ᓯᕗᓕᖅᑎ ᓴᕕᑲᑖᖅ ᐃᓕᓴᖅᓯᕗᖅ ᑲᓇᑕᒥ ᐅᓪᓗᖃᖅᑎᓪᓗᒋᑦ ᐃᖅᑲᐅᒪᓐᓇᒥ ᐊᒻᒪ ᖃᓄᖅᑑᕐᓂᕐᒧᑦ ᐊᕐᓇᐃᑦ ᐋᓐᓂᖅᓯᖅᑕᐅᕙᒃᑐᑦ ᐱᔾᔪᑎᒋᓪᓗᒋᑦ

ᑎᓯᐱᕆ 6, 2018

ᓯᕗᓕᖅᑎ ᔫ ᓴᕕᑲᑖᖅ ᐅᓪᓗᒥ ᓴᖅᑭᑦᑎᖅᑲᐅᕗᖅ ᐅᑯᓂᖓ ᑎᑎᕋᖅᓯᒪᔪᓂᒃ: 

“ᐅᓪᓗᒥ, ᑲᓇᑕᒥ ᐅᓪᓗᖃᖅᑎᓪᓗᒋᑦ ᐃᖅᑲᐅᒪᓐᓇᒥ ᐊᒻᒪ ᖃᓄᖅᑑᕐᓂᕐᒧᑦ ᐊᕐᓇᐃᑦ ᐋᓐᓂᖅᓯᖅᑕᐅᕙᒃᑐᑦ ᐱᔾᔪᑎᒋᓪᓗᒋᑦ, 14−ᖑᔪᑦ ᐊᕐᓇᐃᑦ ᒪᑦᑐᓕᐊᒥ ᐃᓄᐊᖅᑕᐅᓚᐅᖅᓯᒪᔪᑦ ᐃᖅᑲᐅᒪᕙᕗᑦ ᑖᓐᓇ ᐅᓪᓘᑎᓪᓗᒍ 1989-ᒥᑦ, ᐊᒻᒪ ᓈᓴᒐᒃᓴᐅᙱᑦᑐᑦ ᐊᓯᖏᑦ ᓵᓚᒋᔭᐅᓗᐊᖃᑦᑕᖅᓯᒪᔪᑦ, ᐋᓐᓂᖅᓯᖅᑕᐅᕙᒃᑐᑦ ᐅᕝᕙᓘᓐᓃᑦ ᑐᖁᑕᐅᕙᒃᑐᑦ ᐋᓐᓂᖅᓯᕆᔭᕆᐊᖃᙱᑦᑎᐊᖅᑐᓂᒃ ᐋᓐᓂᖅᓯᖅᑕᐅᔪᓄᑦ. 

ᕿᒃᓵᖃᑎᒋᕙᔅᓯ ᐊᒻᒪ ᓂᕆᐅᒃᐳᖓ ᐊᕐᓇᓕᒫᑦᑎᐊᑦ ᓄᓇᕗᒻᒥ, ᑲᓇᑕᒥ ᐊᒻᒪ ᓄᓇᕐᔪᐊᓕᒫᒥ ᐅᓪᓗᖃᓕᓛᕐᓂᖏᓐᓂᒃ ᐊᑦᑕᕐᓇᙱᑦᑐᒦᓪᓗᑎᒃ ᐊᒻᒪ ᑲᒪᒋᔭᐅᑦᑎᐊᕐᓗᑎᒃ ᓲᕐᓗ ᐊᖑᑎᑎᑐᑦ. ᐃᖅᑲᐅᒪᔭᕗᑦ, ᐊᒻᒪ ᐊᓯᔾᔩᔪᒪᓪᓚᑦᑖᖅᐳᒍᑦ ᑕᒪᑐᒥᖓ ᑲᑉᐱᐊᓇᖅᑐᒻᒪᕆᐊᓗᖕᒥᑦ ᐊᑐᖅᑕᐅᓪᓚᑦᑖᖃᑦᑕᖅᑐᒥᑦ. 

ᐱᔪᓐᓇᕐᓂᖃᕐᕕᐅᔪᒥᑦ ᐃᓚᒌᑦ ᐋᓐᓂᖅᓯᖅᑕᐅᕙᒃᑐᑦ 11-ᖏᖅᓱᖅᖢᓂ ᖁᑦᑎᖕᓂᖅᓴᐅᕗᑦ ᐊᓯᖏᓐᓂᒃ ᑲᓇᑕᒦᑦᑐᓂᒃ, ᓄᓇᕗᒻᒥ ᐅᓄᖅᑐᑦ ᖃᑕᙳᑎᒌᑦ ᐊᒃᑐᖅᑕᐅᓯᒪᕗᑦ ᐋᓐᓂᖅᓯᕆᓂᕐᒧᑦ ᐊᒻᒪ ᓱᕋᐃᓪᓚᕆᖃᑦᑕᖅᖢᓂ. ᐱᒻᒪᕆᐊᓘᕗᖅ ᐊᖑᑏᑦ ᓄᑲᑉᐱᐊᓪᓗ, ᐊᒻᒪ ᓄᓇᕗᒻᒥᐅᓕᒫᑦ, ᐃᓕᓐᓂᐊᖅᑎᑕᐅᕙᒡᓗᑎᒃ ᐃᓅᖃᑎᒌᑦᑎᐊᖅᐸᓪᓕᐊᓂᕐᒥᒃ, ᐊᑦᑕᕐᓇᙱᓪᓗᑎᒃ ᐊᒻᒪ ᐃᒃᐱᒍᓱᑦᑎᐊᕐᓗᑎᒃ ᐃᓅᖃᑎᖃᕈᓐᓇᕐᓂᕐᒥᒃ, ᐊᕐᓇᐃᑦ ᓂᕕᐊᖅᓵᓪᓗ ᐋᓐᓂᖅᓯᖅᑕᐅᕙᒃᑐᑦ ᐅᓄᕈᓐᓃᖅᐹᓪᓕᖁᓪᓗᒋᑦ.

ᐱᓕᕆᖃᑎᒌᓚᐅᖅᑕ ᖃᑕᙳᑎᕗᑦ ᐊᒻᒪ ᓄᓇᖅᑲᑎᕗᑦ ᐃᓕᓐᓂᐊᑎᓪᓗᒋᑦ ᐊᖏᕐᓂᕐᒥᑦ, ᐃᒃᐱᒍᓱᑦᑎᐊᕐᓂᕐᒥᑦ ᐊᒻᒪ ᑭᒡᓕᒋᔭᖏᓐᓂᒃ. ᕿᑐᕐᙵᕗᑦ ᐅᖃᐅᑎᔭᕆᐊᖃᓚᐅᖅᓯᒪᔾᔮᙱᓐᓇᑦᑎᒍᑦ  ᖃᓄᐃᓕᐅᖅᑐᖃᕐᓂᕌᖓᑦ ᐊᑐᖅᑕᐅᓚᐅᖅᓯᒪᔪᑎᑐᑦ ᐊᕐᕌᒍᑦ 29 ᐊᓂᒍᖅᓯᒪᓕᖅᑐᓂᑦ.”  

### 

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ: 
ᑲᐃᑦ ᒪᒡᓚᐅᑦ 
ᐱᕙᓪᓕᐊᔪᓄᑦ ᑎᑎᕋᖅᑎ 
ᓯᕗᓕᖅᑎᐅᑉ ᔫ ᓴᕕᑲᑖᖅ ᑎᑎᕋᕐᕕᐊᓂᑦ 
867-975-5059
cmacleod@gov.nu.ca