ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓄᑖᙳᕆᐊᖅᓯᒪᔪᑦ - ᔭᓄᐊᕆ 5, 2021

ᔮᓐᓄᐊᕆ 5, 2021

ᓄᕙᒡᔪᐊᕐᓇᖅ-19 ᓄᓇᕗᑦ ᒐᕙᒪᖓᓂ ᓄᑖᙳᕆᐊᖅᓯᒪᔪᑦ -  ᔭᓄᐊᕆ 5, 2021

ᓯᕗᓕᖅᑎᒥᑦ ᑐᓴᒐᒃᓴᖅ:

ᐅᓪᓛᒃᑯᑦ. ᑕᐃᒪᑐᖅ ᑕᒪᔅᓯᑦᑎᐊᖅ ᑕᖃᐃᖅᓯᑦᑎᐊᓚᐅᖅᐳᓯ ᖁᐊᖅᓵᕐᓇᙱᑦᑐᒥᒡᓗ ᓄᖅᑲᖓᖃᕐᓗᓯ.

ᐅᓪᓗᒥ, ᓄᑖᓂᒃ ᐱᖃᓕᖅᑐᓂᒃ ᓄᕙᒡᔪᐊᕐᓇᖅ-19−ᒥᒃ ᓄᓇᕗᒻᒥ ᐱᑕᖃᙱᓚᖅ, ᑕᒪᓐᓇᓗ ᐃᒪᓐᓇ ᑐᑭᖃᖅᖢᓂ, 0−ᓂᒃ ᐱᖃᖅᐳᒍᑦ ᐆᒪᔪᒥᒃ ᐱᓕᖕᓂᒃ. ᑲᑎᖦᖢᒋᑦ ᐃᓄᐃᑦ ᒫᓐᓇᒧᑦ ᑎᑭᖦᖢᒍ ᖃᐅᔨᓴᖅᑕᐅᓯᒪᓕᖅᑐᑦ 5738−ᖑᓕᖅᑐᑦ. 431 ᐃᓄᐃᑦ ᒫᓐᓇ ᒪᓕᒃᑕᐅᕙᓪᓕᐊᕗᑦ. 265 ᓄᓇᕗᒻᒥᐅᑦ ᖃᓂᒻᒪᓚᐅᖅᑐᑦ ᖃᓄᐃᑦᑐᓐᓃᖅᑐᑦ.

ᓄᒫᓱᒃᖢᖓ ᐅᖃᕆᐊᖃᕋᒪ ᑕᓪᓕᒪᓂᒃ ᓄᓇᕗᒻᒥᐅᓂᒃ ᐃᓅᔪᓐᓃᖅᑐᖃᖅᓯᒪᓕᖅᐳᖅ ᓄᕙᒡᔪᐊᕐᓇᖅ-19−ᒧᑦ. ᑎᓴᒪᐅᓂᖏᑦ ᑖᒃᑯᐊ ᐃᓄᐃᑦ ᐱᓯᒪᓕᓚᐅᖅᐳᑦ ᑕᒪᑐᒥᖓ ᖃᓂᒪᓐᓇᒥᒃ ᖃᓪᖢᓈᑦ ᓄᓇᖓᓐᓂ ᑲᓇᑕᒥ, ᐃᒪᓐᓴᐅᓇᔭᖅᑐᒃᓴᐅᓪᓗᓂᓗ, ᑕᐃᒃᑯᐊ ᐃᓅᔪᓐᓃᕐᓂᕆᔭᖏᑦ ᐅᖃᐅᓯᐅᓂᐊᖅᑐᒃᓴᐅᕗᑦ ᑕᐃᒃᑯᓇᓂ ᐃᓂᓂ ᐱᔪᓐᓇᕐᕕᖃᕐᕕᐅᔪᓂ.

ᑭᒡᒐᖅᑐᖅᖢᒋᑦ ᓄᓇᕗᑦ ᒐᕙᒪᒃᑯᖏᑦ, ᐅᖃᐅᓯᖃᖅᐳᖓ ᐅᒡᒍᐊᖃᑎᒋᒻᒪᕆᖕᓂᑦᑎᓐᓂᒃ ᓴᙱᖁᓪᓗᒋᓪᓗ ᐃᓚᒥᓄᑦ, ᐱᖃᓐᓇᕆᔭᒥᓄᑦ ᓄᓇᓕᖕᒥᐅᓄᓪᓗ. ᑖᓐᓇ ᖃᓕᒪᓐᓇ ᐊᒃᓱᕈᓐᓇᖅᐳᖅ ᑕᐃᒪᐃᓪᓚᕆᒃᑎᑦᑎᕙᒃᖢᓂᓗ − ᓱᖁᑎᒃᓴᙱᑦᑎᐊᖅᑐᖅ ᑭᓇᐅᒐᓗᐊᕈᕕᑦ ᑭᓱᓕᕆᔨᐊᒐᓗᐊᕈᕕᓪᓘᓐᓃᑦ. ᑕᐃᒪᐃᓐᓂᖓᓄᑦ ᑕᕝᕙ ᐊᐱᕆᖃᖅᑕᖅᐳᒍᑦ ᑭᒃᑯᑐᐃᓐᓇᓂᒃ ᒪᓕᖁᔨᓪᓗᑕ ᖃᖓᓕᒪᑦᑎᐊᒃᑯᑦ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖅᑕᐅᔭᕆᐊᓕᖕᓂᒃ. ᐊᒡᒐᑎᑦ ᐅᐊᓴᖃᑦᑕᕐᓗᒋᑦ ᒪᑐᐊᖅᓯᒪᓗᑎᑦ. ᐃᓅᖃᑎᖕᓂᒃ ᐅᖓᓯᒃᓴᖅᐸᒡᓗᑎᑦ. ᖃᓂᒪᒍᕕᑦ ᐊᖏᕐᕋᖅᓯᒪᓗᑎᑦ. ᐃᓕᔅᓯᓐᓂᒃ ᓴᐳᑎᓯᒪᒋᔅᓯ ᑭᒃᑯᑐᐃᓐᓇᓂᖕᓗ ᖃᓂᒋᔭᕐᓃᑉᐸᒃᑐᓂᒃ ᖁᐊᖅᓵᕐᓇᖅᑐᒦᑎᙱᓪᓗᒋᑦ.

ᐅᐊᑦᑎᐊᕈᑦᑎᐊᖅ, ᓘᒃᑖᖅ ᐹᑐᓴᓐ ᐅᖃᐅᓯᖃᕐᓂᐊᖅᐳᖅ ᓄᓇᕗᒻᒥᐅᑦ ᑲᐱᔭᐅᕙᓪᓕᐊᓂᐊᕐᓂᖏᓐᓄᑦ ᐱᕙᒌᔭᐅᑎᒥᒃ. ᐊᐱᕆᕙᔅᓯ ᐅᑕᖅᑭᑦᑎᐊᖃᑦᑕᖁᓪᓗᓯ ᐱᓕᕆᐊᖃᖅᐸᓪᓕᐊᑎᓪᓗᑕ ᑲᐱᓯᓇᔭᕐᓂᕐᒥᒃ ᐊᔪᕐᓇᙱᓐᓂᓕᒡᒪᖓᒍᑦ ᐊᒥᓲᓚᓂᒃ. ᐊᒥᓱᑲᓪᓚᖕᓂᒃ ᐊᑐᖅᑕᐅᔭᕆᐊᓕᖕᓂᒃ ᐱᑕᖃᖅᐳᖅ, ᐅᑕᖅᑭᔭᕆᐊᖃᖅᖢᑕᓗ ᓈᒻᒪᒃᑐᓂᒃ ᑲᐱᔭᐅᔾᔪᑎᒃᓴᓂᒃ ᑕᒪᒃᑭᕈᒪᓪᓗᒋᑦ ᐃᓐᓇᐃᑦ ᓄᓇᓕᖕᒥᐅᑕᐅᖃᑕᐅᔪᑦ.

ᐳᐃᒍᖅᑕᐃᓕᒋᑦ ᑕᒪᓐᓇ ᑲᐱᔭᐅᓂᖅ ᑕᐃᒪᐃᓪᓚᕆᒋᐊᖃᙱᓐᓂᖓᓂᒃ, ᑭᓯᐊᓂᓗ ᖁᐊᖅᓵᕐᓇᙱᖦᖢᓂ ᐊᑐᕐᓂᖃᕈᓐᓇᑦᑎᐊᖅᖢᓂᓗ, ᐱᐅᓛᖑᓪᓗᓂᓗ ᓴᐳᔾᔨᓯᒪᓂᐊᕐᓗᓂ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ. ᐱᐅᓛᖑᕗᖅ ᐊᑐᕈᕕᐅᒃ ᐃᓕᖕᓄᑦ ᑕᒪᒃᑯᓄᖓᓗ ᑕᐃᒪᐃᓕᐅᕈᓐᓇᙱᑦᑐᓄᑦ. ᑕᒪᓐᓇ ᐱᔾᔪᑎᖃᖅᐳᖅ ᓄᓇᓕᖕᒥᐅᓂᒃ ᑭᒃᑯᑐᐃᓐᓇᐃᓪᓗ ᐊᒥᖅᑳᕈᑎᒋᔭᖓᓄᑦ ᖃᓄᐃᙱᑦᑎᐊᕈᓐᓇᕐᓂᕐᒧᑦ.

ᕼᐋᐱ ᓂᐅ ᔨᐊ; ᐊᑏ 2021 ᐱᐅᑎᒻᒪᕆᓚᐅᕐᓚᕗᑦ. ᓄᓇᕗᒻᒥᐅᑦ, ᐱᓕᕆᑦᑎᐊᖃᑦᑕᖅᓯᒪᔪᒻᒪᕆᐅᕗᓯ ᐅᓇᑖᕆᔭᖃᖅᖢᓯ ᑕᒪᑐᒥᖓ ᓄᕙᒡᔪᐊᕐᓇᖅ-19−ᒥᒃ ᒫᓐᓇᕗᑦ ᑎᑭᖦᖢᒍ, ᑭᓯᐊᓂᓗ ᑕᒪᑐᒪ ᓯᐊᒻᒪᒃᐸᓪᓕᐊᓂᕆᔭᖓ ᓱᓕ ᐊᓂᒍᙱᑕᒻᒪᕆᐊᒋᕙᕗᑦ. ᐊᑏ, ᐱᓕᕆᖃᑎᒌᓚᐅᖅᑕ ᐊᕕᒃᓯᒪᓂᖅᐳᑦ ᐅᑭᐅᖅᑕᖅᑐᒥ ᖃᓄᐃᙱᖁᓪᓗᒍ ᖁᐊᖅᓵᕐᓇᖅᑐᒦᖁᓇᒍᓗ.

 

ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᐅᑉ ᑐᓴᒐᒃᓴᖏᑦ ᓄᑖᑦ:

ᐅᓪᓛᒃᑯᑦ,

ᐱᓇᓱᐊᕈᓯᐅᓵᖅᑐᒥ,ᓄᓇᕗᑦ ᐱᓚᐅᖅᐳᖅ ᓯᕗᓪᓕᐹᓂᒃ ᑲᐱᔭᐅᔾᔪᑎᒃᓴᓂᒃ ᑎᑭᑦᑐᓂᒃ. ᑎᓯᐱᕆ 30, 3000−ᓂᒃ ᑲᐱᔭᐅᔾᔪᑎᒃᓴᓂᒃ ᑕᒪᑐᒧᖓ Moderna ᑲᐱᔭᐅᔾᔪᑎᒧᑦ ᐊᐅᓪᓚᖅᑎᑕᐅᓚᐅᖅᐳᑦ ᐃᖃᓗᖕᓄᑦ ᐊᒻᒪᓗᒃᑲᓐᓂᖅ 3000−ᑲᓐᓂᕐᓂᒃ ᑲᖏᖅᖠᓂᕐᒧᑦ.  ᑕᒪᓐᓇ ᐱᒻᒪᕆᐊᓘᓪᓗᓂ ᐊᓂᒍᖅᑎᑕᐅᕗᖅ ᓄᓇᕗᒻᒥᐅᑦ ᓇᒧᙵᖅᐸᓪᓕᐊᓂᕆᔭᖏᓐᓂ ᑕᒪᓐᓇᓗ ᖁᕕᐊᓱᒍᑎᒋᓪᓗᑎᒍ. ᑲᐱᔭᐅᓂᖅ ᐃᓱᒪᖅᓲᑕᐅᕗᖅ, ᑭᓯᐅᓂᓗ ᑎᓕᐅᕆᕗᒐ ᐊᒥᓲᓛᓂᒃ ᐊᔪᖅᑎᑕᐅᙱᑦᑐᓂᒃ ᓄᓇᕗᒻᒥᐅᓂᒃ ᐊᔪᕐᓇᙱᓐᓂᓕᒫᖓᒍᑦ ᑲᐱᔭᐅᖁᓪᓗᒋᑦ. ᒫᓐᓇ ᑖᓐᓇ ᐱᐅᓛᖑᕗᖅ ᓴᐳᔾᔨᓯᒪᓂᐊᕐᓗᓂ ᓄᓇᕗᒻᒥᐅᑦ ᐱᔪ8ᓇᖅᖢᓂᔾᔪᒃ ᑕᒪᑐᒧᖓ ᓄᕙᒡᔪᐊᕐᓇᖅ-19−ᒧᑦ. 

ᑖᓐᓇ Moderna ᑲᐱᔭᐅᔾᔪᑎ ᐊᑐᕐᕕᐅᔭᕆᐊᖃᖅᐳᖅ ᒪᕐᕉᖕᓂᒃ ᑲᐱᔭᐅᓂᕐᓂᒃ ᑕᐃᒪᐃᓕᐅᖅᑕᐅᓗᑎᒡᓗ 28-ᓗ 30−ᓗ ᐅᓪᓗᐃᑦ ᐅᖓᓯᒌᒃᑎᒋᓗᑎᒃ.  ᑕᐃᒃᑯᐊ ᓯᕗᓪᓖᑦ 6000 ᑲᐱᔭᐅᔾᔪᑏᑦ ᑕᒪᑐᒧᖓ ᑲᐱᔭᐅᔾᔪᑎᒧᑦ ᐅᕙᑦᑎᓐᓂᒃ ᐱᕕᒃᓴᖃᖅᑎᑦᑎᓂᐊᖅᐳᖅ ᑲᐱᓯᕙᓪᓕᐊᓕᕐᓂᕐᒥᒃ 3,000−ᓂᒃ ᓄᓇᕗᒻᒥᐅᓂᒃ. ᑕᒪᓐᓇ ᓇᓗᙱᔾᔪᑕᐅᑦᑎᐊᕐᓂᐊᖅᐳᖅ ᑕᒪᒃᑯᐊ ᐊᑐᖅᑕᐅᔭᕆᐊᓖᑦ ᑲᐱᔭᐅᔾᔪᑏᑦ ᒪᓂᒪᒐᓗᐊᕐᒪᖔᑕ, ᑕᐃᓐᓇ ᐊᐃᑉᐸᖓ ᐊᐅᓪᓚᖅᑎᑕᐅᔪᖅ ᑲᐱᔭᐅᔾᔪᑎᓄᑦ ᓂᕆᐅᒋᔭᐅᔪᓄᑦ ᑕᒪᑐᒪᓂ ᓱᓕ ᑕᖅᑭᒥ, ᑭᖑᕙᕆᐊᖅᑎᑕᐅᒃᐸᑦ. 

ᑲᐱᓯᕙᓪᓕᐊᓂᕆᓇᔭᖅᑕᕗᑦ ᖃᓄᐃᓕᐅᕈᒪᔭᕗᑦ ᑲᑎᑎᑦᑎᕗᖅ ᑲᐱᔭᐅᓂᕐᓂᒃ ᓄᓇᓕᖕᒥᐅᓕᒫᓂᒡᓗ ᐃᓗᐊᖅᓴᐃᓂᕐᓂᒃ.  ᑕᐅᑐᒐᖃᓪᓗᐊᑕᖅᑐᑦ ᑲᐱᓯᓃᑦ ᐃᓗᐊᖅᓴᐃᔨᓂᒃ ᐃᓐᓇᒃᑯᕕᖕᒧᐊᖅᑎᑦᑎᓂᐊᖅᐳᖅ ᐱᑎᑦᑎᔭᖅᑐᕐᓗᑎᒃ ᑲᐱᔭᐅᔪᓂᒃ, ᑕᒪᒃᑯᐊᓗ ᓄᓇᓕᖕᓂ ᑲᔪᓯᑎᑕᐅᓂᐊᖅᖢᑎᒃ ᐅᐸᒡᓗᒋᑦ ᑲᔭᐅᔭᖅᑐᕐᕕᐅᓗᑎᒃ ᐅᕝᕙᓘᓐᓃᑦ ᐃᓂᒃᓴᓕᐅᖅᑐᖃᕐᓗᓂ ᑕᐅᑐᒡᓗᒍ ᓄᓇᓕᒃ. ᐱᓕᕆᐊᖃᓯᒋᐊᖅᑳᖅᐸᒃᑐᑦ ᐃᖅᑲᓇᐃᔭᖅᑏᑦ ᐃᖅᑲᓇᐃᔭᖅᑐᑦ ᐃᓐᓇᒃᑯᕕᖕᓂ ᐊᒻᒪᑦᑕᐅᖅ ᑲᐱᔭᐅᓂᐊᕆᕗᑦ. ᐃᓗᐊᖅᓴᐃᔩᑦ ᐋᓐᓂᐊᕕᓕᐊᕐᕕᖕᓂᑦ ᐃᑲᔪᖅᑕᐅᓗᑎᒃ ᐱᓕᕆᖃᑎᒡᒌᒃᑐᓂᒃ ᑳᓐᑐᓛᒃᑰᖓᔪᓂᒃ ᐃᓗᐊᖅᓴᐃᔨᓂᒃ ᑲᐱᓯᖃᑦᑕᕐᓂᐊᖅᐳᑦ ᑲᐱᔭᐅᔾᔪᑎᓂᒃ ᐊᑐᕐᓗᑎᒃ. 

ᑲᐱᓯᕙᓪᓕᐊᓃᑦ ᐱᒋᐊᕐᓂᐊᖅᐳᑦ ᑕᒪᑐᒪᓂ ᐱᓇᓱᐊᕈᓯᕐᒥ ᐃᓐᓇᑯᕕᖕᒥ ᐃᖃᓗᖕᓂ, ᔭᓄᐊᕆ 6−ᒥ. 

ᐱᓇᓱᐊᕈᓯᖓᓂ ᔭᓄᐊᕆ 11, ᐃᓂᒃᓴᓕᐅᖅᓯᒪᓗᓂ−ᑐᙵᕕᓕᖕᓂᒃ ᓄᓇᓕᓕᒫᓂ ᑲᐱᔭᐅᕙᓪᓕᐊᓃᑦ ᑕᐅᑐᒐᖃᓪᓗᐊᑕᖅᑐᓪᓗ ᑲᐱᔭᐅᓃᑦ ᐃᓐᓇᐃᑦ ᐃᓂᖏᓐᓂ ᐱᒋᐊᓛᕐᒥᔪᑦ ᐅᖅᓱᖅᑑᕐᒥ, ᐃᒡᓗᓕᖕᒥ, ᐊᕐᕕᐊᕐᒥ ᐊᒻᒪᓗ ᐃᖃᓗᒃᑑᑦᑎᐊᒥ. ᐅᖅᓱᖅᑑᕐᒥᐅᑦ ᐃᒡᓗᓕᖕᒥᐅᓗ ᐋᖅᑭᒃᑕᐅᓯᒪᕙᒌᖅᐳᑦ ᔭᕗᐊᕆ 11−ᒥ 12−ᒥᓗ. ᐊᕐᕕᐊᕐᒥᐅᑦ ᐋᖅᑭᒡᕕᐅᓯᒪᕗᑦ ᔭᓄᐊᕆ 14−ᒥᑦ 18−ᒧᑦ ᑭᑭᑕᐅᓪᓗᓂ ᓴᓇᑦᑕᐃᓕ.  ᐃᖃᓗᒃᑑᑦᑎᐊᒥᐅᑦ ᔭᓄᐊᕆ 14−ᒥᑦ 16−ᒧᑦ ᑲᐃᔭᐅᕝᕕᖃᕐᓂᐊᖅᐳᑦ. ᑖᒃᑯᓇᓂ ᓄᓇᓕᖕᒥᐅᑦ ᐊᐱᕆᔭᐅᕗᑦ ᐅᖄᓚᖁᔭᐅᓪᓗᑎᒃ ᐋᓐᓂᐊᕕᓕᐊᕐᕕᒋᔭᒥᓄᑦ ᐃᓂᒃᓴᓕᐅᕐᓂᐊᕐᓗᑎᒃ.

ᐊᕐᕕᐊᕐᒥᐅᑦ ᖃᖓᒃᑰᕐᓂᕆᔭᖏᑦ ᑕᐃᒪᐃᔾᔪᑎᖃᖅᐳᑦ ᑕᐃᒃᑯᐊ ᐃᓗᐊᖅᓴᐃᔩᑦ ᑲᔪᓯᑎᑦᑎᕙᒃᑐᑦ ᑕᐃᑲᓂ ᐅᐸᒃᑕᐅᑦᑕᐃᓕᒪᕝᕕᖕᒦᑦᑕᕆᐊᖃᕐᓂᖏᓐᓄᑦ 14−ᓄᑦ ᐅᓪᓗᓄᑦ ᐊᐅᓪᓛᓪᓚᓚᐅᖅᑎᓪᓗᒋᑦ ᐱᔾᔪᑎᖃᖅᖢᑎᒃ ᓯᐊᒻᒪᖕᓂᖓᓄᑦ ᓄᕙᒡᔪᐊᕐᓇᖅ-19.  

ᓄᓇᓕᓕᒫᓂ ᐃᓗᐊᖅᓴᐃᓃᑦ ᑕᒪᐃᓐᓂᑲᓴᒃᑎᒍᑦ ᐱᓕᕆᐊᖑᓂᐊᖅᐳᑦ ᐃᓂᓂ ᓲᕐᓗ ᐃᓕᓐᓂᐊᕐᕖᑦ ᐃᖃᐃᓕᓴᕐᕕᖏᓐᓂ ᓄᓇᓕᖕᒥᐅᓪᓗ ᐱᙳᐊᕐᕕᖏᓐᓂ, ᒪᓕᒋᐊᖃᖅᑐᖁᑎᖃᕐᓗᑎᒃ ᖃᐅᔨᒪᑦᑎᐊᖁᒪᓂᕐᒧᑦ ᑎᒥᒃᑯᑦ ᐅᖓᓯᒃᓴᖃᑦᑕᕋᓗᐊᕐᒪᖔᑕ, ᑕᒻᒪᙱᖦᖢᑎᑦ ᒃ ᐊᑐᖅᑲᑦᑕᕋᓗᐊᕐᒪᖔᑕ ᒪᑐᐊᖅᓯᒪᔾᔪᑎᓂᒃ ᐊᓯᖏᓐᓄᓪᓗ PPE−ᓄᑦ ᐱᐅᓯᑎᑕᐅᒋᐊᖅᓯᒪᔪᓄᓪᓗ ᓴᓗᒻᒪᖅᓴᐃᓂᕐᒧᑦ ᐊᑐᖅᑕᐅᕙᒃᑐᓄᑦ. ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔭᖅᑏᑦ ᐱᓕᕆᖃᑎᖃᓕᖅᓯᒪᕗᑦ ᓄᓇᓕᖕᓂ ᐱᓕᕆᖃᑎᒋᓂᐊᖅᑕᒥᓂᒃ ᐅᖅᓱᖅᑑᕐᒥ, ᐃᒡᓗᓕᖕᒥ, ᐊᕐᕕᐊᕐᒥ ᐊᒻᒪᓗ ᐃᖃᓗᒃᑑᑦᑎᐊᒥ ᓇᓗᙱᑦᑎᐊᕈᒪᓂᕐᒧᑦ ᑕᒪᒃᑯᐊ ᒪᓕᒃᑕᐅᔭᕆᐊᓖᑦ ᑲᔪᓯᑎᑕᐅᒐᓗᐊᕐᒪᖔᑕ. 

ᐃᓗᐊᖅᓴᐃᒃᑲᓐᓂᕐᓃᑦ ᑲᔪᓯᑎᑕᐅᓂᐊᖅᐳᑦ ᑐᙵᕕᖃᖅᑎᑕᐅᓗᑎᒃ ᖃᔅᓯᐅᓂᖏᓐᓄᑦ ᑲᐱᓯᔾᔪᑏᑦ ᐱᓂᐊᖅᑕᔪᑦ ᓯᕗᓂᒃᓴᒥ ᒐᕙᒪᑐᖃᒃᑯᓐᓂᑦ ᐊᐅᓪᓚᖅᑎᑕᐅᔪᓂᑦ, ᖃᔅᓯᐅᓂᖏᓐᓄᓪᓗ ᐊᒥᐊᒃᑯᒋᔭᐅᔪᑦ ᑲᐱᓯᔾᔪᑏᑦ ᑭᖑᓂᑦᑎᓐᓂ ᑲᐱᓯᓂᐊᓚᐅᖅᑐᓂᑦ. ᓄᓇᕗᒻᒥᐅᒃ ᐱᓪᓗᐊᖅᐳᑦ ᓈᒻᒪᒃᑐᓂᒃ ᑲᐱᓯᔾᔪᑎᓂᒃ ᒫᓐᓇᒥᑦ ᐃᓱᓕᓕᖅᐸᓪᓗ ᒫᑦᓯ ᑲᐱᓯᓂᐊᕐᓗᑎᒃ 75−ᐳᓴᖏᓐᓂᒃ ᐃᓐᓇᕐᓂᒃ, 19,000−ᐸᓗᖕᓂᒃ ᐃᓄᖕᓂᒃ. 

ᖃᐅᔨᒪᔪᖓ ᐃᓱᒫᓗᑎᑕᖃᖃᑦᑕᕐᓂᖓᓄᑦ ᓴᖅᑭᑎᑕᐅᔪᓂᒃ ᑕᒪᑐᒧᖓ ᑲᐱᔭᐅᔾᔪᑎᒧᑦ, ᑭᓯᐊᓂᓗ ᓇᓗᓇᐃᖅᓯᑦᑎᐊᖅᐳᒐ ᑭᒃᑯᓕᒫᓄᑦ ᑕᒪᓐᓇ ᖁᐊᖅᓵᕐᓇᙱᓐᓂᖓᓂᒃ. mRNA−ᒧᑦ ᑲᐱᔭᐅᓃᑦ, ᓲᕐᓗ ᑕᒪᑐᒧᖓ Moderna−ᒧᑦ, ᐋᖅᑭᒃᓱᖅᑕᐅᕙᓪᓕᐊᖏᓐᓇᖅᓯᒪᕗᑦ 20 ᐊᕐᕌᒍᐃᑦ ᐅᖓᑖᓄᑦ.  ᐃᓗᐊᖅᓴᐃᓂᕐᒧᑦ ᐆᒃᑑᒪᒍᑕᐅᓯᒪᔪᑦ ᑕᒪᑐᒧᖓ Moderna−ᒧᑐᐊᖅ 30,000-ᓂᒃ ᐃᓚᐅᕝᕕᐅᓚᐅᖅᐳᖅ ᐊᔾᔨᒌᙱᕈᓘᔭᖅᑐᓂᑦ ᐃᓄᒋᔭᐅᔪᓂᑦ, ᐃᓚᒋᔭᐅᓪᓗᑎᒃ ᐃᓐᓇᐃᑦ ᑕᒪᒃᑯᐊᓗ ᐱᓯᒪᕙᒌᖅᑐᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᓄᐃᓕᖓᓂᕐᓂᒃ. ᑕᒪᓐᓇ ᐃᓕᖕᓂᒃ ᑐᓂᓯᔪᓐᓇᙱᑦᑐᖅ ᓄᕙᒡᔪᐊᕐᓇᖅ-19−ᒥᒃ ᑕᒪᒃᑯᐊᓗ ᓴᓂᐊᒍᑦ ᓴᖅᑭᓕᖅᐸᒃᑐᑦ ᓂᕆᐅᒋᔭᐅᕙᒃᑐᓂᐅᕙᒃᐳᑦ ᐊᓯᖏᓐᓄᑦ ᑲᐱᔭᐅᓪᔪᑎᐅᕙᒃᑐᓄᑦ. ᓇᓗᕈᔪᒃᑯᕕᑦ ᑲᐱᔭᐅᓇᔭᕐᒪᖔᖅᐱᑦ,ᖃᐅᔨᒋᐊᕐᓗᑎᑦ ᐋᓐᓂᐊᕕᓕᐊᕐᕕᖕᓄᑦ ᐅᖃᐅᔾᔭᐅᒃᑲᓐᓂᕈᒪᓗᑎᑦ. 

ᑲᐱᔭᐅᓂᖅ 94%−ᒧᑦ ᐊᑐᕈᓐᓇᖅᓂᖃᖅᑎᒋᕗᖅ ᐱᑖᖅᑎᑦᑎᑦᑕᐃᓕᒪᔪᓐᓇᖅᖢᓂ ᓄᕙᒡᔪᐊᖕᓇᖅ 19−ᒥᒃ ᐱᑕᖃᖅᑎᑦᑎᑦᑕᐃᓕᒪᔪᓐᓇᖅᖢᓂᓘᓐᓃᑦ ᐊᐃᑦᑐᕐᓗᒃᑕᐅᕐᔪᐊᕐᓂᕐᒥᒃ ᑕᐃᒪᐃᔾᔪᑎᖃᕐᓗᓂ ᓄᕙᒡᔪᐊᖕᓇᖅ-19−ᒥᒃ. 

ᒫᓐᓇᐅᔪᒃᑯᑦ, ᑖᓐᓇ Moderna ᑲᐱᓯᔾᔪᑎ ᐊᖏᖅᑕᐅᓯᒪᙱᓚᖅ ᑭᓇᑐᐃᓐᓇᓄᑦ ᐊᕐᕌᒍᓕᖕᒧᑦ 18 ᑐᖔᓂ, ᑭᓯᐊᓂᓗ ᐃᓗᐊᖅᓴᐃᕕᖕᓂ ᐆᒃᑑᒪᔭᒍᑕᐅᔪᑦ ᑲᔪᓯᑎᑕᐅᕙᓪᓕᐊᕗᑦ.  ᓄᓇᕗᒻᒥᐅᓂᒃ ᑐᓴᐅᒪᑎᑦᑎᓂᐊᖅᐳᒍᑦ ᓄᑖᒧᑦ ᑲᐱᔭᐅᔾᔪᑎᒧᑦ ᐋᖅᑭᒃᑕᐅᕙᓪᓕᐊᔪᓂᒃ ᐱᓇᓱᐊᕈᓯᕐᓂ ᑕᖅᑭᓂᓗ ᐊᒡᒋᖅᑐᓂ.  ᑐᓴᖅᑐᖃᒃᑲᓐᓂᕈᒪᒃᐸᑦ ᐱᔾᔪᑎᖃᕐᓗᑎᒃ ᑕᒪᒃᑯᓂᖓ ᑲᐱᔭᐅᓂᕐᓂᒃ ᐊᒡᒋᖅᐸᓪᓕᐊᔪᓂᒡᓗ ᐃᓗᐊᖅᓴᐃᓂᕐᓂᒃ, ᐅᐸᒡᓗᒍ ᓄᓇᕗᑦ ᒐᕙᒪᖓᑕ ᐃᑭᐊᖅᑭᕕᖓ ᑕᑯᔭᖅᑐᕐᓗᒍᓗ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓄᕙᒡᔪᐊᕐᓇᖅ-19−ᒧᑦ ᑲᐱᔭᐅᓂᕐᒧᑦ ᒪᒃᐱᖅᑐᒐᖓ. ᑭᒃᑯᑐᐃᓐᓇᖅᓯᐅᑎᓄᑦ ᑲᐱᔭᐅᓂᕐᒧᑦ ᑐᓴᖅᑕᐅᔪᒃᓴᓄᑦ, ᓄᓇᕗᒻᒥᐅᑦ ᖃᐅᔨᒋᐊᕐᕕᖃᕈᓐᓇᕆᕗᑦ ᓄᕙᒡᔪᐊᕐᓇᖅ-19-ᒧᑦ ᐅᖄᓚᕝᕕᐅᔪᓐᓇᖅᑐᒧᑦ ᓂᕈᐊᕆᔭᖃᕐᓗᑎᓪᓗ ᐊᑐᕈᓐᓇᖅᑕᒥᓂᒃ ᐅᖃᓪᓚᒍᓐᓇᕐᓂᕐᒥᒃ ᐃᓗᐊᖅᓴᐃᔨᒧᑦ. 

ᐅᖃᐅᓯᖃᕈᒪᒋᕗᖓᑦᑕᐅᖅ ᑲᔪᓯᕙᓪᓕᐊᓂᕆᔭᐅᔪᒧᑦ ᐊᕕᒃᓯᒪᓂᕆᔭᐅᔪᖅ ᐅᑭᐅᖅᑕᖅᑐᒥ ᐊᓂᒍᖅᑎᖃᑦᑕᖅᓯᒪᔭᖏᓐᓂᒃ ᐱᓇᓱᐊᕈᓯᑉᓂ ᐊᑐᓵᖅᑕᑦᑎᓐᓂ ᓄᖅᑲᖅᑎᑦᑎᔪᒪᓪᓗᑎᒃ ᓯᐊᒻᒪᒃᐸᓪᓕᐊᓂᕆᔭᖓᓂᒃ ᑕᒪᑐᒪ ᓄᕙᒡᔪᐊᕐᓇᖅ-19. ᑎᓯᐱᕆ 30−ᐅᓚᐅᕐᓂᖓᓂᑦ, ᓯᐊᒻᒪᓚᐅᖅᑐᖅ ᑲᖏᖅᖠᓂᕐᒥ ᐊᓂᒍᖅᐳᖅ ᐊᔪᓕᖅᑎᑕᐅᔾᔪᑏᓪᓗ ᑕᐃᑲᓂ ᓄᓇᓕᖕᓂ ᖃᓱᒋᐊᖅᑕᐅᓪᓗᑎᒃ. ᑕᐃᒃᑯᐊ ᓯᐊᒻᒪᒃᑎᖅᑐᖅ ᑕᒪᐃᖕᓂ ᑎᑭᕋᕐᔪᐊᕐᒥ ᐊᕐᕕᐊᕐᒥᓗ ᓱᓕ ᐆᒪᕗᑦ, ᐱᓯᒪᙱᖦᖢᑕᓗ ᒫᓐᓇ ᐆᒪᔪᓂᒃ ᑕᐃᒪᐃᑦᑐᓕᖕᓂᒃ. ᑎᓕᐅᖅᐸᒃᑲ ᓄᓇᕗᒻᒥᐅᑦ ᑲᔪᓰᓇᖃᑦᑕᖁᓪᓗᒋᑦ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑎᓕᓯᔾᔪᑕᐅᓯᒪᔪᓂᒃ ᐃᑲᔪᕈᒪᓪᓗᑕ ᐅᓄᕐᓂᕆᔭᖏᑦ ᐊᑐᖅᓯᖁᓪᓗᒋᑦ ᑕᒻᒪᙱᑦᑐᒥᒃ ᓇᒧᙵᐅᕙᓪᓕᐊᓂᕆᔭᐅᔪᒥᒃ.  

ᑭᖑᓪᓕᖅᐹᒥᒃ, ᐃᓕᓴᖅᓯᔪᒪᕗᖓ ᐃᓄᓕᒫᓂᒃ ᓄᓇᕗᑦ ᒐᕙᒪᒃᑯᖏᓐᓃᑦᑐᓂᒃ ᐱᕕᒃᓴᖃᖅᑎᖃᑦᑕᓚᐅᖅᑐᓂᒃ ᐃᒻᒥᓂᒃ ᓄᖅᑲᖓᓐᓇᐅᑎᓪᓗᒍ ᐃᖅᑲᓇᐃᔭᖅᖢᑎᒃ ᖃᐅᔨᒪᑦᑎᐊᖁᒪᓂᕐᒧᑦ ᑲᔪᓯᓂᖃᑦᑎᐊᖅᑐᒃᑯᑦ ᖁᐊᖅᓵᕐᓇᙱᑦᑐᒃᑯᑦ  ᑎᑭᑎᑦᑎᓂᖏᓐᓄᑦ ᑐᖅᑯᖅᓯᓂᖏᓐᓄᓪᓗ ᑕᒪᑐᒥᖓ ᑲᐱᔭᐅᔾᔪᑎᒥᒃ, ᐋᖅᑭᒃᓱᐃᕙᒃᖢᑎᒃ ᐃᓗᐊᖅᓴᖅᑕᐅᓂᕐᓂᒃ, ᐊᐅᓚᑦᑎᕙᒃᖢᑎᒃ ᑲᔪᓰᓐᓇᖅᑐᓂᒃ ᓯᐊᒻᒪᒃᑐᓂᒃ ᓇᓗᙱᑦᑎᐊᕋᓱᒃᐸᖕᓂᕐᒧᓪᓗ ᑭᒃᑯᓂᒫᑦᑎᐊᑦ ᑐᓴᐅᒪᑎᑕᐅᑦᑎᐊᕋᓗᐊᕐᒪᖔᑕ. ᖁᔭᓐᓇᒦᒃ. 

 

ᐃᓚᒋᔭᐅᓪᓗᓂ ᓄᓇᕗᑦ ᒐᕙᒪᖓᑕ ᐱᓇᔪᒃᑕᖏᓐᓄᑦ ᓴᐳᔾᔨᓯᔪᒪᓪᓗᑎᒃ ᓄᓇᕗᒻᒥᐅᓂᒃ ᓄᕙᒃᔪᐊᕐᓇᖅ-19−ᒧᑦ, ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᑦ ᐊᑐᓕᖅᑎᑦᑎᕗᑦ ᐅᑯᓂᖓ:

ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ

ᑭᖑᓪᓕᕐᒥ ᑐᓴᒐᒃᓴᐅᓚᐅᖅᑐᓂᒃ ᑕᑯᔪᒪᒍᕕᑦ ᐊᒻᒪ ᐃᑲᔫᑎᒃᓴᓂᒃ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ ᓄᓇᕗᒻᒥ, ᐅᕗᙵᕈᓐᓇᖅᐳᑎᑦ: https://www.gov.nu.ca/health/information/covid-19-novel-coronavirus

ᓄᑖᖑᓛᓂᒃ ᑐᓴᒐᒃᓴᓂᒃ ᐱᔪᒪᒍᕕᑦ ᒫᓐᓇ ᑭᒃᑯᑐᐃᓐᓇᓄᑦ ᖃᓄᐃᙱᑦᑐᓄᑦ ᐊᑐᖅᑕᐅᖁᔭᐅᔪᓂᒃ, ᐅᕗᙵᕐᓗᑎᑦ: https://www.gov.nu.ca/health/information/nunavuts-path

 

ᐊᒡᒋᖅᐸᓪᓕᐊᔪᑦ ᓄᓇᓕᖕᓂ ᑲᐱᓯᓂᐅᓂᐊᖅᑐᑦ

ᐃᓐᓇᒃᑯᕕᖕᒦᑦᑐᑦ ᐃᓗᐊᖅᓴᖅᑕᐅᓃᑦ ᓄᓇᓕᖕᓂ ᑕᐅᑐᒐᖃᓪᓗᐊᑕᕐᓂᐊᖅᐳᑦ ᐃᓗᐊᖅᒪᓴᐃᓗᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ  ᐃᖅᑲᓇᐃᔭᖅᑎᒋᔭᐅᔪᑦ ᐃᓂᓄᐊᖅᐸᒡᓗᑎᒃ ᑲᐱᓯᔭᖅᑐᕐᓗᑎᒃ ᑲᐱᔭᐅᔾᔪᑎᒥᒃ ᐃᓄᖕᓄᑦ. ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᐃᓐᓇᒃᑯᕕᖕᓄᐊᑲᐅᑎᒋᖃᖅᑦᑕᕐᓂᐊᖅᐳᑦ ᑲᐱᓯᓂᐊᕐᓂᕐᒧᑦ ᖃᖓᒃᑰᕋᔭᕐᓂᖏᓐᓄᑦ ᐅᓪᓗᐃᓐᓄᓪᓗ.

ᐃᖃᓗᖕᓂ ᐃᓐᓇᒃᑯᕕᒃ

  • ᓇᓂ: ᐃᓇᒃᑯᕕᖕᒥ.
  • ᐅᓪᓗᐊ (ᓯᕗᓪᓕᖅ ᑲᐱᔭᐅᓂᖅ) ᔭᓄᐊᕆ 6
  • ᐅᓪᓗᐊ (ᐊᐃᑉᐸᖓ ᑲᐱᔭᐅᓂᖅ) ᕕᕗᐊᕆ 3.

ᐃᒡᓗᓕᖕᒥ ᑭᒃᑯᑐᐃᓐᓇᓂᒃ ᑲᐱᓯᓂᖅ

  • ᓇᓂ:  ᐃᒡᓗᓕᑦ ᖁᑦᑎᖕᓂᖅᓴᓄᑦ ᐃᓕᓐᓂᐊᕐᕕᒃ.
  • ᐅᓪᓗᐊ (ᓯᕗᓪᓕᖅ ᑲᐱᔭᐅᓂᖅ) ᔮᓄᐊᕆ 11 ᐊᒻᒪᓗ 12. 
  • ᐅᓪᓗᐊ (ᐊᐃᑉᐸᖓ ᑲᐱᔭᐅᓂᖅ) ᕕᕗᐊᕆ 8−9. 
  • ᓇᒧᙵᖅᑎᓪᓗᒍ: 8:00ᒥᑦ ᐅᓪᓛᒃᑯᑦ 9:30ᒧᑦ ᐅᓐᓄᒃᓴᒧᑦ
  • ᐃᓗᐊᖅᓴᖅᑕᐅᓂᕐᒧᑦ ᖃᓄᐃᑦᑑᓂᖓ; ᐃᓂᒃᓴᓕᐅᕐᓗᓂ
  • ᐅᖃᓗᒡᓗᑎᑦ 867-934-2100−ᒧᑦ

ᐅᖅᓱᖅᑑᕐᒥ ᑭᒃᑯᑐᐃᓐᓇᓂᒃ ᑲᐱᓯᓂᖅ

  • ᓇᓂ: ᕿᕿᖅᑕᖅ ᖁᑦᑎᖕᓂᖅᓴᓄᑦ ᐃᓕᓐᓂᐊᕐᕕᒃ. 
  • ᐅᓪᓗᐊ (ᓯᕗᓪᓕᖅ ᑲᐱᔭᐅᓂᖅ) ᔮᓄᐊᕆ 11 ᐊᒻᒪᓗ 12.
  • ᐅᓪᓗᐊ (ᐊᐃᑉᐸᖓ ᑲᐱᔭᐅᓂᖅ) ᕕᕗᐊᕆ 8−9.
  • ᓇᒧᙵᖅᑎᓪᓗᒍ: 8:00ᒥᑦ ᐅᓪᓛᒃᑯᑦ 9:30ᒧᑦ ᐅᓐᓄᒃᓴᒧᑦ
  • ᐃᓗᐊᖅᓴᖅᑕᐅᓂᕐᒧᑦ ᖃᓄᐃᑦᑑᓂᖓ; ᐃᓂᒃᓴᓕᐅᕐᓗᓂ
  • ᐅᖃᓗᒡᓗᑎᑦ 867-360-7441−ᒧᑦ

ᐊᕐᕕᐊᕐᒥ ᑭᒃᑯᑐᐃᓐᓇᓂᒃ ᑲᐱᓯᓂᖅ

  • ᓇᓂ: ᕿᑎᖅᖠᖅ ᐃᓕᓐᓂᐊᕐᕕᒃ.
  • ᐅᓪᓗᐊ (ᓯᕗᓪᓕᖅ ᑲᐱᔭᐅᓂᖅ) ᔭᓄᐊᕆ 14−ᒥᑦ 18−ᒧᑦ (ᑭᑭᑕᐅᓗᓂ ᓴᓇᑦᑕᐃᓕ). 
  • ᐅᓪᓗᐊ (ᐊᐃᑉᐸᖓ ᑲᐱᔭᐅᓂᖅ) ᕕᕗᐊᕆ 11-15.
  • ᓇᒧᙵᖅᑎᓪᓗᒍ: 8:30 ᐅᓪᓛᒃᑯᑦ – 9 ᐅᓐᓄᒃᓴᒧᑦ
  • ᐃᓗᐊᖅᓴᖅᑕᐅᓂᕐᒧᑦ ᖃᓄᐃᑦᑑᓂᖓ; ᐃᓂᒃᓴᓕᐅᕐᓗᓂ
  • ᐅᖃᓗᒡᓗᑎᑦ 867-850-3100−ᒧᑦ

ᐃᖃᓗᒃᑑᑦᑎᐊᒥ ᑭᒃᑯᑐᐃᓇᓂᒃ ᑲᐱᓯᓂᖅ

  • ᓇᓃᓐᓂᖏᑦ ᓇᓗᓇᐃᖅᑕᐅᓇᔭᖅᑐᑦ
  • ᐅᓪᓗᐊ (ᓯᕗᓪᓕᖅ ᑲᐱᔭᐅᓂᖅ) ᔭᓄᐊᕆ 14−ᒥᑦ 16−ᒧᑦ (ᑖᒃᑯᓇᓂ ᐅᓪᓘᖕᓂ)
  • ᐅᓪᓗᐊ (ᐊᐃᑉᐸᖓ ᑲᐱᔭᐅᓂᖅ) ᕕᕗᐊᕆ 11-13.
  • ᓇᒧᙵᖅᑎᓪᓗᒍ: 8:30 ᐅᓪᓛᒃᑯᑦ – 9 ᐅᓐᓄᒃᓴᒧᑦ
  • ᐃᓗᐊᖅᓴᖅᑕᐅᓂᕐᒧᑦ ᖃᓄᐃᑦᑑᓂᖓ; ᐃᓂᒃᓴᓕᐅᕐᓗᓂ
  • ᐅᖃᓗᒡᕕᒃᓴᖅ 867-983-4500.

 

ᓄᕙᒡᔪᐊᕐᓇᖅ-19−ᖃᖅᑐᑦ ᖃᓄᐃᓕᖓᓂᖏᑦ:  ᔮᓄᐊᕆ 5

ᑲᑎᖦᖢᒋᑦ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂᒃ ᑲᑎᖦᖢᒋᑦ ᐆᒪᔪᒥᒃ ᐱᖃᕐᓂᖏᑦ ᑲᑎᖦᖢᒋᑦ ᐊᓂᒍᐃᓯᒪᔪᑦ ᑐᖁᔪᑦ ᑲᑎᖦᖢᒋᑦ ᐃᓄᐃᑦ ᒪᓕᒃᑕᐅᔪᑦ ᒫᓐᓇ ᐃᓄᐃᑦ ᖃᐅᔨᓴᖅᑕᐅᔪᑦ
266 0 265 1 5738 431

ᓄᕙᕐᔪᐊᕐᓇᖅ-19−ᒧᑦ ᓄᓇᓕᖕᓂ ᐱᓕᖕᓂ ᑭᒡᓕᓯᓂᐊᖅᑕᐅᓯᒪᔪᑦ: ᔮᓄᐊᕆ 5

ᓄᓇᓕᒃ ᐃᑉᐸᒃᓴᖅ ᓇᓗᓇᐃᖅᑕᐅᓚᐅᖅᑐᑦ ᓄᕙᒡᔪᐊᕐᓇᖅ-19 −ᖃᕐᓂᖏᓐᓂᒃ   ᐅᓪᓗᒥ ᓇᓗᓇᐃᖅᑕᐅᔪᑦ ᓄᕙᒡᔪᐊᕐᓇᖅ-19 −ᖃᕐᓂᖏᓐᓂᒃ ᐊᓯᔾᔨᕐᓂᕆᔭᖓ ᐱᑕᖃᓪᓚᑦᑖᕐᓂᕋᖅᑕᐅᓯᒪᔪᓂᑦ ᓈᓴᖅᑕᐅᓯᒪᓂᖏᑦ (+/-) ᐃᑉᐸᒃᓴᖓᓂᑦ ᑐᖁᔪᑦ ᑲᑎᖦᖢᒋᑦ ᐊᓂᒍᐃᓯᒪᔪᑦ ᑲᑎᖦᖢᒋᑦ ᐆᒪᔪᒥᒃ ᐱᖃᕐᓂᖏᑦ
ᐊᕐᕕᐊᑦ 222 222 0 1 221 0
ᑎᑭᕋᕐᔪᐊᖅ 23 23 0 0 23 0
ᑲᖏᖅᖠᓂᖅ 19 19 0 0 19 0
ᓴᓂᑭᓗᐊᖅ  2 2 0 0 2 0
ᑲᑎᖦᖢᒋᑦ  266 266 0 1 265 0

ᖃᐅᔨᓴᕐᓂᒧᑦ ᑭᒡᓕᓯᓂᐊᖅᑕᐅᓯᒪᔪᑦ ᒫᓐᓇᒧᑦ ᑎᑭᖦᖢᒍ: ᔮᓄᐊᕆ 5

ᓄᓇᓕᒃ  ᖃᐅᔨᓴᖅᑕᐅᒐᒥ ᐱᖃᓪᓚᕆᖕᓂᕋᖅᑕᐅᕗᖅ ᖃᐅᔨᓴᖅᑕᐅᒐᒥ ᐱᖃᙱᓐᓂᕋᕐᑕᐅᕗᖅ
ᐊᕐᕕᐊᑦ  222 1450
ᑎᑭᕋᕐᔪᐊᖅ  23 266
ᑲᖏᖅᖠᓂᖅ 19 390
ᓴᓂᑭᓗᐊᖅ  2 202
ᑲᑎᖦᖢᒋᑦ  266 2308

ᐃᓄᑐᐊᒃᑯᕕᖕᒦᑦᑐᑦ ᐃᓄᐃᑦ:

ᐊᐅᓪᓚᕈᑎᒋᔭᐅᓯᒪᔪᑦ

ᑐᔪᕐᒥᕕᖕᒦᑦᑐᑦ ᐊᓂᑦᑕᐃᓕᑎᑕᐅᔪᑦ ᔮᓄᐊᕆ 4−ᒥ ᐱᒋᐊᖅᖢᓂ

ᐋᓐᓂᐊᕐᕕᓕᐊᖅᑐᑦ

157

ᑭᒃᑯᑐᐃᓐᓇᑦ

281
ᑐᐊᕕᖅᑐᒃᑯᑦ ᐋᓐᓂᐊᕕᓕᐊᖅᑐᓄᑦ ᐊᐅᓪᓚᖅᑐᓄᑦ ᐃᓄᑑᔭᕆᐊᖃᕐᓂᕐᓗ 9
Construction 34

ᑲᑎᖢᒋᑦ

481

ᐊᐅᓪᓚᖅᐸᒃᑐᑦ ᐅᑎᖅᑎᑕᐅᓯᒪᓕᖅᑐᑦ ᖃᓄᐃᓕᖓᓂᖏᑦ:

ᐅᓪᓗᖅ ᐊᐅᓪᓚᕐᕕᒃᓴᖓ

ᖃᔅᓯᐅᓂᖏᑦ ᐊᐅᓪᓚᕐᓂᐊᖅᑐᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᐸᒃᑕᐅᑦᑕᐃᓕᕕᖕᓂᒃ

ᔭᓐᓄᐊᓕ 5 

12

ᔭᓐᓄᐊᓕ 6 

39

ᔭᓐᓄᐊᓕ 7 

54

ᔭᓐᓄᐊᓕ 8

10

ᔭᓐᓄᐊᓕ 9 

3

ᑲᑎᖢᒋᑦ

118

ᐃᖅᑲᓇᐃᔭᕆᐊᖃᓪᓚᕆᒃᑐᓂᒃ ᑐᒃᓯᕋᐅᑏᑦ:

ᑎᓯᐱᕆ 5−ᒥ ᐱᒋᐊᖅᖢᓂ, 10623−ᓂᒃ ᑐᒃᓯᕋᖅᑐᖃᓚᐅᖅᐳᖅ, 5075−ᖑᓪᓗᑎᒃ ᐃᖅᑲᓇᐃᔭᕆᐊᖃᓪᓚᕆᒃᑐᓄᑦ ᑐᒃᓯᕋᖅᑕᐅᔪᑦ.

ᑐᒃᓯᕋᖅᑕᐅᓯᒪᔪᑦ ᖃᓄᐃᓕᖓᓂᖏᑦ

# %

ᐊᖏᖅᑕᐅᓯᒪᔪᑦ (ᐅᑯᐊᖑᕗᑦ ᐱᔭᕆᐊᖃᓪᓚᕆᒃᑐᑦ ᐊᒻᒪ ᐱᔭᕆᐊᖃᓪᓚᕆᙱᑦᑐᑦ)

7138 67%

ᐊᖏᖅᑕᐅᙱᑦᑐᑦ

294 2.8%
ᐅᑕᖅᑭᔪᑦ 294 2.8%

ᐊᐅᓪᓚᕐᕕᐅᒐᔪᒃᑐᓄᑦ ᐊᖏᖅᑕᐅᔪᑦ

2896 30%
ᑲᑎᖢᒋᑦ 10622 100%

 

ᐃᓕᓐᓂᐊᕐᓂᓕᕆᔨᒃᑯᓐᓄᑦ ᐱᔨᑦᑎᕋᐅᑎᖏᑦ

ᐃᓕᓐᓂᐊᕐᕕᓕᒫᑦ

ᓇᒡᒐᔾᔭᒥᑦ, ᔭᓄᐊᕆ 4, 2021−ᒥᑦ, ᐃᓕᓐᓂᐊᕐᕖᑦ ᓄᓇᓕᖕᓂ ᑎᑎᕋᖅᑕᐅᓯᒪᔪᓂ ᐊᑖᓂ ᓅᓐᓂᐊᖅᐳᑦ ᐅᑯᓄᖓ ᐊᑐᖅᑕᐅᓂᖏᓕᖅᑐᓄᑦ.

  • ᑎᑭᕋᕐᔪᐊᖅ −ᐊᑐᖅᑕᐅᔪᖅ 4
  • ᑲᖏᖅᖠᓂᖅ − ᐊᑐᖅᑕᐅᔪᖅ 2.

ᐊᕐᕕᐊᕐᒥ ᐃᓕᓐᓂᐊᕐᕖᑦ ᑲᔪᓰᓐᓴᕐᓂᐊᖅᐳᖅ ᐊᑐᖅᑕᐅᔪᒥ 4−ᒥ ᐊᑐᕆᐊᓕᒃ 2 − ᐊᓯᓕᒫᖏᑦ ᐃᓕᓐᓂᐊᕐᕖᑦ ᓄᓇᕗᒻᒥ

ᓄᑖᙳᕆᐊᖅᓯᒪᔪᓂᒃ ᓄᓇᓕᖕᒥᐅᑦ ᖃᓄᐃᓕᕙᓪᓕᐊᓂᖏᓐᓄᑦ ᑕᑯᒃᓴᕈᖅᑎᑕᐅᓂᐊᖅᐳᑦ ᐃᓕᓐᓂᐊᕐᓂᓕᕆᔨᒃᑯᑦ ᐃᑭᐊᖅᑭᕕᖓᓂ ᐅᕙᓂ: https://gov.nu.ca/education/information/2020-21-opening-plan-nunavut-sch...

ᐊᑐᖅᑕᐅᔪᖅ 4 - ᑎᑭᕋᕐᔪᐊᖅ

  • ᓇᒑᔾᔭᒥᑦ, ᔭᓄᐊᕆ 4, 2021−ᒥᑦ, ᐃᓄᒡᓚᒃ ᐃᓕᓐᓂᐊᕐᕕᒃ ᐊᑐᓕᕐᓂᐊᖅᐳᖅ ᐊᑐᖅᑕᐅᔭᐊᕆᐊᓕᖕᒥᒃ 4−ᒥᒃ ᐱᓕᕆᐊᖃᕐᓂᕐᒧᑦ ᐱᕙᒌᔭᐅᒻᒥᒃ.
  • ᐃᓗᒡᓚᒃ ᐃᓕᓐᓂᐊᕐᕕᒃ ᑎᑭᕋᕐᔪᐊᕐᒥ ᒪᑐᓯᒪᐃᓐᓴᕐᓂᐊᖅᐳᖅ ᑭᒥᐊᕝᓯᐊᓂ ᐅᖃᐅᓯᒃᑲᓐᓂᖅᐸᑦ ᑕᐃᔅᓱᒪᙵ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖕᒥᑦ.
  • ᑕᒪᕐᒥᑦᑎᐊᖅ ᐊᔪᕈᓐᒡᓂᖅᓴᕐᓂᕆᔭᐅᔪᖅ ᑎᑭᕋᕐᔪᐊᕐᒥ ᑲᔪᓯᑎᑕᐅᓂᐊᖅᐳᖅ ᐅᐸᒃᓯᒪᙱᒃᑲᓗᐊᕐᓗᒍ.
  • ᐃᓕᓴᐃᔩᑦ ᐃᓕᓐᓂᐊᕐᕕᖕᒥᓗ ᐃᖅᑲᓇᐃᔭᖅᑏᑦ ᖃᐅᔨᒋᐊᓛᖅᐳᑦ ᐃᓕᓐᓂᐊᖅᑎᓄᑦ ᐃᓚᖏᓐᓄᓪᓗ ᐊᔪᕐᓇᕈᓐᓃᑐᐊᖅᐸᑦ.

ᐊᑐᖅᑕᐅᔪᖅ 2, ᑲᖏᖅᖠᓂᕐᒥ

  • ᓇᒡᒐᔾᔭᒥᑦ, ᔭᓄᐊᕆ 4, 2021−ᒥᑦ ᓄᖃᖅᖠᕐᓄᑦ ᐃᓕᓐᓂᐊᕐᕖᑦ ᑲᖏᖅᖠᓂᕐᒥ ᓴᕝᒪᑐᐃᖅᓯᒪᓂᐊᖅᐳᑦ ᐅᓪᓗᓕᒫᓄᑦ, ᑕᓪᓕᒪᓄᑦ ᐅᓪᓗᓄᑦ ᐱᓇᓱᐊᕈᓯᕐᒥ.
  • ᓇᒡᒐᔾᔭᒥ ᐱᒋᐊᕐᓗᒍ, ᐊᑯᓪᓕᕐᒥ ᖁᑦᑎᖕᓂᖅᓴᒥᓪᓗ ᐃᓕᓐᓂᐊᕐᕕᖏᓐᓂ ᐃᓕᓐᓂᐊᖅᑎᑦ ᑲᖏᖅᖠᓂᕐᒥ ᐃᓕᓐᓂᐊᕐᕕᐅᑉ ᐃᓗᐊᓂ ᐊᒻᒪ ᖃᕆᓴᐅᔭᒃᑯᑦ ᐃᓕᓐᓂᐊᖅᑎᑕᐅᑲᑕᖕᓂᐊᖅᐳᑦ. ᐃᓕᓐᓂᐊᖅᑎᑦ ᐃᓕᓐᓂᐊᕐᕕᖕᒦᖃᑦᑕᕐᓂᐊᖅᑐᑦ ᐅᓪᓗᓂᑦ ᒪᕐᕉᖕᓂᒃ ᐱᖓᓱᓄᑦ ᑎᑭᓪᓗᒍ ᐱᓇᓱᐊᕈᓯᕐᒥ. ᐋᖅᑭᒃᑕᐅᓯᒪᔪᑦ ᐃᓕᓐᓂᐊᖅᑕᐅᔪᒃᓴᑦ ᐃᓱᒪᓕᐊᖑᖃᑦᑕᕐᓂᐊᖅᐳᑦ ᖃᐅᑕᒫᑦ ᐃᓕᓐᓂᐊᕐᕕᖕᒥ ᐊᑐᕆᐊᓕᒃ 2 ᐱᓕᕆᐊᖑᔪᒃᓴᑦ ᐸᕐᓇᐅᑎᒥᒃ.

ᐃᓕᓐᓂᐊᕆᐅᖅᓴᔪᑦ ᐸᐃᕆᕕᓪᓗ

  • ᑎᑭᕋᕐᔪᐊᕐᒥ ᐊᕐᕕᐊᕐᒥᓗ, ᐸᐃᕆᕝᕖᑦ ᒪᑐᓯᒪᐃᓐᓇᖁᔭᐅᕗᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖕᒧᑦ.
  • ᒪᓕᒃᖢᒍ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑕ ᐅᖃᐅᓯᖏᑦ, ᐸᐃᕆᕕᓕᒫᑦ ᐃᖃᓗᖕᓂ ᒪᒃᐱᖅᓯᒪᐃᓐᓇᕈᓐᓇᖅᑐᑦ ᒪᓕᒡᓗᑎᒃ ᒫᓐᓇ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒻᒪ ᐊᑦᑕᕐᓇᖅᑕᐃᓕᒪᔪᓕᕆᔨᒃᑯᑦ ᑐᑭᒧᐊᒍᑎᖏᓐᓂᒃ ᐊᒻᒪ ᐆᒃᑐᖅᑕᐅᖁᔭᖏᓐᓂᒃ.

 

 

ᓄᓇᕗᒻᒥᐅᑦ ᖃᓄᐃᙱᑦᑎᐊᖅᐸᖕᓂᖏᑦ ᑕᒪᑦᑕᑦᑎᐊᖅ ᑲᑐᔾᔨᓪᓗᑕ ᑲᒪᒋᔭᒃᓴᕆᕙᕗᑦ! ᐳᐃᒍᖅᑕᐃᓕᒋᑦ: ᐊᒡᒐᑎᑦ ᐋᓪᓕᕋᐃᓪᓗ ᐅᐊᓴᖃᑦᑕᕐᓗᒋᑦ, ᖃᓂᒌᓗᐊᖅᑕᐃᓕᕙᒡᓗᓯ, ᐃᖢᐊᖅᓴᐃᔨᓄᑦ ᐅᖃᐅᔾᔪᐃᔾᔪᑕᐅᔪᓂᑦ ᓈᓚᒃᐸᒡᓗᓯ, ᐊᖏᕐᕋᖅᓯᒪᐃᓐᓇᕐᓗᑕᓗ ᖃᓂᒪᒍᑦᑕ.