ᓄᕙᒡᔪᐊᕐᓇᖅ-19−ᒧᑦ ᓄᓇᕗᑦ ᒐᕙᒪᖓᑕ ᓄᑖᙳᕆᐊᖅᑎᑕᖏᑦ - ᐄᐳᕈ 1, 2020

ᐄᑉᐳ 1, 2020

ᓯᕗᓕᖅᑎᒥ ᑐᓴᒐᒃᓴᖅ:

ᒫᓐᓇᒧᑦ, ᓄᕙᒡᔪᐊᕐᓇᖅ-19−ᒥ ᖃᓂᒻᒪᒃᓯᒪᔪᖃᕐᒪᖔᖅ ᖃᓂᒪᓇᓱᒋᔭᐅᔪᖃᕐᒪᖔᑦ  ᓱᓕ ᖃᐅᔨᔭᐅᓯᒪᔪᖃᙱᑦᑐᖅ ᓄᓇᕗᒻᒥ.

ᒫᓐᓇᒧᑦ ᑎᑭᖦᖢᒍ ᑲᑎᖦᖢᒋᑦ ᐃᓄᐃᑦ ᖃᐅᔨᓴᖅᑕᐅᔪᑦ 290-ᖑᓕᖅᑐᑦ. 205 ᒫᓐᓇ ᖃᐅᔨᓴᖅᑕᐅᔪᑦ, 85−ᓗ ᐃᓄᐃᑦ ᖃᐅᔨᓴᖅᑕᐅᔪᓐᓃᖅᖢᑎᒃ.

ᐅᓪᓗᒥ ᐄᐳᕈ 1-ᖑᕗᖅ− ᓄᓇᕗᑦ 21−ᓂᒃ ᐊᕐᕌᒍᖃᓕᖅᖢᓂ. ᐃᒪᓐᓇᐅᓇᔭᖅᐳᒍᑦ, ᖁᕕᐊᓱᒍᑎᖃᕋᔭᖅᐳᒍᑦ ᐊᕕᒃᓯᒪᓂᑦᑕ ᐱᑕᖃᓕᖅᑎᑕᐅᓚᐅᖅᓯᒪᓂᖓᓂᒃ, ᐃᓱᒪᒋᔭᕋ ᐊᓯᖔᖓᕉᕋᔭᕋᓱᒋᓪᓗᖓ. ᑕᒪᑐᒪᓂ ᐊᕐᕌᒍᒥ ᐊᑐᖅᑕᐅᕙᒃᑐᒥᒃ ᐊᑐᔾᔭᙱᒃᑲᓗᐊᖅᑎᓪᓗᑕ, ᑭᓯᐊᓂᓗᑦᑕᐅᖅ ᐅᕙᑦᑎᓐᓄᑦ ᐱᕕᒃᓴᐅᒋᕗᖅ ᐃᓱᒪᒥᐅᑕᖃᕐᓂᕐᒥᒃ ᖃᓄᖅ ᑐᑭᖃᕐᒪᖔᑦ ᓄᓇᕗᒻᒥᐅᑕᐅᓂᖅ.

ᑕᐅᑐᒐᖃᓪᓗᐊᑕᖅᐳᖓ ᖃᓄᐃᓕᐅᕈᓐᓇᕐᒪᖔᕐᒪ ᑕᒪᓐᓇ ᐊᕕᓯᒪᓂᖅᐳᑦ, ᓄᓇᓕᒃᐳᑦ ᖃᓂᒋᔭᒃᖠᕗᓪᓗ ᖃᓄᖅ ᒫᓐᓇ ᖁᐊᖅᓵᕐᓇᖅᑐᒦᙱᑎᑦᑐᓐᓇᕐᒪᖔᑦᑎᒍ; ᐅᓇᐅᓪᓗᓂᓗ, ᐊᖏᕐᕋᖅᓯᒪᓂᖅ ᐅᖓᓯᒃᓴᖅᐸᖕᓂᕐᓗ, ᑲᑎᙵᓗᑕ.

ᑕᐃᒃᑯᓄᖓ ᓄᓇᕗᒻᒥᐅᓄᑦ ᐃᓄᑑᑎᑕᐅᓕᖅᓯᒪᔪᓄᑦ ᖃᓪᓗᓈᑦ ᓄᓇᖏᓐᓂ, ᖁᔭᓐᓇᒦᖑᔪᓯ ᐱᓕᕆᐊᖃᕐᓂᔅᓯᓐᓄᑦ ᐱᓕᕆᐊᕆᔭᕆᐊᖃᖅᑕᔅᓯᓐᓂᒃ ᑕᒪᓐᓇ ᓄᕙᒡᔪᐊᕐᓇᖅ-19 ᑕᒪᐅᙵᖁᙱᓪᓗᒍ.

ᑕᐃᒃᑯᓄᖓ ᓄᓇᕗᒻᒥᐅᓄᑦ ᑕᒡᒪᒡᓂᑦᑐᓄᑦ ᐊᖏᕐᕋᖅᓯᒪᖃᑦᑕᖅᑐᓄᓪᓗ ᒥᑭᒡᓕᒋᐊᖅᑎᑦᑎᓯᒪᔪᒪᓪᓗᑎᒃ ᖁᐊᖅᓵᕐᓇᕈᓐᓇᕐᓂᖓᓂᒃ ᑕᒪᓐᓇ ᓄᕙᒡᔪᐊᕐᓇᖅ-19, ᖁᔭᓐᓇᒦᖑᔪᓯ.

ᑕᐃᒃᑯᓄᖓᓗ ᓄᓇᕗᒻᒥᐅᓄᑦ ᐊᑐᖅᑕᐅᓪᓚᕆᒋᐊᖃᖅᐸᒃᑐᓄᑦ ᐃᖅᑲᓇᐃᔭᖅᑎᐅᓗᑎᒃ, ᐃᖅᑲᓇᐃᔭᕆᐊᖅᐸᒃᑐᓄᑦ ᖃᐅᑕᒫᑦ ᐱᓕᕆᐊᒃᓴᖁᑎᕗᑦ, ᐱᔨᑦᑎᕋᕐᓂᕆᕙᒃᑕᕗᑦ, ᐱᖁᑏᓪᓗ ᐱᔭᕆᐊᖃᖅᑕᕗᑦ ᑲᔪᓯᑎᑦᑐᒪᓪᓗᒋᑦ, ᖁᔭᓐᓇᒦᖑᔪᓯ ᐱᓕᕆᐊᖃᕐᓂᔅᓯᓐᓄᑦ ᓇᖕᒥᓂᖅ ᖃᓄᐃᑦᑕᐃᓕᒪᑎᖦᖢᓯ ᖃᓄᐃᙱᑦᑎᐊᕈᒪᓪᓗᓯᓗ ᐅᕙᑦᑎᓐᓂᓕᒫᖅ ᓴᐳᔾᔨᓯᒪᔪᒪᓪᓗᓯ.

ᑕᒪᑦᑕᑦᑎᐊᖅ ᐱᔭᒃᓴᖃᖅᑐᐃᓐᓇᐅᕗᒍᑦ, ᑲᒪᒋᔭᒃᓴᖃᖅᑐᐃᓐᓇᐅᓪᓗᑕᓗ ᑕᒪᑦᑎᓐᓂᒃ ᖃᓄᐃᙱᑦᑎᐊᖁᔨᓪᓗᑕ.

 

 

ᐃᓚᒋᓪᓗᓂᐅᒃ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓄᑦ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐊᖅᓵᕐᓇᖅᑐᒧᑦ  ᓄᕙᒡᔪᐊᕐᓇᖅ-19−ᖃᓕᑐᐃᓐᓇᕆᐊᓕᖕᓄᑦ, ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ:

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕝᕕᖓᓂ ᑐᓴᒐᒃᓴᑦ

ᐳᓛᕆᐊᖅᑐᖃᖃᑦᑕᕈᓐᓇᔾᔮᙱᑦᑐᖅ ᐊᕗᖓᑲᓪᓚ ᑲᒪᒋᔭᖃᖅᐸᖕᓂᕐᒧᑦ ᐃᓂᒋᔭᐅᔪᐅᓂ ᓄᓇᕗᒻᒥ − ᑎᒥᒥᒍᑦ ᐃᓕᖅᑯᓯᖅᓱᙱᑦᑐᓄᑦ ᐃᓂᒋᔭᐅᔪᓂ ᐃᓐᓇᐃᓪᓗ ᐊᖏᕐᕋᕆᔭᖏᓐᓂ.

ᐊᐅᓪᓚᑲᑕᒃᑐᓕᒫᑦ ᐃᓄᑑᔭᕆᐊᖃᖃᑦᑕᕐᓂᐊᓕᖅᐳᑦ ᓇᓗᓇᐃᖅᑕᐅᓯᒪᔪᒥ ᑐᔪᕐᒥᕕᖕᒥ ᓄᓇᕗᑦ ᓯᓚᑖᓂ ᐅᓪᓗᓄᑦ 14-ᓄᑦ, ᑭᓯᐊᓂ ᐱᒻᒪᕆᐅᔪᑦ ᐃᖅᑲᓇᐃᔭᖅᑏᑦ ᖃᓂᒪᖅᑰᔨᙱᑦᑐᑦ.

ᐃᓄᐃᑦ ᐃᓄᑑᓕᖅᑎᑦᑕᕆᐊᓖᑦ ᐃᖅᑲᐃᑎᑕᐅᒋᐊᖅᐳᑦ ᑕᐃᑯᙵᐅᖁᔭᐅᙱᖦᖢᑎᒃ ᑐᔪᕐᒥᕕᖕᒧᑦ ᑭᓯᐊᓂ ᐱᓯᒪᓕᕈᑎᒃ ᓇᓗᓇᐃᖅᓯᓪᓚᕆᒃᑐᓂᒃ ᐃᓂᒃᓴᓕᐅᖅᑕᐅᓯᒪᓕᕐᓂᕐᒥᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᓐᓂᑦ.

ᑕᐃᒃᑯᐊ ᓄᓇᕗᒻᒧᑦ ᐅᑎᖅᑐᑦ ᐱᔭᕆᐊᖃᖅᐳᑦ ᐊᖏᖅᑕᐅᓯᒪᓂᕐᒥᓂᒃ ᑎᑎᕋᕐᕕᒋᔭᖓᓂᑦ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᐅᑉ, ᐊᐱᕆᔭᐅᓪᓗᑎᒡᓗ ᖃᕆᑕᐅᔭᒃᑯᑦ ᐅᕗᖓ ᑎᑎᕋᖁᔭᐅᓪᓗᑎᒃ CPHOTravelRequests@gov.nu.ca.

ᐃᓄᑑᓕᖅᑎᑦᑕᕆᐊᖃᕈᕕᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔭᑏᑦ ᐃᓕᖕᓂᒃ ᖃᐅᔨᒋᐊᕐᕕᖃᖃᑦᑕᕐᓂᐊᖅᐳᑦ. ᐊᑭᖃᙱᑦᑐᖅ ᐅᖄᓚᕝᕕᐅᔪᓐᓇᖅᑐᖅ ᑭᓇᑐᐃᓐᓇᕐᒧᑦ ᐊᐅᓪᓚᖅᓯᒪᓵᓚᐅᖅᑐᓄᑦ ᐅᕝᕙᓘᓐᓃᑦ ᐋᓐᓂᐊᑲᑕᓕᖅᐸᑦ ᓄᕙᒡᔪᐊᕐᓇᖅ−19-ᒧᑦ ᖃᓂᒪᒍᑕᐅᔪᓂᑦ, 1-888-975-8601 ᑭᐅᔭᐅᖃᑦᑕᕐᓂᐊᖅᐳᖅ 7:30-ᒥᑦ 7:30−ᒧᑦ

CPHO−ᑯᑦ ᑎᓕᓯᔾᔪᑎᒋᓯᒪᔭᖏᑦ ᐊᐅᓪᓚᕐᓂᕐᒧᓪᓗ/ᐱᒻᒪᕆᐊᓗᖕᓄᑦ ᐃᖅᑲᓇᐃᔭᖅᑎᓂᑦ ᒪᓕᒃᑕᐅᔭᕆᐊᓖᑦ ᐃᓕᔭᐅᓯᒪᕗᑦ ᐅᕙᓂ: https://www.gov.nu.ca/health/information/covid-19-novel-coronavirus

ᐅᐸᒃᑕᐅᑦᑕᐃᓕᒪᓂᖅ

  • ᑕᐃᒃᑯᐊ ᐅᐸᒃᑕᐅᑦᑎᐃᓕᒪᔪᑦ ᐊᑐᕈᓐᓇᖅᐳᑦ, ᑕᓚᕖᓴᓂᒃ ᑕᐅᑐᒍᓐᓇᕐᓂᕐᒥᒃ, ᐃᑭᐊᖅᑭᕕᖕᒥᒃ, ᐱᖓᓱᐃᖅᓱᕐᓗᑎᒃ ᐅᓪᓗᒥ ᓂᕆᑎᑕᐅᕙᒡᓗᑎᒃ, ᓴᓗᒪᔪᓂᒃ ᐊᓪᓕᓂᖅᑖᖅᑎᑕᐅᕙᒡᓗᑎᒃ ᓴᓗᒪᖅᓴᐅᑎᑖᖅᑎᑎᑕᐅᕙᒡᓗᑎᒡᓗ. ᓴᓂᕐᓗᑯᖏᑦ ᖃᐅᑕᒫᑦ ᐱᔭᐅᕙᒃᐳᑦ.
  • ᑕᒪᒃᑯᐊ ᐊᑭᓕᕆᐊᖃᕐᓂᖏᑦ ᑲᒪᒋᔭᐅᕗᑦ ᓄᓇᕗᑦ ᒐᕙᒪᒃᑯᖏᓐᓂᑦ. ᓄᓇᕗᑦ ᒐᕙᒪᒃᑯᖏᑦ ᐊᑭᓖᓂᐊᖅᐳᑦ ᖁᐃᖏᓕᓴᕐᓄᑦ, ᓄᑕᕋᓛᑦ ᐊᒫᒪᒃᐸᒃᑕᖏᓐᓄᑦ ᐊᕐᓇᖅᓯᐅᑎᓄᓪᓗ.
  • ᑕᐃᑲᓃᑎᑕᐅᔪᑦ ᑲᒪᒋᔭᒃᓴᖃᖅᐳᑦ ᑎᑭᓴᐃᓂᕐᒥᒃ ᑕᒪᒃᑯᓂᖓ ᐱᖁᑎᓂᒃ ᐱᕝᕕᐅᔪᓐᓇᖅᑐᓂᑦ ᑐᓂᓯᔭᖅᑐᖃᑦᑕᕈᓐᓇᕐᓗᑎᒃ, ᑭᓯᐊᓂ ᑖᒃᑯᓄᖓ ᐱᖁᑎᓄᑦ ᐊᑭᓕᒐᒃᓴᖅᑖᖅᑎᑕᐅᔾᔮᙱᑦᑐᑦ.
  • ᑕᐃᓐᓇ ᑐᙵᓱᒃᑎᑦᑎᓂᕐᒧᑦ ᑲᑎᖅᓱᖅᑕᐅᓯᒪᔪᖅ ᐊᓯᔾᔨᕆᐊᖅᑕᐅᓯᒪᓕᖅᐳᖅ ᐃᓚᖃᖅᑎᑕᐅᓂᐊᓕᖅᖢᓂ ᑐᓴᖅᑕᐅᔪᒃᓴᓂᒃ ᓂᕆᔭᒃᓴᓂᒃ ᑎᑭᓴᐃᕙᖕᓂᕐᒧᑦ ᐊᐃᒃᖠᕈᓐᓇᖅᐸᖕᓂᕐᒧᓪᓗ. ᑕᒪᕐᒥᒃ ᑖᒃᑯᐊᒃ ᑐᔪᕐᒥᕕᖕᒧᙵᐅᔭᐅᖃᑦᑕᕈᓐᓇᖅᐳᒃ. ᑕᒪᒃᑯᐊ ᐊᒡᔭᖅᓯᕕᐅᓃᑦ ᐊᒃᑐᐊᓂᓖᓪᓗ ᐊᑭᖏᑦ ᐊᑭᓕᖅᑕᐅᖃᑦᑕᔾᔮᙱᓚᑦ ᓄᓇᕗᑦ ᒐᕙᒪᑯᖏᓐᓂᑦ.

 

ᒪᓕᒐᓕᕆᔨᒃᑯᓐᓂᑦ ᐱᔨᑦᑎᕋᐅᑎᑦ

ᐋᖅᑭᒋᐊᖅᑕᐅᓯᒪᓕᖅᑐᑦ ᐱᔨᑦᑎᕋᕈᑕᐅᕙᒃᑐᑦ:

ᐱᓂᕐᓗᒡᕕᐅᓯᒪᔪᑦ ᐱᔨᑦᑎᕋᕐᕕᐅᓂᖏᑦ

ᐱᓂᕐᓗᒡᕕᐅᓯᒪᔪᑦ ᐱᔨᑦᑎᕋᕐᕕᐅᕙᖕᓂᖏᓐᓄᑦ ᑎᑎᕋᕐᕕᒃ ᒫᓐᓇ ᑭᒃᑯᑐᐃᓐᓇᓄᑦ ᒪᑐᓯᒪᑲᓚᐅᖅᐳᖅ. ᑭᓯᐊᓂᓗᑦᑕᐅᖅ, ᓄᓇᕗᒻᒥᐅᑦ ᖃᐅᔨᒋᐊᕐᕕᖃᕆᐊᓖᑦ ᑎᑎᕋᕐᕕᖕᒥᒃ ᑕᐃᒪᐃᓕᐅᕈᓐᓇᖅᐳᑦ ᐊᑐᕐᓗᑎᒃ ᐆᒥᖓ ᖃᐅᔨᒋᐊᕐᕕᖃᕐᓂᕐᒧᑦ ᑐᓴᖅᑕᐅᔪᒃᓴᒥᒃ:

  • ᐱᓂᕐᓗᒡᕕᐅᓯᒪᔪᓄᑦ ᐱᔨᑦᑎᕋᕐᕕᖃᕐᓂᕐᒧᑦ ᐊᖏᖃᙱᑦᑐᖅ 1-866-456-5216; victimservices@gov.nu.ca.
  • ᐱᔨᑦᑎᕋᕐᓂᕆᔭᐅᔪᑦ ᐱᑎᑕᐅᖃᑦᑕᕐᓂᐊᖅᐳᑦ ᐊᑕᐅᓯᐅᓈᖅᑎᕐᓗᒋᑦ.

ᑎᑎᕋᕐᕕᖓᑦ ᑭᒃᑯᑐᐃᓐᓇᕐᓄᑦ ᐸᖅᑭᔨᐅᑉ ᕿᒪᐃᔪᓄᓪᓗ ᐃᓅᔪᓪᓃᕐᓂᕐᒧᑦ ᐸᐸᑦᑎᔨᐅᑉ

ᐅᓪᓗᒥᒧᑦ ᑎᑭᖦᖢᒍ, ᐄᐳᕈ 1, 2020, ᑎᑎᕋᕐᕕᖓ ᑭᒃᑯᑐᐃᓐᓇᓄᑦ ᐸᖅᑭᔨᐅᑉ ᑲᑎᖃᑎᖃᕐᓂᐊᖅᐳᖅ ᑎᑎᕋᕐᕕᖓᓂᒃ ᑭᒃᑯᑐᐃᓐᓇᓄᑦ ᐸᐸᑦᑎᔨᐅᑉ ᑖᒃᑯᓇᓂ ᒪᓕᒐᓕᕆᔨᒃᑯᓐᓂ. ᑖᓐᓇ ᓄᑖᖑᓂᐊᓕᖅᑐᖅ ᑎᑎᕋᕐᕕᒃ ᐃᒻᒪᓐᓇᐃᑦᑑᓂᐊᓕᖅᐳᖅ, ᑎᑎᕋᕐᕕᒋᔭᐅᓗᓂ ᑭᒃᑯᑐᐃᓐᓇᓄᑦ ᑲᒪᒋᔭᖃᖅᐸᒃᑑᑉ ᐸᐸᑦᑎᔨᐅᓪᓗ. ᑕᒪᕐᒥᑦᑎᐊᖅ ᖃᐅᔨᒋᐊᕐᕕᒋᓂᐊᕐᓗᒋᑦ ᑐᓴᖅᑕᐅᔪᒃᓴᐃᑦ ᓱᓕ ᐊᔾᔨᑦᑎᐊᕆᕙᖏᑦ.

ᑕᐃᓐᓇ ᑎᑎᕋᕐᕕᒃ ᒪᑐᐃᒃᑲᓐᓂᑐᐊᖅᐸᑦ ᑕᒪᓐᓇ ᑭᒃᑯᓱᑐᐃᓐᓇᓄᑦ ᖃᓄᐃᙱᑎᑦᑎᔪᓐᓇᕐᓂᕐᒧᑦ ᑐᐊᕕᕐᓇᖅᑐᖅ ᐱᐊᓂᐊᓪᓚᓚᐅᖅᑎᓪᓗᒍ, ᑖᓐᓇ ᐃᓂᖃᓕᕐᓂᐊᖅᐳᖅ ᐊᓪᓕᖅᐹᖓᓂ ᓇᑎᖓᓂ ᐆᒪ, Brown Building ᐃᖃᓗᖕᓂ. ᒪᓕᒐᑎᒍᑦ ᑎᑎᕋᖅᐸᓪᓕᐊᔪᓕᕆᔩᑦ ᓅᓯᒪᓕᖅᐳᑦ ᑎᓴᒪᖓᓄᑦ ᓇᑎᐊᓄᑦ ᐅᕙᓂ, 1106 ᐃᓄᒃᓱᒐᐃᑦ ᐃᒡᓗᕐᔪᐊᖓᓂ ᐃᖃᓗᖕᓂ.

ᐱᔾᔪᑎᖃᖅᖢᓂ ᑎᑎᕋᕐᕕᖓ ᐊᓯᐊᓄᐊᖅᑕᐅᓂᖓᓂᒃ, ᑕᐃᑯᙵᐅᓯᒪᔪᑦ ᐊᑐᑐᐃᓐᓇᕆᐊᖃᖅᐳᑦ ᑭᖑᕙᕆᐊᕌᕐᔪᒃᑐᓂᒃ ᐅᖄᓚᐅᑎᓄᑦ ᖃᕆᑕᐅᔭᒃᑯᓪᓗ ᑎᑎᕋᖃᑦᑕᐅᑎᕝᕕᒃᑎᒍᑦ ᑭᐅᔭᐅᓂᕐᒥᒃ. ᒪᒥᐊᑉᐳᒍᑦ ᑕᒪᑐᒧᖓ ᐊᑲᐅᙱᓕᐅᕈᑎᒋᔭᐅᔪᒧᑦ.

 

ᒐᕙᒪᓕᕆᔨᒃᑯᑦ

ᑲᔪᓰᓐᓇᖅᑐᑦ ᐱᔨᑦᑎᕋᐅᑕᐅᔪᑦ:

ᓄᓇᕗᑦ ᒐᕙᒪᒃᑯᖏᑦ ᐊᖑᒻᒪᑏᓐᓇᖅᐳᑦ ᖃᐅᔨᔭᐅᔭᕆᐊᖃᙱᑦᑐᓄᑦ ᐊᑐᕆᐊᖃᖅᐸᒃᑕᒥᓂᒃ ᐅᑯᑎᒎᓇᖅ, ᐊᑐᕈᓐᓇᕐᓂᖅ ᑐᓴᖅᑕᐅᔪᒃᓴᓂᒃ ᓴᐳᔾᔨᓯᒪᓂᕐᓗ ᖃᐅᔨᔭᐅᔭᕆᐊᖃᙱᑦᑐᓂᒃ ᐱᖁᔭᖅ. ATIPP−ᒧᑦ ᐊᐅᓚᑦᑎᔩᑦ ᑲᔪᒡᓯᓐᓇᖅᐳᑦ ᐱᓕᕆᐊᖃᖅᐸᓪᓕᐊᓪᓗᑎᒃ ᓄᑖᓂᒃ ᐱᑕᖃᖅᐸᒌᖅᑐᓂᒡᓗ ᐱᔪᒪᔾᔪᑕᐅᔪᓂᒃ ᑐᓴᖅᑕᐅᔪᒃᓴᓂᒃ ᑭᐅᓯᓂᐊᖅᖢᑎᒡᓗ 25ᓂᒃ-ᐱᓕᕆᕝᕕᒋᔭᐅᔪᓂᒃ-ᐅᓪᓗᒃᑯᑦ ᖃᖓᒃᑰᕐᓂᖏᓐᓂᒃ, ᑭᓯᐊᓂ ᑕᐃᒪᐃᓐᓇᔭᙱᓚᑦ ᐱᔪᓐᓇᐅᑎᓕᒃᑯᑦ ᐅᖓᕙᕆᐊᖅᑕᐅᓂᖓ ᐊᑐᖅᐸᑦ ᐱᖁᔭᐅᑉ ᐊᑖᒍᑦ. ᖃᐅᔨᒋᐊᕐᕕᖃᕐᓂᐊᕐᓂᕐᒧᑦ ᑐᓴᖅᑕᐅᔪᒃᓴᓂᒃ ᑭᓇᒧᑦ ᐅᖃᖃᑎᖃᕈᓐᓇᕋᔭᕐᒪᖔᖅᐱᑦ ᑎᑎᕋᖅᓯᓂᐊᕐᓗᑎᒃ ATIPP−ᒧᑦ ᐱᔪᒪᔾᔪᑕᐅᔪᒧᑦ, ᐊᑕᓕᕐᕕᐅᔪᓐᓇᖅᑐᖅ ᐊᑖᓃᑦᑐᖅ ᑕᑯᒋᐊᕐᓗᒍ https://www.gov.nu.ca/executive-and-intergovernmental-affairs/informatio...

 

ᐊᕙᑎᓕᕆᔨᒃᑯᑦ ᐱᔨᑦᑎᕋᕐᓂᕆᔭᖏᑦ

ᐊᕙᑎᓕᕆᓂᕐᒧᑦ ᓴᐳᔾᔨᓯᒪᓂᕐᒧᑦ ᐱᓕᕆᕝᕕᒃ ᐱᓕᕆᐊᖃᖅᐳᖅ ᒐᕙᒪᑐᖃᒃᑯᓐᓂᒃ, ᐊᕕᒃᓯᒪᓂᓂᕐᓂ ᒐᕙᒪᒋᔭᐅᔪᓂᒃ, ᑲᓇᑕᒥᓗ ᐊᕕᒃᑐᖅᓯᒪᓂᕐᓂᒃ ᐱᓕᕆᖃᑎᒋᕙᒃᑕᒥᓂᒃ ᑎᑎᕋᖅᓯᒪᓕᖅᑎᑦᑎᔪᒪᓪᓗᑎᒃ ᒥᑭᒡᓕᒋᐊᖅᑐᓂᒃ ᐃᓯᐊᕿᑎᑕᐅᕙᒃᑐᓂᒃ ᑕᐃᒪᐃᔾᔪᑎᖃᖅᖢᑎᒃ ᖃᓂᒪᕐᔪᐊᕐᓇᖅᑐᒧᑦ ᑭᐅᓯᔪᒪᓂᖕᓂᒃ.

 

ᓄᓇᕗᒻᒥᐅᒃ ᖃᓄᐃᙱᑦᑎᐊᕈᓐᓇᕐᓂᖏᑦ ᑕᒪᑦᑕᑦᑎᐊᖅ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐅᐊᓴᖃᑦᑕᕐᓗᒋᑦ ᑭᐳᐃᓪᓗ ᐊᓪᓚᖅᑐᖅᐸᒡᓗᒋᑦ, ᑭᒃᑯᑐᐃᓐᓇᓂᒃ ᖃᓂᒃᓴᓗᐊᖅᑕᐃᓕᒪᓗᓯ, ᓇᓚᒃᐸᒡᓗᑎᓪᓗ ᐅᖃᐅᔾᔪᐃᔾᔪᑕᐅᔪᓄᑦ ᐊᓐᓂᐊᖃᕐᓇᙱᑦᑐᓕᕆᔨᓂᑦ, ᐊᖏᕐᕋᖅᓯᒪᕙᒡᓗᑎᒡᓗ ᖃᓂᒪᔭᕌᖓᕕᑦ.