ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂᑦ ᓯᕗᓕᖅᑏᑦ ᑲᑎᑦᑐᑦ ᐅᖃᖃᑎᖃᕐᓂᕐᒧᑦ ᐅᑭᐅᖅᑕᖅᑐᒥᑦ ᐊᑐᐊᒐᕐᒥᑦ

ᔮᓐᓄᐊᕆ 27, 2017

ᓯᕗᓕᖅᑏᑦ ᔫᑳᓐᒥᑦ, ᓄᓇᑦᓯᐊᕐᒥᑦ, ᓄᓇᕗᒻᒥᓪᓗ ᑲᑎᓚᐅᖅᑐᑦ ᕚᓐᑰᕙᒥᑦ ᑕᕝᕙᓂ ᐱᓇᓱᐊᕈᒥᐅᑉ ᐃᓗᐊᓂ ᐅᖃᖃᑎᖃᕐᓂᕐᒥᑦ ᐅᑭᐅᖅᑕᖅᑐᒥᑦ ᐊᑐᐊᒐᕐᒥᑦ ᐅᑭᐅᖅᑕᖅᑐᒥᓪᓗ ᓯᕗᓪᓕᐅᔾᔭᐅᔭᕆᐊᓕᓐᓂᑦ, ᐃᓚᒋᔭᐅᑦᓱᑎᒃ ᐊᐅᓚᐃᓐᓇᑎᑦᓯᓂᕐᒧᑦ. ᓯᕗᓕᖅᑏᑦ ᓇᓗᓇᐃᖅᓯᑲᓐᓂᓚᐅᖅᑐᑦ ᐃᑲᔪᖅᑐᕐᓂᖏᓐᓂᑦ ᐅᔭᕋᓐᓂᐊᕐᓂᕐᒥᑦ, ᐊᖏᖅᓯᒪᓂᖏᓐᓂᓪᓗ ᓴᙱᔪᒥᑦ, ᑕᒫᓃᖏᓐᓇᕈᓐᓇᖅᑐᓂᑦ ᐱᕈᖅᐸᓪᓕᐊᓂᐅᔪᓂᑦ ᐅᑭᐅᖅᑕᖅᑐᒥᑦ.

ᓯᕗᓕᖅᑏᑦ ᐅᖃᐅᓯᖃᓚᐅᕐᒥᔪᑦ ᐱᕙᒌᔭᕐᓂᕐᒥᑦ ᐱᓕᕆᖃᑎᒌᓐᓂᕐᒥᑦ ᐅᑭᐅᖅᑕᖅᑐᒥᑦ ᑕᐅᑐᙳᐊᖅᑕᐅᔪᒥᑦ ᐱᕈᖅᐸᓪᓕᐊᖏᓐᓇᓂᕐᒥᑦ ᐱᕙᓪᓕᐊᑎᑦᓯᓂᕐᒥᓪᓗ. ᒐᕙᒪᒃᑯᑦ ᓄᓇᑦᓯᐊᕐᒥᑦ ᓯᕗᓕᖅᑎᐅᓂᐊᖅᑐᑦ ᐱᕙᓪᓕᐊᑎᑦᓯᓂᕐᒥᑦ ᑲᔪᓯᖏᓐᓇᕈᓐᓇᖅᑐᓄᑦ ᐱᕙᓪᓕᐊᑎᑦᓯᓂᕐᒧᑦ ᖃᓄᐃᓕᐅᖅᐸᓪᓕᐊᓂᕐᒧᑦ ᐃᑲᔪᕐᓂᐊᖅᑐᒥᑦ ᓇᓗᓇᐃᖅᓯᓂᕐᒥᑦ ᐅᑭᐅᖅᑕᖅᑐᒥᐅᑦ ᓴᙱᔪᒥᑦ, ᓂᐱᖃᑦᓯᐊᖅᓗᑎᒃ ᐅᖃᖃᑎᒌᓐᓇᓂᕐᒧᑦ ᓯᕗᓂᑦᓴᖓᑕ ᐅᑭᐅᖅᑕᖅᑑᑉ ᐱᓕᕆᐊᖃᕐᓂᕐᒥᓪᓗ ᐋᖅᑭᑦᓱᐃᓂᕐᒥᑦ ᐃᓱᒪᓕᐅᕈᑕᐅᔪᓂᑦ ᐊᑦᑐᐊᓂᓕᓐᓂᑦ ᐅᑭᐅᖅᑕᖅᑐᒥᑦ ᐃᓄᖏᓐᓂᓪᓗ.

ᓯᕗᓕᖅᑏᑦ ᑲᑐᔾᔨᖃᑎᖃᖃᑦᑕᕐᓂᕐᒥᑦ, ᐱᓕᕆᖃᑎᖃᕐᓂᕐᒥᓪᓗ ᓄᓇᖃᖅᑳᖅᑐᓂᑦ ᐃᓄᓐᓂᑦ ᓄᓇᖁᑎᖏᓐᓂᑦ, ᓴᖅᑭᑎᑦᓯᓂᕐᒥᑦ ᐱᒻᒪᕆᐅᒋᔭᐅᒐᔪᑦᑐᓂᑦ ᐊᑐᐊᒐᐃᓪᓗ ᐱᕙᓪᓕᐊᑎᑦᓯᓂᕐᒧᑦ ᖃᐅᔨᒪᔾᔪᑎᒋᔭᐅᓂᐊᖅᑐᓂᒃ ᓄᑖᒥᑦ ᐅᑭᐅᖅᑕᖅᑐᒥᑦ ᐊᑐᐊᒐᕐᒧᑦ.

ᐅᖃᐅᓯᐅᔪᑦ

“ᖁᕕᐊᓱᑦᑐᖓ ᑲᑎᖃᑎᖃᕆᐊᒥᑦ ᐊᕕᑦᓱᖅᓯᒪᔪᓂᑦ ᐱᓕᕆᔨᐅᖃᑎᓐᓂᑦ ᐅᖃᖃᑎᖃᕐᓂᕐᒥᑦ ᓯᕗᓪᓕᐅᔾᔨᒋᐊᓕᑦᑎᓐᓂᑦ. ᐊᖏᖅᓯᒪᓂᖃᖅᑐᖓ ᓇᓗᓇᐃᖅᓯᓂᕐᒥᑦ ᑕᑯᓐᓇᕐᓂᖏᑦ ᔫᑳᓐᒥᐅᑦ ᐃᓚᐅᑎᑕᐅᒐᓗᐊᕐᒪᖔᑕ ᒐᕙᒪᑐᖃᒃᑯᑦ ᐅᑭᐅᖅᑕᖅᑐᒥᑦ ᐊᑐᐊᒐᕐᓂᑦ ᐱᓕᕆᐊᖏᓐᓂᑦ ᓴᖅᑭᑎᑦᓯᓂᕐᒥᓪᓗ ᐅᑭᐅᖅᑕᖅᑐᒥ ᐋᖅᑭᒋᐊᕆᓂᕐᒥᑦ ᐃᓱᒫᓘᑎᒋᔭᐅᔪᓂᑦ ᐅᑭᐅᖅᑕᖅᑐᒥᐅᓄᑦ.”

–ᔫᑳᓐᒥ ᓯᕗᓕᖅᑎ ᓵᓐᑎ ᓯᐅᕗ

“ᐃᓱᒪᓕᐅᕈᑕᐅᔪᑦ ᐅᑭᐅᖅᑕᖅᑑᑉ ᒥᑦᓵᓄᑦ ᐅᑭᐅᖅᑕᖅᑐᒥᐅᓄᑦ ᐃᓱᒪᓕᐅᕈᑕᐅᒋᐊᓖᑦ. ᒪᓂᑐᐃᓐᓇᑦᔮᖏᑦᑐᒍᑦ ᐊᓯᖏᓐᓄᑦ ᒐᕙᒪᐅᔪᓄᑦ ᓄᓇᓕᕐᔪᐊᓄᓪᓘᓐᓃᑦ ᖃᓄᐃᓕᐅᖁᔨᓂᖏᓐᓂᑦ ᖃᖓᓗ ᐅᑭᐅᖅᑕᖅᑐᖅ ᓴᖅᑭᖅᑎᑕᐅᔪᓐᓇᕐᒪᖔᑦ. ᐊᕐᕌᒍᒐᓴᓐᓄᑦ ᒫᓂᒥᐅᑕᐅᓯᒪᓕᖅᑐᒍᑦ ᐃᑲᔪᖅᑐᕈᓐᓇᖅᓱᑕᓗ ᓴᖅᑭᑎᑦᓯᓂᕐᒥᑦ ᓴᙱᔪᒥᑦ ᑲᔪᓯᖏᓐᓇᕈᓐᓇᖅᑐᓄᓪᓗ ᓯᕗᓂᑦᓴᕐᒥᑦ ᒪᓕᓪᓗᒋᑦ ᐅᑭᐅᖅᑕᖅᑐᒥᑦ ᓯᕗᓪᓕᐅᔾᔨᓂᕐᒧᑦ ᐱᒻᒪᕆᐅᒋᔭᖏᓐᓄᓪᓗ. ᐅᑭᐅᖅᑕᖅᑐᒥᑦ ᑕᐅᑐᑦᑕᖓ ᐱᕈᖅᑎᑦᓯᓂᕐᒥᑦ ᑲᔪᓯᖏᓐᓇᖁᔨᓂᕐᒥᓪᓗ ᑐᙵᕕᒋᓗᒋᑦ ᐊᑐᐊᒐᖃᑎᖃᕐᓂᕐᒥᑦ ᐱᒻᒪᕆᐅᓂᐊᖅᑐᖅ ᓇᓗᓇᐃᖅᓯᓂᕐᒥᑦ ᐅᑭᐅᖅᑕᖅᑐᒥᐅᑦ ᐱᔪᓐᓇᕐᓂᖏᓐᓄᑦ ᑲᒪᒋᔭᖃᕐᓂᕐᒥᑦ ᐅᑭᐅᖅᑕᖅᑐᒧᑦ ᐃᓱᒪᓕᐅᕈᑕᐅᔪᓄᑦ.”

–ᓄᓇᑦᓯᐊᕐᒥᑦ ᓯᕗᓕᖅᑎ ᕚᑉ ᒪᒃᓚᐅᑦ

“ᐱᒻᒪᕆᐅᕗᖅ ᖃᓄᐃᑦᑐᑐᐃᓐᓇᖅ ᓄᑖᖅ ᐊᑐᐊᒐᕐᒥᑦ ᐋᖅᑭᑦᓯᒪᓂᐅᒐᔭᖅᑐᓂᑦ ᐅᖃᐅᓯᖃᓗᐊᖅᑐᒥᑦ ᐅᑭᐅᖅᑕᖅᑐᒥᑦ ᐃᓚᒋᔭᐅᑎᑦᓯᒋᐊᓕ ᐅᖃᕈᓐᓇᖅᑎᑕᐅᓂᕐᒥᓪᓗ ᐅᑭᐅᖅᑕᖅᑐᒥᐅᓂᑦ ᐱᖓᓱᐃᓪᓗ ᐊᕕᑦᑐᖅᓯᒪᔪᓂᑦ ᒐᕙᒪᐅᔪᓂᑦ. ᑲᑎᒪᓂᕗᑦ ᓇᓗᓇᐃᖅᓯᑲᓐᓂᕐᓂᐅᕗᖅ ᐅᖃᒃᑲᓐᓂᓚᐅᕆᓪᓗᓂᓗ.”

–ᓄᓇᕗᒻᒥᑦ ᓯᕗᓕᖅᑎ ᐲᑕ ᑕᑉᑑᓇ

ᖃᐅᔨᒋᐊᕐᕕᐅᔪᓐᓇᖅᑐᑦ:

ᓴᓂ ᐹᑦᔅ
ᒪᓕᒐᓕᐅᕐᕕᒻᒥᑦ ᑐᓴᐅᒪᖃᑦᑕᐅᑎᓕᕆᓂᕐᒧᑦ
ᒐᕙᒪᒃᑯᑦ ᔫᑳᓐᒥᑦ
867-332-0362
sunny.patch@gov.yk.ca

ᐋᓐᑐᕉ ᓕᕕᖕᓯᑕᓐ
ᒪᓕᒐᓕᐅᕐᕕᒻᒥᑦ ᑐᓴᐅᒪᖃᑦᑕᐅᑎᓕᕆᓂᕐᒧᑦ ᐅᖃᐅᔾᔨᒋᐊᖅᑎᒻᒪᕆᒃ
ᒐᕙᒪᒃᑯᑦ ᓄᓇᑦᓯᐊᕐᒥᑦ
867-767-9140 ᓇᕿᒃᑲᓐᓂᕐᓗᒍ 11091
Andrew_livingstone@gov.nt.ca

ᔭᔅᒦᓇ ᐱᐸ
ᑐᓴᐅᒪᖃᑦᑕᐅᑎᓕᕆᕕᒃ
ᒐᕙᒪᒃᑯᑦ ᓄᓇᕗᒻᒥᑦ
867-975-5059
ypepa@gov.nu.ca