Nunami Hivuliqtiuyut katittut Ottawa-mi ikayurnahugittugu Ukiuqtaqtuq

Qiqaiyarluarviani 4, 2018

OTTAWA, ON (Qiqaiyarluarvia 4, 2018) - Nunavunmi Hivuliqti Paul Quassa, Nunattiami Hivuliqti Bob McLeod unalu Yukon-mi Hivuliqti Sandy Silver katittut Ottawa-mi uumani havainiqmi uqariyumavlugit nunami nakuuyunik piyakhanut aadjikkiiktuni pidjutikhanut hilami aallannguqtirutinut, carbon-mut akikhainut, aulapkaidjutikhanut manikhainut, kanatauplu kavamangata atugakhainut pivalliadjutikhanut ukiuqtaqtumi.

Pingahut hivuliktiuyut ihuaqpiaktumik katimaqatigiyait Kanatap Angayuqqaaqyuanga Justin Trudeau, nakuuyumiklu uqaqatigivlugit ukuat Manikhanut Minista Bill Morneau, Avatingnut Minista Catherine McKenna, Aulapkaidjutikhanut Minista Amarjeet Sohi unalu Crown-Indigenous Relations Ministanga Carolyn Bennett.

Aulapkaidjutikhanut

Hivuliqtiit ilihimayaat taimaa kanataup kavamangapiliktut naunaittunik nakuuyunik nutaanik ikayuutikhanik aulapkaidjutikhanut talvani 2018 maniit ukiunganut atuqtakhanut. Uqaqtangit pilluagakhanut pihimmaaklutik ikayuutikhanut nakuuyuniklu atuqlutik ukununga kanataup kavamanganut aallanullu paanariiktunut ihuaqhilugit ayuqhautit nunallaami, auladjutinut, tuhagakhanut ingilradjutikhanullu aulapkaidjutikhanut akunngani nunani tamainnilu Kanatami. Piiklugit ayuqhautit ikayuutauniaqtuq mikhilaaqlugu akikhait inuuyaami Ukiuqtaqtumiutanut pidjutikhaqariami ihuaqtunik nakuuyuniklu maniliurutikhanut pivikhanillu pivalliadjutikhanut. Ihumaginiaqtait ihuaqtut manikhanut pidjutikhat uqariyauyuqlu katimangmata.

Hilap Aalanguqnigatigut

Kanataup kavamangata piyakhait pivalliadjutikhaanut Ukiuqtaqtumi Hungiutidjutikhanut Qanuriliurutikhanut, naunaikhimayumut talvani Pan-Canadian Framework ukununga NakuuyunutPidjutigivalliadjutikhanut unalu Hilaup Aalannguqtirutinginnun, uqariyauyut pilluagakhanut taimaa pingahut nunat pidjutikhaqarianginni hungiutilutik aallannguqtiliqtumi hilaptingni. Una ilihimayakhauyuq ukiuqtaqtumi taimaa hilaup aallannguqtirutinga piliqtumi.

Carbon Akikhainut

Hivuliqtiit uqariyait carbon-mut akikhait naunaikhugillu aallatqiit pidjutikhat havaliktakhanut ukiuqtaqtumi. Tamaita pingahut nunat unalu kanataup kavamanga havaqatigiiktut taimaa pidjutait carbon-mut akikhainutangivallaangittumik mikivallaangittumiklu pidjutilimaittut nunamiutanut angikliyuumilugu tadja akituvallaamut akiliqtuidjutinut inuuyaami nanminiqaqtunilu havakpakhutik.

Ukiuqtaqtumi Atugakhanut Tunngavikhaa

Hivuliqtiuyut uqaffaaqtangit piyakhariyanut pivalliadjutikhamut atugakhamut tunngavikhaanut ukiuqtaqtumut ihumagilluaqhugit piyumayainut nakuugiyainullu ukiutaqtumiut. Una ilgiyaa aivaktuutikhat havaktakhallu nuutirnirmut angirutikhat. Ikayuutikhaq Ukiuqtaqtumi Atugakhanut Tunngavikhaanut havakpiaktakhainut Kanatap piliuqlutik ihuaqtunik ikayuutikhanik nunani ihuaqtunut tamainnut aviktuqhimayuni naunaikhimaiyunut piyumayamingnut ikayuutikhanullu ihuaqtunut ukiuqtaqtumi maniliurutikhanut, naunaikhimayuni talvani Pan-Territorial Vision Ihuaqtunut Pivalliadjutikhanut anipkarutainut ukiuqtaqtumi hivuliqtinit 2017-mi.

Hivuliqtiit havakhimmaakniaqtut ihuaqhiyuumilugit piyakhat, naunaiyakniaqtaillu havaktauyut tugliani Ukiuqtaqtumi Hivuliqtit Katimayuarutaanut katimakpata Nunavunmi.

"Ukuat katimadjutit uqaqtinniaqtaavut aallangayunik ayuqhautigivaktaptingnik, ayuiqlugit aadjikkiiktut pidjutikhat, atuqlugit hakugiknivut ukiuqtaqtumi taimaa aallangayut piyumayavut ihumagiyavullu tuhaqtauyaanginni kangiqhiyaulutiklu nunakyuami," uqaqtuq Hivuliqti Quassa, katimapkaivluni Ottawa-mi. "Naunaittut ikayuutikhat piyakhariyauyut ukiuqtaqtumi taimaa aadjikkiiliriaptingni tamainnut Kanatami. Havakpiakniaqtugut havaqatigiikhimmaakluta hivuliqtiuvluta akhuurutigilugit ihuatqiyat piyumayait ukiuqtaqtumi ukiuqtaqtumiutauyunullu."

"Piqaqtuq amihunik naunaittunik ayuqhautinik Ukiuqtaqtumut taimaa Kanataup ilihimayakhainut ikayuutigiyakhainullu. Quviagiyakkut ikayuqpiarumangmata havaqatigiluta naunaikhidjutigilugit piyumayaptingnik havaqatigiiikhimmaaklutalu ikayuqatigiikluta," uqaqtuq Hivulitqi McLeod.

"Aliahuktunga ilaulirama havaqatimnut ukiutaqtumi hivuliqtiuyunut Ottawa-mi. Aadjikkiiktunik ihumagiyaqaqtugut uqaqtukhauyugullu kanataup kavamangani ministanut atauhiulugu nipivut. Atuqhimmaaktavut aallangayut pidjutit nunani, pilugit ukuat ukiuqtaqtumi ihumagiyauyut havaqatigiikluta ikayuutauyuq uqarilugit piyumayavit nunakyuami pilugit. Ihuaqpiaktumik katimayugut quyagiyumayatkalu havaqatitka ukiutaqtumi hivuliqtiit uumunga pidjutigiyaptingnut," uqaqtuq Hivuliqti Silver.

-30-

Tuhaqtipkainikkut Uqaqatigivikhat:

Hillary Casey
Tuhaqtakhanut Titiraqtit
Havagvia Hivuliqti Quassa
Nunavut Kavamanga
867-975-5059
hcasey@gov.nu.ca

Charlotte Digness
Tuhaqtidjutikhanut Tuhagakhanullu Tutqikhaiyi
Ministat Katimayiit Tuhagakhanut Maliktakhanullu
Nunattiami Kavamanga
867-767-9140 hivayarvia 11092
charlotte_digness@gov.nt.ca

Sunny Patch
Aulapkaiyi, Tuhagakhanut
Havagvia Hivuliqtiup
Yukon Kavamanga
867-393-7478
sunny.patch@gov.yk.ca