ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓄᑖᕈᕆᐊᖅᑕᐅᔪᑦ - ᐊᑦᑑᕝᕙ 8, 2020

ᐅᑐᐱᕆ 8, 2020

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓄᑖᕈᕆᐊᖅᑕᐅᔪᑦ

ᒥᓂᑕ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓇᖅᓯᔪᖅ ᓯᕗᓕᖅᑎᒥᑦ ᓄᑖᕈᕆᐊᖅᑕᐅᔪᑦ

ᐅᓪᓛᒃᑯᑦ. ᑲᑎᖦᖢᒋᑦ ᐃᓄᐃᑦ ᒫᓐᓇᒧᑦ ᑎᑭᖦᖢᒍ ᖃᐅᔨᓴᖅᑕᐅᓯᒪᓕᖅᑐᑦ ᐅᓪᓗᒥᒧᑦ 3159. 523 ᐃᓄᐃᑦ ᒫᓐᓇ ᖃᐅᔨᓴᖅᑕᐅᔪᑦ.

ᓘᒃᑖᖅ. ᐹᑐᓴᓐ ᐅᖃᐅᓯᖃᕐᓂᐊᑐᐃᓐᓇᖅᑐᖅ ᖃᓄᐃᓐᓂᐅᓕᖅᑐᓂᑦ ᒫᓐᓇ ᐊᕐᕚᖅᑑᕐᒥᑦ ᐅᔭᕋᓐᓂᐊᕐᕕᖓᓐᓂᑦ. ᓯᕗᓪᓕᕐᒥᑦ, ᖁᔭᓐᓇᒦᕈᒪᔭᒃᑲ ᑕᒪᕐᒥᒃ ᐃᓄᐃᑦ ᐱᓕᕆᓯᒪᐃᓐᓇᑦᑎᐊᕐᒪᑕ ᐊᔅᓱᕈᖅᑐᒻᒪᕆᐅᓪᓗᑎᑦ ᐱᓇᓱᐊᕈᓯᕐᓂᑦ ᐊᓂᒍᖅᑐᓂᑦ ᑕᒪᓐᓇ ᐊᐃᑦᑐᕐᓗᐃᖃᑦᑕᐅᑎᓂᐅᓯᒪᔪᖅ ᓯᐊᒻᒪᑦᑎᑕᐅᑲᓐᓂᖁᓇᒍᓗ, ᑭᓇᒃᑯᑦ ᐊᑦᑐᖅᑕᐅᒻᒪᖔᑕᓗ ᖃᐅᔨᔭᓇᓱᑦᑎᓪᓗᒋᑦ ᐊᒻᒪ ᐊᓂᔭᕆᐊᖃᕈᓐᓃᖅᑎᑕᐅᓪᓗᑎᑦ.

ᑕᒪᓐᓇ ᐱᓕᕆᐊᖑᓯᒪᔪᖅ ᐊᑑᑎᖃᓪᓚᕆᒻᒪᑦ ᑐᑭᓯᒃᑲᓐᓂᕈᑕᐅᓪᓗᓂ ᓄᕙᕐᔪᐊᕐᓇᖅ-19ᒥᑦ, ᖃᓄᖅ ᐊᐃᑦᑐᐃᒍᑕᐅᓲᒻᒪᖔᖅ, ᐊᒻᒪ ᖃᓄᖅ ᐃᓄᐃᑦ ᓴᑉᐳᑎᒋᐊᒃᑲᕈᓐᓇᕐᒪᖔᑎᒍ − ᓄᓇᕗᒻᒥᑐᐊᖑᙱᑦᑐᖅ, ᐊᓯᖏᓐᓂᓪᓗᑦᑕᐅᖅ ᒐᕙᒪᖃᕐᕕᐅᔪᓂᑦ. ᖁᔭᓐᓇᒦᖅᐸᕗᑦ ᑖᒃᑯᐊ ᑐᐊᕕᕐᓇᖅᑐᓕᕆᔨᑦ, ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᑎᑎᕋᕐᕕᖓ, ᐊᒻᒪ ᑭᒃᑯᑐᐃᓐᓇᐃᑦ ᐃᓚᒋᔭᐅᓯᒪᔪᑦ ᑖᒃᑯᓂᖓ ᐋᖅᑭᔅᓲᔾᔨᓯᒪᔪᑦ ᑲᔪᓯᓂᖃᑦᑎᐊᕈᓐᓇᖁᓪᓗᒋᑦ ᐱᓇᓱᐊᕈᓯᕐᓂᑦ ᑕᖅᑭᓂᓪᓗ ᐊᓂᒍᖅᑐᓂᑦ ᐊᑐᐃᓐᓇᕈᖅᓴᐃᓯᒪᒻᒪᑦ ᑕᐃᒪᐃᑦᑐᒥ ᐊᑐᕆᐊᖃᑳᓪᓚᓐᓂᕈᑦᑕ ᐱᓕᕆᔾᔪᑎᒋᔭᐅᔪᔅᓴᓂᑦ. ᖁᔭᒋᑦᑎᐊᖅᐸᕗᑦ ᐊᔅᓱᒻᒪᕆᑦᑐᑎᑦ ᐱᓕᕆᓯᒪᔪᑦ ᓄᓇᕗᒻᒥᐅᓂᑦ ᐊᑦᑕᕐᓇᖅᑐᒦᑦᑐᖃᖁᔨᓐᓇᑎᑦ ᐊᒻᒪ ᖃᓄᐃᑦᑐᖃᓕᖁᔨᓇᑎᑦ.

ᑭᖑᓪᓕᐹᒥᓪᓗ, ᖁᔭᓕᓐᓇᐅᑉ ᐱᓇᓱᐊᕈᓯᖓᓐᓄᑦ ᑎᑭᐅᑎᓕᖅᑎᓪᓗᑕ, ᐃᖅᑲᐃᑎᑦᑎᒋᐊᒃᑲᓐᓂᕈᒪᕗᖓ ᐅᔾᔨᖅᓱᖅᑎᐊᕐᓗᓯ ᓂᕿᓕᕆᕕᐅᔪᑦ ᓴᓗᒪᑎᑕᐅᑦᑎᐊᖁᓪᓗᒋᑦ,

ᐊᒡᒐᑎᑦ ᐅᐊᓴᐃᓐᓇᖃᑦᑕᕐᓗᒋᑦ, ᑲᑎᙵᔪᑦ ᐊᑕᐅᑦᑎᒥᑦ ᐃᓄᒋᐊᓗᐊᖅᑕᐃᒪᓕᑎᓪᓗᒋᑦ ᐊᒻᒪ ᒫᓐᓇ ᑭᓪᓕᒋᔭᐅᑎᑕᐅᔪᑦ ᒪᓕᑦᑕᐅᓗᑎᑦ, ᐊᖏᕐᕋᓯᒪᓗᓯᓗ ᐋᓐᓂᐊᒍᔅᓯ.

ᖁᔭᓕᓐᓇᖅ ᑕᕝᕙᓂ ᐅᑭᐅᕐᒥᑦ ᐊᔾᔨᒋᙱᑐᐃᓐᓇᕆᐊᓕᖓ ᑕᐃᒫᖑᕙᑦᑐᒥᑦ ᐊᑐᖅᑕᐅᕙᑦᑐᒥᑦ, ᑭᓯᐊᓂ ᖁᔭᓕᔾᔪᑎᔅᓴᖃᖅᑐᒍᑦ ᐊᒥᓱᐊᓗᓐᓂᑦ. ᐊᑐᕆᐊᓕᓐᓂᑦ ᒪᓕᑦᑎᓪᓗᑕ ᐋᓐᓂᐊᖅᑕᐃᓕᒪᔪᓕᕆᓂᕐᒧᑦ ᑭᒃᑯᑐᐃᓐᓇᕐᓄᑦ ᐊᑐᕆᐊᓕᓐᓂᑦ ᐅᕙᑦᑎᓐᓂᑦ ᐊᑐᓂ ᓄᓇᓕᑦᑎᓐᓂᓪᓗ ᐅᓗᕆᐊᓇᙱᑦᑐᒦᑎᑦᑎᓪᓗᑕ, ᐃᖅᑲᐅᒪᒋᑦ ᐆᒥᖓ: ᐱᓂᐊᕐᓂᓯ. ᑭᒃᑯᓕᒫᑦ ᖃᓄᐃᙱᑦᑎᐊᕈᓯᖏᑦ.

 

ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᓄᑖᕈᕆᐊᖅᑕᐅᔪᑦ

ᐅᓪᓛᒃᑯᑦ. ᐱᒋᐊᕈᑎᖃᕈᒪᕗᔪᖓ ᓄᕙᕐᔪᐊᕐᓇᖅ-19 ᒥᔅᓵᓄᑦ ᖃᓄᐃᓐᓂᐅᓕᖅᑐᓂᑦ ᑕᐃᑲᓂ ᐊᕝᕚᖅᑑᕐᒥᑦ ᐅᔭᕋᖕᓂᐊᕐᕕᖓᓐᓂᑦ ᐊᐃᑦᑐᕐᓗᐃᖃᑦᑕᐅᑎᓂᐅᓯᒪᔪᒥᑦ ᖃᓂᒻᒪᓇᖅᑐᒥᑦ.

ᐅᓪᓗᒥᒧᑦ, ᓄᕙᕐᔪᐊᕐᓇᖅ-19ᒧᑦ ᖃᓐᓂᒻᒪᔅᓯᒪᔪᑦ 10 ᖃᐅᔨᓴᖅᑕᐅᓯᒪᔪᑦ ᓇᓗᓇᐃᖅᑕᐅᓯᒪᔪᑦ ᓄᕙᕐᔪᐊᕐᓇᖅ-19ᖃᕐᓂᖏᓐᓂᑦ ᐅᔭᕋᖕᓂᐊᕐᕕᒻᒥᑦ 6ᖑᓪᓗᑎᑦ ᖃᓂᒪᓇᓱᒋᔭᐅᔪᑦ ᐅᑕᖅᑭᔪᑦ ᓇᓗᓇᐃᖅᑕᐅᓂᔅᓴᖓᓐᓂᑦ ᖃᐅᔨᓴᖅᑕᐅᔾᔪᑎᖏᓐᓂᑦ.

ᐅᔭᕋᖕᓂᐊᕐᕕᒻᒧᑦ ᑎᑭᒻᒪᑕ ᑕᐃᙵᓂᑦ ᓰᑏᕝᕙ 29ᒥ, ᑐᐊᕕᕐᓇᖅᑐᓕᕆᔨᒃᑯᑦ ᑕᐃᑲᓂ ᐱᓕᕆᐊᖃᖅᓯᒪᔪᑦ ᖃᐅᔨᓴᖅᑕᐅᔭᕆᐊᓖᑦ ᑕᒪᕐᒥᒃ ᖃᐅᔨᓴᖅᑕᐅᔪᐃᓐᓇᐅᖁᓪᓗᒋᑦ, ᑭᓇᒃᑯᑦ ᐊᑦᑐᖅᑕᐅᒻᒪᖔᑕ ᖃᐅᔨᔭᐅᓇᓱᓪᓗᑎᑦ ᐊᒻᒪ ᐃᓄᑑᔭᕆᐊᖃᓕᖅᑎᑕᐅᓪᓗᑎᑦ ᒪᓕᓪᓗᑦᑕᐅᓗᑎᑦ ᒪᓕᒋᐊᓖᑦ ᐋᖅᑭᓱᖅᑕᐅᓯᒪᕙᒌᖅᑐᑦ ᑖᓐᓇ ᓯᐊᒻᒪᒃᑲᓐᓂᖁᓇᒍ ᖃᓂᒻᒪᓇᖅᑐᖅ ᐅᔭᕋᖕᓂᐊᕐᕕᒻᒥ.

ᐱᐅᓛᒃᑯᑦ ᐊᑐᖅᑕᐅᔪᓐᓇᖅᑐᑦ ᐱᓕᕆᓂᕐᒧᑦ ᓄᓇᕐᔪᐊᕐᒥ ᐊᑐᖅᑕᐅᔪᖅ ᖃᐅᔨᓴᕈᑎᖃᕐᓂᕐᒧᑦ, ᑭᓇᒃᑯᑦ ᐊᑦᑐᖅᑕᐅᖃᑕᐅᒻᒪᖔᑕ ᖃᐅᔨᓇᓱᑦᑕᐅᓗᑎᑦ ᐊᒻᒪ ᐃᓄᑑᔭᕆᐊᖃᓕᖅᑎᑕᐅᓗᑎᑦ, ᐱᖃᓯᐅᑎᓗᒋᑦ ᐊᓯᖏᑦ ᐱᓕᕆᔾᔪᓰᑦ ᓲᕐᓗ ᒪᑯᐊ ᐊᐅᓪᓚᕆᐊᖃᕈᓐᓃᖅᑎᑕᐅᓗᑎᑦ ᐊᒻᒪᓗ ᖃᓂᕐᒧᑦ ᒪᑐᐊᖅᓯᒪᔾᔪᑏᑦ ᐊᑐᐃᓐᓇᕆᐊᖃᓕᕐᓗᒋᑦ ᒪᓕᒋᐊᓖᑦ ᑕᒪᒃᑯᐊ ᐅᑦᑑᑎᒋᓗᒍᑦ ᐊᑑᑎᖃᑦᑎᐊᖅᑐᕐᒪᑦ ᓄᖅᑲᖓᑎᑦᑎᓂᕐᒥᑦ ᐊᓯᖏᓐᓄᑦ ᐱᔭᐅᖁᓇᒍ ᐊᒻᒪ ᓄᖅᑲᖓᑎᑦᑎᓂᕐᒧᑦ

ᐊᐃᑦᑐᕐᓗᐃᖃᑦᑕᐅᑎᓂᕐᒥᑦ.

ᐊᐅᓪᓚᕆᐊᖃᕈᓐᓃᖅᑎᑦᑎᓂᖅ ᐅᓪᓗᓄ ᖁᓕᓄᑦ ᐊᑐᖅᑕᐅᑎᓪᓗᒍ ᓄᖅᑲᖓᑎᑦᑎᔾᔪᑕᐅᓪᓗᓂ ᐱᐅᓛᖑᓯᒪᔪᖅ ᐊᐃᑦᑐᕐᓗᐃᔪᖃᒃᑲᓐᓂᖁᓇᒍ, ᐊᒻᒪ ᑖᓐᓇ ᓄᕙᕐᔪᐊᕐᓇᖅ-19 ᐊᓯᖏᓐᓄᑦ ᒐᕙᒪᖃᕐᕕᐅᔪᓄᑦ ᐊᐃᑦᑐᕐᓗᐃᒍᑕᐅᑲᓐᓂᖁᓇᒍᓗ. ᓄᓇᕗᒻᒥᐅᑦ ᐅᓗᕆᐊᓇᖅᑐᒦᓐᓂᕆᔭᖓ ᓱᓕ ᐅᓗᕆᓇᓗᐊᙱᑦᑐᒦᖏᓐᓂᖅᓴᐅᔪᑦ ᐊᐃᑦᑐᕐᓗᐃᓂᖅᑕᖃᖅᑎᓪᓗᒍᑦ.

ᐅᓪᓗᒥ, ᐱᓕᕆᐊᕆᔭᐅᔪᑦ ᖃᓄᐃᓕᖓᓂᖏᑦ ᒪᓕᓪᓗᒋᑦ, ᐅᖃᕈᓐᓇᖅᑐᖓ ᐊᐃᑦᑐᖅᑕᐅᓯᒪᔪᖃᒃᑲᓐᓂᕈᓃᖅᑐᖅ ᐅᔭᕋᖕᓂᐊᕐᕕᕐᒥᑦ ᐊᒻᒪᓗ ᐅᓗᕆᐊᓇᖅᑐᒦᓐᓂᕆᔭᐅᔪᑦ ᓄᖑᔾᔮᖏᒻᒪᑦ, ᑭᓯᐊᓂ ᐅᖃᐅᓯᕆᔪᓐᓇᖅᑕᕗᑦ ᑕᐃᑲᓂ ᐊᕐᕚᖅᑑᕐᒥᑦ ᐅᔭᕋᖕᓂᐊᕐᕕᖓᓐᓂᑦ ᓯᐊᒻᒪᒃᑲᓐᓂᕈᓐᓇᐃᓕᑎᑕᐅᓯᒪᓕᖅᑐᖅ.

ᑕᒪᓐᓇ ᐱᓪᓗᒍ ᑖᓐᓇ ᑐᑭᖃᖅᑐᖅ ᑕᐃᑯᖓ ᐊᒻᒪ ᑕᐃᑲᙵᑦ ᐅᔭᕋᖕᓂᐊᕐᕕᒻᒥᑦ ᐊᐅᓪᓚᕆᐊᓖᑦ ᑲᔪᓯᔪᓐᓇᖅᓯᒻᒥᔪᑦ. ᐃᓄᐃᑦ ᐃᓄᑑᔭᕆᐊᖃᖅᑎᑕᐅᓯᒪᔪᑦ ᐊᓂᒍᐃᔪᑦ, ᐊᒻᒪ ᐃᓄᐃᑦ ᓇᓗᓇᐃᖅᑕᐅᓯᒪᔪᑦ ᐅᓗᐊᕆᐊᓇᓪᓚᕆᑦᑑᒥᑎᑦᑎᓂᖏᓐᓄᑦ ᐊᖏᕐᕋᒧᑦ ᐊᐅᓪᓚᕈᓐᓇᖅᓯᔪᑦ. ᐃᓚᖏᑦ ᐅᓗᕆᐊᓇᓪᓚᕆᑦᑐᒦᑎᑦᑎᓂᖏᓐᓄᑦ ᐊᓂᔭᕆᐊᖃᖅᑎᑕᐅᙱᑦᑐᑦ ᐊᒻᒪ ᑖᒃᑯᐊ ᐊᐅᓪᓚᕈᓐᓇᖅᓯᓛᕐᓂᐊᖅᑐᒋᔭᐅᔪᑦ ᐱᓇᓱᐊᕈᓯᐅᓛᖅᑐᒥᑦ.

ᑐᐊᕕᕐᓇᖅᑐᓕᕆᔨᒃᑯᑦ ᐅᔭᓐᓂᐊᕐᕕᒻᒥᑦ ᐊᐅᓪᓚᕐᓂᐊᖅᑐᑦ ᐅᓐᓄᓴᕈᖅᐸᑦ ᐅᓪᓗᒥ ᐊᒻᒪ ᐃᓄᑑᔭᕆᐊᖃᕐᓂᐊᖅᑐᑦ ᐊᓂᑦᑕᐃᓕᓗᑎᑦ ᐅᓪᓗᓄᑦ 14ᓄᑦ.

ᑕᕝᕙᓂ ᐱᓇᓱᐊᕈᓯᕐᒥᑦ ᓯᕗᒧᒋᐊᕈᑎᖃᕐᓂᐊᕋᑦᑕ ᑖᔅᓱᒥᖓ ᓄᓇᕗᒻᒥᑦ ᐊᑐᖅᑕᐅᓂᐊᖅᑐᖅ ᐸᕐᓇᐅᑎᒦᑦᑐᒥᑦ ᑖᒃᑯᐊ ᐃᓄᓐᓄᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐊᑐᖅᑎᑕᐅᔪᑦ ᓄᓇᕗᒻᒥᑦ ᓄᖅᑲᖓᑎᑦᑎᒍᑕᐅᔪᓂᑦ ᐃᓚᖏᓐᓂᑦ ᐊᑐᕈᓐᓃᖅᑎᑦᑎᓗᑎᑦ. ᐊᓯᔾᔨᖅᑕᐅᔪᓂᑦ ᐃᓚᖏᓐᓂᑦ, ᐃᓄᒋᐊᖑᓗᑎᑦ ᑲᑎᙵᔪᓐᓇᖅᑐᑦ ᑭᓪᓕᒋᑎᑕᐅᔪᖅ ᐊᒥᓱᕈᕆᐊᖅᑕᐅᓗᓂ ᐊᒻᒪ ᐊᔪᕈᓐᓃᖅᑎᑕᐅᓗᑎᑦ ᐃᓄᒋᐊᔅᓯᒋᐊᒃᑲᓐᓂᖅᑕᐅᔪᑦ ᐱᙳᐊᖅᑐᓕᕆᓂᕐᒧᑦ ᐊᑐᖅᑕᐅᖃᑦᑕᖅᑐᓂᑦ. ᖃᐅᔨᓴᕈᑎᓂᑦ ᐱᑕᖃᓕᖅᑐᒍᑦ ᑕᒫᓂ ᑲᖏᖅᖠᓂᕐᒥᑦ ᐃᖃᓗᓐᓂᓗ ᐃᓕᓯᓯᒪᔪᖃᓕᖅᑐᖅ ᖃᐅᔨᓴᕈᑎᓂᑦ ᑖᒃᑯᐊ ᖃᐅᔨᓴᖅᑕᐅᖃᑦᑕᖅᑐᑦ ᕿᓚᒥᐅᓂᖅᓴᖅ ᖃᐅᔨᓴᖅᑕᐅᒍᑎᖏᑦ ᑐᑭᓯᔭᐅᔪᓐᓇᖃᑦᑕᕐᓂᐊᓕᖅᑐᑦ. ᑲᔪᓯᔪᓐᓇᕐᒪᖔᑦ ᖃᐅᔨᔭᐅᓇᓱᔅᓯᒪᔪᖅ ᑖᓐᓇ ᐊᑐᖅᑕᐅᔪᖅ ᖃᐅᔨᓴᕈᑕᐅᔪᓂᑦ ᐅᑕᖅᑭᔭᕆᐊᖃᖃᑦᑕᕐᓂᕆᔭᖏᑦ ᕿᓚᒥᐅᓂᖅᓴᒃᑯᑦ ᐱᔭᐅᖃᑦᑕᕈᓐᓇᕐᒪᖔᑕ ᑲᔪᓯᓂᖃᑦᑎᐊᖅᓯᒪᔪᖅ ᐊᒻᒪ ᑖᓐᓇ ᐊᑐᓕᖅᑎᑕᐅᓯᒪᓕᖅᑐᓂᑦ ᐃᓚᓕᐅᔾᔭᐅᓯᒪᓕᖅᑐᓂᓗ ᐊᐅᓚᓂᕆᕙᑦᑕᑎᓐᓄᑦ ᕿᑭᖅᑖᓗᒻᒥᑦ. ᐊᑦᑑᕝᕙ 14ᒥ ᐱᒋᐊᖅᑐᓂᑦ, ᑖᓐᓇ ᐱᓕᕆᐊᔅᓴᖅ ᑭᕙᓪᓕᕐᒥᑦ ᕿᑎᕐᒥᐅᓂᓪᓗ ᐊᑐᐃᓐᓇᕈᖅᑎᓐᓂᐊᖅᑕᕗᑦ.

ᑕᐃᒫᖑᕙᒻᒪᑦ, ᖃᐅᔨᓴᖅᐸᓪᓕᐊᖏᓐᓇᕐᓂᐊᖅᑐᒍᑦ ᐊᒻᒪ ᖃᐅᔨᓇᓱᖃᑦᑕᕐᓗᑕ ᖃᓄᐃᓐᓂᐅᔪᒥᑦ ᐊᑐᖅᑕᐅᔪᒥᑦ. ᐅᓗᕆᐊᓇᖅᑐᒦᓕᑲᓐᓂᕐᓂᕈᑦᑕ, ᓄᖅᑲᑎᑦᑎᔾᔪᑕᐅᓯᒪᔪᑦ ᑖᒃᑯᐊ ᐱᒋᐊᖅᑎᑕᐅᒃᑲᓐᓂᕈᓐᓇᖅᑐᑦ ᐋᓐᓂᐊᖅᑕᐃᓕᒪᑎᑦᑎᓂᕐᒧᑦ ᐊᒻᒪ ᐊᑦᑕᕐᓇᖅᑐᒦᑎᑦᑎᖁᔨᓇᑕ ᓄᓇᕗᒻᒥᐅᓂᑦ.

ᓄᖅᑲᕈᑎᒋᓗᒍ ᖁᕕᐊᓇᖅᑐᖅ ᐅᖃᐅᓯᔅᓴᐅᔪᖅ ᑖᒃᑯᐊ ᓄᓇᕗᒻᒥᐅ ᒪᒃᑯᓂᖅᓴᐃᑦ ᐊᒻᒪ ᐆᒻᒪᑎᒥᒍᑦ ᒪᒃᑯᑦᑐᑦ ᐊᓐᓄᕌᓪᓗᑦᓯᒪᓇᕐᓂᑦ ᑲᔪᓯᔪᓐᓇᕐᓂᐊᖅᑐᖅ ᓄᓇᕗᒻᒥ.

ᐳᓚᕋᓐᓂᖅ ᐊᓐᓄᕌᓪᓗᑦᓯᒪᓇᐅᓕᖅᐸᑦ ᐊᑐᖅᑕᐅᖁᓪᓗᒍ ᐊᑦᑕᕐᓇᖏᑦᑐᒃᑯᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᕝᕕᖓ ᑲᑐᔾᔨᓪᓗᑎᑦ ᓄᓇᓕᖕᓂ ᒐᕙᒪᒃᑯᓐᓂᓪᓗ

ᐱᔨᑦᑎᕋᖅᑎᒃᑯᑦ ᐱᓕᕆᕝᕕᖓᑕ ᐱᙳᐊᖅᑐᓕᕆᓂᖅ ᑭᐱᙳᐃᔭᖅᑎᑦᑎᓂᕐᒧᓪᓗ ᐊᑐᐊᒐᐅᓂᐊᖅᑐᓂᑦ ᓴᖅᑭᑎᑦᑎᓯᒪᔪᑦ. ᑖᒃᑯᐊ ᐊᑐᐊᒐᐃᑦ ᐊᑐᐃᓐᓇᐅᔪᖅ ᓄᓇᕗᑦ ᒐᕙᒪᒃᑯᖏᑕ ᐃᑭᐊᖅᑭᕕᖓᓐᓂᑦ ᐊᒻᒪᓗ ᕼᐋᒻᒪᓚᓄᑦ ᑐᓂᐅᖅᑲᖅᑕᐅᓂᐊᕐᒥᔪᑦ.

ᑕᕝᕙᓂ ᐱᓇᓱᐊᕈᓯᐅᑉ ᓄᙳᐊᓂ ᖁᔭᓕᓐᓇᕐᒥᑦ ᓇᓪᓕᐅᓂᖅᓯᐅᑎᓪᓗᑕ, ᐃᓇᑉᐸᓯ ᐃᓄᐃᑦ ᒪᓕᖁᓪᓗᓯ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᐊᒐᖏᑎᒍᑦ ᐋᖅᑭᑦᑕᐅᓯᒪᔪᓂᑦ ᑲᑎᙵᔪᓐᓇᖅᑐᑦ ᐃᓄᐃᑦ ᐊᑦᑕᐅᑦᑎᒥᑦ 15ᖑᔭᕆᐊᖃᕐᒪᑕ.

ᖃᓄᐃᑦᑕᐃᓕᒪᓗᓯ ᐊᒻᒪ ᐱᓕᕆᖃᑎᒌᓪᓗᓯ ᑖᒃᑯᐊ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᓄᐃᓕᐅᕈᑕᐅᖁᔭᐅᔪᑦ ᐃᑲᔪᖅᑐᑦ ᓄᕙᒡᔪᐊᕐᓇᖅ-19ᒧᑦ ᓄᖅᑲᖓᑎᑦᑎᒍᑕᐅᓪᓗᓂ ᓄᓇᕗᒻᒥᑦ.

ᖁᔭᓐᓇᒦᒃ,



ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᖕᓂᕆᔭᖓᓄᑦ ᓴᐳᔾᔨᓯᒪᔪᒪᓪᓗᑎᒃ ᓄᓇᕗᒻᒥᐅᓂᒃ ᖁᐋᖅᓵᕐᓇᖅᑐᒧᑦ ᓄᕙᒡᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᖓᑕ ᐱᓕᕆᕝᕕᒋᑦ ᐅᑯᓂᖓ ᐊᑐᓕᖅᑎᑦᑎᓯᒪᕗᑦ:

ᐃᓕᓐᓂᐊᕐᓂᓕᕆᔨᒃᑯᑦ ᐱᓕᕆᕝᕕᖓᓐᓂᑦ ᓄᑖᕈᕆᐊᖅᑕᐅᔪᑦ

ᐊᑦᑑᕝᕙ 7, 2020, ᒥᓂᔅᑕ ᔪᐊᓇᓯ ᐊᒻᒪᓗ ᑖᒃᑯᐊ ᑲᓇᑕᐅᑉ ᒐᕙᒪᒃᑯᖏᑕ ᒥᓂᔅᑕᖓ ᐃᓛᒌᓄᑦ, ᓄᑕᖅᑲᓄᑦ ᐊᒻᒪ ᐃᓄᐃᑦ ᐱᕙᓪᓕᐊᑎᑕᐅᓂᖏᓐᓄᑦ, ᐋᒥᑦ ᕼᐅᓴᓐ, ᐅᖃᓚᐅᕐᒪᑦ ᐃᑲᔪᖅᑐᐃᒋᐊᒃᑲᓐᓂᕈᑎᔅᓴᓂᑦ ᐃᓕᓐᓂᐊᓕᒻᒪᒃᓴᔪᓕᕆᕕᓐᓄᑦ, ᐸᐃᕆᕕᓐᓄᓪᓗ ᐃᓕᓐᓂᐊᕐᕕᓐᓄᓪᓗ ᓄᓇᕗᒻᒥ (ᑲᓇᑕ−ᓄᓇᕗᑦ ᐃᓕᓐᓂᐊᓕᒻᒪᒃᓴᔪᓕᕆᕕᓄᑦ ᐊᒻᒪ ᐸᐃᕆᕕᓐᓄᑦ ᑕᒪᒃᑮᓄᑦ ᐊᖏᕈᑎ ($2.4 ᒥᓕᐊᓐ) ᐊᒻᒪ ᐱᒋᐊᑦᑎᐊᑲᓐᓂᕐᓂᕐᒧᑦ ᐊᑦᑕᕐᓇᙱᑦᑐᒥᑦ ᐊᖏᖃᑎᒌᒍᑎ ($2.6 ᒥᓕᐊᓐ).

ᑖᓐᓇ ᑲᓇ−ᓄᓇᕗᑦ ᐃᓕᓐᓂᐊᓕᒻᒪᒃᓴᔪᓕᕆᕕᓄᑦ ᐊᒻᒪ ᐸᐃᕆᕕᓐᓄᑦ ᑕᒪᒃᑮᓄᑦ ᐊᖏᖃᑎᒌᒍᑎᖓ ᐃᑲᔪᕐᓂᐊᖅᑐᖅ ᐋᖅᑭᐅᒪᑎᑦᑎᒍᑕᐅᓗᓂ ᐊᑭᑐᓗᐊᕈᓐᓃᖅᑎᑦᑎᒍᑕᐅᓗᓂ ᐃᓕᓐᓂᐊᓕᒻᒪᒃᓴᔪᓕᕆᕕᓐᓄᑦ ᐊᒻᒪ ᐸᐃᕆᕕᓐᓄᑦ ᐱᓕᕆᐊᔅᓴᓂᑦ ᐊᐅᓚᓂᖏᑎᒍᑦ ᑮᓇᐅᔭᖃᖅᑎᑕᐅᓗᑎᑦ, ᑖᒃᑯᐊ ᐸᐃᕆᕕᓐᓂᑦ ᐃᓂᔅᓴᖅᑕᖃᖅᑎᑦᑎᒃᑲᓐᓂᕈᑕᐅᓗᑎᑦ ᐊᔪᖅᓴᕐᓂᖅᓴᐅᔪᓄᑦ ᐱᑕᖃᓗᐊᖏᓐᓂᖏᓐᓄᑦ ᓄᓇᓕᓐᓄᑦ, ᐱᓕᒻᒪᒃᓴᖅᑎᑦᑎᓂᕐᒥᑦ ᐊᒻᒪ ᐱᓕᕆᔨᒻᒪᕆᕈᖅᓴᓂᕐᒧᑦ ᐱᕕᖃᖅᑎᑕᐅᖁᓪᓗᒋᑦ ᐃᓕᓐᓂᐊᓕᒻᒪᒃᓴᔪᓕᕆᕕᓐᓂᑦ ᐃᓕᓐᓂᐊᑎᑦᑎᔨᖏᑦ, ᐊᒻᒪ ᐃᓕᓐᓂᐊᖅᑎᑦᑎᒍᑎᔅᓴᓂᑦ ᐱᕙᓪᓕᐊᑎᑦᑎᖁᓪᓗᒋᑦ ᐊᒻᒪ ᐃᓕᓐᓂᐊᖅᑎᑦᑎᒍᑎᖃᕐᓗᑎᑦ ᑕᒪᐃᓐᓂᒃ ᓄᓇᕗᒻᒥᑦ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᐊᑐᕐᓗᒋᑦ.

ᐱᒋᐊᑦᑎᐊᒃᑲᓐᓂᕐᓂᕐᒧᑦ ᐊᑦᑕᕐᓇᙱᑦᑐᒥᑦ ᐊᖏᖃᑎᒌᒍᑎ ᐃᓕᓐᓂᐊᖅᑎᑦᑎᔾᔪᑕᐅᔪᓐᓇᖅᑐᒥᑦ ᐱᑕᖃᖅᑎᑦᑎᓂᐊᖅᑐᖅ ᓴᓗᒻᒪᖅᓴᐃᓂᕐᒥᑦ ᐊᒻᒪ ᓴᓗᒻᒪᖅᓴᐃᑎᔅᓴᑖᖅᑎᑕᐅᓗᑎᑦ ᓄᑕᖅᑲᓄᑦ ᓇᔪᖅᑕᐅᔪᓂᑦ ᑕᒪᒃᑯᓄᖓ ᐃᓕᓐᓂᐊᓕᓵᖅᑐᓂᑦ ᖁᕝᕙᓯᖕᓂᓕᖕᓄᑦ 12-ᒧᑦ ᐃᓕᓐᓂᐊᕐᕕᓐᓄᑦ ᓄᓇᕗᓕᒫᒥᑦ, ᐊᒻᒪᓗ ᓂᐅᕕᕈᑎᔅᓴᐅᓗᑎᑦ ᖃᕆᑕᐅᔭᕋᓛᓂᑦ, ᖃᕆᓴᐅᔭᕋᓛᑦ ᑎᒍᒥᐊᒐᕐᓂᑦ, ᐃᑭᐊᖅᑭᕕᒃᑰᕈᓐᓇᐅᑎᑖᕐᓗᑎᑦ ᐅᖓᓯᑦᑐᒦᓪᓗᑎᑦ ᐃᓕᓐᓂᐊᕐᓂᕐᒥᑦ ᐱᔭᕆᐊᖃᑐᐊᖅᐸᑕ

ᐃᑲᔪᖅᑕᐅᓂᐊᕐᒪᑕ ᑖᓐᓇ ᓄᓇᓕᒃ ᐅᓗᕆᐊᓇᖅᑐᒦᓐᓂᖅᓴᐅᑐᐊᑉᐸᑦ ᓄᕙᒡᔪᐊᕐᓇᖅ-19ᒧᑦ.

 

ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐱᓕᕆᕝᕕᖓᓐᓂᑦ ᓄᑖᕈᕆᐊᖅᑕᐅᔪᑦ

 

ᐃᓄᑐᐊᒃᑯᕕᖕᒦᑦᑐᑦ ᐅᓄᕐᓂᖏᑦ

ᑲᑎᖦᖢᒋᑦ (ᑕᒪᕐᒥᑦᑎᐊᖅ ᐃᓄᑐᐊᒃᑯᕕᖕᒦᑦᑐᑦ)  
ᐊᐅᓪᓚᖅᓯᒪᔫᑉ ᖃᓄᐃᑦᑑᓂᖓ ᑐᔪᕐᒥᑎᑕᐅᔪᑦ ᐊᓂᑦᑕᐃᓕᒪᔪᓂ ᐅᑐᐱᕆ 2-ᒥᑦ ᐱᒋᐊᖅᖢᓂ
ᐋᓐᓂᐊᕐᕕᓕᐊᖅᑐᑦ 540
ᑭᒃᑯᑐᐃᓐᓇᑦ 320
ᑲᑎᖦᖢᒋᑦ 860

 

ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓂᖏᓐᓄᑦ ᖃᓄᐃᓕᖓᓂᖏᑦ:

ᐅᓪᓗᖅ ᐊᐅᓪᓚᕐᕕᒃᓴᖓ ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐃᓄᑐᐊᒃᑯᕕᖕᒦᑦᑐᑦ
ᐅᑐᐱᕆ 8 65
ᐅᑐᐱᕆ 9 58
ᐅᑐᐱᕆ 10 0
ᐅᑐᐱᕆ 11 69
ᐅᑐᐱᕆ12 115
ᑲᑎᖦᖢᒋᑦ 307



ᐃᖅᑲᓇᐃᔭᕆᐊᖃᓪᓚᕆᒃᑐᑦ ᑐᒃᓯᕋᖅᑕᐅᔪᑦ

ᐅᑐᐱᕆ 8−ᒥ ᐱᒋᐊᖅᖢᓂ, 6898−ᓂᒃ ᑐᒃᓯᕋᖅᓯᒪᔪᖃᖅᐳᖅ, 3303−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓂᒃ ᑐᒃᓯᕋᕈᑕᐅᔪᑦ.

ᑐᒃᓯᕋᕈᑕᐅᓯᒪᔪᑦ ᖃᓄᐃᓕᖓᓂᖏᑦ # %
ᐊᖏᖅᑕᐅᓯᒪᔪᑦ (ᐅᑯᐊᖑᕗᑦ ᐱᒻᒪᕆᐊᓗᐃᑦ ᐱᒻᒪᕆᐅᓗᐊᙱᑦᑐᓪᓗ) 4774 69.2%
ᐊᖏᕐᑕᐅᙱᑦᑐᑦ 266 3.9%
ᐅᑕᖅᑭᔪᑦ 131 1.9%
ᐊᐅᓪᓚᕐᕕᐅᔪᓐᓇᖅᑐᑦ ᐊᑐᖅᑕᐅᒐᔪᒃᑐᓄᑦ ᐊᖏᖅᑕᐅᔪᑦ 1727 25.0%
ᑲᑎᖦᖢᒋᑦ 6898 100%

 



ᓄᓇᕗᒻᒥᐅᓂᑦ ᖃᓄᐃᙱᑦᑎᐊᖅᑎᑦᑎᓇᓱᒡᓗᑕ ᑕᒪᑦᑕ ᑲᒪᒋᔭᒃᓴᕆᔭᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐊᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᖃᓂᒌᓗᐊᖅᑕᐃᓕᕙᒡᓗᓯ, ᐃᖢᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᑦᑕ.