐊᖅ ᐊᑐᓪᓚᕆᒋᐊᖃᙱᑦᑐᑦ ᐃᓗᐊᖅᓴᖅᑕᐅᔭᖅᑐᕐᓗᓂ ᐊᐅᓪᓚᕐᓂᕆᔭᐅᕙᒃᑐᑦ ᑕᒫᙵᑦ ᐊᕕᒃᓯᒪᓂᕐᒥᑦ ᐅᖓᕙᕆᐊᖅᑕᐅᕗᑦ.
    • ᐃᓂᒃᓴᓕᐊᖑᓯᒪᔪᑦ ᐅᖓᕙᕆᐊᖅᑕᐅᔪᑦ ᐃᓂᒃᓴᖅᑖᖅᑎᑕᐅᒃᑲᓐᓂᕐᓂᐊᖅᐳᓪᓘᓐᓃᑦ ᐅᓪᓗᒧᑦ ᐅᖓᕙᓯᒃᑲᓐᓂᖅᑐᒧᑦ, ᓅᑎᑕᐅᓗᑎᒃ ᑕᓚᕖᓴᒃᑯᑦ ᐃᓗᐊᖅᓴᖅᑐᐅᓂᕐᒧᑦ, ᐱᔭᕇᖅᑕᐅᓂᐊᖅᖢᑎᒡᓘᓐᓃᑦ ᑕᒫᓂ ᐊᕕᒃᓯᒪᓂᕐᒥ ᐅᑭᐅᖅᑕᖅᑐᒥ.
    • ᐋᓐᓂᐊᖃᕐᓇᑎᑦᑐᓕᕆᔨᒃᑯᑦ ᐱᓕᕆᐊᖃᖅᐳᑦ ᐱᑐᐃᓐᓇᐅᙱᑦᑐᓕᕆᔨᓄᐊᖁᔨᕙᒃᖢᑎᒃ ᓯᕗᓪᓕᖅᐸᐅᑦᑎᐅᑎᔪᒪᓂᕐᒧᑦ ᐊᑐᖅᑕᐅᔭᕆᐊᖃᓪᓚᕆᒃᐸᒃᑐᖅ ᐃᓗᐊᖅᓴᖅᑕᐅᔭᖅᑐᕐᓗᓂ ᐊᐅᓪᓚᕐᓂᕆᔭᐅᔪᖅ.
    • ᑕᒪᕐᒥᑦᑎᐊᖅ ᐃᓗᐊᖅᓴᖅᑕᐅᔭᖅᑐᖅᓯᒪᔪᑦ ᐊᐅᓪᓚᖅᓯᒪᔪᑦ ᖃᐅᔨᓴᖅᑕᐅᕝᑯᐅᓂᐊᖅᐳᑦ ᐱᑕᖃᑐᐃᓐᓇᕆᐊᖃᕐᓂᖏᓐᓄᑦ ᑕᒪᑐᒥᖓ ᓄᕙᒡᔪᐊᕐᓇᖅ-19−ᒥ ᖃᓂᒪᓐᓇᒥᒃ ᐊᔪᕈᓐᓃᖅᑎᑕᐅᓚᐅᙱᓐᓂᕐᒥᓂ ᐊᖏᕐᕋᐅᔪᓐᓇᖅᓯᓂᕋᖅᑕᐅᓗᑎᒃ.
    • ᓄᒃᑕᖅᑏᑦ ᐅᑎᕈᓐᓇᐃᓪᓕᔪᑦ ᐊᖏᕐᕋᕆᔭᒥᓄᑦ ᒫᓐᓇᑲᐅᑎᒋ ᐋᖅᑭᒃᑕᐅᓯᒪᕝᑯᐅᓂᐊᖅᐳᑦ ᐃᓗᐊᖅᓴᖅᑕᐅᓂᕐᒧᑦ ᓄᒃᑕᖁᓐᓴᕐᓂᕐᒧᑦ ᖃᓄᐃᓕᖓᑎᑕᐅᓂᖏᓐᓂᒃ −  ᑕᒃᑯᐊ ᐃᑲᔪᖅᑕᐅᖃᑦᑕᕐᓂᐊᖅᐳᑦ ᓂᕆᔭᒃᓴᓄᑦ, ᑐᔪᕐᒥᕕᒃᓴᖏᓐᓄᑦ, ᓇᔪᙵᐅᔾᔪᑎᒃᓴᖏᓐᓄᑦ ᐱᓕᕆᐊᖑᓯᒪᓂᖏᓐᓄᓪᓗ ᐊᐅᓚᑦᑎᕝᕕᐅᓗᑎᒃ.
    • ᑕᐃᒪᐃᑦᑕᕆᐊᖃᕈᑎᒃ, ᐅᐸᒃᑕᐅᑦᑕᐅᓕᒪᓂᖅ ᐱᓕᕆᐊᖑᖃᑦᑕᕐᓂᐊᖅᐳᖅ ᐃᓛᒃᑰᖅᑐᓄᑦ ᐃᒡᓗᕈᓯᕐᓄᑦ ᑕᖕᒫᖅᓯᒪᕝᕕᖕᓂ ᑐᔪᕐᒥᕕᖕᓂᓘᓐᓃᑦ.
  • ᑕᒪᕐᒥᑦᑎᐊᖅ ᐅᐸᒃᓯᒪᓗᒋᑦ ᐊᔪᕈᓐᓃᖅᓴᕐᓃᑦ ᑲᔪᓯᑎᑕᐅᕙᒃᑐᑦ ᐅᑯᓇᙵᑦ, Quality of Life Secretariat ᐋᖅᑭᒃᑕᐅᓯᒪᔪᑦ ᒫᑦᓯᒥ ᐄᐳᕈᒥᓗ ᓄᖅᑲᖅᑎᑕᐅᕗᑦ.
  • ᑕᒫᓂ ᐱᑐᐃᓐᓇᐅᙱᑦᑐᓕᕆᓂᕐᒧᑦ ᐃᓗᐊᖅᓴᐃᓃᑦ ᓄᖅᑲᖅᑎᑕᐅᕗᑦ.
  • ᒪᒃᑯᒃᑐᑦ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᐱᓕᕆᖃᑎᒌᓄᑦ ᐅᐸᒃᓯᓗᓂ ᐅᖃᐅᔾᔪᖅᑕᐅᓃᑦ, ᐃᓕᓐᓂᐊᕌᓂᒃᓯᒪᓕᖅᑎᓪᓗᒋᑦ ᐱᓕᕆᐊᖑᕙᒃᑐᑦ, ᐱᓕᕆᖃᑎᖃᖅᐸᖕᓃᑦ, ᐅᐸᒃᑕᐅᕙᒃᑐᓪᓗ ᐅᓪᓗᓕᒫᒧᑦ ᐋᖅᑭᒃᑕᐅᓯᒪᔪᑦ ᒫᑦᓯᒧᑦ ᐄᐳᕈᒧᓪᓗ ᓄᖅᑲᖅᑎᑕᐅᕗᑦ.



ᒪᓕᒐᓕᕆᔨᒃᑯᓐᓂᑦ ᓄᑖᙳᕆᐊᖅᑎᑕᐅᔪᑦ ᑐᓴᒐᒃᓴᑦ

ᐃᓄᐃᑦ ᐊᐱᕆᔭᐅᕗᑦ ᖃᐅᔨᒋᐊᕐᕕᖃᖁᔭᐅᓪᓗᑎᒃ ᐃᓚᒌᓂ ᐋᓐᓂᖅᓯᔪᖃᖅᐸᖕᓂᖓᓄᑦ ᐱᓕᕆᕝᕕᖃᖔᓕᕐᓂᕐᒧᑦ ᐱᖁᔭᕐᒧᑦ (FAIA) ᐅᖄᓚᕝᕕᐅᔪᓐᓇᖅᑐᒧᑦ ᐊᐱᖅᑯᑎᒃᓴᖃᕐᓂᕈᑎᒃ ᐃᑲᔪᖅᑕᐅᔭᕆᐊᖃᕈᑎᒡᓘᓐᓃᑦᐆᒥᖓ ᓈᓴᐅᒻᒥᒃ ᐊᑐᕐᓗᑎᒃ, 1-844-534-1038.  ᑕᒪᓐᓇ ᐅᖄᓚᓂᖅ ᖃᐅᔨᓴᖅᑕᐅᓂᐊᖅᐳᖅ ᖃᐅᔨᒪᓕᕈᒪᓂᕐᒧᑦ ᐃᑲᔪᖅᑕᐅᔭᕆᐊᖃᕐᓂᕐᒧᑦ ᐱᔭᐅᔭᕆᐊᓕᖕᒧᑦ ᑐᕌᖅᑎᑕᐅᓗᓂ ᓄᓇᓕᖕᓂ ᐱᑐᐃᓐᓇᐅᙱᑦᑐᓕᕆᓂᕐᒧᑦ ᑖᓐᓇᓗ ᐃᑲᔪᕈᓐᓇᖅᖢᓂ ᐱᓇᔫᑎᒋᔭᐅᔪᓄᑦ ᐊᑐᖅᑕᐅᔪᓐᓇᖅᑐᓂᒡᓗ ᓇᓗᓇᐃᖅᓯᔪᓐᓇᖅᖢᓂ. 

ᒪᓕᒐᓕᕆᔨᒃᑯᑦ ᐃᑲᔪᖅᑐᐃᖏᓐᓇᕐᓂᐊᖅᐳᑦ ᓄᓇᕗᒻᒥᐅᓄᑦ ᐅᑯᑎᒎᓇᖅ, ᐃᓚᒌᓂ ᐋᓐᓂᖅᓯᕆᔪᖃᖅᐸᖕᓂᖓᓄᑦ ᐱᓕᕆᕝᕕᖃᖔᓕᕐᓂᕐᒧᑦ ᐱᖁᔭᒃᑯᑦ ᒫᓐᓇᐅᔪᒃᑯᑦ.  ᖁᐊᖅᓵᕐᓇᖅᑕᐃᓕᒪᓂᖅ ᓱᓕ ᓯᕗᓪᓕᖅᐸᐅᑦᑎᐅᓯᒪᕙᕗᑦ ᐃᓱᒫᓘᑎᒋᓪᓗᒍ ᑲᔪᓰᓐᓇᕐᓂᐊᖅᖢᑕᓗᖃᐅᔨᒪᑦᑎᐊᕈᒪᓪᓗᑕ ᐱᔨᑦᑎᕋᕐᓂᕆᕙᒃᑕᕗᑦ ᒪᓂᒪᒐᓗᐊᕐᓗᒪᖔᑕ ᐱᔭᐅᔭᕆᐊᖃᕐᕕᒋᔭᒥᓂ. 

ᒪᓕᒐᓕᕆᔨᒃᑯᑦ ᑕᐅᑐᒐᖃᓪᓗᐊᑕᖅᐳᑦ ᖃᓄᐃᙱᑦᑎᐊᕐᕈᓐᓇᕐᓂᖏᓐᓄᑦ ᐃᖅᑲᓇᐃᔭᖅᑏᑦ, ᑎᒍᔭᐅᓯᒪᔪᑦ, ᓄᓇᓖᓪᓗ. ᐋᖅᑭᒃᓱᐃᓯᒪᕗᒍᑦ ᐊᑐᖅᑕᐅᓕᕈᓐᓇᖅᑐᓂᒃ ᐱᕙᒌᔭᕈᑎᓂᒃ ᓇᓗᙱᑦᑎᐊᕈᒪᓂᕐᒧᑦ ᑲᔪᓯᑎᑦᑎᔪᓐᓇᕋᓗᐊᕐᒪᖔᑦᑕ ᐊᐅᓚᓂᕆᔭᐅᔪᓂᒃ.

ᑲᔪᓰᓐᓇᖅᑐᑦ ᐃᔨᑦᑎᕋᕐᓂᕆᔭᐅᔪᑦ:

  • ᓯᕗᓪᓕᖅᐹᒥᒃ ᐱᔨᑦᑎᕋᖅᑳᕐᓂᕆᔭᐅᔪᑦ ᓄᓇᓕᖕᓂ ᒪᓕᒐᓕᕆᔨᒃᑯᑦ ᐊᑖᒍᑦ ᑲᔪᓯᓂᐊᖅᐳᑦ.
  • ᓄᓇᕗᒻᒥ ᐃᖅᑲᖅᑐᐃᕕᓕᕆᔨᒃᑯᑦ ᑲᔪᓰᓐᓇᕐᓂᐊᖅᐳᑦ ᑐ ᓴᕙᒡᓗᑎᒃ ᑐᐊᕕᕐᓇᖅᑐᓂᒃ ᐱᓕᕆᐊᒃᓴᕆᔭᐅᔪᑦ ᒫᓐᓇᐅᔪᒃᑯᑦ.
  • ᐅᖃᐅᓯᐅᒃᐸᑦ ᑭᓯᐊᓂ, ᐱᓕᕆᕝᕕᖕᒥ ᐱᔨᑦᑎᕋᐅᑎᑦ ᐊᒥᐊᒃᑯᑐᐊᖑᓕᖅᑐᑦ ᐊᐅᓚᔾᔪᓯᕆᕙᒃᑕᒥᓂᒃ ᐊᐅᓚᐃᓐᓇᕐᓂᐊᖅᐳᑦ. ᖃᐅᑕᒫ ᑐᓴᒐᒃᓴᓂᒃ ᓴᖅᑭᑎᑦᑎᑲᑕᒃᑐᑦ. 

ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

  • ᒪᓕᒐᓕᕆᔨᒃᑯᑦ ᐊᐱᕆᕗᑦ ᑕᒪᐃᓐᓂᑦᑎᐊᖅ ᓄᓇᓕᖕᓂ ᑎᒍᔭᐅᓯᒪᕝᕕᓕᕆᓂᕐᒧᑦ ᐱᓕᕆᕝᕕᒋᔭᐅᕙᒃᑐᑦ ᐅᖃᖃᑦᑕᖁᓪᓗᒋᑦ ᐅᖄᓚᐅᑎᑎᒍᑦ ᓄᓇᓕᖕᓂ ᑎᒍᔭᐅᓯᒪᕝᕕᓕᕆᓂᕐᒧᑦ ᐱᓕᕆᔨᒧᑦ.

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:

  • ᑎᒍᔭᐅᓯᒪᕝᕕᓕᕆᔩᑦ ᑎᑎᖃᕐᕕᖏᑦ ᒪᑐᓯᒪᓂᐊᖅᐳᑦ ᑕᐅᑯᙵᐅᕙᒃᑐᓄᒃ ᑭᓯᐊᓂ ᒪᑐᐃᓛᖅᖢᑎᒃ ᐅᖃᐅᓯᐅᒃᑲᓐᓂᕈᑎᒃ.
  • ᓄᓇᕗᒻᒥ ᓄᓇᓕᖕᓂ ᒪᓕᒐᓕᕆᓂᕐᒧᑦ ᑎᑎᕋᕐᕖᑦ ᑭᒃᑯᑐᐃᓐᓇᓄᑦ ᒪᑐᓯᒪᓂᐊᖅᐳᑦ, ᑕᒪᓐᓇ ᐱᒋᐊᕐᓗᓂ ᓇᒡᒐᔾᔭᒥ, ᒫᑦᓯ 23, 2020−ᒥ.
  • ᑕᒪᕐᒥᑦᑎᐊᖅ ᐳᓛᕆᐊᕐᓂᕆᔭᐅᕙᒃᑐᑦ ᐃᓂᒋᔭᐅᔪᓄᑦ ᓄᖅᑲᖅᑎᑕᐅᕗᑦ ᖃᐅᔨᒪᑦᑎᐊᕈᒪᓂᕐᒧᑦ ᖃᓄᐃᙱᑦᑎᐊᕈᓐᓇᕐᓂᖏᓐᓂᒃ ᖁᐊᖅᓵᖅᓇᖅᑐᒦᙱᓐᓂᖕᓐᓄᓪᓗ ᑎᒍᔭᐅᓯᒪᔪᑦ ᐃᖅᑲᓇᐃᔭᖅᑏᓪᓗ. 
  • ᓄᓇᕗᒻᒥ ᐃᖅᑲᖅᑐᐃᕕᒃᑯᑦ ᓄᖅᑲᖅᑎᑦᑎᓯᒪᓕᖅᐳᑦ ᖃᐅᑕᒫᑦ ᐊᐅᓚᓂᕆᕙᒃᑕᒥᓂᒃ.



ᐃᓕᓐᓂᐊᕐᓂᓕᕆᔨᒃᑯᓐᓄᑦ ᓄᑖᙳᕆᐊᖅᓯᒪᔪᑦ

ᐃᓕᓐᓂᐊᕐᓂᓕᕆᔨᒃᑯᑦ ᖃᔅᓯᑲᓪᓚᐃᓪᓗ ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᔭᖏᑦ ᐱᓕᕆᖃᑎᒌᑦᑎᐊᖅᐳᑦ ᒥᑭᒡᓕᒋᐊᖅᑎᑦᑎᔪᒪᓪᓗᑎᒃ ᐊᒃᑐᖅᓯᓂᕆᔭᐅᔪᒥᒃ ᐃᓕᓐᓂᐊᕐᕖᑦ ᒪᑐᔭᐅᓂᖏᓐᓂᒃ ᑕᒪᒃᑯᓄᖓ ᓂᕆᑎᑦᑎᓂᕐᒧᑦ ᐱᓕᕆᐊᖑᕙᒃᑐᓄᑦ.

ᐃᓕᓐᓂᐊᕐᓂᓕᕆᔨᒃᑯᑦ ᐱᑎᑦᑎᓂᐊᖅᐳᑦ ᑮᓇᐅᔭᓂᒃ ᑕᒪᐃᓐᓄᓕᒫᖅ ᓚᐃᓴᖃᖅᑐᓄᑦ ᓄᑕᖅᑲᓂᒃ ᐸᐃᕆᕝᕕᒋᔭᐅᕙᒃᑐᓄᑦ.

ᑖᒃᑯᐊ ᑮᓇᐅᔭᖁᑎᒋᔭᐅᔪᑦ ᓇᓕᒧᒋᔭᖃᕐᓂᐊᖅᐳᑦ ᐊᖓᔪᖅᑳᕆᔭᐅᔪᑦ ᐊᑭᓕᖅᐸᒃᑕᖏᓐᓄᑦ ᓚᐃᓴᓕᖕᓄᑦ ᐸᐃᕆᕝᕕᖕᓄᑦ ᐃᓇᔭᖅᑕᕋᓗᐊᙱᑦᑐᑦ ᑕᒪᑐᒪᓂ ᐱᓇᓱᐊᕈᓯᕐᓄᑦ ᐱᖓᓱᓄᑦ ᒪᑐᓯᓯᒪᓂᕆᔭᐅᔪᒥ.

ᑕᒪᓐᓇ ᐱᕕᖃᖅᑎᑦᑎᓂᐊᖅᐳᖅᐸᐃᕆᕝᕕᖕᓂᒃ ᐊᓕᒐᒃᓴᖅᑖᖅᑎᑦᑎᙱᓪᓗᑎᒃ ᐊᖓᔪᖅᑳᑦ ᐊᑭᓕᐅᑎᒋᕙᒃᑕᖏᓐᓂᒃ ᑕᒪᓐᓇ ᐊᑐᖅᑎᓪᓗᒍ, ᑭᓯᐊᓂᓗᑦᑕᐅᖅ ᐃᖅᑲᓇᐃᔭᖅᑎᒥᓂᒃ ᐊᑭᓕᖅᓱᐃᖏᓐᓇᕐᓂᐊᖅᖢᑎᒃ.

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:

ᑕᒪᕐᒥᑦᑎᐊᖅ ᐃᓕᓐᓂᐊᕐᕖᑦ ᓄᑕᖅᑲᓄᓪᓗ ᐸᐃᕆᕝᕖᑦ ᓄᓇᕗᒻᒥ ᒪᑐᔭᐅᕗᑦ ᐱᓇᓱᐊᕈᓯᕐᓄᑦ ᐱᖓᓱᓄᑦ, ᑕᒪᓐᓇ ᒪᑐᓯᒪᓂᖓᑦ ᐱᒋᐊᕐᓂᐊᖅᖢᓂ ᐊᐃᑉᐹᓂ, ᒫᑦᓯ 17, 2020−ᒥ.





ᐃᓄᓕᕆᔨᒃᑯᓂᑦ ᓄᑖᙳᕆᐊᖅᑎᑕᐅᔪᑦ

ᓄᓇᕗᑦ ᒐᕙᒪᖓ ᐱᓕᕆᐊᖃᖅᐸᓪᓕᐊᕗᖅ ᕿᒫᕝᕕᖕᓄᑦ ᓱᓴᐃᐊᑎᒋᔭᐅᔪᓂᒃ ᐊᔪᖅᑎᑦᑎᔪᒪᙱᓐᓂᕐᒥᓄᑦ ᐅᖓᕙᕆᐊᖅᑕᐅᔪᓂᒃ ᐃᑲᕐᕋᓂᒃ ᐊᒻᒪᓗᑦᑕᐅᖅ ᐊᑐᖅᓯᓗᑎᒃ ᐃᓂᒃᓴᒃᑲᓐᓂᐊᔪᓐᓇᖅᑐᓂᒃ ᐊᔪᖅᑎᑦᑎᔪᒪᙱᓐᓂᕐᒥᓄᑦ ᑕᒪᑐᒥᖓ ᐃᓅᖃᑎᒌᓂ ᖃᓂᒌᒃᑎᑦᑎᓗᐊᖅᑕᐃᓕᒪᓂᕐᓂᒧᒃ. ᐱᖓᓱᐃᓐᓇᕐᓂᒃ ᕿᒫᕝᕕᒃᑕᖃᖅᐳᖅ ᓄᓇᕗᒻᒥ, ᒫᓐᓇᓗ ᑖᒃᑯᐊ ᒪᑐᓯᒪᕙᒃᖢᑎᒃ ᐅᓪᓗᒃᑯᑦ.

ᐅᖃᐅᓯᐅᒃᐸᑦ ᑭᓯᐊᓂ, ᐱᓕᕆᕝᕕᖕᒥ ᐱᔨᑦᑎᕋᐅᑎᑦ ᐊᒥᐊᒃᑯᑐᐊᖑᓕᖅᑐᑦ ᐊᐅᓚᔾᔪᓯᕆᕙᒃᑕᒥᓂᒃ ᐊᐅᓚᐃᓐᓇᕐᓂᐊᖅᐳᑦ. ᖃᐅᑕᒫ ᑐᓴᒐᒃᓴᓂᒃ ᓴᖅᑭᑎᑦᑎᑲᑕᒃᑐᑦ. 

FANS−ᑯᑦ ALTs−ᑯᓪᓗ

  • ᐃᓕᓐᓂᐊᖅᑏᑦ ᐃᓕᓐᓂᐊᕐᕕᖕᒥᓃᓪᓗᐊᖅᐳᑦ ᐃᓂᒥᓂ, ᑭᓯᐊᓂ  ᑕᒪᓐᓇ ᐃᓕᓐᓂᐊᕐᓂᕆᔭᖓ ᐃᓱᓕᓪᓚᕆᒃᐸᑦ.  ᒫᓐᓇᓄᑦ ᑎᑭᖦᖢᒍ, ᐃᓕᓐᓂᐊᕐᓃᑦ ᐊᔪᓕᖅᑎᑕᐅᓚᐅᑲᒃᓯᒪᕗᑦ, ᓄᖅᑲᖅᑎᑕᐅᙱᖦᖢᑎᒃ.
  • ᐃᓕᓐᓂᐊᖅᑏᑦ ᐊᖏᕐᕋᖏᑦ ᒪᑐᐃᙶᖏᓐᓇᖅᐳᑦ, ᐃᓕᓐᓂᐊᖅᑏᓪᓗ ᐱᔪᓐᓇᖅᑎᑕᐅᓪᓗᑎᒃ ᐃᓕᓐᓂᐊᕕᖏᑕ ᐊᖏᕐᕋᕆᑎᑉᐸᒃᑕᖏ ᓂᓐᓂᐊᖅᖢᑎᒃ  ᐄᐳᕈ ᐃᓱᓕᓐᓇᓱᖕᓂᖓᓄᑦ. ᐃᓕᓐᓂᐊᕐᕖᑦᑕᐅᖅ ᑲᔪᓯᑎᑦᑎᕗᑦ ᓂᕆᑎᑦᑎᕙᖕᓂᕐᒧᑦ ᐱᔨᑦᑎᕋᕐᓂᕆᕙᒃᑕᒥᓂᒃ.
  • ᖃᐅᔨᒪᑦᑎᐊᕈᒪᓂᕐᒧᑦ ᑮᓇᐅᔭᑎᒍᑦ ᐊᒃᓱᕈᓐᓇᖅᑐᖅᓯᐅᖅᑐᖃᙱᓐᓂᖓᓂᒃ ᑕᒪᒃᑯᓄᖓ ᑕᒫᓂᕐᒥᐅᑕᐅᙱᑦᑐᓄᑦ ᐃᓕᓐᓂᐊᖅᑎᓄᑦ, ᑕᐃᒃᑯᐊ ᑮᓇᐅᔭᖅᑖᖅᐸᒃᑐᑦ FANS−ᑯᓐᓂᑦ ALTS−ᑯᓐᓂᓘᓐᓃᑦ ᐱᖃᑦᑕᐃᓐᓇᕐᓂᐊᖅᐳᑦ ᑮᓇᐅᔭᓂᒃ ᑕᐃᒪᙵᓕᒫᖅ ᐊᖏᕐᕋᕆᔭᒥᓂᑦ ᐊᐅᓪᓚᖅᓯᒪᑐᐊᕈᑎᒃ

ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

  • ᑕᒪᕐᒥᑦᑎᐊᖅ ᓂᖃᐃᓱᖅᐸᒃᑐᑦ, ᐃᖅᑲᓇᐃᔮᖃᕐᓂᕐᒧᑦ ᐱᕙᓪᓕᐊᓃᑦ ᐃᓚᒌᓄᓪᓗ ᖃᓄᐃᙱᑦᑎᐊᖅᑎᑦᑎᓂᕐᒧᑦ ᐱᓕᕆᕝᕕᐅᕙᒃᑐᑦ ᐊᐱᕆᔭᐅᕗᑦ ᐅᖄᓚᖃᑦᑕᖁᔭᐅᓪᓗᑎᒃ ᐋᖅᑭᒃᓯᓂᐊᕐᓗᑎᒃ ᐃᓂᒃᓴᓕᐅᕐᓂᕐᒥᒃ, ᐃᒪᐃᙱᖔᕐᓗᑎᒃ, ᑎᑎᕋᕐᕕᑦᑎᓐᓄᙵᐅᙱᓪᓗᑎᒃ: 
    • ᑕᒪᕐᒥᑦᑎᐊᖅ ᐃᓗᐊᖅᓴᖅᑕᐅᔭᖅᑐᖅᓯᒪᔪᑦ ᐅᖄᓪᓚᓪᓗᐊᖅᐳᑦ ᐋᖅᑭᒃᓯᓗᑎᒡᓗ ᐃᓂᒃᓴᒧᑦ ᐱᕕᒃᓴᒥᒃ ᐅᓪᓗᐊᓂᒡᓗ ᐃᓱᓕᑦᑕᖅᑎᑦᑎᔪᒪᓂᕐᒧᑦ ᐃᓄᒋᐊᒃᑐᓂᒃ ᑲᑎᓐᓂᐅᓇᔭᖅᑐᓂᒃ ᐅᑕᖅᑭᕕᑦᑎᓐᓂ.



ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐱᓕᕆᕝᕕᖓᑕ ᓄᑖᙳᕆᐊᖅᑎᑕᖏᑦ

ᐅᖃᐅᓯᐅᒃᐸᑦ ᑭᓯᐊᓂ, ᐱᓕᕆᕝᕕᖕᒥ ᐱᔨᑦᑎᕋᐅᑎᑦ ᐊᒥᐊᒃᑯᑐᐊᖑᓕᖅᑐᑦ ᐊᐅᓚᔾᔪᓯᕆᕙᒃᑕᒥᓂᒃ ᐊᐅᓚᐃᓐᓇᕐᓂᐊᖅᐳᑦ. ᖃᐅᑕᒫ ᑐᓴᒐᒃᓴᓂᒃ ᓴᖅᑭᑎᑦᑎᑲᑕᒃᑐᑦ. 

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:

  • ᑕᒪᕐᒥᑦᑎᐊ ᐊᖁᑎᓄᑦ ᖃᐅᔨᓴᖅᓯᓃᑦ ᓄᖅᑲᖅᑎᑕᐅᕗᑦ ᐄᐳᕈ 7−ᖑᕋᓱᖕᓂᖓᓂ.
  • ᑭᒃᑯᑐᐃᓐᓇᓄᑦ ᐱᓕᕆᐊᒃᓴᕆᔭᐅᔪᑦ ᐳᓛᕆᐊᖅᑎᓄᑦ ᐃᓂᒋᔭᐅᔪᓂ ᓄᖅᑲᖅᑎᑕᐅᕗᑦ.



ᐃᓕᖅᑯᓯᓕᕆᔨᒃᑯᓐᓂ ᑐᓴᒐᒃᓴᖅ

ᐅᖃᐅᓯᐅᒃᐸᑦ ᑭᓯᐊᓂ, ᐊᓯᖏᑦ ᐱᓕᕆᕝᕕᐅᑉ ᐱᔨᑦᑎᕋᐅᑎᖏᑦ ᐊᐅᓚᔾᔪᓯᕆᕙᒃᑕᒥᓂᒃ ᐊᐅᓚᐃᓐᓇᕐᓂᐊᕋᓱᒋᔭᐅᔪᑦ. ᖃᐅᑕᒫ ᑐᓴᒐᒃᓴᓂᒃ ᓴᖅᑭᑦᑎᑲᑕᖕᓂᐊᖅᑐᑦ.

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ

  • ᐃᖃᓗᐃᑦ ᐅᖃᓕᒫᒐᖃᕐᕕᖓ ᑭᒃᑯᑐᐃᓐᓇᓄᑦ ᒪᑐᓯᒪᓕᖅᑐᖅ.



ᐊᕙᑎᓕᕆᔨᒃᑯᓐᓂᑦ ᓄᑖᙳᕆᐊᖅᑎᑕᐅᔪᑦ

ᐱᓕᕆᕝᕕᒋᔭᐅᔪᖅ ᐃᓱᒪᒃᓴᖅᓯᐅᕈᑎᖃᖅᐳᖅ ᐊᑐᖅᑕᐅᔪᓐᓇᕋᔭᖅᑐᓂᒃ ᑲᔪᓰᓇᖅᑎᑦᑎᓗᑎᒃ ᐱᔨᑦᑎᕋᕐᕆᔭᐅᕙᒃᑐᓂᒃ ᑕᐃᒪᐃᓕᐅᕐᓂᕐᒥᓂᓗ ᑲᔪᓯᑎᑦᑎᓗᑎᒃ ᓄᕙᒡᔪᐊᕐᓇᖅ-19−ᒧᑦ ᖁᐊᖅᓵᓇᖅᑕᐃᓕᒪᓂᕐᒧᑦ ᐊᑐᖅᑕᐅᕙᓪᓕᐊᕙᒃᑐᓂᒃ.

ᐊᑐᖅᑕᐅᔭᕆᐊᖃᒻᒪᕆᒃᐸᒃᑐᑦ ᐱᔨᑦᑎᕋᕐᓂᕆᔭᐅᔪᑦ ᓲᕐᓗ ᐊᑲᐅᙱᓕᐅᖅᑎᑦᑎᔪᓂᒃ ᓂᕐᔪᑎᓂᒃ ᐱᓕᕆᐊᖃᓕᕐᓂᖅ ᑯᕕᔪᖃᖅᑎᓪᓗᒍᓗ ᑭᐅᓯᓂᖅ ᑲᔪᓰᓐᓇᕐᓂᐊᖅᐳᒃ ᐊᑐᖅᑕᐅᕙᒃᑐᑎᑐᑦ.

ᐅᖃᐅᓯᐅᒃᐸᑦ ᑭᓯᐊᓂ, ᐱᓕᕆᕝᕕᖕᒥ ᐱᔨᑦᑎᕋᐅᑎᑦ ᐊᒥᐊᒃᑯᑐᐊᖑᓕᖅᑐᑦ ᐊᐅᓚᔾᔪᓯᕆᕙᒃᑕᒥᓂᒃ ᐊᐅᓚᐃᓐᓇᕐᓂᐊᖅᐳᑦ. ᖃᐅᑕᒫ ᑐᓴᒐᒃᓴᓂᒃ ᓴᖅᑭᑎᑦᑎᑲᑕᒃᑐᑦ. 

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:

  • ᐃᓕᓐᓂᐊᕐᕖᑦ ᒪᑐᔭᐅᓂᖏᓐᓄᑦ ᐸᐃᕆᕝᕖᓪᓗ ᒪᑐᔭᐅᓂᖏᓐᓄᑦ, ᐅᑯᐊ ᐆᒪᔪᕐᓂᐊᖅᑎᒃᑯᑦ ᑎᑎᕋᕐᕕᖏᑦ ᒪᑐᔭᐅᕗᑦ
    • ᐃᒃᐱᐊᕐᔪᒃ, ᑲᖏᖅᑐᒑᐱᒃ, ᓴᓂᑭᓗᐊᖅ, ᖃᒪᓂ'ᑐᐊᖅ, ᐃᒡᓗᓕᒑᕐᔪᒃ,ᓇᐅᔮᑦ, ᑰᒑᕐᔪᒃ, ᑕᓗᕐᔪᐊᖅ.
    • ᑖᒃᑯᓇᓂ ᓄᓇᓕᖕᓂ, ᐊᖑᓇᓱᒃᑐᓕᕆᔨᒃᑯᑦ ᑐᓴᐅᒪᑎᑕᐅᕗᑦ ᖃᓄᖅ ᖃᐅᔨᒋᐊᕐᕕᖃᕈᓐᓇᕋᔭᕐᒪᖔᖏᑦᑎᒃ ᐱᓕᕆᕝᕕᒋᔭᐅᔪᒥᒃ ᑐᐅᕕᕐᓇᖅᑐᖅᑕᖃᓕᕐᓂᖅᐸᑦ ᓲᕐᓗ ᑯᕕᔪᖃᕐᓂᖅᐸᑦ ᐊᑲᐅᙱᓕᐅᕈᑎᒋᔭᐅᔪᒥᒡᓘᓐᓃᑦ ᓂᕐᔪᑎᒥᒃ ᐱᑕᖃᓕᕐᓂᖅᐸᑦ.



ᐃᖅᑲᓇᐃᔭᖅᑐᓕᕆᔨᒃᑯᓐᓂ ᑐᓴᒐᒃᓴᖅ

ᐃᖅᑲᓇᐃᔭᖅᑐᓕᕆᔨᒃᑯᑦ ᐱᓕᕆᖃᑎᖃᖅᑐᑦ ᒪᓕᒐᓕᕆᔨᒃᑯᓐᓂ, ᐃᓄᓕᕆᔨᒃᑯᓐᓂ, ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑐᑭᑖᕋᓱᒃᖢᑎᒃ ᑭᓱᓂᒃ ᐃᑲᔪᖅᑐᐃᔾᔪᑎᒃᓴᒃᑲᓐᓂᕐᓂᒃ ᐱᔭᕆᐊᖃᕐᒪᖔᑕ. 

ᐃᖅᑲᓇᐃᔭᖅᑐᓕᕆᔨᒃᑯᑦ ᑲᑎᒪᖃᑎᖃᕐᓂᐊᖅᑐᑦ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᒃ ᓇᓪᓕᐅᒃᑯᒫᓂᓪᓗ ᖃᐅᔨᓴᖅᑎᓂᑦ ᐅᖃᐅᓯᖃᕐᓗᑎᒃ ᖃᓄᖅ ᐱᓕᕆᖃᑎᒌᑦᑎᐊᓛᖑᔪᓐᓇᕐᒪᖔᑕ.  ᐃᖅᑲᓇᐃᔭᖅᑐᓕᕆᔨᒃᑯᑦ ᑲᑎᒪᖃᑎᖃᕐᓂᐊᕐᒥᔪᑦ ᓄᓇᕗᒻᒥ ᐃᖅᑲᓇᐃᔭᖅᑎᓄᑦ ᑲᑐᔾᔨᖃᑎᒌᓂᑦ ᖃᓄᐃᑉᐸᓕᐊᓕᕐᓂᖏᓐᓂᒃ ᐱᔾᔪᑎᖃᕐᓗᑎᒃ.

ᐅᖃᐅᓯᐅᒃᐸᑦ ᑭᓯᐊᓂ, ᐊᓯᖏᑦ ᐱᓕᕆᕝᕕᐅᑉ ᐱᔨᑦᑎᕋᐅᑎᖏᑦ ᐊᐅᓚᔾᔪᓯᕆᕙᒃᑕᒥᓂᒃ ᐊᐅᓚᐃᓐᓇᕐᓂᐊᕋᓱᒋᔭᐅᔪᑦ. ᖃᐅᑕᒫ ᑐᓴᒐᒃᓴᓂᒃ ᓴᖅᑭᑦᑎᑲᑕᖕᓂᐊᖅᑐᑦ.

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ

  • ᐃᖅᑲᓇᐃᔭᖅᑎᑦ ᐃᒡᓗᖁᑎᖏᓐᓂᒃ ᐃᒡᓗᑖᖅᑎᑦᑎᔩᑦ ᑲᑎᒪᔨᕋᓛᖏᑦ ᑲᑎᒪᓂᐊᓚᐅᖅᑐᑦ ᓄᖅᑲᖅᑎᑕᐅᔪᑦ. 
  • ᐊᐅᔭᒃᑯᑦ ᐃᓕᓐᓂᐊᖅᑏᑦ ᐃᖅᑲᓇᐃᔭᖅᑎᑕᐅᕙᒃᑐᑦ ᓄᖅᑲᖓᑎᑕᐅᓚᐅᑲᒃᑐᖅ ᓴᖅᑭᑕᐅᒃᑲᓐᓂᑐᐃᓐᓇᕆᐊᖃᖅᖢᓂᓗ ᖃᑯᒍᒃᑲᓐᓂᖅ.







ᓄᓇᕗᒻᒥᐅᑦ ᖃᓄᐃᙱᑦᑎᐊᕈᓐᓇᕐᓂᖏᑦ ᑕᒪᑦᑕᑦᑎᐊᖅ ᑲᒪᒋᔭᒃᓴᕆᕙᕗᑦ!  ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐅᐊᓴᖅᐊᒡᓗᒋᑦ  ᖃᕆᔭᐅᒧᓪᓗ, ᐊᑐᖅᐸᒡᓗᑎᒃ ᑭᒃᑯᑐᐃᓐᓇᓂᒃ ᖃᓂᒃᓴᓗᐊᖅᑕᐃᓕᒪᓂᕐᒥᒃ,  ᓇᓚᒃᐸᒡᓗᑎᓪᓗ ᐅᖃᐅᔾᔪᐃᔾᔪᑕᐅᔪᓄᑦ  ᐊᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓂᑦ, ᐊᖏᕐᕋᖅᓯᒪᕙᒡᓗᑎᒡᓗ ᖃᓂᒪᔭᕌᖓᕕᑦ.