ᓄᓇᕗᒻᒥᐅᑦ ᑎᓕᐅᖅᑕᐅᕗᑦ ᐃᓕᓴᖅᓯᖁᔭᐅᓪᓗᑎᒃ ᐊᕐᕌᒍᓄᑦ ᓇᓕᒧᒌᙱᓐᓂᕐᒧᑦ ᐅᓪᓗᕆᔭᐅᔪᒥᒃ

ᔫᓂ 1, 2018

ᐃᖃᓗᐃᑦ, ᓄᓇᕗᑦ – ᒥᓂᔅᑕᐅᑎᓪᓗᓂ ᑲᒪᒋᔭᒃᓴᖃᖅᑎᑕᐅᓪᓗᓂ ᐃᓐᓇᕐᓄᑦ ᑭᒡᒐᖅᑐᐃᔨᐅᓪᓗᓂ, ᓯᕗᓕᖅᑎ ᐹᓪ ᖁᐊᓴ ᑎᓕᐅᕆᕗᖅ ᓄᓇᕗᒻᒥᐅᓕᒫᓂᒃ ᖃᐅᔨᒋᐊᕐᕕᖃᖁᓪᓗᒋᑦ ᐃᓄᖕᒧᑦ ᐊᕐᕌᒍᖃᑎᒋᙱᑕᒥᓄᑦ ᐅᓪᓗᒥ, ᑕᒪᓐᓇ ᐊᑐᕐᓗᒍ ᐃᓕᓴᖅᓯᓂᕐᒧᑦ ᐊᕐᕋᒍᓄᑦ ᓇᓕᒧᒌᙱᓐᓂᕐᒧᑦ ᐅᓪᓗᕆᔭᐅᔪᒥᒃ ᑲᓇᑕᒥ.

ᐊᕐᕌᒍᓄᑦ ᓇᓕᒧᒌᙱᓐᓂᕐᒧᑦ ᐅᓪᓗᕆᔭᐅᔪᖅ ᐃᓕᓴᖅᓯᕗᖅ ᐱᒻᒪᕆᐅᓂᖓᓂᒃ ᐊᑕᓂᖃᖅᑎᑦᑎᓕᕐᓂᐊᕐᓗᓂ ᐅᑯᓄᖓ, ᐃᓐᓇᓪᓚᕆᖕᓄᒃ, ᐃᓐᓇᕐᓄᑦ ᒪᒃᑯᒃᑐᓄᓪᓗ ᐊᒥᖅᑳᖃᑎᒌᖕᓂᐊᕐᓗᑎᒃ ᖃᐅᔨᒪᓂᕆᔭᐅᔪᓂᒃ ᐊᑐᖅᑕᐅᖃᑦᑕᖅᓯᒪᔪᓂᒡᓗ, ᒥᑭᒡᓕᒋᐊᖅᑎᑦᑎᓗᓂ ᐃᓐᓇᐅᓂᖅᓴᐃᑦ ᐃᓄᑑᑎᑕᐅᕙᖕᓂᖏᓐᓄᑦ, ᑲᔪᓯᑎᑦᑎᓗᑎᒡᓗ ᑐᑭᓯᐅᒪᓂᕐᒥᒃ ᐃᒃᐱᒋᒋᔭᖃᑦᑎᐊᕈᓐᓇᕐᓂᕐᒥᒃ ᐃᓚᐅᑎᑦᑎᕙᖕᓂᕐᒥᒃ ᑲᒪᒋᔭᐅᕙᖕᓂᖏᓐᓄᓪᓗ ᑕᒪᒃᑯᐊ ᐊᕐᕌᒍᖃᑎᒌᙱᑦᑐᑦ.

"ᐃᓄᐃᑦ ᐃᓕᖅᑯᓯᕆᕙᒃᑕᖏᑦ ᐱᔾᔪᑎᖃᓪᓚᕇᓐᓇᐅᔭᖅᐸᒃᐳᑦ ᓴᙱᔪᓂᒃ ᐊᒃᑐᐊᑦᑎᐊᖅᐸᖕᓂᖏᓐᓂᒃ ᒪᒃᑯᒃᑐᑦ, ᐃᓐᓇᐃᑦ ᐃᓐᓇᓪᓚᕇᓪᓗ. ᐃᓐᓇᓪᓚᕇᑦ ᖃᐅᔨᒪᓂᖃᑦᑎᐊᖅᑐᒻᒪᕆᐅᕗᑦ, ᐊᔪᙱᓐᓂᖃᑦᑎᐊᖅᖢᑎᒃ ᐱᓕᕆᖃᑦᑕᖅᓯᒪᓂᑰᓪᓗᑎᒡᓗ ᑕᒪᒃᑯᐊᓗ ᐅᕙᑦᑎᓐᓄᐊᖅᐸᓪᓕᐊᔪᓐᓴᖅᖢᓂᔾᔪᒃ ᐃᑲᔪᕈᒪᓂᕐᒧᑦ ᐃᖅᑲᐅᒪᔭᖃᕐᓂᕐᒥᒃ ᑭᖑᓂᑦᑎᓐᓂᒃ, ᑕᓯᐅᖅᓯᓗᑎᒃ ᒫᓐᓇ ᐃᓅᓯᕆᓕᖅᑕᑦᑎᓐᓂᒃ ᐋᖅᑭᒃᓯᒪᓕᖅᐸᒃᑕᑦᑎᓐᓂᒡᓗ, ᖃᓄᐃᓕᖓᓕᖅᑎᑦᑎᕙᒃᖢᑎᒡᓗ ᓯᕗᓂᒃᓴᑦᑎᓐᓂᒃ," ᑕᐃᒪᓐᓇ ᓯᕗᓕᖅᑎ ᖁᐊᓴ ᐊᖃᖅᖢᓂ. "ᐱᒻᒪᕆᐅᕗᖅ ᑎᓕᐅᕆᔾᔪᑎᖃᕈᑦᑕ ᑕᒪᒃᑯᓄᖓ ᐊᑕᖃᑦᑕᐅᑎᓂᐅᓇᔭᖅᑐᓄᑦ ,ᑕᒪᒃᑯᐊ ᐃᓄᐃᑦ ᖃᐅᔨᒪᔭᑐᖃᖏᑦ ᐃᓅᖃᑎᒌᒃᐸᖕᓂᕐᒧᓪᓗ ᐊᓐᓂᕆᔭᖏᑦ ᑲᔪᓯᑦᑎᐊᙱᓐᓇᖁᓪᓗᒋᑦ ᑐᓴᐅᒪᑎᑦᑎᓗᑎᒡᓗ ᖃᓄᖅ ᐊᑐᓕᖅᓯᕙᖕᒪᖔᑕ ᖃᐅᑕᒫᑦ ᐃᓅᓯᕆᕙᒃᑕᑦᑎᓐᓂ,"

100 ᐅᖓᑖᓃᑦᑐᑦ ᓄᓇᓕᐸᐅᔭᐃᑦ ᑕᒪᕐᒥᑲᓴᒡᓗ ᐊᕕᒃᓯᒪᓂᕆᔭᐅᔪᑦ ᐅᑭᐅᖅᑕᖅᑐᒥᓗ ᐊᕕᒃᓯᒪᓃᑦ ᐃᓕᓴᖅᓯᕗᑦ ᔫᓂ 1 ᐊᕐᕌᒍᖃᑎᒌᙱᓐᓂᕐᒧᑦ ᐅᓪᓗᕆᔭᐅᔪᒥᒃ ᑲᓇᑕᒥ.

"ᑎᓕᐅᖅᐸᒃᑲ ᓄᓇᕗᒻᒥᐅᓕᒫᑦ ᑲᔪᓯᑎᑦᑎᖁᓪᓗᒋᑦ ᓄᑖᒥᒃ ᐊᑕᖃᑎᖃᕐᓂᐅᓂᐊᖅᑐᒥᒃ ᐃᓄᖕᒧᑦ ᐊᖓᔪᒋᔭᒥᓄᑦ ᓄᑲᕆᔭᕐᒥᓄᓪᓘᓐᓃᑦ ᓄᓇᒋᔭᒥᓂ ᐃᓕᓴᖅᓯᔪᒪᓂᕐᒧᑦ ᐊᕐᕌᒍᖃᑎᒌᙱᑦᑐᓄᑦ ᐅᓪᓗᕆᔭᐅᔪᒥᒃ. ᐃᒪᓐᓇ ᐊᔪᕐᓇᙱᑎᒋᕗᖅᑕᒪᓐᓇ, ᐅᖃᖃᑎᖃᕐᓗᓂ ᑏᑐᖃᑎᒋᓗᒍ, ᐅᓂᒃᑳᖃᑎᒋᓗᒍ ᐃᑲᔪᕐᓗᒍᓘᓐᓃᑦ," ᑕᐃᒪᓐᓇ ᓯᕗᓕᖅᑎ ᖁᐊᓴ ᐃᓚᓯᓪᓗᓂ.

###

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:

ᕼᐃᓗᕆ ᑲᐃᓯ
ᐱᕙᓪᓕᐊᔪᓄᑦ ᑎᑎᕋᖅᑎ
ᓯᕗᓕᖅᑎ ᐹᓪ ᖁᐊᓴᐅᑉ ᑎᑎᕋᕐᕕᐊ
867-975-5059
hcasey@gov.nu.ca