ᓄᕙᒡᔪᐊᕐᓇᖅ-19−ᒧᑦ ᓄᓇᕗᑦ ᒐᕙᒪᖓᑕ ᓄᑖᙳᕆᐊᖅᑎᑕᖏᑦ - ᐄᐳᕈ 6, 2020

ᐄᑉᐳ 6, 2020

ᓯᕗᓕᖅᑎᒥᑦ ᑐᓴᒐᒃᓴᖅ:

ᒫᓐᓇᒧᑦ, ᓄᕙᒡᔪᐊᕐᓇᖅ-19−ᒥ ᖃᓂᒻᒪᒃᓯᒪᔪᖃᕐᒪᖔᖅ ᖃᓂᒪᓇᓱᒋᔭᐅᔪᖃᕐᒪᖔᑦ  ᓱᓕ ᖃᐅᔨᔭᐅᓯᒪᔪᖃᙱᑦᑐᖅ ᓄᓇᕗᒻᒥ.

ᐅᓪᓗᒥ, ᑲᑎᖦᖢᒋᑦ ᐃᓄᐃᑦ ᖃᐅᔨᓴᖅᑕᐅᔪᑦ 356-ᖑᓕᖅᑐᑦ. 247 ᒫᓐᓇ ᖃᐅᔨᓴᖅᑕᐅᔪᑦ, 109−ᓗ ᐃᓄᐃᑦ ᖃᐅᔨᓴᖅᑕᐅᔪᓐᓃᖅᖢᑎᒃ.

ᑕᒪᑐᒪᓂᐅᓵᖅᑐᖅ ᐱᓇᓱᐊᕈᓯᐅᑉ ᓄᙳᐊᓂ, ᐃᓚᒃᑲ ᐃᓅᖃᑎᒋᔪᓐᓇᓚᐅᖅᐸᒃᑲ ᐅᐱᕐᙵᒃᓴᓕᖅᑐᒥᒃ ᐊᓕᐊᓇᐃᒍᓱᖃᑎᒋᓪᓗᒋᑦ, ᐱᔾᔪᑎᖃᓪᓗᐊᑕᖅᖢᑕᓗ ᐃᓱᒪᑦᑎᒍᑦ ᖃᓄᐃᙱᑦᑎᐊᕐᓂᕐᒥᒃ. ᓄᓇᒧᑦ ᐊᐅᓪᓚᖅᓯᒪᓚᐅᖅᐳᒍᑦ, ᐃᖃᓪᓕᐊᖅᓯᒪᓚᐅᖅᐳᒍᑦ, ᓄᓇᓕᖕᓃᑦᑐᓐᓃᖅᓯᒪᓚᐅᖅᐳᒍᑦ, ᐅᕙᑦᑎᓐᓂᒡᓗ ᐱᕕᒃᓴᖃᖅᑎᐊᕐᔪᒃᖢᑕ ᐃᓂᒃᓴᓂᒃ ᐋᖅᑭᒋᐊᕆᐊᖃᒃᑲᓐᓂᐊᕐᔪᖕᓂᕐᒥᒃ ᒥᑭᒃᑐᑯᓗᖕᒥᒃ.

ᒫᓐᓇ ᖃᖓᒃᑲᓐᓂᐊᓚᐅᖅᑐᒥᑦ ᐱᒋᐊᓪᓚᒃᓯᒪᒃᑲᓐᓂᖅᖢᓂ, ᐊᓂᖅᓵᖅᑐᕆᐊᖃᖅᐳᒍᑦ ᐅᕿᙱᓐᓂᐅᓪᓗ ᐃᒃᐱᒋᓯᒪᔭᑦᑕ ᐃᓚᖓ ᐲᕐᓗᒍ ᑕᒪᓐᓇᐅᑎᓪᓗᒍ ᓄᕙᒡᔪᐊᕐᓇᖅ-19.

ᖃᓄᕈᓘᔭᒻᒪᕆᐊᓗᒃ ᓇᓗᓈᕿᓐᓇᖅᓯᒪᖕᒪᑦ ᑲᑉᐱᐊᓱᖕᓇᖅᖢᓂᓗ, ᑕᐃᒪᐃᓐᓂᐊᓄᓪᓗ ᖃᓄᐃᙱᖦᖢᓂ ᐃᓱᒪᔭᕆᐊᒃᓴᖅ ᐱᔭᒃᓴᖃᓗᐊᓕᕐᓂᕐᒥᒃ.  ᑕᐃᒪᐃᓐᓂᖓᓄᓪᓗ ᐱᒻᒪᕆᐊᓘᕗᖅ ᐱᕕᒃᓴᖃᖅᑎᒃᑯᕕᑦ ᐱᔾᔪᑎᖃᓗᐊᙳᐊᕐᓗᑎᑦ ᐃᓕᖕᓂᒃ ᑲᒪᒋᑦᑎᐊᕐᓂᕐᒥᒃ, ᖃᐅᔨᑎᑦᑎᕙᒡᓗᑎᑦ ᐃᑲᔪᖅᑕᐅᔭᕆᐊᖃᕈᕕᑦ, ᐊᓂᖅᓵᖅᑐᒐᑦᑎᐊᕙᒃᑑᒪᕙᒡᓗᑎᑦ, ᑐᑭᓯᐅᒪᓗᑎᓪᓗ ᐃᓄᑑᙱᑦᑎᐊᕐᓂᕐᓂᒃ.

ᐊᑕᐅᑦᑎᒃᑯᑦ ᑕᒪᓐᓇ ᐊᑐᕐᐸᕗᑦ. ᑕᒪᑦᑕᑦᑎᐊᖅ ᑕᐃᒪᐃᑦᑐᒥᒃ ᓱᓕᔪᒥᒃ ᑲᒪᒋᔭᕆᐊᖃᓚᐅᖅᓯᒪᙱᑦᑎᐊᖅᐳᒍᑦ.

ᑕᒪᐃᓐᓄᑦᑎᐊᖅ ᓄᓇᓕᖕᓄᑦ ᓇᖕᒥᓂᖅ ᑎᓕᐅᕆᖃᑦᑕᐅᑎᑦᑎᐊᖅᑐᓄᑦ, ᑕᒪᐃᓐᓄᓪᓗ ᑲᑐᔾᔨᖃᑎᒌᓄᑦ ᐊᑐᓕᖅᑐᓄᑦ ᓄᑖᓂᒃ ᐱᔪᒥᓇᖅᑐᓂᒡᓗ ᖃᐅᔨᔪᒥᓇᖅᑐᓂᒃ ᐊᑕᖃᑦᑕᐅᑎᔪᓐᓇᕐᓂᕐᒥᒃ, ᐃᑲᔪᖃᑦᑕᐅᑎᔪᓐᓇᕐᓂᕐᒥᒡᓗ ᑕᒪᐅᓇ ᓇᓗᓇᕈᔪᒃᑐᒃᑰᕐᓂᑦᑎᓐᓂ, ᑕᒪᐃᓐᓄᓪᓗ ᐱᓇᔪᒍᓐᓇᕐᓂᓕᒫᒥᓂᒃ ᐱᓇᔪᒃᑐᓄᑦ ᓇᒧᙵᐅᕙᓪᓕᐊᔪᒪᓪᓗᑎᒃ ᑕᒪᐅᓇ ᓄᑖᑯᑦ ᐊᑐᖅᑕᐅᓕᖅᑐᑎᒍᑦ − ᖁᔭᓐᓇᒦᒃ.

ᑭᓱᓕᒫᑦᑎᐊᖅ ᐱᓇᔪᒃᑕᐅᔪᖅ ᐃᑲᔪᕐᓂᖃᖅᐳᖅ ᖁᔭᒋᔭᐅᓪᓗᓂᓗ. ᐃᓕᔅᓯᓐᓂᒃ ᐊᓯᔅᓯᓐᓂᒡᓗ ᑲᒪᑦᑎᐊᕐᓗᓯ.

 

 

ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᕙᖕᒥᓂᕐᒧᑦ ᐱᓕᕆᔨᐅᑉ ᐅᖃᐅᓯᕆᔭᖓ:

ᐊᑐᕐᓕᖅ ᓄᕙᒡᔪᐊᕐᓇᖅ-19−ᒧᑦ ᖃᐅᔨᓴᖅᑕᐅᓂᕐᒧᑦ ᐱᖁᑎᓂᒃ ᓄᓇᕗᒻᒥ

ᐊᒥᓱᓯᒍᑦ ᖃᐅᔨᒪᑎᓪᓗᓯ, Agnico Eagle ᐅᔭᕋᖕᓂᐊᖅᑎᒃᑯᑦ ᑎᑭᑎᑦᑎᓯᒪᓕᕐᒪᑕ ᑲᖏᖅᓕᓂᕐᒧᑦ, ᓄᕙᒡᔪᐊᕐᓇᖅ-19−ᒧᑦ ᖃᔨᓴᖅᓯᓂᕐᒧᑦ ᐱᓕᕆᔾᔪᑎᓂᒃ. ᑖᕐᑯᐊ ᖃᐅᔨᓴᖅᓯᔾᔪᑏᑦ ᐊᑐᖅᑕᐅᓂᐊᖅᐳᑦ ᖃᐅᔨᓴᖅᓯᔾᔪᑕᐅᓗᑎᒃ ᐅᔭᕋᖕᓂᐊᕐᕕᐅᑉ ᐃᖅᑲᓇᐃᔭᖅᑎᖁᑎᖏᓐᓂᒃ ᑕᒪᑐᒧᐊ ᓄᕙᒡᔪᐊᕐᓇᖅ-19−ᒧᑦ ᖃᐅᔨᓴᖅᑕᐅᓗᑎᒃ.

ᒫᓐᓇᐅᔪᒃᑯᑦ ᖃᐅᔨᔾᔪᑎᖃᖅᑐᖃᖅᓯᒪᙱᓚᖅ ᑕᐃᒪᓐᓇ ᖃᐅᔨᓴᖅᓯᖃᑦᑕᕐᓂᖅ ᐃᓇᖏᖅᓯᔪᓐᓇᕐᒪᖔᑦ 14−ᓄᑦ ᐅᓪᓗᓄᑦ ᐅᐸᒃᑕᐅᑦᑕᐃᓕᒪᓂᕐᒥᒃ. ᑕᐃᒪᐃᓐᓂᖓᓄᑦ ᑕᕝᕙ ᓄᓇᕗᒻᒥ, ᐊᓯᓕᒫᖏᓐᓂᓗ ᑲᓇᑕᒥᐅᓂ ᐃᓂᒋᔭᐅᔪᓂ, ᐊᑐᖅᐳᑦ 14−ᓂᒃ ᐅᓪᓗᓂᒃ ᐅᐸᒃᑲᐅᑦᑕᐃᓕᒪᑎᑦᑎᕙᖕᓂᕐᒥᒃ ᑕᐃᒪᐃᑦᑐᓕᖕᒦᕌᓪᓚᓚᐅᖅᖢᑎᒃ ᐊᐅᓪᓚᖅᓯᒫᓪᓚᓚᐅᖅᖢᑎᒡᓘᓐᓃᑦ. ᑕᐃᒪᐃᓐᓂᖓᓄᑦ, Agnico Eagle ᐅᔭᕋᖕᓂᐊᖅᑎᒃᑯᑦ ᐊᐅᓚᑦᑎᔨᖏᑦ ᑐᓴᖅᑎᓯᒪᕙᒃᑲ ᑕᒪᒃᑯᐊ ᖃᐅᔨᓴᕐᓃᑦ ᐊᓯᔾᔨᖅᓯᙱᓐᓂᖏᓐᓂᒃ ᒫᓐᓇ ᐊᑐᖅᑕᐅᖃᑦᑕᕆᐊᖃᖅᑐᓂᒃ, ᐅᔭᕋᖕᓂᐊᕐᕕᐅᑉ ᐃᖅᑲᓇᐃᔭᖅᑎᖏᓐᓄᑦ ᑲᖏᖅᖠᓂᕐᒧᐊᖁᙱᓪᓗᒋᑦ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᐊᖃᒻᒪᕆᒍᒪᖕᒪᑕ ᐱᐅᓯᒋᐊᖅᑎᑦᑎᓂᕐᒥᒃ ᓴᐳᔾᔨᓯᒪᓂᕐᒥᒡᓗ ᖃᓄᐃᙱᑦᑎᐊᕈᓐᓇᕐᓂᖏᓐᓄᑦ ᓄᓇᕗᒻᒥᐅᓕᒫᑦ. ᓄᕙᒡᔪᐊᕐᓇᖅ-19−ᒧᑦ, ᑕᒪᓐᓇ ᐃᒪᓐᓇ ᑐᑭᖃᖅᐳᖅ, ᐱᓯᒪᓂᖅ ᖃᐅᔨᓴᕈᑕᐅᔪᓐᓇᖅᑐᓂᒃ  ᐱᖁᑎᓂᒃ ᑲᓇᑕᒥᐅᑦ ᒪᓕᒋᐊᖃᖅᐸᒃᑕᖏᓐᓂᒃ ᒪᓕᒃᑐᓂᒃ, ᑕᒪᐃᓐᓄᓪᓗ ᓄᓇᓕᖕᓄᑦ ᓄᓇᕗᒻᒥ ᑐᓂᐅᖅᑲᐅᑕᐅᔪᓐᓇᖅᖢᑎᒃ. ᐱᖁᑎᑦ ᐊᑐᖅᑕᐅᔪᑦ AEM−ᑯᓐᓂᑦ ᑕᒪᒃᑯᓄᖓ ᐊᑐᖅᑕᐅᔭᕆᐊᓕᖕᓄᑦ ᐊᖑᒻᒪᑎᙱᒻᒪᑕ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᑕᐃᒪᐃᑦᑐᓂᒃ ᐊᑐᖅᑕᐅᕙᒃᑐᓂᒃ  ᐊᑐᓪᓚᕆᒍᒪᓐᓂᖅᐸᑕ, ᐱᐅᓯᒋᐊᖅᑎᑦᑎᓇᔭᙱᑦᑎᐊᖅᐳᒍᑦ ᐊᑐᕈᓐᓇᕐᓂᕐᒥᒃ ᓄᕙᒡᔪᐊᕐᓇᖅᑐᒧᑦ ᖃᐅᔨᓴᖅᓯᓂᕐᒥᒃ ᓄᓇᕗᒻᒥᐅᓕᒫᓄᑦ.

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕙᓪᓕᐊᖏᓐᓇᖅᐳᑦ ᐱᓯᒪᓕᕐᓂᐊᓂᕐᒥᒃ ᖃᐅᔨᓴᖅᓯᓂᕐᒧᑦ ᐊᔪᙱᓐᓂᖃᓕᕐᓂᕐᒥᒃ, ᑕᒪᓐᓇᓗ ᐊᑐᖅᑕᐅᓯᑲᐅᑎᒋᑎᑕᐅᔪᓐᓇᕐᓗᓂ ᓱᒃᑲᓕᔪᒃᑯᑦ, ᐱᑎᑦᑎᔪᓐᓇᕐᓗᓂᓗ ᓄᓇᕗᒻᒥᐅᓕᒫᓂᒃ ᖃᐅᔨᑲᐅᑎᑲᐅᑎᒋᔪᓐᓇᕐᓂᕐᒥᒃ ᖃᐅᔨᔭᐅᔪᓄᑦ.

ᑕᒪᒃᑯᐊ ᑲᑎᖅᓱᖅᓯᒪᔪᑦ ᐱᓕᕆᔾᔪᑏᑦ ᐱᓇᔪᐃᓐᓇᖅᑕᕗᑦ ᖃᐅᔨᓴᖅᓯᔪᓐᓇᕐᓂᕐᒥᒃ ᓄᓇᓕᓕᒫᓂ ᐱᑎᑦᑎᑐᐃᓐᓇᔾᔮᙱᑦᑐᑦ, ᑭᓯᐅᓂᓗᑦᑕᐅᖅ ᐱᐅᓯᒋᐊᖅᑎᑦᑎᓂᐊᕐᒥᔪᑦ ᐊᔪᙱᓐᓂᕆᔭᑦᑎᓐᓂ ᓱᒃᑲᓕᔪᒃᑯᑦ ᖃᐅᔨᓴᖅᓯᔪᓐᓇᓕᕐᓂᕐᒥᒃ ᐊᓯᖏᓐᓂᒃ ᓯᐊᒻᒪᒃᑎᖅᑕᐅᕙᒃᑐᓂᒃ ᐋᓐᓂᐊᕆᔭᐅᓕᖅᐸᒃᑐᓂᒃ ᖁᐊᖅᓵᕐᓇᖅᑐᒦᑎᑦᑎᓕᖅᐸᒃᑐᓂᒃ ᓄᓇᕗᒻᒥᐅᓂᒃ.

ᖃᐅᔨᓴᖅᓯᓂᖅ ᓄᕙᒡᔪᐊᕐᓇᖅ-19−ᒧᑦ ᓈᒻᒪᓈᙱᓪᓗᓂ ᖃᖓᒃᑰᕐᓂᖓ ᓴᖅᑭᑎᑦᑎᔪᓐᓇᖅᐳᖅ ᑕᒻᒪᖅᓯᒪᔪᓂᒃ ᖃᐅᔨᔭᐅᔪᓂᒃ, ᑕᒪᓐᓇᓗ ᓴᖅᑭᑎᑦᑎᓕᒥᓗᓂ ᓱᓕᙱᑦᑐᒥᒃ ᑕᐃᒪᐃᑦᑐᖃᙱᓐᓂᕋᐃᓂᕐᒥᒃ.

 

ᐃᓚᒋᓪᓗᓂᐅᒃ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓄᑦ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐊᖅᓵᕐᓇᖅᑐᒧᑦ ᓄᕙᒡᔪᐊᕐᓇᖅ-19−ᒥᒃ ᐱᑐᐃᓐᓇᕆᐊᖃᕐᓂᕐᒥᒃ, ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ:

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕝᕕᖓᓐᓂᑦ ᑐᓴᒐᒃᓴᑦ

ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᑐᖁᑎᖓᑦ ᐅᖓᕙᕆᐊᖅᑕᐅᓯᒪᕗᖅ ᐄᐳᕈ 16−ᒧᑦ.

ᐅᐸᒃᑕᐅᑦᑕᐃᓕᒪᓂᕐᒧᑦ ᐃᓃᑦ

ᑕᐃᒃᑯᐊ ᐅᐸᒃᑕᐅᑦᑎᐃᓕᒪᔪᑦ ᐊᑐᕈᓐᓇᖅᐳᑦ, ᑕᓚᕖᓴᓂᒃ ᑕᕐᕆᔭᕈᑎᓂᒃ, ᐃᑭᐊᖅᑭᕕᖕᒥᒃ, ᐱᖓᓱᐃᖅᓱᕐᓗᑎᒃ ᐅᓪᓗᒥ ᓂᕆᑎᑕᐅᕙᒡᓗᑎᒃ, ᓴᓗᒪᔪᓂᒃ ᐊᓪᓕᓂᖃᖅᑎᑕᐅᕙᒡᓗᑎᒃ ᓴᓗᒪᖅᓴᐅᑎᑖᖅᑎᑕᐅᕙᒡᓗᑎᒡᓗ. ᐊᒃᑕᑯᖏᑦ ᖃᐅᑕᒫᑦ ᐱᔭᐅᕙᒃᐳᑦ. ᑕᒪᒃᑯᐊ ᐊᑭᓕᕆᐊᓖᑦ ᑲᒪᒋᔭᐅᕗᑦ ᓄᓇᕗᑦ ᒐᕙᒪᒃᑯᖏᓐᓂᑦ. ᓄᓇᕗᑦ ᒐᕙᒪᒃᑯᖏᑦ ᐊᑭᓖᓂᐊᖅᐳᑦ ᖁᐃᖏᓕᓴᕐᓄᑦ, ᓄᑕᕋᓛᑦ ᐃᒻᒧᖏᓐᓄᑦ ᐊᕐᓇᖅᓯᐅᑎᓄᓪᓗ. ᑕᐃᑲᓃᑎᑕᐅᔪᑦ ᑎᑭᓴᐃᔭᕆᐊᖃᖃᑦᑕᖅᐳᑦ ᑕᒪᒃᑯᓂᖓ ᐱᖁᑎᓂᒃ ᐱᕝᕕᐅᔪᓐᓇᖅᑐᓂᑦ ᑐᓂᓯᔭᖅᑐᖃᑦᑕᕈᓐᓇᕐᓗᑎᒃ, ᑭᓯᐊᓂ ᑖᒃᑯᓄᖓ ᐱᖁᑎᓄᑦ ᐊᑭᓕᒐᒃᓴᖅᑖᖅᑎᑕᐅᔾᔮᙱᑦᑐᑦ.

ᑕᐃᓐᓇ ᑐᙵᓱᒃᑎᑦᑎᓂᕐᒧᑦ ᑲᑎᖅᓱᖅᑕᐅᓯᒪᔪᖅ ᐊᓯᔾᔨᕆᐊᖅᑕᐅᓯᒪᓕᖅᐳᖅ ᐃᓚᖃᖅᑎᑕᐅᓂᐊᓕᖅᖢᓂ ᑐᓴᖅᑕᐅᔪᒃᓴᓂᒃ ᓂᕆᔭᒃᓴᓂᒃ ᑎᑭᓴᐃᕙᒃᑐᓄᑦ ᐊᐃᒃᖠᕈᓐᓇᖅᐸᒃᑐᓄᓪᓗ. ᑕᒪᕐᒥᒃ ᑖᒃᑯᐊᒃ ᑐᔪᕐᒥᕕᖕᒧᙵᐅᔭᐅᖃᑦᑕᕈᓐᓇᖅᐳᑦ. ᑕᒪᒃᑯᐊ ᐊᒡᔭᖅᓯᕕᐅᔪᑦ ᐊᒃᑐᐊᓂᓖᓪᓗ ᐊᑭᖏᑦ ᐊᑭᓕᖅᑕᐅᖃᑦᑕᔾᔮᙱᓚᑦ ᓄᓇᕗᑦ ᒐᕙᒪᑯᖏᓐᓂᑦ.

ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐅᐸᒃᑕᐅᑦᑕᐃᓕᒪᓂᕐᒧᑦ ᐃᓃᑦ)

ᐊᐅᓪᓚᖅᓯᒪᔫᑉ ᖃᓄᕆᑦᑑᓂᖓ

ᑐᔪᕐᒥᑎᑕᐅᔪᑦ ᐅᐸᒃᑕᐅᑦᑕᐃᓕᒪᔪᓂ ᐄᐳᕈ 4-ᒥᑦ

ᐋᓐᓂᐊᖅᑐᓕᕆᓂᕐᒧᑦ

235
ᐃᓄᓕᒫᑦ 113
ᐃᓕᓐᓂᐊᖅᑏᑦ 60
ᑲᑎᖦᖢᒋᑦ 408

ᐊᐅᓪᓚᕈᒪᓗᓂ ᐊᐱᕆᔾᔪᑕᐅᓯᒪᔪᑦ

ᐄᐳᕈ 5−ᖑᓚᐅᕐᓂᖓᓂᑦ (ᐅᓪᓛᒃᑯᑦ)  408−ᓂᒃ ᐊᐅᓪᓚᕈᒪᔪᓂᑦ ᑐᒃᓯᕋᖅᑐᖃᖅᓯᒪᕗᖅ, 313−ᓗ ᐱᕕᒡᔪᐊᖑᓪᓗᑎᒃ ᐃᖅᑲᓇᐃᔭᖅᑎᓂᒃ ᑐᒃᓯᕋᖅᑕᐅᔪᑦ.

ᐱᔪᒪᔪᖃᖅᐸᖕᓂᖓᓄᑦ ᖃᓄᐃᓕᖓᓂᖓ # %
ᐊᖏᖅᑕᐅᓯᒪᔪᑦ (ᑕᒪᓐᓇ ᐃᓚᖃᖅᐳᖅ ᐱᒻᒪᕆᐊᓗᖕᓂᑦ ᐱᒻᒪᕆᐊᓘᙱᑦᑐᓂᒡᓗ) 305 74.8%
ᐊᖏᕐᑕᐅᙱᑦᑐᖅ 44 10.7%
ᐅᑕᖅᑭᔪᑦ 59 14.5%
ᑲᑎᖦᖢᒋᑦ 408 100%

 

ᑲᔪᓰᓐᓇᖅᑐᑦ ᐱᔨᑦᑎᕋᐅᑕᐅᔪᑦ:

ᐋᓐᓂᐊᖃᕐᓇᙱᑦᑐᓕᔨᓄᑦ ᐱᔨᑦᑎᕋᕐᓂᕆᔭᐅᕙᒃᑐᓄᑦ ᐃᑲᔪᖅᑕᐅᓂᐅᖃᑦᑕᖅᑐᑦ ᓱᓕ ᐊᑐᐃᓐᓇᐅᔪᑦ ᑕᒪᐃᓐᓄᑦ ᓄᓇᓕᖕᓂ 7-ᓄᑦ ᐅᓪᓗᓄᑦ ᐱᓇᓱᐊᕈᓯᕐᒥ. ᑐᐊᕕᕐᓇᙱᑦᑐᓕᒫᑦ ᑲᒪᒋᔭᕆᐊᓖᑦ ᐱᓕᕆᐊᖑᖃᑦᑕᕐᓂᐊᖅᑐᑦ ᖃᐅᑕᒫᑦ ᑐᐊᕕᕐᓇᓂᖏᑦ ᒪᓕᓪᓗᒋᑦ. ᑐᐊᕕᕐᓇᖅᑐᓕᕆᔨᓄᑦ ᐋᓐᓂᐊᕕᖕᒥᑦ ᐱᔨᑎᕋᐅᑎᖏᑦ ᓱᓕ ᐊᑐᐃᓐᓇᖏᓐᓇᕐᓂᐊᖅᑐᑦ 24−ᓄᑦ ᐃᑲᕐᕋᓄᑦ, ᐱᓇᓱᐊᕈᓯᓕᒫᑦᑎᐊᖅ. ᐃᓗᐊᖅᓴᖅᑕᐅᔭᕆᐊᖃᖅᑐᓕᒫᑦ ᐅᖄᓚᖃᑦᑕᖁᔭᐅᕗᑦ ᓴᖅᑭᓚᐅᙱᓐᓂᕐᒥᓂ ᐋᓐᓂᐊᕐᕕᖕᒧᑦ.

  • ᐃᖃᓗᖕᓂ, ᐅᖁᒪᐃᓐᓂᕐᓂᐊᕐᕕᒃ, ᑐᐊᕕᕐᓇᖅᑐᓕᕆᕝᕕᒃ ᐃᒡᓗᕈᓯᖅ ᐅᓂᒃᓯᒪᕝᕕᐅᕙᒃᑐᕐᓗ ᒪᑐᐃᖓᐃᓐᓇᕐᓂᐊᖅᑐᑦ.
  • ᖃᓄᐃᙱᑦᑎᐊᖅᑐᓄᑦ ᓄᑕᕋᓛᕐᓄᑦ ᐱᓕᕆᐊᖑᕙᒃᑐᑦ, ᓯᖓᐃᔪᓄᑦ ᑕᑯᔭᐅᕙᒃᑐᑦ ᑲᐱᔭᐅᕙᒃᑐᓪᓗ ᑲᔪᓰᓐᓇᖅᐳᑦ ᓄᓇᕘᓕᒫᒥ.
  • ᓘᒃᑖᑦ ᑲᔪᓰᓐᓇᕐᓂᐊᖅᑐᑦ ᓄᓇᓕᖕᓄᑦ ᐳᓚᕋᖃᑦᑕᕐᓂᖏᑦ. ᑕᒪᓐᓇ ᐊᔪᕐᓇᕐᓂᖅᐸᑦ, ᑕᑯᔭᐅᖃᑦᑕᕐᓂᐊᖅᑐᑦ ᑕᓚᕖᓴᒃᑯᑦ ᐃᓗᐊᖅᓴᖅᑕᐅᓗᑎᒃ ᐅᖄᓚᐅᑎᒃᑯᓪᓘᓐᓃᑦ.

ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

ᐃᓂᒃᓴᓕᐅᖅᑐᑦ ᐋᓐᓂᐊᕕᖕᒧᑦ ᑐᐊᕕᕐᓇᕐᓂᕆᔭᖏᑦ ᒪᓕᒃᑕᐅᖃᑦᑕᕐᓂᐊᖅᐳᑦ; ᑕᐃᒪᐃᒻᒪᑦ ᐅᖃᓘᑎᒃᑯᑦ ᐃᓂᒃᓴᓕᐅᖃᑦᑕᕐᓂᐊᖅᐳᑦ ᐅᕝᕙᓘᓐᓃᑦ ᐅᐸᒡᓗᑎᒃ.

ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖃᑦᑕᖅᑐᑦ ᐅᓄᕈᓐᓃᕆᐊᖅᑕᐅᔪᑦ ᑭᓯᐊᓂ ᑐᐊᕕᕐᓇᓐᑐᓄᑦ ᐋᓐᓂᐊᕕᓕᐊᕆᐊᓕᖕᓄᑐᐊᖅ ᐊᐅᓚᖅᑎᑕᐅᖃᑦᑕᕐᓂᐊᖅᑐᑦ. ᑲᒪᒋᔭᐅᕙᒃᑐᑦ ᐅᖃᐅᔾᔪᖅᑕᐅᓂᐊᖅᐳᑦ ᐊᓯᔾᔨᖅᑕᐅᔪᓂᑦ ᐅᖃᖃᑎᒌᖃᑕᐅᓗᑎᒡᓗ ᑐᓴᕆᐊᓕᖏᓐᓂᑦ.

ᐃᖃᓗᖕᓂ, ᐋᓂᐊᕐᕕᓕᐊᖃᑦᑕᖅᑐᓄᑦ ᐊᒻᒪ ᑎᒥᒃᑯᑦ ᐃᖃᐃᓕᓴᕆᐊᓖᑦ ᑕᑯᔭᐅᖃᑦᑕᖅᑐᑦ ᑐᐊᕕᕐᓇᕐᓂᖏᑦ ᒪᓕᓪᓗᒋᑦ ᑕᑯᔭᐅᖃᑦᑕᖅᑐᑦ ᐊᒻᒪ ᑕᑯᔭᒃᓴᓕᐊᖑᓯᒪᔪᓂ ᓱᓕ ᑕᑯᖃᑦᑕᖅᑐᑦ. ᐊᐅᖏᖅᑕᐅᓯᒪᔪᓂᑦ ᖃᐅᔨᓴᕐᕕᖓ ᐊᒻᒪ ᑕᕐᕋᖅᑐᖅᑕᐅᕕᖓ ᕿᑭᖅᑕᓂ ᐋᓐᓂᐊᕕᖕᒥ ᐃᓚᐃᓐᓇᖏᓐᓂᑦ ᑲᒪᖃᑦᑕᕐᓂᐊᖅᑐᑦ. ᑕᑯᔭᐅᕝᕕᒃᓴᓕᓕᒫᑦ ᐊᒡᒋᖅᐸᓪᓕᐊᔪᑦ ᐃᓂᒃᓴᓕᐅᖅᑕᐅᓯᒪᔪᑦ ᑐᐊᕕᕐᓇᓂᖏᑦᑎᒍᑦ ᒪᓕᓪᓗᒋᑦ ᐋᖅᑭᒃᒋᐊᖅᑕᐅᒃᑲᓐᓂᖅᐸᓪᓕᐊᕗᑦ.

ᐃᓱᒪᓕᕆᔨ ᐅᐃᕆᓯᒪᔪᓕᕆᔨᓗ ᓅᓯᒪᓕᖅᐳᑦ ᐅᖄᓚᐅᑎᒃᑯᑦ ᖃᐅᔨᒋᐊᕐᕕᐅᔪᓐᓇᖅᖢᑎᒃ ᐃᑲᔪᖅᑐᐃᓂᕐᒧᓪᓗ ᐃᓚᖏᓐᓄᑦ ᑲᒪᒋᔭᐅᔪᓄᑦ. ᑕᑯᔭᔅᓴᓕᐊᖑᓯᒪᔪᑦ ᐃᔭᒐᖏᓐᓂᑦ ᐊᐃᔅᓯᕆᐊᓖᑦ ᐊᒻᒪ ᐱᓕᕆᖃᖅᑕᕐᓂᕆᕙᑦᑕᖏᑦ ᓱᓕ ᐊᓯᔾᔨᖏᑦᑐᑦ. ᑐᐅᕕᕐᓇᖅᑐᒦᓪᓚᕆᒃᑯᕕᑦ, ᐋᓐᓂᐊᕐᕕᖕᒧᐊᕐᓗᑎᑦ. ᐊᖏᕐᕋᕆᔭᐅᔪᓄᑦ ᐅᐸᑦᑕᐅᖃᑦᑕᖅᑐᑦ ᐄᔭᒐᖏᑕ ᒥᔅᓵᓄᑦ ᐊᑕᐅᓯᐅᓈᖅᑎᕐᓗᒋᑦ ᐱᓕᕆᐊᖃᑦᑕᕐᓂᐊᖅᑐᑦ.

ᒪᑐᔭᐅᔪᖅ/ᓄᖅᑲᖅᑎᑕᐅᔪᖅ/ᓄᖅᑲᖓᑎᑕᓚᐅᑲᒃᑐᖅ ᐱᔨᑦᑎᕋᐅᑏᑦ:

ᑐᐊᕕᕐᓇᖅᑐᑐᐊᑦ ᑭᒍᑎᓕᕆᔨᒧᑦ ᐱᓕᕆᐊᖑᖃᑦᑕᕐᓂᐊᖅᐳᑦ ᓄᓇᕗᒻᒥ ᓄᓇᓕᓕᒫᓂᑦ ᐊᓯᐊᓂᒃ ᑐᓴᖅᑎᑦᑎᔪᖃᒃᑲᓐᓂᓚᐅᙱᓐᓂᖓᓂ.

ᐱᑐᐃᓐᓇᐅᙱᑦᑐᔨᕆᕝᕖᑦ ᐃᓗᐊᖅᓴᖅᑕᐅᓃᑦ ᓄᖅᑲᖅᑎᑕᐅᓯᒪᓕᖅᐳᑦ. ᐱᓕᕆᔪᖃᖅᐸᓪᓕᐊᕗᖅ ᑐᑭᓯᓇᓱᒃᖢᑎᒃ ᓇᓕᐊᒃ ᐃᓗᐊᖅᓴᖅᑕᐅᔭᕆᐊᓖᑦ ᑲᒪᒋᔭᐅᔪᓐᓇᕐᒪᖔᑕ ᐅᖄᓚᐅᑎᒃᑯᑦ/ᖃᕆᓴᐅᔭᒃᑯᑦ ᑲᒪᒋᔭᐅᓗᑎᒃ.

ᐊᐅᓪᓚᕆᐊᓖᑦ ᐱᔭᕆᐊᖃᓪᓚᕆᖏᑦᑐᑦ ᐃᓱᒪᓕᕆᔨᒃᑯᑎᒍᑦ ᐱᓕᕆᕝᕕᐅᕙᒃᑐᓄᑦ ᐃᓚᒌᓐᓄᓪᓗ ᓄᖅᑲᖅᑎᑕᐅᕗᑦ. ᐊᐅᓪᓚᕆᐊᖃᖅᑐᓕᒫᑦ ᖃᑕᙳᑎᒥᓂᒃ ᐋᓐᓂᐊᕐᕕᖕᒦᑦᑐᒥᒃ ᑕᑯᔭᖅᑐᖅᐸᒃᑐᑦ ᓄᖅᑲᖅᑎᑕᐅᔪᑦ.

ᐳᓛᕆᐊᖅᑐᖃᖃᑦᑕᕈᓐᓇᔾᔮᙱᑦᑐᖅ ᐊᕗᖓᑲᓪᓚ ᑲᒪᒋᔭᖃᖅᐸᖕᓂᕐᒧᑦ ᐃᓂᒋᔭᐅᔪᐅᓂ ᓄᓇᕗᒻᒥ − ᑎᒥᒥᒍᑦ ᐃᓕᖅᑯᓯᖅᓱᙱᑦᑐᓄᑦ ᐃᓂᒋᔭᐅᔪᓂ ᐃᓐᓇᐃᓪᓗ ᐊᖏᕐᕋᕆᔭᖏᓐᓂ.

 

ᐃᓄᓕᕆᔨᒃᑯᑦ

ᓂᖃᐃᓱᕐᓂᕐᒧᑦ ᐱᔨᑦᑎᕋᕐᓃᑦ ᓄᓇᕗᒻᒥᓕᒫᖅ

  • ᒫᑦᓯ 23, 2020-ᐅᓚᐅᕐᓂᖓᓂᑦ, ᐃᓄᓕᕆᔨᒃᑯᑦ ᐱᓕᕆᐊᖃᖃᑦᑕᖅᐳᑦ ᓂᖃᐃᓱᕆᐊᖅᓯᒪᔪᓂᒃ ᐅᖄᓚᐅᑎᒃᑯᑦ.
  • ᐄᐳᕈᒥ ᓂᖃᐃᓱᕈᑕᐅᔪᑦ ᐋᖅᑭᒃᑕᐅᓂᐊᖅᐳᑦ ᐊᑐᖅᑐᖃᕐᓗᓂ ᒫᑦᓯᒧᑦ ᓂᖃᐃᓱᓚᐅᕐᓂᕐᒧᑦ ᐃᑲᔪᖅᑕᐅᓚᐅᕐᓂᕐᒧᑦ ᖃᐅᔨᓴᖅᑕᐅᓯᒪᔪᓂᒃ ᒪᓕᒃᑐᖃᕐᓗᓂ.

ᐄᐳᕈᒧᑦ ᑮᓇᐅᔭᒃᓴᖅᑖᖑᔪᒃᓴᑦ ᑎᑎᕋᖅᓯᒪᓕᖅᑎᑕᐅᓯᒪᓕᖅᐳᑦ, ᐃᓂᒃᓴᓕᐅᖅᑕᐅᓯᒪᓕᖅᖢᑎᒡᓗ ᑕᐃᒃᑯᐊ ᐱᔭᕆᐊᓖᑦ ᑖᒃᑯᓂᖓ ᐱᓂᐊᕐᓗᑎᒃ. ᐃᓂᒃᓴᓕᐅᖅᑕᐅᓯᒪᔪᑦ ᐋᖅᑭᒃᓱᖅᑕᐅᓯᒪᕗᑦ ᐊᑕᐅᓯᑐᐊᑦᑎᐊᕐᒥᒃ ᑎᑎᕋᕐᕕᒦᑦᑐᖃᖃᑦᑕᕐᓂᐊᖅᖢᓂ ᑕᐅᑯᙵᖅᐸᓪᓕᐊᔪᓂᑦ.

 

ᓄᓇᕗᒻᒥᐅᑦ ᖃᓄᐃᙱᑦᑎᐊᕈᓐᓇᕐᓂᖏᑦ ᑕᒪᑦᑕᑦᑎᐊᖅ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐅᐊᓴᖅᐊᒡᓗᒋᑦ ᖄᕆᔭᐅᔪᓪᓗ, ᐊᑐᖅᐸᒡᓗᑎᒃ ᑭᒃᑯᑐᐃᓐᓇᓂᒃ ᖃᓂᒃᓴᓗᐊᖅᑕᐃᓕᒪᓂᕐᒥᒃ, ᓈᓚᒃᐸᒡᓗᑎᓪᓗ ᐅᖃᐅᔾᔪᐃᔾᔪᑕᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓂᑦ, ᐊᖏᕐᕋᖅᓯᒪᕙᒡᓗᑎᒡᓗ ᖃᓂᒪᔭᕌᖓᕕᑦ.