ᓄᕙᒡᔪᐊᕐᓇᖅ-19−ᒧᑦ ᓄᓇᕗᑦ ᒐᕙᒪᖓᑕ ᓄᑖᙳᕆᐊᖅᑎᑕᖏᑦ - ᐊᐃᕆᓕ 7, 2020

ᐄᑉᐳ 7, 2020

ᒫᓐᓇᒧᑦ, ᓄᕙᒡᔪᐊᕐᓇᖅ-19−ᒥ ᖃᓂᒻᒪᒃᓯᒪᔪᖃᕐᒪᖔᖅ ᖃᓂᒪᓇᓱᒋᔭᐅᔪᖃᕐᒪᖔᑦ  ᓱᓕ ᖃᐅᔨᔭᐅᓯᒪᔪᖃᙱᑦᑐᖅ ᓄᓇᕗᒻᒥ.

ᑕᒪᑐᒪᓂ ᐱᓇᓱᐊᕈᓯᐅᑉ ᓄᙳᒋᓵᖅᑕᖓᓂ, ᐊᒥᓱᑦ ᓄᓇᕗᒻᒥᐅᑦ ᐅᐸᒃᑕᐅᑦᑕᐅᓕᒪᔪᒦᓵᖅᑐᑦ ᖃᓪᓗᓈᑦ ᓄᓇᖓᓂ ᐅᑎᕐᓂᐊᓕᖅᐳᑦ ᑕᒪᐅᖓ ᐅᑭᐅᖅᑕᖅᑐᒧᑦ. ᓇᓗᓇᐃᖅᓯᑦᑎᐊᕈᓐᓇᖅᐳᖓ ᖃᔅᐊᕐᔪᖕᓂᒃ ᖃᓄᐃᓕᖓᓂᐊᕐᓂᖏᓐᓂᒃ ᖃᖓᑕᓂᐊᓕᖅᐸᑕ ᑕᒪᐅᖓ ᐅᑭᐅᖅᑕᖅᑐᒧᑦ:

  • ᑕᐃᒃᑯᐊ ᑲᒪᒋᔭᐅᓯᒪᔪᑦ ᐱᔭᕇᖅᓯᔪᑦ ᐅᐸᒃᑕᐅᑦᑕᐅᓕᒪᓵᕐᓂᕐᒥᓂᒃ ᕚᓯᒃᑯᑦ ᐃᓂᒥᓂᑦ ᐅᐸᒃᑕᐅᑦᑕᐃᓕᒪᕝᕕᒋᔭᒥᓂᑦ ᑐᔪᕐᒥᕕᖕᓂᑦ ᒥᑦᑕᕐᕕᓕᐊᕈᔾᔭᐅᓂᐊᖅᐳᑦ ᑎᖕᒥᓲᓄᓪᓗ ᐃᑭᓗᑎᒃ.
  • FANS−ᑰᓲᑦ ᐃᓕᓐᓂᐊᖅᑏᑦ ᓵᑕᒃᑰᖅᑎᑕᐅᓂᐊᖅᐳᑦ ᑕᒪᐅᖓ ᐅᑭᐅᖅᑕᖅᑐᒧᑦ, ᐊᒻᒪᐃᓛᒃ ᐊᖏᕐᕋᖏᓐᓄᑦ ᓄᓇᓕᖕᓄᑦ.
  • ᖃᓄᓕᒫᑦᑎᐊᖅ ᐱᓇᔪᒃᑐᖃᓂᐊᖅᐳᖅ ᒥᑦᑕᕐᕕᖕᓂ, ᐃᓚᐅᙱᑦᑐᓂᒃ ᐅᐸᒃᑎᑦᑎᑦᑕᐃᓕᒪᓗᑎᒃ. 
  • ᑕᐃᒪᐃᓕᐅᖅᑎᑕᐅᓵᖅᑐᑦ ᐱᔭᕇᖅᓯᔪᑦ 14−ᓄᑦ ᐅᓪᓗᓄᑦ ᐅᐸᒃᑕᐅᑦᑕᐃᓕᒪᓂᕐᒥᓂᒃ ᓇᓕᐊᖕᓂᑐᐃᓐᓇᖅ ᑐᔪᕐᒥᕕᖕᓂ ᑕᐃᒪᐃᓕᐅᒃᑲᓐᓂᕆᐊᖃᖅᑎᑕᐅᙱᓚᑦ ᐊᖏᕐᕋᕆᔭᒥᓂ ᓄᓇᓕᖕᓂ. ᑭᓯᐊᓂᓗᑦᑕᐅᖅ – ᓇᖕᒥᓂᖅ ᓇᐅᑦᑎᖅᓱᐃᓐᓇᓪᓗᐊᖅᐳᑦ ᖃᓄᐃᑉᐸᓪᓕᐊᖕᒪᖔᕐᒥᓂᒃ, ᐊᑐᕐᓗᑎᒃ ᑎᒥᒃᑯᑦ ᐅᖓᓯᒃᓴᕆᐊᖃᕐᓂᕐᒥᒃ, ᐊᖏᕐᕋᖅᓯᒪᓗᑎᒡᓗ, ᑭᓯᐊᓂ ᑕᒃᑯᓄᖓ ᐊᑐᕆᐊᖃᓪᓚᕆᒃᑕᒥᓄᑦ ᑕᐃᒪᐃᓕᐅᖅᐸᒡᓗᑎᒃ.

ᐳᐃᒍᖅᑕᐃᓕᒋᔅᓯ, ᑕᒪᒃᑯᐊ ᐊᑐᖅᑕᐅᔭᕆᐊᖃᖅᑐᑦ ᒫᓐᓇ ᓄᒡᑕᖑᓪᓗᑎᒃ ᐃᓕᖅᑯᓯᕆᓕᖅᐸᕗᑦ.

ᖁᔭᓐᓇᒦᒃ ᓄᓇᕗᒻᒥᐅᓕᒫᑦ ᐱᓇᔪᖕᓂᖏᓐᓄᑦ ᓇᖕᒥᓂᖅ ᓇᐳᒻᒥᖃᑦᑕᐅᑎᓇᓱᒃᐸᒃᖢᑎᒃ. ᐊᑏ ᑕᐃᒪᐃᓕᐅᖏᓐᓈᓐᓄᒋᔅᓯ, ᓇᐅᑦᑎᖅᓱᑦᑎᐊᖏᓐᓇᕐᓗᓯᓗ.

ᐃᓚᒋᓪᓗᓂᐅᒃ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓄᑦ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐊᖅᓵᕐᓇᖅᑐᒧᑦ  ᓄᕙᒡᔪᐊᕐᓇᖅ-19−ᖃᓕᑐᐃᓐᓇᕆᐊᓕᖕᓄᑦ, ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ:

ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ

ᐅᐸᒃᑕᐅᑦᑕᐃᓕᒪᓂᕐᒧᑦ ᐃᓃᑦ

ᑕᐃᒃᑯᐊ ᐅᐸᒃᑕᐅᑦᑎᐃᓕᒪᔪᑦ ᐊᑐᕈᓐᓇᖅᐳᑦ, ᑕᓚᕖᓴᓂᒃ ᑕᐅᑐᒍᓐᓇᕐᓂᕐᒥᒃ, ᐃᑭᐊᖅᑭᕕᖕᒥᒃ, ᐱᖓᓱᐃᖅᓱᕐᓗᑎᒃ ᐅᓪᓗᒥ ᓂᕆᑎᑕᐅᕙᒡᓗᑎᒃ, ᓴᓗᒪᔪᓂᒃ ᐊᓪᓕᓂᖅᑖᖅᑎᑕᐅᕙᒡᓗᑎᒃ ᓴᓗᒪᖅᓴᐅᑎᑖᖅᑎᑎᑕᐅᕙᒡᓗᑎᒡᓗ. ᐊᒃᑕᑯᖏᑦ ᖃᐅᑕᒫᑦ ᐱᔭᐅᕙᒃᐳᑦ. ᑕᒪᒃᑯᐊ ᐊᑭᓕᕆᐊᓖᑦ ᑲᒪᒋᔭᐅᕗᑦ ᓄᓇᕗᑦ ᒐᕙᒪᒃᑯᖏᓐᓂᑦ. ᓄᓇᕗᑦ ᒐᕙᒪᒃᑯᖏᑦ ᐊᑭᓖᓂᐊᖅᐳᑦ ᖁᐃᖏᓕᓴᕐᓄᑦ, ᓄᑕᕋᓛᑦ ᐃᒻᒧᖏᓐᓄᑦ ᐊᕐᓇᖅᓯᐅᑎᓄᓪᓗ. ᑕᐃᑲᓃᑎᑕᐅᔪᑦ ᑎᑭᓴᐃᔭᕆᐊᖃᖃᑦᑕᖅᐳᑦ ᑕᒪᒃᑯᓂᖓ ᐱᖁᑎᓂᒃ ᐱᕝᕕᐅᔪᓐᓇᖅᑐᓂᑦ ᑐᓂᓯᔭᖅᑐᖃᑦᑕᕈᓐᓇᕐᓗᑎᒃ, ᑭᓯᐊᓂ ᑖᒃᑯᓄᖓ ᐱᖁᑎᓄᑦ ᐊᑭᓕᒐᒃᓴᖅᑖᖅᑎᑕᐅᔾᔮᙱᑦᑐᑦ.

ᑕᐃᓐᓇ ᑐᙵᓱᒃᑎᑦᑎᓂᕐᒧᑦ ᑲᑎᖅᓱᖅᑕᐅᓯᒪᔪᖅ ᐊᓯᔾᔨᕆᐊᖅᑕᐅᓯᒪᓕᖅᐳᖅ ᐃᓚᖃᖅᑎᑕᐅᓂᐊᓕᖅᖢᓂ ᑐᓴᖅᑕᐅᔪᒃᓴᓂᒃ ᓂᕆᔭᒃᓴᓂᒃ ᑎᑭᓴᐃᕙᒃᑐᓄᑦ ᐊᐃᒃᖠᕈᓐᓇᖅᐸᒃᑐᓄᓪᓗ. ᑕᒪᕐᒥᒃ ᑖᒃᑯᐊᒃ ᑐᔪᕐᒥᕕᖕᒧᙵᐅᔭᐅᖃᑦᑕᕈᓐᓇᖅᐳᑦ. ᑕᒪᒃᑯᐊ ᐊᒡᔭᖅᓯᕕᐅᔪᑦ ᐊᒃᑐᐊᓂᓖᓪᓗ ᐊᑭᖏᑦ ᐊᑭᓕᖅᑕᐅᖃᑦᑕᔾᔮᙱᓚᑦ ᓄᓇᕗᑦ ᒐᕙᒪᑯᖏᓐᓂᑦ.

ᖃᔅᓯᐅᓂᖏᑦ ᐅᐸᒃᑕᐅᑦᑕᐃᓕᒪᔪᑦ

ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐅᐸᒃᑕᐅᑦᑕᐃᓕᒪᔪᓄᑦ ᐃᓂᖏᑦ)  
ᐊᐅᓪᓚᖅᓯᒪᔫᑉ ᖃᓄᐃᑦᑑᓂᖓ ᑐᔪᕐᒥᑎᑕᐅᔪᑦ ᐅᐸᒃᑕᐅᑦᑕᐃᓕᒪᔪᓂ ᐄᐳᕈ 4-ᒥᑦ ᐱᒋᐊᖅᖢᓂ
ᐋᓐᓂᐊᕕᓕᐊᖅᑐᓄᑦ ᐊᐅᓪᓚᕈᑏᑦ 228
ᑭᒃᑯᑐᐃᓐᓇᑦ 121
ᐃᓕᓐᓂᐊᖅᑏᑦ 60

ᑲᑎᖦᖢᒋᑦ

409

 

ᐊᐅᓪᓚᕈᒪᓗᓂ ᐊᐱᕆᔾᔪᑕᐅᓯᒪᔪᑦ

ᐄᐳᕈ 5−ᖑᓚᐅᕐᓂᖓᓂᑦ (ᐅᓪᓛᒃᑯᑦ)  408−ᓂᒃ ᐊᐅᓪᓚᕈᒪᔪᓂᑦ ᑐᒃᓯᕋᖅᑐᖃᖅᓯᒪᕗᖅ, 313−ᓗ ᐱᕕᒡᔪᐊᖑᓪᓗᑎᒃ ᐃᖅᑲᓇᐃᔭᖅᑎᓂᒃ ᑐᒃᓯᕋᖅᑕᐅᔪᑦ.

ᑐᒃᓯᕋᕈᑕᐅᓯᒪᔪᑦ ᖃᓄᐃᓕᖓᓂᖏᑦ

# %
ᐊᖏᖅᑕᐅᓯᒪᔪᑦ (ᐃᓚᖃᖅᐳᖅ ᐱᒻᒪᕆᐊᓗᖕᓂᑦ ᐱᒻᒪᕆᐅᓗᐊᙱᑦᑐᓂᒡᓗ) 317 74.6%
ᐊᖏᕐᑕᐅᙱᑦᑐᑦ 47 11.0%
ᐅᑕᖅᑭᔪᑦ 61 14.4%
ᑲᑎᖦᖢᒋᑦ 425 100%

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ

ᐄᐳᕈ 7−ᒥᑦ ᐱᒋᐊᖅᖢᓂ, ᐃᓕᓴᐃᔩᑦ ᒫᓐᓇ ᑕᒫᓃᑦᑐᑦ ᐃᓕᓐᓂᐊᕐᕕᖕᓄᑦ ᐅᑎᕈᓐᓇᓕᖅᐳᑦ ᑕᒪᓐᓇᓗ ᐃᓱᒪᖅᓲᑎᒋᓪᓗᓂᔾᔪᒃ, ᐃᓕᓐᓂᐊᕐᕕᓕᐊᖃᑦᑕᕈᑎᒃ ᐋᖅᑭᒃᓱᐃᕙᓪᓕᐅᔪᒪᓕᕐᓂᕐᒥᓄᑦ ᐃᓕᓐᓂᐊᕈᑎᒃᓴᓂᒃ ᐃᓕᓐᓂᐊᖅᑐᓄᑦ. ᒪᓕᒋᐊᓕᖕᓂᒃ ᑲᔪᓯᑎᑦᑎᓂᐊᕐᓗᓂ ᑕᒪᒃᑯᓂᖓ ᐃᓕᓐᓂᐊᕈᑕᐅᓂᐊᓕᖅᑐᓂᒃ ᐃᓕᓐᓂᐊᖅᑎᓄᑦ, ᑭᖑᓪᓕᖅᐹᖅᓯᐅᑎᖏᑦ ᐋᖅᑭᒃᓱᖅᑲᐅᕙᓪᓕᐊᕗᑦ ᐃᓕᓐᓂᐊᕐᓂᓕᕆᔨᒃᑯᓐᓂᑦ.

ᑕᒪᕐᒥᑦᑎᐊᖅ ᐃᓕᓐᓂᐊᕐᕕᖕᓂ ᐃᖅᑲᓇᔭᖅᑎᓕᒫᑦ ᐃᖅᑲᓇᐃᔭᕐᕕᖕᒥᓄᑦ ᐅᑎᕐᓂᐊᕋᓱᒋᔭᐅᕗᑦ ᐊᖏᕐᕋᕆᔭᒥᓂ ᓄᓇᓕᖕᓂ ᐊᐃᕐᕆᓕ 21, 2020−ᒥ. ᐃᓕᓴᐃᔩᑦ ᒫᓐᓇ ᐊᐅᓪᓚᖅᓯᒪᔪᑦ ᑕᒫᙵᑦ ᐅᑭᐅᖅᑕᖅᑐᒥᑦ ᐊᑐᕆᐊᖃᖅᑎᑕᐅᓂᐊᖅᐳᑦ 14−ᓄᑦ ᐅᓪᓗᓄᑦ ᐅᐸᒃᑕᐅᑦᑕᐃᓕᒪᓂᕐᒥᒃ ᐋᖅᑭᒃᑕᐅᓯᒪᕙᒌᖅᑐᒥ ᐅᐸᒃᑕᐅᑦᑕᐃᓕᕝᕕᖕᒥ ᐅᑎᓚᐅᙱᓐᓂᕐᒥᓂ ᓄᓇᕗᒻᒧᑦ. ᐃᓕᓴᐃᔨᓂᒃ ᐱᒋᐊᖅᑐᖃᕈᓐᓇᙱᑉᐸᑦ 14−ᓄᑦ ᐅᓪᓗᓄᑦ ᐅᐸᒃᑕᐅᑦᑕᐃᓕᒪᔭᕆᐊᖃᕐᓂᕐᒥᓂᒃ ᐅᑎᕆᐊᖃᕐᓂᐊᕐᓗᑎᒃ ᐊᐃᕐᕆᓕ 21−ᒥ, ᐃᓕᓐᓂᐊᕐᕕᖓᑕ ᐊᖓᔪᖅᑳᖓ ᖃᐅᔨᑎᑦᑕᕆᐊᖃᑦᐸᐅᒃ ᑐᓴᖅᑎᓪᓗᒍᓗ ᑐᓴᖅᑎᔾᔪᑎᒋᔭᕆᐊᖃᖅᑕᒥᓂᒃ ᓄᒃᑕᕐᓂᕐᒧᑦ ᖃᓄᐃᓕᖓᓂᐊᕐᒪᖔᒥᓂ, ᐅᖃᖃᑎᖃᖅᐸᒡᓗᓂᓗ ᓇᓕᐊᖕᓂᑐᐃᓐᓇᖅ ᐅᐸᒃᑕᐅᑦᑕᐃᓕᒪᕝᕕᖕᓂᒃ ᐅᖃᐅᑎᔪᒪᓗᒋᑦ ᖃᓄᑐᐃᓐᓇᖅ ᑭᖑᕙᕆᐊᕆᐊᖅᑎᑕᐅᑐᐃᓐᓇᕆᐊᓕᖕᓂᒃ.  

ᐊᐃᕐᕆᓕ 21-ᖑᓕᖅᐸᑦ, ᐋᖅᑭᒃᑕᐅᓯᒪᓕᖅᑐᖃᓛᖅᑐᖅ ᒪᓕᒃᑐᖃᕐᓗᓂ ᐋᓐᓂᐊᖃᕐᓇᙱᑦᑐᓕᕆᔨᓪᓗᐊᑕᐅᑉ ᖃᓄᐃᓕᐅᖁᓯᒪᔭᖏᓐᓂᒃ.

ᐃᓕᓐᓂᐊᕐᕖᑦ ᒪᑐᒪᐃᓐᓇᕆᐊᖃᖅᐸᑕ:

  • ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑏᑦ ᐊᐅᓚᓂᕆᕙᒃᑕᒥᓂᒃ ᐊᐅᓚᑎᑦᑎᔭᕆᐊᖃᓛᖅᑐᐃᑦ, ᐊᐱᕆᔭᐅᓂᐊᖅᖢᑎᒡᓗ ᐋᖅᑭᒃᓱᐃᖁᔭᐅᓗᑎᒃ ᐃᓕᓐᓂᐊᕈᑎᒃᓴᓂᒃ ᐋᖅᑭᒃᓱᐃᕙᓪᓕᐊᖏᓐᓇᕐᓂᕐᒥᒃ ᐃᓕᓐᓂᐊᖅᑎᓕᒫᓄᑦ.
  • ᐃᓕᓴᐃᔨᑦ ᑐᓂᔭᐅᓂᐊᕐᑐᑦ ᑐᑭᓯᓇᑦᑎᐊᕐᑐᓂᑦ ᒪᓕᒐᒃᓴᓂᑦ ᖃᓄᖅ ᖃᐅᔨᓴᕋᔭᖕᒪᖔᖏᑦ, ᖃᓄᕐᓗ ᑭᖑᓪᓕᖅᐹᖅᓯᐅᑎᓂᒃ, ᐃᓕᓐᓂᐊᖅᑏᑦ ᓇᓕᖅᑲᖏᓐᓂᒃ, ᖁᑦᑎᒃᓯᕙᓪᓕᐊᓃᓪᓗ ᑎᑭᑕᐅᓂᐊᖕᒪᖔᖏᑕ.

ᐃᓕᓐᓂᐊᕐᕖᓪᓕ ᒪᑐᐃᒃᑲᓐᓂᕐᓂᖅᐸᑕ:

  • ᐃᓕᓐᓂᐊᕐᕕᖕᓂ ᐊᐅᓚᓂᕆᔭᐅᕙᒃᑐᑦ ᑲᔪᓯᑐᐃᓐᓇᕐᓂᐊᖅᑐᑦ ᑲᔪᓯᓂᕆᕙᒃᑕᒥᑐᑦ.

ᐱᓕᕆᕝᕕᖕᓂᑦ ᖃᐅᔨᓴᕈᑎᑦ ᖁᑦᑎᓛᓄᑦ ᐃᓕᓐᓂᐊᕐᑎᓄᑦ ᓄᖅᑲᖅᑎᑕᐅᓚᐅᕐᐳᑦ ᔫᓐ ᐃᓱᐊᓄᑦ.

ᓄᓇᕗᒻᒥᐅᑦ ᖃᓄᐃᙱᑦᑎᐊᕈᓐᓇᕐᓂᖏᑦ ᑕᒪᑦᑕᑦᑎᐊᖅ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐅᐊᓴᖅᐊᒡᓗᒋᑦ ᖄᕆᔭᐅᔪᓪᓗ, ᐊᑐᖅᐸᒡᓗᑎᒃ ᑭᒃᑯᑐᐃᓐᓇᓂᒃ ᖃᓂᒃᓴᓗᐊᖅᑕᐃᓕᒪᓂᕐᒥᒃ, ᓈᓚᒃᐸᒡᓗᑎᓪᓗ ᐅᖃᐅᔾᔪᐃᔾᔪᑕᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓂᑦ, ᐊᖏᕐᕋᖅᓯᒪᕙᒡᓗᑎᒡᓗ ᖃᓂᒪᔭᕌᖓᕕᑦ.