Hivuliqti Quassa nuittitiniaqtuq Turaaqtavut

Qiqaiyarviani 20, 2018

IQALUIT, Nunavut (Qiqaiyalirvia 20, 2018) - Hivuliqti Paul Quassa katimadjutikhanut iliuraiyut Kavamangat Nunavutim pinahuaqtainik hitamani ukiuni Nunavutim Maligaliurviani ublumi.Turaaqtavut – aullanikhaqqut turaaqtakhaptingnut – ihuaqhaqhimayut tallimat hivulliutiyakhat, hivuniuqhugit Inuit Qaujimajatuqangiit ukuallu Inuit Ukpiriyait Pitquhikkut.

"Maligaliuqatitkalu havaktugut pinahuaqtakhaptingnik ihumagiplugit hivulliutiyumait Nunavunmiut, naunaiglugulu takuyumayainik Nunavunmi takuyumayaptingnik aviktuqhimaniani kavamaptingnilu," uqaqtuq Hivuliqti Quassa. "Ilitariyavut havaktauyukhat, quyagiplugillu hivuliqtiuvakhimayut iniqtiqpaktainiglu. Akhuuqhimmarniaqtugut takuyumayaptingnik, uuktuqhimmarlutallu ihuaqhautikhanik inuuhikhaniklu tamarmik Nunavunmiut."

Turaaqtavut hanaqihimayut Nunavutim hivulliutiyakhainik ukiungini 2018-2021:

  • Havauhikhavut inuuhirittiarnikkut inmikkuliringainillu inuutivut nunallavullu Inuusivut.
  • Pivalliadjutikhanut aulapkaidjutikhaptingnik maniliurutikhaniglu ikayuutauyut ihuaqtumik hivunikhanut inuutipta, nunallaavullu, nunakpullu talvunga Pivaallirutivut.
  • Iliharvikhainuglu ayuiqavikhainiglu hanaiyautikhanginik nutaqqat, inulramiit inirnirillu ihuaqtunik ikayuutikhainik inuuhirmingnut ihuaqtuniglu havaakhainik talvuuna Sivummuaqpalliajjutivut.
  • Hakugikhivalliayangani Nunavut naunaittumiklu avikturnianik Kanatami nunaryuamillu talvuuna Inuunivut.
  • Havaqatigiikhuta tikinnahuarutikhanik pinahuaqtavut piyumayainiglu Nunavunmiut talvuuna Katujjiqatigiinnivut.

Tamaita kavamatkut atuliqtakhainik parnautit pivallianik, qanuriliurutinik unniudjutit hailiyauvangniaqtut 5th Maligaliurviani Nunavut.

"Hivulliuqtauyut tamangnik pitquhivut qaujimajatuqangit nutaaniklu atuqtauyunik, hivunikhaliurutikhat tunngaviqaqtut uqauhivut, ukpirriyauyunik ilitquhivullupiniaqtugut nutaamik akhuurutikhaptingnik, nutaanik ihuaqhautikhanik imatullu nutaanik ikayuutikhanginik inuutivut, Nunakput hivunikhaqqullu," uqaqtuq Hivuliqti Quassa.

Turaaqtavut hailiyuq qaritauyakkurutaani talvani www.gov.nu.ca.

###

Tuhaqtipkainikkut Uqaqatigivikhat:

Hillary Casey
Tuhaqtakhanut Titiraqtit
Havagvianit Hivuliqti Quassa
(867) 975-5059
hcasey@gov.nu.ca